ഹോളി ഫാമിലി എച്ച്. എസ്സ്. വേനപ്പാറ/എന്റെ ഗ്രാമം
ഞാന്‍ സ്നേഹിക്കുന്ന വേനപ്പാറ
വേനപ്പാറയെ ഇങ്ങനെ നിര്‍വചിക്കാം.മലനിരകളാല്‍ തഴുകപ്പെട്ട കുടിയേറ്റ ഭുമി.മലമടക്കുകളിലെ ഹരിതനിരകളില്‍നിന്നുയരുന്ന കാറ്റിനും മനുഷ്യാധ്വാനത്തിന്റെ സ്വേദഗന്ധം. അറബി വാണിജ്യവും,നാടുവാഴികളുടേയും മരക്കാര്‍മാരുടേയും ചതിയും യുദ്ധവും കഥകളായി നിറഞ്ഞ കോഴിക്കോട് നഗരത്തില്‍ നിന്നും 40 കിലോമീറ്റര്‍ അകലെ കിഴക്കന്‍ മലയോരത്ത് ഇരുവഞ്ഞിപ്പുഴയുടെ സമതലങ്ങഴളില്‍ തലയുയര്‍ത്തി ചരിഞ്ഞുകിടക്കുന്ന വേനപ്പാറ.അധ്വാനം ആത്മതാളമാക്കിയ ആദികുടിയേറ്റ ജനവിഭാഗവും അവരുടെ അനന്തര തലമുറകളും ഇവിടെ ജീവിക്കുന്നു.
വേനപ്പാറ ഇന്നലെ - ഒരു സ് മൃതി യാത്ര
കാട്ടുമൃഗങ്ങളോടും മലമ്പനിയോടും പട്ടിണിയോടും പടവെട്ടിയ കാലം. ഓമശ്ശേരിയില്‍ നിന്നും വേനപ്പാറയിലെത്താന്‍ കാട്ടിലൂടെയുള്ള ഊടുവഴിയായിരുന്നു ശരണം.ആനയുടെ ശല്ല്യം പൊതുവെ കുറവായിരുന്നെങ്കിലും കടുവകള്‍ ധാരാളമുണ്ടായിരുന്നു.മനുഷ്യരും വളര്‍ത്തുമൃഗങ്ങളും പലപ്പോഴും ഇവയുടെ ആക്രമണങ്ങള്‍ക്ക് വിധേയമായിട്ടുണ്ട്.വന്യജീവികളേക്കാള്‍ ആളുകള്‍ ഭയപ്പെട്ടിരുന്നത് മലമ്പനിയെയായിരുന്നു.കൃഷി ചെയ്യാന്‍ ധാരാളം ഭൂമി.കാടുവെട്ടിത്തെളിച്ചാല്‍ കിട്ടുന്ന കന്നിമണ്ണ്.ഏക്കറിന് 20 രൂപ പ്രകാരം ജന്മിമാരോട് ഭൂമി വാങ്ങി കൃഷി ചെയ്ത് കനകം വിളയിച്ച കുടിയേറ്റക്കാര്‍.അവരായിരുന്നു വേനപ്പാറയുടെ വികസനത്തിന് അടിത്തറ പാകിയവര്‍.
വേനപ്പാറയുടെ ഇന്നിന്റെ ചിത്രം
ഇന്നത്തെ വേനപ്പാറയുടെ ചിത്രത്തിന് കൂടുതല്‍ മിഴിവുണ്ട്.ഒരു കൂട്ടം കര്‍ഷകരുടെ കഠിനാധ്വാനത്തിന്റെ ഫലമായി പൊന്നു വിളയുന്ന ഭൂമി സൃഷ്ടിക്കാന്‍ സാധിച്ചു.കമുക്,തെങ്ങ്,റബര്‍ എന്നിവ കാര്‍ഷികമേഖലയുടെ നട്ടെല്ലാണ്.ജനങ്ങളില്‍ 80% കാര്‍ഷിക മേഖലയെ ആശ്രയിക്കുന്നു.മറ്റൊരു പ്രബല വിഭാഗം അധ്യാപനമേഖലയില്‍ പ്രവര്‍ത്തിക്കുന്നു.പിന്നൊരു വിഭാഗം കൂലിപ്പണിയില്‍ മുഴുകുന്നു. ഓമശ്ശേരി പഞ്ചായത്തിലെ നാല്,അഞ്ച് വാര്‍ഡുകളുകളുടെ പരിധിക്കുള്ളിലാണ് ഞങ്ങളുടെ ഈ ഗ്രാമം.വിനോദസഞ്ചാര കേന്ദ്രമായ തുഷാരഗിരിയിലേക്കുള്ള പാത ഗ്രാമത്തെ രണ്ടായി പകുത്ത് കടന്നുപോകുന്നു.ഹൈസ്കൂള്‍,യു.പി.സ്കൂള്‍,ക്രിസ്ത്യന്‍ ദേവാലയം,മുസ്ളീം പള്ളി എന്നിവയുടെ സാന്നിധ്യം ആത്മീയ,വിദ്യാഭ്യാസ മേഖലകളെ ധന്യമാക്കുന്നു.
ഗ്രാമക്കാഴ്ചകള്‍........
ഹോളി ഫാമിലി എച്ച്. എസ്സ്. വേനപ്പാറ/എന്റെ ഗ്രാമം/വേറിട്ട കാഴ്ചകള്‍