ഗവ എച്ച് എസ് എസ് പീച്ചി/പ്രവർത്തനങ്ങൾ/2026-27
വിജയങ്ങളെ ആഘോഷിച്ച്... പുതുമുഖങ്ങളെ ഹൃദയപൂർവ്വം സ്വാഗതം ചെയ്ത്... പ്രവേശനോത്സവം – വിജയോത്സവം 2026–27
പീച്ചി ഗവൺമെന്റ് ഹയർ സെക്കൻഡറി സ്കൂളിലെ പ്രവേശനോത്സവം വിപുലമായി ആഘോഷിച്ചു. ബഹുമാനപ്പെട്ട ബ്ലോക്ക് പഞ്ചായത്ത് വൈസ് പ്രസിഡന്റ് ശ്രീ മാത്യു നൈനാൻ പ്രവേശനോത്സവം ഉദ്ഘാടനം ചെയ്തു. ഫുൾ എ പ്ലസും ഉന്നത വിജയവും നേടിയ പ്ലസ് ടു, എസ്.എസ്.എൽ.സി വിജയികൾക്ക് അനുമോദനവും പുരസ്കാര വിതരണവും അദ്ദേഹം നടത്തി. ജില്ലാ പഞ്ചായത്ത് ഡിവിഷൻ മെമ്പർ ശ്രീ പി. എസ്. വിനയൻ, പീച്ചി പോലീസ് സ്റ്റേഷൻ എസ്.എച്ച്.ഒ ശ്രീ അമർ അലി എന്നിവർ മുഖ്യാതിഥികളായിരുന്നു. മുതിർന്ന മാധ്യമ പ്രവർത്തകനായിരുന്ന ശ്രീ ജോർജ് പൊടിപ്പാറ മുഖ്യപ്രഭാഷണം നടത്തി.
ക്ഷേമകാര്യ സ്റ്റാൻഡിങ് കമ്മിറ്റി ചെയർമാൻ ശ്രീ വിനോദ് തേനംപറമ്പിൽ, വാർഡ് മെമ്പർമാരായ ശ്രീമതി സന്ധ്യ ഷാജി, സ്വപ്ന രാധാകൃഷ്ണൻ, ആര്യ ശരത്ത്, മുൻ വാർഡ് മെമ്പർ ശ്രീ ബാബു തോമസ്, വികസന സമിതി ചെയർമാൻ മുബീന നസീർ, വികസന സമിതി കൺവീനർ ഷിബു പോൾ, പി.ടി.എ പ്രസിഡന്റ് ശ്രീ രാജേഷ് ഐ. ജി., എം.പി.ടി.എ പ്രസിഡന്റ് ശ്രീമതി ലിന്റാ ബിനോയ്, ഫാദർ ജോർജ് കണ്ണമ്പുഴ, ഒ.എസ്.എ പ്രസിഡന്റ് ശ്രീ സിജു എം. ജെ. എന്നിവർ ആശംസകൾ അറിയിച്ച് സംസാരിച്ചു. പ്രിൻസിപ്പാൾ ശ്രീ ഗിരീശൻ എ ചടങ്ങിന് സ്വാഗതം ആശംസിച്ചു. എച്ച്.എം ഇൻചാർജ് ശ്രീമതി ഷർമിള എം.സി നന്ദി രേഖപ്പെടുത്തി. എസ്.ആർ.ജി കൺവീനർ ശ്രീമതി സജിത എം. പി. സൈബർ സേഫ്റ്റി പ്രതിജ്ഞ ചൊല്ലിക്കൊടുത്തു.
പ്രസ്തുത ചടങ്ങിൽ ജില്ലാ കളക്ടർ അർജുൻ പാണ്ഡ്യൻ അനുവദിച്ച സ്പോർട്സ് കിറ്റിന്റെ വിതരണോദ്ഘാടനവും ഒ.എസ്.എ നൽകിയ പഠനോപകരണങ്ങളുടെ വിതരണവും നടത്തി. ചടങ്ങിൽ വിദ്യാർത്ഥികളുടെ കലാപരിപാടികളും അരങ്ങേറി. പുതുതായി സ്കൂളിലെത്തിയ വിദ്യാർത്ഥികളെ പൂക്കളും മധുരപലഹാരങ്ങളും നൽകി സ്നേഹപൂർവ്വം സ്വീകരിച്ചു. പുതിയ അധ്യയന വർഷത്തെ ആത്മവിശ്വാസത്തോടെയും ഉത്സാഹത്തോടെയും വരവേൽക്കാൻ വിദ്യാർത്ഥികൾക്ക് പ്രചോദനമാകുന്ന സന്ദേശങ്ങൾ അതിഥികൾ പങ്കുവെച്ചു. വിദ്യാഭ്യാസ മികവും സഹപാഠ്യ പ്രവർത്തനങ്ങളിലെ നേട്ടങ്ങളും കൈവരിക്കാൻ വിദ്യാർത്ഥികൾ പരിശ്രമിക്കണമെന്ന് അവർ ആഹ്വാനം ചെയ്തു. പുതുതായി പ്രവേശനം നേടിയ വിദ്യാർത്ഥികൾക്കും രക്ഷിതാക്കൾക്കും സ്കൂളിന്റെ പ്രവർത്തനങ്ങൾ, സൗകര്യങ്ങൾ, അക്കാദമിക് പദ്ധതികൾ എന്നിവ പരിചയപ്പെടുത്തി.
പി.ടി.എ, എസ്.എം.സി, എം.പി.ടി.എ, ഒ.എസ്.എ പ്രതിനിധികൾ, രക്ഷിതാക്കൾ, അധ്യാപകർ, വിദ്യാർത്ഥികൾ എന്നിവർ ചടങ്ങിൽ പങ്കെടുത്തു. പുതുവർഷത്തെ പ്രതീക്ഷകളും സ്വപ്നങ്ങളുമായി വിദ്യാർത്ഥികൾക്ക് ആവേശകരമായ തുടക്കം കുറിച്ച പ്രവേശനോത്സവം ശ്രദ്ധേയമായി.
ലഹരിക്കെതിരെ ഒരു കിക്ക്, ആരോഗ്യകരമായ ജീവിതത്തിലേക്ക് ഒരു ചുവടുവെപ്പ്
പീച്ചി ഗവൺമെന്റ് ഹയർ സെക്കൻഡറി സ്കൂളിൽ ലഹരിവിരുദ്ധ ബോധവൽക്കരണ പ്രവർത്തനങ്ങളുടെ ഭാഗമായി 2026 ജൂൺ 11 വ്യാഴാഴ്ച ഉച്ചയ്ക്ക് 2 മണിക്ക് ഫുട്ബോൾ ഷൂട്ടൗട്ട് സംഘടിപ്പിച്ചു. വാർഡ് മെമ്പർ ശ്രീമതി സന്ധ്യ ഷാജി പരിപാടി ഉദ്ഘാടനം ചെയ്തു. പി.ടി.എ പ്രസിഡന്റ് ശ്രീ രാജേഷ് ഐ.ജി അധ്യക്ഷത വഹിച്ചു. എച്ച്.എം ഇൻചാർജ് ശ്രീമതി ഷർമിള എം.സി സ്വാഗതം ആശംസിച്ചു.
വിദ്യാർത്ഥികളിൽ ലഹരിവിരുദ്ധ സന്ദേശം ശക്തമായി എത്തിക്കുന്നതിനും ആരോഗ്യകരമായ ജീവിതശൈലി പ്രോത്സാഹിപ്പിക്കുന്നതിനുമായി “ലഹരിക്കെതിരെ ഒരു കിക്ക്” എന്ന സന്ദേശമുയർത്തിയാണ് പരിപാടി സംഘടിപ്പിച്ചത്. ഫുട്ബോൾ എന്ന ജനപ്രിയ കായിക ഇനത്തെ ബോധവൽക്കരണത്തിനുള്ള ഫലപ്രദമായ മാധ്യമമാക്കി മാറ്റാൻ പരിപാടിക്ക് സാധിച്ചു. വിദ്യാർത്ഥികൾ ആവേശപൂർവം പങ്കെടുത്ത ഷൂട്ടൗട്ടിൽ മികച്ച പ്രകടനം കാഴ്ചവെച്ചവരെ അഭിനന്ദിക്കുകയും ചെയ്തു.
പരിപാടിയോടനുബന്ധിച്ച് ലഹരി ഉപയോഗത്തിന്റെ ദൂഷ്യഫലങ്ങളെക്കുറിച്ചും കായിക-സാംസ്കാരിക പ്രവർത്തനങ്ങളിൽ സജീവമായി പങ്കെടുക്കുന്നതിന്റെ പ്രാധാന്യത്തെക്കുറിച്ചും ബോധവൽക്കരണം നടത്തി. അധ്യാപകരും വിദ്യാർത്ഥികളും ഒരുമിച്ച് പങ്കാളികളായ പരിപാടി ലഹരിമുക്ത സമൂഹ നിർമ്മാണത്തിന്റെ സന്ദേശം ശക്തമായി പ്രചരിപ്പിച്ചു. സജിത ടീച്ചറും സജീന ടീച്ചറും പരിപാടികൾക്ക് നേതൃത്വം നൽകി. വിദ്യാർത്ഥികളിൽ കായികമനോഭാവവും സാമൂഹിക ഉത്തരവാദിത്വബോധവും വളർത്തുന്നതിനും ലഹരിവിരുദ്ധ സന്ദേശം സമൂഹത്തിലേക്ക് വ്യാപിപ്പിക്കുന്നതിനും പരിപാടി ശ്രദ്ധേയമായി.
വായനകളരിക്ക് തുടക്കം
പീച്ചി ഗവൺമെന്റ് ഹയർ സെക്കൻഡറി സ്കൂളിൽ മലയാള മനോരമ വായനകളരിയുടെ ഉദ്ഘാടനം ജൂൺ 19-ന് വായനാദിനത്തോടനുബന്ധിച്ച് നടന്നു. വിദ്യാർത്ഥികൾക്ക് പത്രം കൈമാറിക്കൊണ്ട് 2005 ഹ്യൂമാനിറ്റീസ് ബാച്ചിലെ പൂർവവിദ്യാർത്ഥികളായ റൈജോ തോമസ്, സിജിത്ത്, ശ്രീജ വി. ആർ എന്നിവർ പരിപാടി ഉദ്ഘാടനം ചെയ്തു.
വിദ്യാർത്ഥികളിൽ വായനാശീലം വളർത്തുന്നതിനും സമകാലിക സംഭവങ്ങളെക്കുറിച്ചുള്ള അവബോധം വർധിപ്പിക്കുന്നതിനുമായാണ് വായനകളരി ആരംഭിച്ചത്. ദിനംപ്രതി പത്രവായന നടത്തുന്നതിലൂടെ പൊതുവിജ്ഞാനവും ഭാഷാപരമായ കഴിവുകളും വികസിപ്പിക്കാൻ വിദ്യാർത്ഥികൾക്ക് അവസരം ലഭിക്കും.
ഹെഡ്മിസ്ട്രസ് ശ്രീമതി ബിന്ദു എം. ജോസ് അധ്യക്ഷത വഹിച്ച ചടങ്ങിൽ അധ്യാപകൻ സുനിൽ ടി. പി., മലയാള മനോരമ സർക്കുലേഷൻ എക്സിക്യൂട്ടീവ് അനിഷ് പി. എ., വി. എൻ. ഉഷ ടീച്ചർ എന്നിവർ സംസാരിച്ചു. വായനയുടെ പ്രാധാന്യത്തെക്കുറിച്ചും പത്രവായനയുടെ ഗുണങ്ങളെക്കുറിച്ചും അവർ വിദ്യാർത്ഥികളുമായി പങ്കുവെച്ചു.
അധ്യാപകരും വിദ്യാർത്ഥികളും പൂർവവിദ്യാർത്ഥികളും മലയാള മനോരമ പ്രതിനിധികളും പങ്കെടുത്ത ചടങ്ങിൽ വായനകളരിയുടെ പ്രവർത്തനങ്ങൾക്ക് തുടക്കമായി. വിദ്യാർത്ഥികളിൽ വായനാസംസ്കാരം വളർത്തുന്നതിനും അറിവിന്റെ പുതിയ ലോകം തുറന്നുകൊടുക്കുന്നതിനും ഈ സംരംഭം സഹായകരമാകുമെന്ന് പ്രത്യാശ പ്രകടിപ്പിച്ചു.
മനസ്സിനും ശരീരത്തിനും ആരോഗ്യം പകരാൻ യോഗദിനം
പീച്ചി ഗവൺമെന്റ് ഹയർ സെക്കൻഡറി സ്കൂളിൽ അന്താരാഷ്ട്ര യോഗദിനം വിവിധ പരിപാടികളോടെ ആചരിച്ചു. യോഗദിനത്തോടനുബന്ധിച്ച് പ്രത്യേക അസംബ്ലി സംഘടിപ്പിച്ചു.
അസംബ്ലിയിൽ ധന്യ ടീച്ചർ യോഗദിന സന്ദേശം നൽകി. ശാരീരികവും മാനസികവുമായ ആരോഗ്യം മെച്ചപ്പെടുത്തുന്നതിൽ യോഗയുടെ പ്രാധാന്യത്തെക്കുറിച്ചും ദിനചര്യയിൽ യോഗ ഉൾപ്പെടുത്തേണ്ടതിന്റെ ആവശ്യകതയെക്കുറിച്ചും വിദ്യാർത്ഥികൾക്ക് ബോധവൽക്കരണം നടത്തി.
തുടർന്ന് ശോഭ ടീച്ചറുടെ നേതൃത്വത്തിൽ വിദ്യാർത്ഥികളും അധ്യാപകരും ചേർന്ന് വിവിധ യോഗാസനങ്ങളും യോഗ വ്യായാമങ്ങളും പരിശീലിച്ചു. പരിപാടിയിൽ മുഴുവൻ വിദ്യാർത്ഥികളും അധ്യാപകരും സജീവമായി പങ്കാളികളായി.
യോഗയിലൂടെ ആരോഗ്യമുള്ള മനസ്സും ശരീരവും വളർത്തിയെടുക്കാമെന്ന സന്ദേശം പകർന്നുകൊണ്ട് പരിപാടികൾ സമാപിച്ചു.