ഗവ വി വി എച്ച് എസ് എസ് , കോടംതുരുത്ത്/നാടോടി വിജ്ഞാനകോശം

.പേരിൻറെ ചരിത്രം -കോടംതുരുത്ത്

കോടം തുരുത്തിൻറെകിടപ്പ് വളഞ്ഞും പുളഞ്ഞുമാണ് .ഈ പ്രത്യേകതയെ 'കോടിയ'എന്ന വാക്കുപയോഗിച്ചാണ് വ്യവഹരിച്ചു പോന്നത് .

വേമ്പനാട്ട് കായലിൻറെ ഉപശാഖയായ ഉളവയ്പ്പ് കായലിൻറെയും പടിഞ്ഞാറ് കുറുമ്പിക്കായലിൻറെയും വല്ലേത്തോട്,പൊഴിത്തോട് ,കരേത്തോട് ,തയ്യിൽത്തോട് തുടങ്ങിയവയുടെ ഉള്ളിലേയ്ക്ക് വളഞ്ഞുംപുളഞ്ഞും കയറിക്കിടക്കുന്ന ഭൂപ്രദേശമായത്തിനാൽ ഇതിനെ കോടിയതുരുത്ത് എന്നാണ് ഈ നാടിനെ പഴമക്കാർ വിളിച്ചിരുന്നത് .ഈ പേര് പിന്നീട് കോടംതുരുത്ത് ആയി മാറുകയാണുണ്ടായത് എന്നു പറയപ്പെടുന്നു .

കൂടാതെ മറ്റൊരു ചരിത്രവും പറയപ്പെടുന്നുണ്ട് .പണ്ടുകാലത്ത് എട്ടുവീട്ടിൽ കർത്താക്കന്മാരുടെ വീടുകളിലേയ്ക്ക് തയ്യിൽ തോട് വഴി ആഴ്വാഞ്ചേരി തമ്പ്രാക്കൾ എത്തിയിരുന്നു .പള്ളിയോടങ്ങളിലായിരുന്നു ഇവരുടെ സഞ്ചാരം .അങ്ങനെ പള്ളിയോടങ്ങളിൽ വന്നിരുന്നതിനാൽ ഓടം തുരുത്ത് എന്നറിയപ്പെടുകയും പിന്നീടത് കോടംതുരുത്ത് ആയി മാറുകയും ചെയ്തു എന്നു പറയപ്പെടുന്നു .

കരപ്പുറം എന്ന പേരിലാണ് ചേർത്തല താലൂക്ക് അറിയപ്പെട്ടിരുന്നത് .മൂത്തേടത്ത് ,ഇളയേടത്ത്എന്ന രണ്ടു നാടുകൾ ഇവിടെ ഉണ്ടായിരുന്നു .ഇതിൽ മുട്ടം കേന്ദ്രമാക്കി ഭരിച്ചിരുന്ന മൂത്ത കൈമളിൻറെ നാട്ടുരാജ്യത്തിലാണ് ഈ പ്രദേശം ഉൾപ്പെട്ടിരുന്നത്

ചരിത്ര സ്മാരകങ്ങൾ

തിരുവിതാംകൂർ- കൊച്ചി നാട്ടുരാജ്യങ്ങളുടെ അതിർത്തി ഗ്രാമത്തെ സൂചിപ്പിക്കുന്ന ചൌക്ക (ചെക്ക് പോസ്റ്റ് )ഇവിടെയായിരുന്നു .രാജഭരണത്തിൻറെ ബാക്കി പത്രമായി ഇന്നത് ജീർണാവസ്ഥയിൽ കുത്തിയതോട് മാർക്കറ്റിൻറെഅടുത്ത് ഇപ്പൊഴും കാണപ്പെടുന്നു .

രാജഭരണത്തിൻറെ സ്മരണകളെ ഉണർത്തുന്ന അതിർത്തിശില (തിരുവിതാംകൂർ -കൊച്ചി )7ആം വാർഡിൽ ഇപ്പൊഴും ഉണ്ട് .

രാജഭരണകാലത്ത് അലഞ്ഞു തിരിഞ്ഞു നടക്കുന്ന മൃഗങ്ങളെ പിടിച്ച് കെട്ടുന്നതിനായി സ്ഥാപിച്ച പൌണ്ട് എന്ന കെട്ടിടത്തിൻറെ അവശിഷ്ടങ്ങൾ കാണാം .