Cheloormani

വയനാട് ജില്ലയിലെ പട്ടികവർഗ വിഭാഗക്കാരായ അടിയ , പണിയ വിഭാഗത്തിൽപ്പെട്ടവരുടെ ഇഷ്ടവിഭവമാണ് നെവേഞ്ചി (RIVER NAILS ).കബനി , ബാവലിപ്പുഴ തുടങ്ങിയ നദികളിൽ കാണപ്പെടുന്ന കക്കയ്ക്ക് സമാനമായ ഒരു ജലജീവിയാണ് നെവേഞ്ചി.കട്ടിയുള്ള പുറന്തോടോടുകൂടിയ നെവേഞ്ചി വെള്ളത്തിൽ കല്ലിലും , വെള്ളത്തിൽ വീഴുന്ന കരിയിലയിലും പറ്റിപ്പിടിച്ചിരിക്കും.ഒരു ചക്കക്കുരുവിന്റെവലിപ്പമാണ് ഇതിനുള്ളത്.വാലെന്ന് തോന്നിക്കുന്ന ഭാഗം നീണ്ട് കുർത്തതും അടഞ്ഞതുമാണ്.തലഭാഗം തുറന്നിരിക്കും.മുൻഭാഗത്ത് ചെറിയ വട്ടത്തിൽ പൊട്ടുപോലെ കാണപ്പെടുന്ന കട്ടിയുള്ള ഭാഗം കൊണ്ടാണ് ഇവ കല്ലിലും മറ്റും പറ്റിപ്പിടിച്ചിരിക്കുന്നത്.ഇവ സഞ്ചരിക്കുമ്പോൾ തോടിനുള്ളിൽ നിന്നും ശരീരഭാഗം പകുതിയോളം പുറത്തായിരിക്കും.തോടിനുള്ളിലെ ഈ മാംസഭാഗമാണ് മുമ്പ് പറഞ്ഞ വിഭാഗക്കാർ ആഹാരമാക്കുന്നത്.വെള്ളത്തിൽ നിന്നും ഇവ ശേഖരിച്ച് വീട്ടിൽ കൊണ്ടുവന്ന് വെള്ളത്തിൽ കുറച്ചു നേരം ഇട്ടുവയ്ക്കും.തോടിനുള്ളിലെ അഴുക്ക് കളയാനാണ് ഇങ്ങനെ വെള്ളത്തിലിടുന്നത്.വൃത്തിയായി കഴുകിയെടുത്ത് മഞ്ഞളും ഉപ്പുും ചേർത്ത് അടുപ്പിൽ വെച്ച് വേവിക്കും.ഇതിന്റെ തോടോടുകൂടിയാണ് വേവിക്കുക.വെന്തുകഴിഞ്ഞാൽ സേഫ്റ്റി പിൻ ഉപയോഗിച്ച് തോടിനുള്ളിൽ നിന്നും ഇറച്ചി കുത്തിയെടുത്ത് കഴിക്കും.കൂടാതെ ഇതിന്റെ പിൻഭാഗം അടിച്ചു കളഞ്ഞ് കഴുകിയെടുത്ത് കറിമസാലകൾ ചേർത്ത് കറിവെച്ചും കഴിക്കും.വലിവ് അസുഖമുള്ളവർക്ക് ഇത് കഴിച്ചാൽ ആശ്വസമാകുമെന്ന് ഇവർ പറയുന്നു.