എസ്.കെ.വി./പ്രവേശനോത്സവം-വായിക്കുക

2017-18 വർഷത്തെ പ്രവേശനോത്സവം 01/06/2017 വ്യാഴാഴ്ച സ്കൂൾഹാളിൽ വച്ച് നടത്തപ്പെട്ടു. രാവിലെ 10.30 ന് അധ്യാപകരും രക്ഷിതാക്കളും മുതിർന്ന വിദ്യാർഥികളും ചേർന്ന് നവാഗതരായ കുട്ടികളെ സ്കൂൾ ഹാളിലേക്ക് ആനയിച്ചുകൊണ്ട് പരിപാടികൾക്ക് തുടക്കം കുറിച്ചു. പി.റ്റി.എ പ്രസിഡന്റ് ശ്രീ.കെ.എസ്. ബിജുവിന്റെ അധ്യക്ഷതയിൽ ചേർന്ന യോഗത്തിന് പ്രിൻസിപ്പാൾ ശ്രീമതി രാധാമണി ടീച്ചർ സ്വാഗതം ആശംസിച്ചു. പുതുതായി വന്നെത്തിയ വിദ്യാർഥികൾക്ക് സ്വാഗതമേകിക്കൊണ്ടും എസ്.എസ്.എൽ.സി. ,ഹയർ സെക്കണ്ടറി വിഭാഗങ്ങളിൽ മികച്ച വിജയം കരസ്ഥമാക്കിയതിൽ വിദ്യാർഥികളെയും അധ്യാപകരെയും അനുമോദിച്ചുകൊണ്ടും പി.റ്റി.എ. പ്രസിഡന്റ് സംസാരിച്ചു. വാർഡ് മെമ്പർ ശ്രീമതി . സുലഭ ഗോപാലകൃഷ്ണൻ ഉദ്ഘാടനം നിർ‍വഹിച്ച സമ്മേളനത്തിന് ശ്രീലക്ഷ്മിയും കൂട്ടുകാരും അവതരിപ്പിച്ച പ്രവേശനഗാനം മാറ്റു കൂട്ടി. ബഹു.വിദ്യാഭ്യാസമന്ത്രി ശ്രീ രവീന്ദ്രനാഥിന്റെ സന്ദേശം ശ്രീമതി റോസി വർഗീസ് വായിച്ച് അവതരിപ്പിച്ചു. കേരള ഗ്രാമീൺ ബാങ്ക് നീണ്ടൂർ ശാഖാ മാനേജർ ,മുൻ അധ്യാപകരായ ശ്രീമതി ഹേമലത ടീച്ചർ, ശ്രീമതി പൊന്നമ്മ ടീച്ചർ എന്നിവർ ആശംസകൾ അർപ്പിച്ച് സംസാരിച്ചു. നവാഗതർക്ക് പഠന ഉപകരണങ്ങളും എൽ.കെ.ജി., യു.കെ.ജി. വിദ്യാർഥികൾക്ക് കുടകളും എല്ലാ കുട്ടികൾക്കും മധുരപലഹാരങ്ങളും വിതരണം ചെയ്തു. ശ്രീമതി റോസി വർഗീസ് ടീച്ചറിന്റെ നന്ദി പ്രകാശനത്തോടെ 12 മണിക്ക് യോഗം സമംഗളം പര്യവസാനിച്ചു.