എ.എൽ.പി.എസ്.കീഴാറ്റൂർ/ഹരിതകേരളം
Date : 08 Dec 2016 പച്ചയിലൂടെ വൃത്തിയിലേക്ക് ഹരിതകേരളം
Chief Minister's Office,
ശുദ്ധജലവും ശുദ്ധവായുവും ജൈവകാര്‍ഷികോല്പന്നങ്ങളും സമൃദ്ധമായി കിട്ടുന്നയിടമാക്കി കേരളത്തെ വീണ്ടെടുക്കുവാനുള്ള ഒരു പരിശ്രമമാണ് ഹരിതകേരളം എന്ന ബൃഹദ്‌പദ്ധതി. 'Clean through green' (പച്ചയിലുടെ വൃത്തിയിലേക്ക്) എന്നതാണ് ഈ പദ്ധതി ഉയര്‍ത്തുന്ന മുദ്രാവാക്യം. ഹരിതകേരളം പദ്ധതിയുടെ കേരളത്തിലെ കുളങ്ങളും നദികളും കായലുകളും തടാകങ്ങളും എന്ന് വേണ്ട സമസ്ത ജലസ്രോതസുകളും ജലസംഭരണികളും മാലിന്യമുക്തമാക്കും. ഖരമാലിന്യം സംസ്കരിച്ച് ജൈവവളമുണ്ടാക്കി പച്ചക്കറിയടക്കമുള്ള വിളകള്‍ കൃഷി ചെയ്ത് ഒരു ഹരിതകേരളം സൃഷ്ടിക്കും.
ഒരു സംസ്ഥാനതല റ്റാസ്ക്‍ ഫോഴ്സ് ആയിരിക്കും ഈ ബൃഹദ്‌പദ്ധതിയുടെ നടത്തിപ്പും മേല്‍നോട്ടവും വഹിക്കുന്നത്. മുഖ്യമന്ത്രി അദ്ധ്യക്ഷനും തദ്ദേശ-ജലസേചനവകുപ്പ് മന്ത്രിമാര്‍ സഹാധ്യക്ഷരും ഒരു മുതിര്‍ന്ന ശാസ്ത്രജ്ഞന്‍ സാങ്കേതികോപദേഷ്ടാവുമായിരിക്കും. പരിസ്ഥിതിവകുപ്പിന്റെ പ്രിന്‍സിപ്പല്‍ സെക്രട്ടറി ഈ റ്റാസ്ക്‍ ഫോഴ്സിന്റെ മെമ്പര്‍ സെക്രട്ടറി ആയിരിക്കും. പ്രതിപക്ഷ നേതാവിനോട് ഈ സമിതിയില്‍ പ്രത്യേക ക്ഷണിതാവായിരിക്കുവാന്‍ അഭ്യര്‍ത്ഥിക്കും. റ്റാസ്ക്‍ ഫോഴ്സിന് ക്രിയാത്മക നിര്‍ദ്ദേശങ്ങള്‍ നല്‍കുവാന്‍ ശാസ്ത്രജ്ഞര്‍, വിദഗ്ദ്ധര്‍, സാമൂഹിക പ്രവര്‍ത്തകര്‍ തുടങ്ങിയവരുള്‍പ്പെട്ട വിഷന്‍ ഗ്രൂപ്പ് രൂപീകരിക്കും. സംസ്ഥാന ആസൂത്രണബോര്‍ഡിന്റെ പരിസ്ഥിതി-കാലാവസ്ഥാ വ്യതിയാന വിഭാഗം റ്റാസ്ക്‍ ഫോഴ്സിന്റെ സെക്രട്ടേറിയേറ്റായി പ്രവര്‍ത്തിക്കും.
ജനകീയാസൂത്രണത്തിന്റെയും അധികാരവികേന്ദ്രീകരണത്തിന്റെയും സാക്ഷരതാ പ്രസ്ഥാനത്തിന്റെയും ശൈലിയില്‍ ജനകീയ പങ്കാളിത്തമുള്ള ഒരു മഹാപ്രസ്ഥാനമായിരിക്കും ഹരിതകേരളം പദ്ധതി. ജനങ്ങളുടെയും സന്നധസംഘടനകളുടെയും സാമൂഹികസംഘടനകളുടെയും പങ്കാളിത്തം മാലിന്യനിര്‍മാജനത്തില്‍ ഉറപ്പുവരുത്തുവാനുള്ള ചുമതല ഈ റ്റാസ്ക്‍ ഫോഴ്സിനായിരിക്കും. മാലിന്യനിര്‍മാജനം സംബന്ധിച്ച മാസ്റ്റര്‍പ്ലാന്‍ നടപ്പിലാക്കുവാനും ജലസ്രോതസുകളുടെ ശുചീകരണം, സംരക്ഷണം എന്നിവ സാധ്യമാക്കുവാനും, മഴവെള്ള സംരക്ഷണത്തിനും, പഴവര്‍ഗ-പച്ചക്കറി കൃഷിയുടെ വ്യാപനത്തിനും ബദല്‍ ഊര്‍ജസ്രോതസ്സുകള്‍ കണ്ടെത്തുവാനും ഉള്ള ചുമതല റ്റാസ്ക്‍ ഫോഴ്സിനാകും.
ഓരോ പഞ്ചായത്തിലും ആവശ്യമായതിന്റെ അമ്പത് ശതമാനം കാര്‍ഷികവിളകളെങ്കിലും ആദ്യഘട്ടത്തില്‍ ജൈവരീതിയില്‍ ഉല്പാദിപ്പിക്കുന്നുവെന്ന് ഉറപ്പുവരുത്തും. സൗരോര്‍ജം, കാറ്റ് എന്നിവയുടെ സാധ്യതകള്‍ പൂര്‍ണമായും ഉപയോഗപ്പെടുത്തിക്കൊണ്ടുള്ള പദ്ധതികള്‍ ഇതോടൊപ്പം നടപ്പിലാക്കും. സ്വകാര്യമേഖലയില്‍ നിന്നുള്‍പ്പടെ ആയിരിക്കും ഇതിനാവശ്യമായ ഫണ്ട് സ്വരൂപിക്കുക. വലിയ തോതിലുള്ള ജനപങ്കാളിത്തം ആവശ്യമുള്ള പദ്ധതിയാണിത്. എല്ലാ വിഭാഗം ജനങ്ങളും ഈ ബൃഹദ്‌പദ്ധതിയുമായി സഹകരിക്കണമെന്ന് അഭ്യര്‍ത്ഥിക്കുന്നു.
- GreenKerala #ThereIsaPeoplesAlternative #TIPA
കടപ്പാട് :ബഹു. കേരളാ മുഖ്യമന്ത്രി ശ്രീ പിണറായി വിജയന്റെ സന്ദേശം
