പ്രവേശനോത്സവം

ഞങ്ങളുടെ സ്കൂളിലെ പ്രവേശനോത്സവം ആഘോഷപൂർവം നടത്തി. തൃശൂർ കൗൺസിലർ ശ്രീമതി ലാലി ജെയിംസ് പരിപാടി ഉദ്ഘാടനം ചെയ്തു. പ്രധാനാധ്യാപിക ശ്രീമതി ബേബി ടി. ജെ. സ്വാഗതപ്രസംഗം നടത്തി. മാനേജർ ഫാ. ജോസ് ചാലിക്കൽ അനുഗ്രഹപ്രഭാഷണം നൽകി. ചടങ്ങിന്റെ ഭാഗമായി അധ്യാപകർ വിജ്ഞാനദീപം തെളിയിച്ച് വിദ്യാർത്ഥികൾക്ക് കൈമാറി. കൂടാതെ, നമ്മുടെ സ്കൂളിലെ വിദ്യാർത്ഥികൾ തയ്യാറാക്കിയ "ഒഴിവിലെ മിഴിവ്" എന്ന പുസ്തകത്തിന്റെ സമർപ്പണവും പ്രകാശനവും നടത്തി. പി.ടി.എ. പ്രസിഡന്റ് ശ്രീ രാജീവ് വിദ്യാർത്ഥികൾക്ക് പഠനോപകരണങ്ങൾ വിതരണം ചെയ്തു. പാർവതി ടീച്ചർ നന്ദിപ്രസംഗം നടത്തി. വിദ്യാർത്ഥികളുടെയും രക്ഷിതാക്കളുടെയും സാന്നിധ്യത്തിൽ പരിപാടി ഭംഗിയായി നടന്നു.

ലോക പരിസ്ഥിതി ദിനാചരണം

ഞങ്ങളുടെ സ്കൂളിൽ ലോക പരിസ്ഥിതി ദിനം വിവിധ പരിപാടികളോടെ ആഘോഷിച്ചു. പരിപാടിയുടെ ഉദ്ഘാടനം കൗൺസിലർ ശ്രീമതി ലാലി ജെയിംസ് നിർവഹിച്ചു. കൃഷി ഓഫീസറും ഹെഡ്മിസ്ട്രസ് ബേബി ടീച്ചറും പരിസ്ഥിതി ദിന സന്ദേശം നൽകി. പ്രകൃതി സംരക്ഷണത്തിന്റെ പ്രാധാന്യത്തെക്കുറിച്ചും പരിസ്ഥിതി സംരക്ഷണത്തിൽ വിദ്യാർത്ഥികളുടെ പങ്കിനെക്കുറിച്ചും അവർ സംസാരിച്ചു.

പരിസ്ഥിതി ദിനത്തോടനുബന്ധിച്ച് പോസ്റ്റർ നിർമ്മാണ മത്സരം സംഘടിപ്പിച്ചു. കൂടാതെ പരിസ്ഥിതി ബോധവൽക്കരണ ക്യാമ്പയിനും നടത്തി. വിദ്യാർത്ഥികൾ പരസ്പരം ചെടികൾ കൈമാറുന്ന പരിപാടി സംഘടിപ്പിക്കുകയും സ്കൂൾ മുറ്റത്ത് നിരവധി വൃക്ഷത്തൈകൾ നട്ടുപിടിപ്പിക്കുകയും ചെയ്തു. സ്കൂളിൽ ഒരു ചെണ്ടുമല്ലി പൂന്തോട്ടം നിർമ്മിക്കാൻ തീരുമാനിക്കുകയും അതിനുള്ള പ്രവർത്തനങ്ങൾ ആരംഭിക്കുകയും ചെയ്തു.

ഈ പരിപാടികൾ വിദ്യാർത്ഥികളിൽ പരിസ്ഥിതി സംരക്ഷണത്തെക്കുറിച്ചുള്ള അവബോധവും ഉത്തരവാദിത്വബോധവും വളർത്താൻ സഹായിച്ചു.

ചെണ്ടുമല്ലി പൂന്തോട്ടം

ഹരിത ക്ലബ്ബിന്റെ ആഭിമുഖ്യത്തിൽ ഞങ്ങളുടെ സ്കൂളിൽ ചെണ്ടുമല്ലി പൂന്തോട്ട പദ്ധതി നടപ്പിലാക്കി. പദ്ധതിയുടെ ഉദ്ഘാടനം കൗൺസിലർ ശ്രീമതി ലാലി ജെയിംസ് നിർവഹിച്ചു. വിദ്യാർത്ഥികളും അധ്യാപകരും പദ്ധതിയിൽ സജീവ പങ്കാളിത്തവും താത്പര്യവും പ്രകടിപ്പിച്ചു.

കൃഷി ഓഫീസറുടെ നിർദേശപ്രകാരം ചെടികൾക്ക് ആവശ്യമായ വളവും പരിപാലനവും നൽകി. വിദ്യാർത്ഥികൾ ചെടികളുടെ സംരക്ഷണത്തിലും പരിപാലന പ്രവർത്തനങ്ങളിലും സജീവമായി പങ്കെടുത്തു. സ്കൂൾ പരിസരം കൂടുതൽ മനോഹരവും പ്രകൃതി സൗഹൃദവുമാക്കുക എന്ന ലക്ഷ്യത്തോടെയാണ് ഈ പദ്ധതി നടപ്പിലാക്കിയത്.

ചെണ്ടുമല്ലി പൂന്തോട്ടം വിദ്യാർത്ഥികളിൽ കൃഷിയോടും പരിസ്ഥിതി സംരക്ഷണത്തോടും ഉള്ള താത്പര്യം വർധിപ്പിക്കാൻ സഹായകമായി.