വയല എൻ.വി.യു.പി.എസ്./അക്ഷരവൃക്ഷം

• കൊറോണക്കാലത്തെ കൂട്ടുകൂടൽ

കൊറോണക്കാലത്തെ കൂട്ടുകൂടൽ സ്കൂൾ പെട്ടെന്ന് അടച്ച വിഷമത്തിലായിരുന്നു മിന്നു. കൂട്ടുകാരെയുമോർത്ത് വീടിൻറെ പൂമുഖത്ത് പോയി ഇരുന്നു അവൾ. പെട്ടെന്ന് തൻറെ പിന്നിൽ നിന്നും കിളിയൊച്ചകേൾക്കുന്നതുപോലെ തോന്നി മിന്നുവിന്. വീടിൻറെ മുറ്റത്തുള്ള ചെമ്പരത്തിയിൽ തേൻ കുടിക്കാൻ എപ്പോഴും വരുന്ന കൊക്കൻ തേൻകിളിയാണ്. കുറച്ചു നാരുകളും മറ്റും കൊണ്ട് ഇടയ്ക്കിടയ്ക്ക് ചെമ്പരത്തിയിൽ നിന്നും വരാന്തയിലെ തൂണിന്റെ അടുത്തുള്ള കൊളുത്തിലേക്ക് പറന്നു വരുന്നുണ്ട്. അവൾ മെല്ലെ അവിടെ ചെന്നു. അവൾ അമ്മയെവിളിച്ച് ആ കിളി എന്തുചെയ്യുകയാണെന്ന് ചോദിച്ചു. അപ്പോൾ അമ്മ ചിരിച്ചുകൊണ്ട് പറഞ്ഞു "മോളെ അതിവിടെ കൂടുകൂട്ടുകയാണ്". ഇതു കേട്ട മിന്നുവിൻറെ സങ്കടം പമ്പകടന്നു. പിന്നെ അവൾ ഓരോ ദിവസവും കിളിയമ്മ കൂടുണ്ടാക്കുന്നത് നിരീക്ഷിച്ചുകൊണ്ടിരുന്നു. ദിവസങ്ങൾ കടന്നു പോയതറിഞ്ഞില്ല. അങ്ങനെ ഒരാഴ്ചയെടുത്തു കിളി കൂടു പണി തീർക്കാൻ. ഒരു ദിവസം കിളി തീറ്റതേടി പോയ സമയത്ത് മിന്നു അരഭിത്തിയിൽ കയറി എത്തിവലിഞ്ഞുനോക്കി അവൾ അപ്പോൾ കൂടിനകത്ത് രണ്ട് മനോഹരമായ മുട്ടകൾ കണ്ടു. വെളളയിൽ കറുത്ത പുള്ളികളുള്ള രണ്ടെണ്ണം. അവൾ അമ്മയുടെ അടുത്തേക്ക് ഓടിച്ചെന്നിട്ടു പറഞ്ഞു "അമ്മേ കിളി രണ്ടു കുഞ്ഞി മുട്ടകളിട്ടു" ഇതുകേട്ട് അമ്മയ്ക്കും സന്തോഷമായി. ഇപ്പോൾ മിന്നുവിൻറെ ജോലി മുട്ടയെടുക്കാൻ വരുന്ന കാക്കകളേയും മറ്റും അവിടെ നിന്ന് ഓടിക്കുകയാണ്. ഇപ്പോൾ കിളി അധികം പുറത്തേയ്ക്ക് പോകാറില്ല. എപ്പോഴും കൂട്ടിൽ അടയിരിപ്പ് തന്നെ. കുറച്ചുദിവസങ്ങൾ കഴിഞ്ഞു, ഒരു ദിവസം മിന്നുവിന് കൂട്ടിൽ നിന്നൊരൊച്ച കേൾക്കുന്നതുപോലെ തോന്നി. അവൾ പതിയെ അരഭിത്തിയിൽ കയറി നോക്കിയപ്പോൾ മുട്ടകൾ വിരിഞ്ഞ് കുഞ്ഞുങ്ങളായിരിക്കുന്നു. അവയാണ് ശബ്ദമുണ്ടാക്കുന്നത്. അവൾ അമ്മയോട് ഉറക്കെ വിളിച്ചു പറഞ്ഞു. "അമ്മേ മുട്ട വിരിഞ്ഞ് കുഞ്ഞുങ്ങളായി" അമ്മയ്ക്കും സന്തോഷമായി. ഒരു ദിവസം അവൾ കൂടിനരികിൽ നിൽക്കുകയായിരുന്നു. അപ്പോൾ അതാ ഒരു കിളി ചുണ്ടിൽ നിറയെ തേനുമായി വരുന്നു. അവൾക്ക് കാര്യം മനസ്സിലായി "ഇത് അച്ഛൻ കിളിയാണ്" അവൾ മനസ്സിൽ പറഞ്ഞു. അങ്ങനെ എല്ലാദിവസവും അച്ഛൻ കിളി വളരെ ശ്രദ്ധയോടെ കുഞ്ഞുങ്ങൾക്ക് തേൻ കൊണ്ടുകൊടുത്തു. ഒരു ദിവസം കൂട്ടിൽ നിന്ന് ഒച്ചയൊന്നും കേൾക്കാതായപ്പോൾ മിന്നു കൂട്ടിലേക്ക് നോക്കി. അവിടെ ആരും തന്നെയില്ല. അവൾ സങ്കടത്തോടെ അമ്മയുടെ അടുത്തെത്തിയപ്പോൾ അമ്മ പറഞ്ഞു "അത് പറന്നുപോയല്ലേ, സാരമില്ല. അവരിനിയും വരും" മിന്നു ആ കിളികുടുംബം തിരികെ വരുന്ന ദിവസത്തെ വരവേൽക്കാൻ കൊതിയോടെ കാത്തിരുന്നു. നീഹാരിക എസ്.വി. 4 B എൻ.വി.യു.പി.എസ്. വയലാ അഞ്ചൽ ഉപജില്ല കൊല്ലം അക്ഷരവൃക്ഷം പദ്ധതി, 2020 കഥ