ഗവ. എച്ച്.എസ്.എസ്. വെണ്ണല

ആമുഖം

2007 -ല്‍വെണ്ണല ഗവ.സ്ക്കൂള്‍ ഒരു നൂറ്റാണ്ട് പിന്നിട്ടു കഴിഞ്ഞു. വെണ്ണലയിലും അടുത്ത പ്രദേശങ്ങളിലുമുള്ള കഴിഞ്ഞ നാലു തലമുറകള്‍ക്കെങ്കിലും അറിവിന്റെ വെളിച്ചം പകര്‍ന്നു കൊടുക്കാന്‍ കഴിഞ്ഞ ചാരിതാര്‍ത്ഥ്യത്തോടെ അഭിമാനപുരസ്സരം തലയുയര്‍ത്തി വെണ്ണലയുടെ ഹൃദയസ്ഥാനത്ത് അത് നിലകൊള്ളുന്നു.ഒരു സമ്പൂര്‍ണ്ണ സ്ക്കൂളിന്റെ എല്ലാ വിഭാഗങ്ങളും ഒരേ കോമ്പൗണ്ടില്‍ തന്നെ സ്ഥിതിചെയ്യുന്ന ചുരുക്കം ചില സ്ക്കൂളില്‍ ഒന്നാണിത്. ഒരു നൂറ്റാണ്ടിനു മുമ്പ് ലോവര്‍ പ്രൈമറി അര നൂറ്റാണ്ടു കഴിഞ്ഞ് അപ്പര്‍ പ്രൈമറി, ഷ്ഷ്ഠിപൂര്‍ത്തിയോടെ ഹൈസ്ക്കൂള്‍ നൂറ്റാണ്ടു തികയുന്നതോടെ പ്ലസ് ടു. ഇതിനിടയ്ക്ക് പ്രീ പ്രൈമറിയും ഇംഗ്ലീഷ് മീഡിയം ക്ലാസ്സുകളും ഈ സ്ക്കൂളിന്റെ വളര്‍ച്ച ഒരു നാടിന്റെ തന്നെ വളര്‍ച്ചയാണ്.

1904-ല്‍ വെണ്ണല തൈക്കാവിന് വടക്കുഭാഗത്തുള്ള കേശമംഗലത്തില്ലത്തെ നീലകണ്ഠന്‍ ഇളയത്ത് അദ്ദേഹത്തിന്റെ ഇല്ലപറമ്പില്‍ ഒരു കുടിപ്പള്ളിക്കൂടം തുടങ്ങിയതായിരുന്നു വെണ്ണല സ്ക്കൂളിന്റെ ആരംഭം. ഈ കുടിപ്പള്ളിക്കൂടം വെണ്ണലയില്‍ ഇന്നത്തെ സ്ക്കൂളിന്റെ പടിഞ്ഞാറുഭാഹത്തുണ്ടായിരുന്ന കുറ്റാനപ്പിള്ളി കുടുംബം വകയായിരുന്ന 'പുതിയാട്ടില്‍' പറമ്പിലേക്ക് മാറ്റി സ്ഥാപിച്ചു.ഏതാനും കൊല്ലം അതവിടെ പെണ്‍പള്ളിക്കൂടമായി തുടര്‍ന്നു. അതിനിടയ്ക്ക് സര്‍ക്കാരില്‍ നിന്നും അതിനംഗീകാരം ലഭിച്ചു. അതോടൊപ്പം തന്നെ നാട്ടുകാരില്‍ നിന്നും സംഭാവനകള്‍ സ്വീകരിച്ച് ഇപ്പോള്‍ പ്രൈമറി സ്ക്കൂള്‍സ്ഥിതി ചെയ്യുന്ന അമ്പത് സെന്റ് സ്ഥലം കുറ്റാപ്പിള്ളി പരമേശ്വരപ്പണിക്കരുടെ പേരില്‍ തീറുവാങ്ങി ഒരു ഷെഡു പണിത് സ്ക്കൂള്‍ അവിടേയ്ക്കു മാറ്റി. 1907 ല്‍ ആയിരുന്നു അത്. 1908 ല്‍ ഈ സ്ഥലവും സ്ക്കൂളും കൂടി തിരുവിതാംകൂര്‍ ഭരിച്ചിരുന്ന മൂലം തിരുനാള്‍ മഹാരാജാവിന് ഒരു ചക്രം വിലയ്ക്ക് തീറു നല്‍കുകയും അവിടെ സര്‍ക്കാര്‍ ഓലമേഞ്ഞ ഒരു സ്ക്കൂള്‍ കെട്ടിടം പണിഞ്ഞത്.അറബിക് അധ്യാപകനായ ബാക്കാട് ബാവ മൗലവില്ല മുന്‍കൈയെടുത്ത് നാട്ടുകാരില്‍ നിന്നും പണം പിരിച്ച് അറബി പഠിപ്പിക്കുന്നതിനും വേണ്ടി പ്രൈമറി സ്ക്കൂളിന്റെ വടക്കുഭാഗത്തായി ഒരു കെട്ടിടം പണിയുകയുണ്ടായി. പ്രൈമറി സ്ക്കൂളിന്റെ വികസനത്തിനു വേണ്ടി പ്രവര്‍ത്തിച്ച ഹെഡ്മാസ്റ്റര്‍മാരായിരുന്നു. കിഴക്കേടത്ത് നാരായണമേനോന്‍ മാസ്റ്ററും അട്ടാണിയേടത്ത് കുഞ്ഞുണ്ണിപ്പിള്ള സാറും.

ആദ്യകാലത്ത് കുട്ടികളുടെ എണ്ണം കുറവായിരുന്നെങ്കിലും 1950 കളില്‍ കുട്ടികളുടെ എണ്ണം വര്‍ദ്ധിച്ചു. അതോടെ സ്ഥലപരിമിതിമൂലം സ്ക്കൂളില്‍ ഷിഫ്റ്റ് സമ്പ്രദായം ഏര്‍പ്പെടുത്തി.സര്‍ക്കാരില്‍ നിന്നും അമ്പതുകളുടെ അവസാനത്തോടെ പ്രൈമറി സ്ക്കൂള്‍ കുട്ടികള്‍ക്ക് ഉച്ചക്കഞ്ഞി നല്‍കിതുടങ്ങി. പിന്നീട്സര്‍ക്കാര്‍ ഉച്ചഭക്ഷണപദ്ധതി നിര്‍ത്തലാക്കിയെങ്കിലും വാര്‍ഡ് മെമ്പറായ ശ്രീ.ടി.കെ.നാരായണന്‍ കൂടാതെ ശ്രീ.പച്ചാറ്റില്‍ മക്കരുമാപ്പിള്ള തുടങ്ങിയവരുടെ പരിശ്രമഫലമായി ഉച്ചക്കഞ്ഞി മുടങ്ങാതെ നടന്നുപോയി.പിന്നീട് കെയര്‍ എന്ന അമേരിക്കന്‍ സംഘടന ഗോതമ്പും പാല്‍പ്പൊടിയും എല്ലാ സ്ക്കൂളുകള്‍ക്കും നല്‍കിത്തുടങ്ങി.

വെണ്ണല യു.പി.എസ്സിലെ ആദ്യത്തെ ഹെഡ്മാസ്റ്റര്‍ പോണേക്കരയില്‍ നിന്നും വന്നിരുന്ന ശ്രീ.നാരായണന്‍ മാസ്റ്ററായിരുന്നു. പിന്നീട് പി.ടി.ജോര്‍ജ്ജ് മാസ്റ്റര്‍ 1958-59 ഹെഡ്മാസ്റ്ററായി നിയമിക്കപ്പെട്ടു. അധ്യാപകരക്ഷാകതൃ സമിതി രൂപീകരിച്ചു.കുട്ടികളുടെ എണ്ണം വര്‍ദ്ധിച്ചതോടെ സ്ഥലപരിമിതി രൂക്ഷമായി.സര്‍ക്കാരില്‍ നിന്നും ആസ്ബസ്റ്റോസ് മേഞ്ഞ ഒരു സെമി പെര്‍മനന്റ് കെട്ടിടം അനുവദിച്ചു.ക്ലാസ്സുകളുടെ എണ്ണമനുസരിച്ചുള്ള അധ്യാപകരേയും നിയമിച്ചു കിട്ടി. 1957-58-ല്‍ സ്ക്കൂളിന് അമ്പതുവര്‍ഷം പൂര്‍ത്തിയായപ്പോള്‍ അധ്യാപകരക്ഷകതൃസമിതി ചേര്‍ന്ന് ജൂബിലി മൂന്നു ദിവസത്തെ പരിപാടികളോടെ കേമമായി ആഘോഷിച്ചു. 1961 -ല്‍ ഇന്റര്‍ സ്ക്കൂള്‍ മത്സരത്തില്‍ ടെനീകോയറ്റില്‍ പങ്കെടുത്ത കുട്ടികള്‍ ഒന്നാം സമ്മാനമായി കപ്പു നേടി. സ്ക്കൂളിന്റെ ചരിത്രത്തിലെ ആദ്യത്തെ അനുഭവം.

വെണ്ണല സ്ക്കൂള്‍ ഒരു ഹൈസ്ക്കൂളാക്കി ഉയര്‍ത്തണമെന്നുള്ളത് നാടിന്റെ ഏറ്റവും വലിയ ആവശ്യമായിരുന്നു. 1966-67 ല്‍ വെണ്ണലയില്‍ ഹൈസ്ക്കൂള്‍ അനുവദിച്ചു.ഹൈസ്ക്കൂളിന്റേയും നാട്ടുകാര്‍ പണിത് സംഭാവന നല്‍കിയ കെട്ടിടത്തിന്റേയും ഉദ്ഘാടനം ഒരുത്സവമായി വെണ്ണലക്കാര്‍ കൊണ്ടാടി. പി.ടി. ജോര്‍ജ്ജ് മാസ്റ്റര്‍ തന്നെയായിരുന്നു ഹൈസ്ക്കൂള്‍ ആയതിനുശേഷം ഹെഡ്മാസ്റ്റര്‍.ഈ സ്ക്കൂളിലെ ആദ്യത്തെ ഗസ്റ്റഡ് ഹെഡ്മിസ്ട്രസ്സ് ശ്രീമതി ലീലാപരമേശ്വരന്‍ ആയിരുന്നു.ആദ്യത്തെ എസ്.എസ്.എല്‍.സി റിസല്‍റ്റു തന്നെ ഉയര്‍ന്നതായിരുന്നു. ആ വര്‍ഷത്തെ ഒന്നാം റാങ്ക് ടി.പി. വേണുഗോപാലന്‍ നായര്‍, തുരുത്തിയില്‍ എന്ന വിദ്യാര്‍ത്ഥിക്കായിരുന്നു. ശ്രീമതി ലീലാപരമേശ്വരന്‍ ഹെഡ്മിസ്ട്രസ്സായിരുന്ന കാലത്തുതന്നെ പ്രൈമറി സ്ക്കൂള്‍ ഹൈസ്ക്കൂളില്‍ നിന്നു വേര്‍പ്പെടുത്തി. ലീലാപരമേശ്വരനു ശേഷം വന്ന ഹെഡ്മാസ്റ്റര്‍മാരായിരുന്നു ജോസഫ് ചേന്ദമംഗലം, പി.ജെപി.കെ.കൗല്യ, ഭദ്രാബ‌ദേവിത്തമ്പുരാന്‍, അന്നാകോശി,പി.എ.ശോശാമ്മ,പി.കെ.കലാവതി, ഇന്ദിരാ രവീന്ദ്രന്‍ എന്നവരായിരുന്നു. 1974 ല്‍ ശിശുദിനാഘോഷത്തോടനുസരിച്ച് സ്ക്കൂളുകള്‍ തമ്മില്‍ നടത്തിയ പ്രസംഗമത്സരത്തില്‍ ഒന്നാം സമ്മാനം നേടിയത് വെണ്ണല സ്ക്കൂളിലെ ഫാനി പള്ളന്‍ എന്ന ഏഴാം ക്ലാസ്സ് വിദ്യാത്ഥിയായിരുന്നു.ജോസി ഫൗണ്ടേഷന്‍ അവാര്‍ഡ് കരസ്ഥമാക്കിയ വെണ്ണലമോഹന്‍,നീന്തല്‍ താരം ആദപ്പിള്ളി സതീശന്‍,ചെസ് താരം കെ.എ യൂനസ്സ്,കെ.പി.എ.സി പുരസ്സക്കാരം നേടിയ എം.എം.അബദുല്‍ ജലീല്‍,അനുഗൃഹീത നാടകകൃത്ത് കൃഷ്ണന്‍കുട്ടി,ദേശീയചാമ്പ്യന്മാരായ ജോസി തോമസ്സ്,ജോണ്‍സേവ്യര്‍ ജോസഫ്, സന്തോഷ് ട്രോഫിക്കുവേണ്ടി പൊരുതിയ സുനീര്‍ പി.എ തുടങ്ങിയവര്‍ ഇവിടത്തെ പൂര്‍വ്വവിദ്യാര്‍ത്ഥികളാണ്.

2003 ല്‍ എറണാകുളം ജില്ലയിലെ ഏറ്റവും നല്ല പി.ടി.എയ്ക്കള്ള പുരസ്സക്കാരം ലഭിക്കുകയുണ്ടായി.2004-2005 ല്‍ ഹയര്‍സെക്കന്ററി ആരംഭിച്ചു.ഇതിനിടെ ഇംഗ്ലീഷ് മീഡിയം ക്ലാസ്സുകളും ഇവിടെ തുടങ്ങി. 2007 ല്‍ ലൈബ്രറി പ്രദര്‍ശനത്തില്‍ മൂന്നാം സ്ഥാനം വെണ്ണല എല്‍.പി. എസിനാണ് ലഭിച്ചത്.ക്യാമ്പസ് ക്ലീന്‍ മത്സരത്തില്‍ ഈ സ്ക്കൂളിന് പുരസ്സക്കാരം ലഭിച്ചിട്ടുണ്ട്. 2007-2008 ല്‍ വെണ്ണല സ്ക്കൂള്‍ ശതാബ്ദി മൂന്നു ദിവസത്തെ ആഘോഷമായി കൊണ്ടാടുകയുണ്ടായി. ജ്വാല എന്ന പേരില്‍ ശതാബ്ദി സ്മരണികയും പുറത്തിറക്കി. ശതാബ്ദി ആഘോഷങ്ങളുടെ ഭാഗമായി പൂര്‍വ്വഅധ്യാപകരെ ആദരിക്കുകയുണ്ടായി.ഉന്നതവിജയം നേടിയ വിദ്യാര്‍ത്ഥികള്‍ക്ക് സ്കോളര്‍ഷിപ്പ് നല്‍കുകയും ചെയ്തു.

വെണ്ണല സ്ക്കൂള്‍ ഇന്ന്..- ഹയര്‍ സെക്കന്ററി വിഭാഗത്തില്‍ രണ്ട് ഡിവിഷനുകളാണുള്ളത്.കൊമേഴ്സ്,സയന്‍സ് എന്നീ രണ്ട് ഗ്രൂപ്പുകള്‍. രണ്ടു ബാച്ചിലുമായി 240 ഓളം കുട്ടികള്‍ പഠിക്കന്നു. ശ്രീമതി.കെ.ജി. സതീറാണിയാണ് പ്രിന്‍സിപ്പാള്‍ പന്ത്രണ്ട് അധ്യാപകരും ഒരു അധ്യാപകേതര ജീവനക്കാരനും ഇവിടെ പ്രവര്‍ത്തിക്കുന്നു.

ഹൈസ്ക്കൂള്‍ വിഭാഗത്തില്‍ അഞ്ചാം സ്റ്റാന്‍ഡേര്‍ഡു മുതല്‍ പത്താം സ്റ്റാന്‍ഡേര്‍ഡുവരെ 861 കുട്ടികള്‍ പഠിക്കുന്നു.ശ്രീമതി.രത്നവല്ലിയാണ് ഹെഡ്മിസ്സ്ട്രസ്സ്.31 അധ്യാപകരും 5 അനധ്യാപകരും ഇവിടെ ജോലി ചെയ്യുന്നു.ഹൈസ്ക്കൂളും ഹയര്‍ സെക്കന്ററിയും കൂടി ഒരു പി.ടി.എ ആണുള്ളത്. ശ്രീ.എ.സി.ഫ്രാന്‍സിസാണ് പി.ടി.എ പ്രസിഡന്റ്.ഒരു മാതൃസംഘടനയും ഇവിടെ പ്രവര്‍ത്തിക്കുന്നു. ശാസ്ത്രപോഷിണി എന്ന പേരില്‍ പ്രവര്‍ത്തിക്കുന്ന സയന്‍സ് ലാബ് (കൊച്ചിന്‍ യൂണിവേഴ്സിറ്റിയുടെ സാമ്പത്തിക സഹായത്താല്‍ നിര്‍മ്മിതം) ജ്യോതിര്‍ഗമയ വിദ്യാഭ്യാസപദ്ധതിയാല്‍ നവീകരിച്ച ലൈബ്രറി,ഇന്റര്‍ നെറ്റ് സൗകര്യത്തോടികൂടിയ നവീകരിച്ച കമ്പ്യൂട്ടര്‍ ലാബ്,S.S.A ഫണ്ടുപയോഗിച്ചുള്ള ടോയ്ലറ്റുകള്‍ മറ്റു പുനര്‍നിര്‍മ്മാണപ്ര‍വര്‍ത്തനങ്ങള്‍,ഹരിത-പദ്ധതി, seed-പദ്ധതി കൂടാതെ ഈ വര്‍ഷം ഉദ്ഘാടനം ചെയ്ത സ്മാര്‍ട്ട് ക്ലാസ്സ് റൂം. ഇത്രയും സൗകര്യങ്ങള്‍ ഇന്നീ സ്ക്കൂളിനുണ്ട്. ആദ്യത്തെ എസ്.എസ്.എല്‍.സി.വിജയശതമാനം 76% ആയിരുന്നത് ഇന്ന് 97%-ല്‍ എത്തിനില്ക്കുകയാണ്. സ്ക്കൂളിന്റെ നവീകരണപ്രവര്‍ത്തനങ്ങള്‍,കൊച്ചിന്‍ കോര്‍പ്പറേഷന്‍,ബഹു.എം.പി.എം.എല്‍.എ-മുതലായവരുടെ സഹായത്തോടെ വളരെ ഭംഗിയായി നടത്തപ്പെടുന്നു. സ്ക്കൂള്‍ പുരോഗതിയില്‍ പി.ടി.എയുടെ സഹകരണം നിസ്സീമമാണ്.നല്ലവരായ നാട്ടുകാരുടെയെല്ലാം സഹായത്തോടെ സ്ക്കൂള്‍ അഭിവൃദ്ധിയുടെ പടികളിലൂടെ മുന്നേറുന്നു.തൊഴിലധിഷ്ഠിത വിദ്യാഭ്യാസപരിപാടിയുടെ ഭാഗമായി എട്ടാം ക്ലാസ്സിലെ 40 പെണ്‍കുട്ടികള്‍ക്ക് ബ്യൂട്ടീഷ്യന്‍ കോഴ്സ് ആരംഭിക്കാനുള്ള നടപടികള്‍ പൂര്‍ത്തിയായിക്കൊണ്ടിരിക്കുന്നു.

സ്ക്കൂള്‍ ലൊക്കേഷന്‍.- പാലാരിവട്ടം ബൈപ്പാസില്‍ നിന്നും ആലിന്‍ചുവട് എരൂര്‍ റോഡില്‍ തൈക്കവ് ശിവക്ഷേതൃത്തിനും വടക്കിനേത്ത് ജൂമാമസ്ജിദിനും ഇടയില്‍ റോഡിന്റെ കിഴക്കുവശത്തായി സ്ക്കൂള്‍ സ്ഥിതി ചെയ്യുന്നു.