എഫ്.എം.ജി.എച്ച്. എസ്.എസ് കൂമ്പൻപാറ/പ്രവർത്തനങ്ങൾ/2018-19 -ലെ പ്രവർത്തനങ്ങൾ

അക്കാദമിക പ്രവർത്തനങ്ങൾ

ഫാത്തിമ മാതാ സ്കൂളിൽ വിവിധങ്ങളായ അക്കാദമിക പ്രവർത്തനങ്ങൾ നടക്കുന്നു. പൊതുവിദ്യാഭ്യസ വകുപ്പ് നിഷ്ക്കർഷിക്കുന്നതും വർശങ്ങളായി സ്കൂൾ തലത്തിൽ നടത്തി മികച്ച ഫലം നേടിയതുമായ അക്കാദമിക പ്രവർത്തനങ്ങളാണ് സ്കൂൾ തലത്തിൽ നടക്കുന്നത്. കുട്ടികളുടെയും അദ്ധ്യാപകരുടേയും രക്ഷിതാക്കളുടേയും മാനേജ്മെന്റിന്റെയും കൂട്ടായ പരിശ്രമമാണ് ഞങ്ങളുടെ വിജയം

ഹലോ ഇംഗ്ലീഷ്

പൊതുവിദ്യാലയങ്ങളിലെ ഇംഗ്ലീഷ് പഠനം മെച്ചപ്പെടുത്തുന്നതിന്റെ ഭാഗമായി സമഗ്രശിക്ഷാ അഭിയാൻ ആവിഷ്ക്കരിച്ച് നടപ്പിലാക്കുന്ന പഠന പരിപോഷണ പരിപാടിയാണ് ഹലോ ഇംഗ്ലീഷ്. ഇംഗ്ലീഷ് ഭാഷ അനായാസമായി കൈകാര്യം ചെയ്യാൻ കുട്ടികളെ പ്രാപ്തരാക്കുന്നതിനുള്ള ചിട്ടയായ പഠന പ്രവർത്തനങ്ങളാണ് ഇതിൽ ഉൾപ്പെട്ടിരിക്കുന്നത്. വിദ്യാർത്ഥികളുടെ ഇംഗ്ലീഷ് പഠനം ശാക്തീകരിക്കുന്നതിനുള്ള പൊതുവിദ്യാലയങ്ങളുടെ നിർണായകമായ ചുവട് വയ്പ്പാണ് ഹലോ ഇംഗ്ലീഷ്. ഫാത്തിമ മാതയിലും ഹലോ ഇംഗ്ലീഷ് പ്രോഗ്രാം വളരെ വിജയകരമായി നടത്തുന്നു. ഇംഗ്ലീഷ് പഠനം ഏറെ രസകരമാക്കിതീർക്കുവാനും പല വിധ ആക്ടിവിറ്റികളിലൂടെ ഇംഗ്ലീഷ് ഭാഷയിൽ പ്രാവീണ്യം നേടുവാനും കുട്ടികളെ സഹായിക്കുവാൻ ഇത് ഏറെ പ്രയോജനപ്പെടുന്നു.

ഹായ് ഇംഗ്ലീഷ്

ഒന്നു മുതൽ നാലു വരെ ക്ലാസ്സുകളിലായി കുട്ടികൾക്ക് ഇംഗ്ലീഷ് പഠനം ആസ്വാദ്യകരമാക്കാനായി ഹായ് ഇംഗ്ലീഷ് എന്ന പേരിൽ ക്ലാസ്സുകൾ നടത്തുന്നു. ഇംഗ്ലീഷിൽ കഥകളും പാട്ടുകളും കുട്ടിക്കവിതകളുമൊക്കെ പഠിപ്പിച്ച് അതിനൊപ്പം ആടാനും പാടാനും അവരെ പ്രാപ്തരാക്കുന്നു മാത്രമല്ല കൊച്ചുകൊച്ചു ഇംഗ്ലീഷ് വാക്കുകളിലൂടെ ഇംഗ്ലീഷിൽ സംസാരിക്കുവാനും ആശയവിനിമയം നടത്തുവാനും കുട്ടികളിൽ ശേഷി വളർത്തുന്നു.

ശ്രദ്ധ

ശ്രദ്ധ മികവിലേയ്ക്കൊരു ചുവട് പദ്ധതിയുടെ ഭാഗമായ പഠന പ്രവർത്തനങ്ങൾ എൽ പി, യു പി, എച്ച് എസ് തലങ്ങളിൽ വിഷയങ്ങൾ കൈകാര്യം ചെയ്യുന്ന അദ്ധ്യാപകരുടെ നേതൃത്വത്തിൽ നടത്തപ്പെടുന്നുണ്ട്. ഭൂരിഭാഗം കുട്ടികളും ഈ പദ്ധതിയിലൂടെ മികവിലേയ്ക്ക് കടന്നുവരുന്നുണ്ട്. ആത്മവിശ്വാസത്തോടെ മുമ്പോട്ട് വരുവാനും സ്വന്തം കഴിവുകൾ പ്രകടിപ്പിക്കുവാനും അവർക്ക് സാധിക്കുന്നു. ഞങ്ങളുടെ സ്കൂളിലെ ശ്രദ്ധ പ്രോഗ്രാം വിജയകരമായി മുൻപോട്ടുപോകുന്നു. കുട്ടികളിലെ ആത്മവിശ്വാസം വളർത്താൻ സാധിച്ചു എന്നതാണ് ഏറ്റവും വലിയ വിജയം. പിന്നാക്കം നിൽക്കുന്ന കുട്ടികളെ പ്രത്യേകം ശ്രദ്ധിക്കുന്നതിനാൽ മടികൂടാതെ ക്ലാസ്സിൽ വരുന്നതിന് സ്വന്തമായി ക്ലാസ്സ് പ്രവർത്തനങ്ങൾ ‌ചെയ്യുന്നതിനും അവർക്ക് കഴിയുന്നുണ്ട്.

നവപ്രഭ

ഒൻപതാം ക്ലാസ്സിൽ പഠനത്തിൽ പിന്നാക്കം നിൽക്കുന്ന കുട്ടികൾക്കായി ആവിഷ്ക്കരിച്ച പദ്ധതിയാണ് നവപ്രഭ. എല്ലാ വിഷയങ്ങൾക്കും കുട്ടികൾക്ക് പ്രത്യേക പരിശീലനം നൽകുന്നു.. ഭൂരിഭാഗം കുട്ടികളും ഈ പദ്ധതിയിലൂടെ മികവിലേയ്ക്ക് കടന്നുവരുന്നുണ്ട്. ആത്മവിശ്വാസത്തോടെ മുമ്പോട്ട് വരുവാനും സ്വന്തം കഴിവുകൾ പ്രകടിപ്പിക്കുവാനും അവർക്ക് സാധിക്കുന്നു. ഞങ്ങളുടെ സ്കൂളിലെ നവപ്രഭ പ്രോഗ്രാം വിജയകരമായി മുൻപോട്ടുപോകുന്നു. കുട്ടികളിലെ ആത്മവിശ്വാസം വളർത്താൻ സാധിച്ചു എന്നതാണ് ഏറ്റവും വലിയ വിജയം. പിന്നാക്കം നിൽക്കുന്ന കുട്ടികളെ പ്രത്യേകം ശ്രദ്ധിക്കുന്നതിനാൽ മടികൂടാതെ ക്ലാസ്സിൽ വരുന്നതിന് സ്വന്തമായി ക്ലാസ്സ് പ്രവർത്തനങ്ങൾ ‌ചെയ്യുന്നതിനും അവർക്ക് കഴിയുന്നുണ്ട്.

മലയാളത്തിളക്കം

ഭാഷാപരമായ പിന്നാക്കാവസ്ഥയിലുളള കുട്ടികളെ ഭാഷാപരമായ മികവിലേക്ക് ഉയർത്തുന്നതിനായി സർവശിക്ഷാ അഭിയാൻ ആസൂത്രണം ചെയ്ത മലയാള ത്തിളക്കം ഈ വർഷം എച്ച് എസ് വിഭാഗത്തിലാണ് നടപ്പിലാക്കിയത്. അൺ എയ്‍ഡഡ് വിദ്യാലയങ്ങളിൽ നിന്നും വന്ന നല്ലൊരു ശതമാനം കുട്ടികൾക്കും മലയാളത്തിളക്കം ആവശ്യമുണ്ട്. എല്ലാ കുട്ടികളെയും അടിസ്ഥാനഭാഷാശേഷിയുളളവരാക്കി മാറ്റുക, വർഷാവസാനം നടക്കുന്ന സർഗോത്സവത്തിൽ വെച്ച് ഒന്നാം ക്ലാസ് മുതലുളള കുട്ടികളുടെ ഭാഷാപരമായ കഴിവുകൾ സമൂഹവുമായി പങ്കിട്ട് പൊതുവിദ്യാഭ്യാസ സംരക്ഷണയജ്ഞത്തിന് ശക്തിപകരുക, എല്ലാ കുട്ടികളെയും സ്വതന്ത്രവായനക്കാരാക്കി മാറ്റുക. എന്നിവയാണ് ലക്ഷ്യങ്ങൾ. ഞങ്ങളുടെ സ്കൂളിലും മലയാള ഭാഷാ അദ്ധ്യാപകരുടെ മേൽനോട്ടത്തിൽ മലയാളത്തിളക്കം വളരെ കാര്യക്ഷമമായി നടക്കുന്നു

സുരീലി ഹിന്ദി

പാഠ്യ പദ്ധതി പരിപോഷണ പരിപാടിയുടെ ഭാഗമായ സുരീലി ഹിന്ദി പ്രോഗ്രാം ഫാത്തിമ മാതാ സ്കൂളിലും വളരെ കാര്യക്ഷമമായി നടത്തി. ആറാം ക്ലാസ്സിലെ കുട്ടികൾക്കുവേണ്ടിയുള്ള പ്രോഗ്രാമിൽ 58കുട്ടികൾ പങ്കെടുത്തു. ഹിന്ദി ഭാഷയിലുള്ള പരിജ്ഞാനം വർദ്ധിപ്പിക്കുവാനും ഹിന്ദിയിൽ ആശയ വിനിമയം നടത്തുവാനും കുട്ടികൾക്ക് ഇതുവഴി കഴിഞ്ഞു.

GK Information Universe

പ്രതിഭാധനരായ ഒട്ടേറെ വിദ്യാർത്ഥികൾ നമ്മുടെ വിദ്യാലയത്തിൽ ഉണ്ട്. അവർക്ക് സ്ക്കൂൾ സിലബസിന് അപ്പുറത്തുള്ള വിജ്ഞാനം ലഭിക്കേണ്ടതുണ്ട്. ഇത് കണക്കിലെടുത്ത് കുട്ടികൾക്ക് പ്രത്യേക പരിശിലനം നല്കി വരുന്നു. അതിനായി സ്കൂളിൽ തന്നെ വിദഗ്ദരായ അദ്ധ്യാപകരുടെ നേതൃത്വത്തിൽ തയ്യാറാക്കപ്പെട്ട GK Information Universe എന്ന പുസ്തകം കുട്ടികൾക്ക് വിതരണം ചെയ്യുന്നു. വിവിധ മത്സരങ്ങൾക്കായി ഒരുങ്ങുന്നതിനും വിജയം നേടുന്നതിനും ഇത് കുട്ടികളെ വളരെയധികം സഹായിക്കുന്നു. LP,UP, HS വിഭാഗത്തിലെ കുട്ടികൾക്കാണ് പുസ്തകം വിതരണം ചെയ്യുക.

എൽ എസ് എസ് പരിശീലനം

സംസ്ഥാനത്തെ പൊതുവിദ്യാലയങ്ങളിൽ നാലാംതരത്തിൽ പഠിക്കുന്ന വിദ്യാർഥികൾക്ക് പൊതുവിദ്യാഭ്യാസ വകുപ്പ് നടത്തുന്ന പരീക്ഷയാണ് എൽ.എസ്.എസ്. നാലാം തരത്തിൽ ആർജിച്ച അറിവുകൾ, അനുഭവങ്ങൾ എന്നിവ പരീക്ഷിക്കുന്ന ഒരു പരീക്ഷകൂടിയാണിത്. പരിസരപഠനം, ഭാഷ, ഇംഗ്ളീഷ്, ഗണിതം, പൊതുവിജ്ഞാനം എന്നീ മേഖലകളിൽനിന്നുമുള്ള ചോദ്യങ്ങളാണ് പരീക്ഷക്കുണ്ടാവുക. അതിനാൽ തുടക്കം മുതൽ തന്നെ നാലാം ക്ലാസ്സിൽ പഠിക്കുന്ന കുട്ടികൾക്കായി എൽ എസ് എസ് പ്രത്യേക പരിശീലനം നടത്തുന്നു. ഈ അദ്ധ്യയന വർഷം 23 കുട്ടികൾക്ക് എൽ എസ് എസ് സ്കോളർഷിപ്പ് നേടാനായി എന്നത് ഏറെ സന്തോഷം പകരുന്നു

യു എസ് എസ് പരിശീലനം

ഏഴാംക്ലാസിലെ മിടുക്കരെ കണ്ടെത്തുന്ന പരീക്ഷയാണ്‌ യു.എസ്.എസ്. ഒന്നാംടേം പരീക്ഷയിൽ ഉയർന്ന ഗ്രേഡുകൾ നേടുന്ന കുട്ടികൾക്കാണ്‌ പരീക്ഷയെഴുതാൻ യോഗ്യത. അതിനാൽ തുടക്കം മുതൽ തന്നെ നാലാം ക്ലാസ്സിൽ പഠിക്കുന്ന കുട്ടികൾക്കായി യു എസ് എസ് പ്രത്യേക പരിശീലനം നടത്തുന്നു. ഈ അദ്ധ്യയന വർഷം 3 കുട്ടികൾക്ക് എൽ എസ് എസ് സ്കോളർഷിപ്പ് നേടാനായി എന്നത് ഏറെ സന്തോഷം പകരുന്നു.

മോർണിംഗ് ക്ലാസ്

പത്താം ക്ലാസ്സിലെ കുട്ടികൾക്കായി രാവിലെ 8.30 മുതൽ ക്ലാസ്സുകൾ നടത്തുന്നു. ഈ സമയങ്ങളിൽ പഠനത്തിൽ പിന്നാക്കം നിൽക്കുന്ന കുട്ടികൾക്ക് പ്രത്യേക ശ്രദ്ധ കൊടുക്കുന്നതിന് അദ്ധ്യാപകർ പ്രത്യേകം ശ്രദ്ധിക്കുന്നു.

ഈവനിംഗ് ക്ലാസ്

പത്താം ക്ലാസ്സിലെ കുട്ടികൾക്കായി വൈകുന്നേരം 4.30 വരെ ക്ലാസ്സുകൾ നടത്തുന്നു. ഈ സമയങ്ങളിൽ പഠനത്തിൽ പിന്നാക്കം നിൽക്കുന്ന കുട്ടികൾക്ക് പ്രത്യേക ശ്രദ്ധ കൊടുന്നതിന് അദ്ധ്യാപകർ പ്രത്യേകം ശ്രദ്ധിക്കുന്നു.

എക്‌സ്‌ട്രാ ക്ലാസ്സ്

ശനിയാഴ്ച ദിവസങ്ങളിൽ ഹൈസ്കൂൾ വിഭാഗത്തിൽ എക്‌സ്‌ട്രാ ക്ലാസ്സുകളും യു പി, എൽ പി വിഭാഗങ്ങളിൽ പഠനത്തിൽ പിന്നാക്കം നിൽക്കുന്നവർക്കായി പ്രത്യേക പരിശീലനവും നൽകുന്നു

ബെസ്റ്റ് ക്ലാസ്

എൽ പി, യു പി, എച്ച് എസ് വിഭാഗങ്ങളിലെ ഏറ്റവും നല്ല ക്ലാസ്സിനെ കണ്ടെത്തി സമ്മാനം നൽകുന്നു. മാനദണ്ഡം അച്ചടക്കം, ശുചിത്വം

ബെസ്റ്റ് സ്റ്റുഡന്റ്സ്

ഓരോ ഡിവിഷനിലും പാഠ്യ രംഗത്തും പാഠ്യേതര രംഗത്തും പെരുമാറ്റത്തിലും മൂല്യാധിഷ്ഠിത പ്രവർത്തനം കാഴ്ച വയ്ക്കുന്ന, മറ്റുള്ള കുട്ടികൾക്ക് മാതൃകയാകുന്ന - കുട്ടികളെ കണ്ടെത്തുന്നു. ക്ലാസ്സ് ടീച്ചർമാരുടെയും മറ്റ് അദ്ധ്യാപകരുടേയും മേൽനോട്ടത്തിലാണ് കുട്ടികളെ തിരഞ്ഞടുക്കുന്നത്. തെരഞ്ഞെടുക്കപ്പെടുന്ന കുട്ടികൾക്ക് സ്കൂൾ വാർഷികത്തോടനുബന്ധിച്ച് മൊമന്റോ നൽകി ആദരിക്കുന്നു

ഇംഗ്ലീഷിൽ പ്രാവീണ്യം നേടൽ

ഇംഗ്ലീഷിൽ സംസാരിക്കുന്നതിനും ആശയവിനിമയം നടത്തുന്നതിനുമായി കുട്ടികൾക്ക് പ്രത്യേക പരിശീലനം നൽകുന്നു. അതിനായി സ്പോക്കൺ ഇംഗ്ലീഷ് ക്ലാസ്സുകളും കമ്യൂണിക്കേറ്റീവ് ഇംഗ്ലീഷ് ക്ലാസ്സുകളും നടത്തുന്നു. ഡിബേറ്റ്, സ്കിറ്റ്, സ്പീച്ച് എന്നിവ ഇംഗ്ലീഷിൽ നടത്തി കുട്ടികൾക്ക് ആത്മവിശ്വാസം പ്രദാനം ചെയ്യുന്നു

ക്വിസ് മത്സരം

കുട്ടികളിൽ പൊതു വി‍ജ്ഞാനം വർദ്ധിപ്പിക്കുക എന്ന ലക്ഷ്യത്തോടെ ഓരോ ദിനാചരണങ്ങളിലും എല്ലാ കുട്ടികളെയും ഉൾപ്പെടുത്തി ക്വിസ്സ് മത്സരങ്ങൾ നടത്തുകയും വിജയികൾക്ക് സമ്മാനങ്ങൾ വിതരണം ചെയ്യുകയും ചെയ്യുന്നു.

വായനാമൂല

ഓരോ ക്ലാസ്സുകളിലും ക്ലാസ്സ് ലൈബ്രറികൾ ഒരുക്കുകയും വായനാമൂല ക്രമീകരിക്കുകയും ചെയ്യുന്നു. കുട്ടികൾ തങ്ങളുടെ ഫ്രീ സമയങ്ങൾ പുസ്തക വായനക്കായി ഉപയോഗിക്കുകയും ചെയ്യുന്നു

ഗ്രൂപ്പ് സ്റ്റഡി

കുട്ടികളുടെ സംഘടിത പഠനം ഏറെ പ്രധാനപ്പെട്ട ഒന്നാണ്. ഓരോ ക്ലാസ്സിലും കുട്ടികളെ പത്ത് പേരടങ്ങുന്ന ഒരു ഗ്രൂപ്പായി തിരിക്കുകയും അവരിൽ നിന്നും ഒരു ലീഡറിനെ തെരഞ്ഞെടുക്കുകയും ചെയ്യുന്നു. ഈ ലീഡറിന്റെ നേതൃത്വത്തിൽ കുട്ടികൾ ഗ്രൂപ്പ് പഠനം നടത്തുന്നു.

മന്ത്‌ലി ടെസ്റ്റ് - പ്രോഗ്രസ് റിപ്പോർട്ട്

അധ്യയന വർഷത്തിന്റെ ആരംഭം മുതൽ അവസാനം വരെ ഓരോ മാസവും കുട്ടികൾക്കായി ക്ലാസ്സ് ടെസ്റ്റുകൾ നടത്തുകയും മാർക്കുകളും ഗ്രേഡുകളും പ്രോഗ്രസ് റിപ്പോർട്ടിലേയ്ക്ക് എഴുതുകയും ചെയ്യുന്നു. ഇതുവഴി വളരെ എളുപ്പത്തിൽ കുട്ടിയുടെ പഠന പുരോഗതി വിലയിരുത്താൻ കഴിയുന്നു

ടേം മൂല്യനിർണയം

ഓരോ ടേമിലും കുട്ടികൾക്കായി പരീക്ഷകൾ നടത്തുകയും മാർക്കുകളും ഗ്രേഡുകളും പ്രോഗ്രസ് റിപ്പോർട്ടിലേയ്ക്ക് എഴുതുകയും ചെയ്യുന്നു. ക്ലാസ്സ് പി ടി എ നടത്തി കുട്ടികളുടെ പഠന പുരോഗതി രക്ഷിതാക്കളെ അറിയിക്കുകയും ചെയ്യുന്നു

ഹെൽപ്പ് ഗ്രൂപ്പ്

പഠനത്തിൽ പിന്നാക്കം നിൽക്കുന്ന കുട്ടികൾക്കായി, കുട്ടികളുടെ നേതൃത്വത്തിൽ ഒരു ഹെൽപ്പ് ഗ്രൂപ്പ് പ്രവർത്തിക്കുന്നു.

സ്കൂൾ പാർലമെന്റ്

ജനാധിപത്യ രീതിയിൽ ഒരോ ക്ലാസ്സിൽ നിന്നും ക്ലാസ്സ് ലീഡറിനെ തെരഞ്ഞെടുക്കുകയും സ്കൂൾ പാർലമെന്റ് ഒരുമിച്ചു ചേരുകയും ചെയ്യുന്നു. എസ് ആർ ജി കുട്ടികളുടെ പഠന നിലവാരം ഉയർത്തുന്നതിനായി വിഷയാടിസ്ഥാനത്തിൽ അദ്ധ്യാപകർ മാസം തോറും ഒരുമിച്ചുകൂടി പഠന വിഭവങ്ങൾ തയ്യാറാക്കുകയും അദ്ധ്യാപകർ തങ്ങളുടെ മികവ് വികസിപ്പിക്കുന്നതിനുള്ള ഒരു വേദിയായി എസ് ആർ ജിയെ മാറ്റുകയും ചെയ്യുന്നു

അദ്ധ്യാപക ദിനം -ആഘോഷമാക്കി

എല്ലാ അദ്ധ്യയന വർഷവും അദ്ധ്യാപക ദിനം കുട്ടികളുടെ നേതൃത്വത്തിൽ ഏറെ സന്തോഷത്തോടെ ആഘോഷിക്കുന്നു. ക്ലാസ്സ് ലീഡർമാരുടെ നേതൃത്വത്തിലാണ് അന്നത്തെ എല്ലാ പരിപാടികളും ക്രമീകരിക്കുന്നത്. കുട്ടികളെല്ലാം ചേർന്ന് അന്നേ ദിവസം അവിസ്മരണീയമാക്കി തീർക്കുന്നു

ക്ലബ്ബ് പ്രവർത്തനങ്ങൾ

കുട്ടികൾക്ക് നേതൃപാടവവും വിവിധ വിഷയങ്ങളിലെ പരിജ്ഞാനവും കൂടുതലായി ലഭിക്കുന്നതിന് വിവിധ ക്ലബ്ബ് പ്രവർത്തനങ്ങൾ സഹായിക്കുന്നു സ്കൂൾ വാർഷികാഘോഷം എല്ലാ വർഷത്തേയും പോലെ ഈ വർഷവും സ്കൂൾ വാർഷികാഘോഷം വർണ്ണശബളമായിരുന്നു. മഹാത്മാഗാന്ധി യൂണിവേഴ്സിറ്റി മുൻ വൈസ് ചാൻസലർ ഡോ. സിറിയക് തോമസായിരുന്നു ഞങ്ങളുടെ മുഖ്യാതിഥി. അദ്ദേഹത്തിന്റെ മുഖ്യ പ്രഭാഷണം അദ്ധ്യാപകരേയും കുട്ടികളേയും രക്ഷിതാക്കളേയും ഇരുത്തി ചിന്തിപ്പിക്കുന്നതായിരുന്നു. സ്കൂൾ വാർഷികാഘോഷങ്ങളിൽ കുട്ടികളുടേയും പൂർവ്വ വിദ്യാർത്ഥികളേടേയും രക്ഷിതാക്കളുടെയും പങ്കാളിത്തം പ്രശംസനീയമാണ്. കണ്ണിനും കാതിനും കുളിരേകുന്ന ധാരാളം പരിപാടികളുമുണ്ടായിരുന്നു

അക്കാദമിക മികവ്

ഈ അധ്യയന വർഷത്തിൽ പത്താം ക്ലാസ്സിൽ 236 കുട്ടികളാണ് പരീക്ഷ എഴുതിയത്. 100% വിജയത്തോടൊപ്പം 35 കുട്ടികൾക്ക് ഫുൾ എ പ്ലസും 20 കുട്ടികൾക്ക് 9 വിഷയങ്ങൾക്ക് എ പ്ലസും ലഭിച്ചു. എൽ എസ് എസ് സ്കോളർഷിപ്പ് 23 കുട്ടികൾക്ക് ലഭിച്ചു. യു എസ് എസ് സ്കോളർഷിപ്പ് 3 കുട്ടികൾക്കും ലഭിച്ചു. ഹയർ സെക്കൻഡറി വിഭാഗത്തിൽ സയൻസ് -കൊമേഴ്സ് ഗ്രൂപ്പുകളിലായി 480 കുട്ടികളാണ് പരീക്ഷ എഴുതിയത്. 29 കുട്ടികൾക്ക് ഫുൾ എ പ്ലസ് നേടാൻസാധിച്ചു. സയൻസ് വിഭാഗത്തിൽ ഐശ്വര്യ മോഹൻ എന്ന കുട്ടി 1200/1200 ഉം അക്ഷയ പ്രദീപ് 1198/1200 ഉം അപർണ എസ് 1197/1200 മാർക്ക് നേടി ഫാത്തിമ മാതയുടെ അഭിമാനമായി

പാഠ്യേതര പ്രവർത്തനങ്ങൾ

ലിറ്റിൽ കൈറ്റ്സ്

കേരളത്തിലെ പൊതുവിദ്യാലയങ്ങളിൽ ഐ.ടി അധിഷ്ഠിത പ്രവർത്തനങ്ങൾക്ക് നേതൃത്വം നൽകുന്ന കൈറ്റിനു കീഴിൽ ഫാത്തിമ മാതാ ഗേൾസ് ഹയർ സെക്കണ്ടറി സ്കൂളിൽ ലിറ്റിൽ കൈറ്റ്സ് പ്രവർത്തനങ്ങൾ വളരെ വിപുലമായ രീതിയിൽ നടക്കുന്നു.ഈ പദ്ധതിയിൽ സ്കൂളിലെ ഒൻപതാം ക്ലാസ് വിദ്യാർത്ഥിനികളായ 35 കുട്ടികൾ പങ്കെടുക്കുന്നു. യൂണിറ്റ് ലീഡറായി കുമാരി മന്ന ജോർജും ഡപ്യൂട്ടി ലീഡറായി ദിയ ഷജീറും പ്രവർത്തിക്കുന്നു. കൈറ്റ് മിസ്‌ട്രസ്സുമാരായി സി. ഷിജിമോൾ സെബാസ്റ്റ്യൻ, ശ്രീമതി റീന ജെയിംസ് എന്നിവർ പ്രവർത്തിക്കുന്നു. ചെയർമാൻ - ശ്രീ ബിനു ആന്റണി, കൺവീനർ - സി. ലാലി മാണി, വൈസ് ചെയർമാൻമാരായി ശ്രീമതി ലിജ ജോയിസൺ, ശ്രീ സുനീർ കാരിമറ്റം എന്നിവരും പ്രവർത്തിക്കുന്നു. ലിറ്റിൽ കൈറ്റ്സിൽ അംഗങ്ങളായിട്ടുള്ള കുട്ടികളുടെ ആദ്യഘട്ട പരിശീലനം 2018 ജൂൺ മാസത്തിൽ നടന്നു. ഹൈടെക് സ്കൂൾ, ലിറ്റിൽ കൈറ്റ്സ് അടിസ്ഥാന ധാരണകൾ, ഹൈടെക് സ്കൂൾ ഉപകരണങ്ങൾ – ട്രബിൾഷൂട്ടിംഗ്സ്ക്രാച്ച് സോഫ്റ്റ്‌വെയർ, മൊബൈൽ ഗെയിം പ്രോഗ്രാമിംഗ് എന്നിവയിലാണ് കുട്ടികൾക്ക് പരിശീലനം ലഭിച്ചത്. കുട്ടികൾ ഏറെ സന്തോഷത്തോടെ പുതു അറിവുകൾ നേടുകയും ക്ലാസ്സുകളിലെ മറ്റുകുട്ടികൾക്കായി തങ്ങൾ നേടിയ ശേഷികൾ പങ്ക് വയ്ക്കുകയും ചെയ്തു. ജൂലൈ മാസത്തിൽ നടന്ന രണ്ടാം ഘട്ട പരിശീലനത്തിൽ ഗ്രാഫിക്സ്, ആനിമേഷൻ എന്നീ മേഖലയിലാണ് കുട്ടികൾ പരിശീലനം നേടിയത്. മാനുഷീക മൂല്യങ്ങളോടൊപ്പം സാങ്കേതിക വിദ്യയിലും മികച്ച നിലവാരം പുലർത്തുന്ന ഒരു തലമുറയെ വളർത്തിയെടുക്കുന്നതിനായി കൈറ്റ് ആരംഭിച്ചിരിക്കുന്ന ഈ സംരംഭം പരമാവധി പ്രയോജനപ്പെടുത്താൻ ഫാത്തിമ മാതയിലെ കുട്ടികൾ പ്രതിജ്ഞാബദ്ധരാണ്.

സ്കൗട്ട് & ഗൈഡ്സ്

ഭാരത് സ്കൗട്ട് ആൻഡ് ഗൈഡ് സ്ഥാപകനായ ബേഡൽ പവൽ വിഭാവനം ചെയ്ത ഉദ്യേശ്യം, തത്വങ്ങൾ, രീതി എന്നിവയ്ക്കനിസൃതമായി പരിശീലനം നടത്തുന്ന ഒരു സ്കൗട്ട് ട്രൂപ്പും ഗൈഡ് ഗ്രൂപ്പും ഞങ്ങളുടെ സ്കൂളിൽ പ്രവർത്തിക്കുന്നു. വ്യക്തിത്വ വികസനത്തിലൂടെ അച്ചടക്കമുള്ളവരായി സമൂഹത്തിൽ കൊള്ളാവുന്ന കുട്ടികളായി മാറാൻ പ്രസ്ഥാനം സഹായകരമാകുന്നു. പരിസര ശുചീകരണം, മരത്തെ നട്ട് സംരക്ഷിക്കൽ , പച്ചക്കറികൃഷി എന്നിവയിലൂടെ വ്യക്തിത്വ വികസനവും സാമൂഹീക പ്രതിബദ്ധതയും കുട്ടികളിൽ വളർന്നുവരാൻ സഹായിക്കുന്നു. ഞങ്ങളുടെ സ്കൂളിൽ നിന്നും രാഷ്ട്രപതി ഗൈഡ് അവാർഡിനായുള്ള ടെസ്റ്റിൽ 4 കുട്ടികൾ പങ്കെടുത്തു. പത്ത് കുട്ടികൾ രാജ്യപുരസ്കാർ നേടി. വിവിധ ഘട്ടങ്ങളിലായി 32 കുട്ടികൾ പരിശീലനം നേടുന്നു.

ജൂണിയർ റെഡ്ക്രോസ്

ജീവ കാരുണ്യം, പൗരബോധം, വ്യക്തിത്വ വികസനം, ആരോഗ്യം എന്നീ മേഖലകളിൽ ശ്രദ്ധ പതിപ്പിച്ച് സേവനം ലക്ഷ്യമാക്കി ഞങ്ങളുടെ സ്കൂളിലെ ജെ ആർ സി യൂണിറ്റ് വളരെ ക്രിയാത്മകമായി പ്രവർത്തിക്കുന്നു. എൽ പി, യു പി, എച്ച് എസ് വിഭാഗങ്ങളിലായി നൂറോളം കുട്ടികൾ ഈ ക്ലബ്ബിൽ പ്രവർത്തിക്കുന്നു. എല്ലാ വെള്ളിയാഴ്ചയും ജെ ആർ സി കുട്ടികൾ പ്രത്യേക യൂണിഫോം ധരിച്ച് സ്കൂളും പരിസരവും വൃത്തിയാക്കുന്നു. അപരന്റെ വേദന സ്വന്തം വേദനയായി കണ്ട് പുവർ ഫണ്ട് കളക്ഷൻ നടത്തുകയും ചികിത്സാസഹായം തേടുന്ന കുട്ടികൾക്ക് ആവശ്യാനുസരണം വിതരണം ചെയ്യുകയും ചെയ്യുന്നു. ഞങ്ങളുടെ അടുത്തുള്ള അനാഥാലയങ്ങളും ഗവൺമെന്റ് ആശുപത്രികളും സന്ദർശിച്ച് ഭക്ഷണവും വസ്ത്രവും വിവിധ ഉപയോഗ സാധനങ്ങളും വിതരണം ചെയ്യുന്ന ഈ കുട്ടികൾ നാടിന്റെ നൻമയും പ്രതീക്ഷയുമാണ്. സാമൂഹ്യ തിന്മകൾക്കെതിരെ ചുവർ പത്രികകൾ തയ്യാറാക്കിയും , മുദ്രാവാക്യ ഗീതങ്ങളും പ്ലക്കാർഡുകൾ തയ്യാറാക്കിയും റാലികൾ നടത്തി ഇവർ മറ്റ് കുട്ടികൾക്കും സമൂഹത്തിനും മാതൃകയായി മാറുന്നു.സ്കൂളുകളിൽ നടത്തുന്ന വിവിധ കർമ്മപരിപാടികൾക്ക് ജെ ആർ സി കുട്ടികൾ നേതൃത്വം നൽകുകയും നല്ല നേതൃത്വപാടവമുള്ളവരായി മാറുകയും ചെയ്യുന്നു. ജെ ആർ സി കുട്ടികൾക്കായി നടത്തുന്ന എ, ബി, സി ലെവൽ പരീക്ഷകളിൽ ഞങ്ങളുടെ എല്ലാകുട്ടികളും ഉന്നത വിജയം കരസ്ഥമാക്കുന്നു. ഞങ്ങളുടെ കുട്ടികൾ ഫസ്റ്റ് എയ്ഡിൽ പരിശീലനം ആർജ്ജിക്കുകയും എൽ പി, യു പി എച്ച് എസ് വിഭാഗങ്ങളിലേയ്ക്ക് ഫസ്റ്റ് എയ്ഡ് ബോക്സുകൾ തയ്യാറാക്കി നൽകുകയും ചെയ്തു. ഞങ്ങളുടെ സ്കൂളിലെ ജൈവവൈവിധ്യ പാർക്കിനെ മനോഹരമാക്കാൻ ജെ ആർ സി കുട്ടികൾ തങ്ങളുടെ കഴിവിന്റെ പരമാവധി ശ്രമിക്കുന്നു.കുട്ടികളിൽ നിന്നും വസ്ത്രങ്ങൾ, സോപ്പ്, പേസ്റ്റ്, ബ്രഷ് എന്നിവ ശേഖരിച്ച് ജൂണിയർ റെഡ്ക്രോസിൽ പ്രവർത്തിക്കുന്ന കുട്ടികൾ അദ്ധ്യാപകരുടെ സഹായത്തോടെ ഓർഫനേജുകളിലും അഗതി മന്ദിരങ്ങളിലും എത്തിക്കുന്നു.

ബാന്റ് ട്രൂപ്പ്

സ്കൂളിലെ ഇരുപതോളം കുട്ടികൾ ബാന്റ് ട്രൂപ്പിൽ പ്രവർത്തിക്കുന്നു. അച്ചടക്കം, ഏകാഗ്രത എന്നിവയിൽ പ്രത്യേക പരിശീലനം ലഭിക്കുകയും ബാന്റിൽ മികവ് നേടുകയും ചെയ്യുന്നു. സബ്ജില്ലാ, ജില്ലാ കലോത്സവങ്ങളിലെ സ്ഥിരം സാന്നിദ്ധ്യമാണ് ഫാത്തിമ മാതയിലെ കുട്ടികളുടെ ബാന്റ് ട്രൂപ്പ്

ജൈവ വൈവിധ്യ പാർക്ക്

ജൈവവൈവിധ്യത്തിന്റെ സംരക്ഷണവും അതിന്റെ സുസ്ഥിരമായ പരിപാലനവും നിലനിൽപ്പിന്റെ അവിഭാജ്യ ഘടകങ്ങളിലൊന്നാണ്. പരിസ്ഥിതിയിലും കാലാവസ്ഥയിലും മാറിമാറി സംഭവിക്കുന്ന വ്യതിയാനങ്ങൾക്കൊപ്പം ഭൂമിശാസ്ത്ര സാംസ്കാരിക പ്രത്യേകതകളും കൂടി ചേർന്ന് എല്ലാ തലങ്ങളിലും ജീവശാസ്ത്രപരമായ ഒരു വൈവിധ്യമാണ് നിലനിൽക്കുന്നത്.ഞങ്ങളുടെ സ്കൂളിലും വളരെ മനോഹരമായ ജൈവവൈവിധ്യ പാർക്ക് തയ്യാറാക്കിയിട്ടുണ്ട്. വൃക്ഷങ്ങളും ചെറുവൃക്ഷങ്ങളും, കുറ്റിച്ചെടികളും, ഫലവൃക്ഷങ്ങളും , വള്ളിപ്പടർപ്പുകളും , പടർന്നുവളരുന്ന ചെടികളും, പൂച്ചെടികളും ഒക്കെയായി ആരെയും ആകർഷിക്കുന്ന ജൈവവൈവിധ്യപാർക്ക്. 15 സെന്റ് സ്ഥലത്താണ് ഈ പാർക്ക് സ്ഥിതിചെയ്യുന്നത്. ജൈവവൈവിധ്യ പാർക്കിനായി മാറ്റി വച്ചിരിക്കുന്ന 15 സെൻറ് സ്ഥലത്ത് വിവിധ സസ്യങ്ങൾ നട്ടു നനച്ചു പരിപാലിച്ചു വരുന്നു. ജൈവവൈവിധ്യ ഉദ്യാനത്തിന്റെ ചുമതലയുള്ള അധ്യാപകരുടെ മേൽനോട്ടത്തിൽ, നേച്ചർ ക്ലബിന്റെ സഹകരണത്തോടെ പാർക്കിന്റെ പ്രവർത്തനങ്ങൾ സുഗമമായി നടന്നു വരുന്നു. വിവിധ പൂച്ചെടികൾ, ശലഭ പാർക്ക്, ചെറു മരങ്ങൾ, ഔഷധസസ്യങ്ങൾ, കള്ളിമുൾച്ചെടി, മുളക്കൂട്ടം, ഫലവൃക്ഷങ്ങൾ, വള്ളിച്ചെടികൾ, ആമക്കുളം, ആമ്പൽകുളം, മീൻകുളം, പക്ഷിക്കൂട് ഇവയെല്ലാം പരിമിതമായ സ്ഥലത്തു ക്രമീകരിച്ചിട്ടുണ്ട്. ശലഭ പാർക്കിൽ ശലഭങ്ങളെ പ്രത്യേകം ആകർഷിക്കുന്ന തരത്തിലുള്ള മെലസ്ട്രോമ, ചെമ്പരത്തി, ചെത്തി, കോസ്മോസ്, ജമന്തി, അരളി, സൗഗന്ധികം, ദശപുഷ്പങ്ങൾ, കൊങ്ങിണി തുടങ്ങിയ ചെടികൾ സുലഭമായുണ്ട്. ഇവിടെ ശലഭങ്ങളും, തുമ്പികളും, ചിലതരം പക്ഷികളും എപ്പോഴും ഉണ്ട്. വിവിധതരം ഔഷധസസ്യങ്ങളുടെ കലവറ തീർക്കാനുള്ള ശ്രമത്തിലാണ്. ഇപ്പോൾ അശോകം, അമൃത്, ആടലോടകം, ആവണക്ക്, ഉങ്ങ്, എരുക്ക്, കയ്യോന്നി,കറിവേപ്പ്, കരിനെച്ചി, കറ്റാർ വാഴ, കാറ്റെക്സ്, കീഴാർനെല്ലി, കുറുന്തോട്ടി, കല്ലുരുക്കി, കൂവളം, കുടകൻ, ചെമ്പരത്തി, തഴുതാമ, തിപ്പലി, തുമ്പ, തുളസി, ചെത്തി, തെച്ചി, തൊട്ടാവാടി, നന്ത്യാർവട്ടം, നീലയമരി, നെല്ലി, പനിക്കൂർക്ക, ചുമക്കൂർക്ക, പുളിയാറില, പൂവാംകുരുന്നില, ബ്രഹ്മി, മുക്കുറ്റി, മുയൽചെവിയൻ, മുറികൂട്ടി, മുത്തങ്ങ, മുരിങ്ങ, മൈലാഞ്ചി, രാമച്ചം, വിഷ്ണുക്രാന്തി, ശതാവരി, ശംഖുപുഷ്പം, മഞ്ഞൾ, വെളുത്തുള്ളി, ചതുരമുല്ല, പാഷൻഫ്രൂട്ട് എന്നിങ്ങനെ ധാരാളം ഔഷധസസ്യങ്ങൾ പരിപാലിച്ചുവരുന്നു.സ്ട്രോബറി, വെൽവെറ്റ് ആപ്പിൾ, മുള്ളാത്ത, മുന്തിരി, പാഷൻഫ്രൂട്ട്, ഓറഞ്ച്, നെല്ലി, മാവ്, അത്തി, ചെറുനാരകം, മംഗോസ്റ്റിൻ, മാതളം, റംബുട്ടാൻ, ബട്ടർ ഫ്രൂട്ട്, ചാമ്പ, കശുമാവ്, പേര, മാതളനാരകം, ലൂബിക്ക എന്നീ ഫലവൃക്ഷങ്ങളും ഉദ്യാനത്തിലും പരിസരത്തുമായി പരിപാലിക്കുന്നു.ആമയുടെ ആകൃതിയിൽ നിർമ്മിച്ചിരിക്കുന്ന ആമക്കുളത്തിലും ചെറിയ ആമ്പൽക്കുളത്തിലും ഗപ്പി മത്സ്യങ്ങളും, ചെറുമത്സ്യങ്ങളും, തവളകളും കൂടാതെ വിരിഞ്ഞു നില്ക്കുന്ന ആമ്പൽപ്പൂക്കളും ധാരാളം ഉണ്ട്. കൊച്ചുകുഞ്ഞുങ്ങളുടെ ആകർഷണ കേന്ദ്രമാണീ വർണ്ണക്കാഴ്ചകൾ. ജൈവവൈവിധ്യ ഉദ്യാനത്തോടു ചേർന്നുള്ള മീൻകുളത്തിൽ തീലാപ്പിയ, നട്ടർ, വാള, ഗൗര, ഗപ്പി എന്നീ മത്സ്യങ്ങൾ ധാരാളം ഉണ്ട്. ഈ കുളത്തിലെ വെള്ളം പ്രയോജനപ്പടുത്തി അക്വാപോണിക്സ് കൃഷിരീതി അവലംബിക്കാനുള്ള പ്രാരംഭ നടപടികൾ തുടങ്ങിക്കഴിഞ്ഞു. ലൗ ബേഡ്സ്, കുരുവികൾ എന്നീ അലങ്കാര പക്ഷികളുടെ കളകൂജനങ്ങളാൽ ശബ്ദ മുഖരിതമാണ് ഉദ്യാനം. സ്വാഭാവിക പ്രജനനത്തിലൂടെ വംശവർദ്ധനവ് നടത്തി ഇവ പെരുകുന്നു. ഇവയുടെ വിവിധവർണ്ണങ്ങളും, കലപിലകളും, കുഞ്ഞുങ്ങളെ ഇവരുടെ നിത്യസന്ദർശകരാക്കുന്നു. ജൈവ വൈവിധ്യ ഉദ്യാനത്തിൽ ഏതാണ്ട് ഇരുപത്തിയഞ്ച് കടയോളം സ്ട്രോബെറി ചെടികൾ നട്ടുപിടിപ്പിച്ചിട്ടുണ്ട്. മത്സ്യക്കുളത്തോടും പക്ഷിക്കൂടിനോടും ചേർന്ന സ്ഥലത്തായതിനാൽ കുട്ടികൾ ഇവയെ നിരീക്ഷിക്കുകയും പഠന വിഷയമാക്കുകയും ചെയ്യുന്നു.സ്കൂളിന്റെ പരിസരങ്ങളിലും ജൈവവൈവിധ്യ ഉദ്യാനത്തിലും വിവിധയിനം മുളകൾ നട്ടുപിടിപ്പിച്ചിരിക്കുന്നു.പലതരത്തിലുള്ള കാറ്റെക്സുകൾ ഇവിടെ ധാരാളമായി നട്ടുപിടിപ്പിച്ചിരിക്കുന്നു. ഭൂപ്രകൃതിയനുസരിച്ച്, സ്കൂളിന്റെ വിവിധ ഇടങ്ങളിലായി പരിപാലിക്കപ്പെട്ടിരിക്കുന്ന വൃക്ഷലതാദികളാൽ സ്കൂൾ പരിസരം ഹരിതാഭമാണ്. വിവിധ ഇലച്ചെടികളും, വള്ളിച്ചെടികളും, മനോഹാരിത വർദ്ധിപ്പിക്കുന്നു. ഉദ്യാനം സംരക്ഷിക്കുന്നതിൽ കുട്ടികൾക്ക് നല്ല ശ്രദ്ധയുണ്ട്. 2018-19 അദ്ധ്യയന വർഷത്തിൽ മികച്ച ജൈവവൈവിധ്യ പാർക്കുകളിലൊന്നായി ഫാത്തിമ മാതായുടെ ജൈവവൈവിധ്യ പാർക്ക് തെരഞ്ഞെടുക്കപ്പെട്ടു എന്നത് ഏറെ സന്തോഷം പകരുന്നു

കാരുണ്യ ഫണ്ട്

ജെ ആർ സിയിൽ പ്രവർത്തിക്കുന്ന കുട്ടികളുടെ നേതൃത്വത്തിൽ എല്ലാ വെള്ളിയാഴ്ചയും ഓരോ ക്ലാസ്സിലെ കുട്ടികളിൽ നിന്നും ഫണ്ട് ശേഖരിക്കുന്നു. കാരുണ്യ ഫണ്ട് എന്ന പേരിൽ അറിയപ്പെടുന്ന പുവർ ഫണ്ട് കളക്ഷനിൽ ഏറെ സന്തോഷത്തോടെ കുട്ടികൾ സഹകരിക്കുന്നു. സ്കുളിലെ തന്നെ നമിർധനരായ കുട്ടികളെ സഹായിക്കാനാണ് ഇത് പ്രയോജനപ്പെടുത്തുന്നത്.

ക്ലീൻ ക്യാംപസ് - ഗ്രീൻ ക്യാപസ്

സ്കുളും പരിസരവും ക്ലാസ്സ് മുറികളും വൃത്തിയായും പ്ലാസ്റ്റിക് രഹിതമായും സൂക്ഷിക്കാൻ പ്രത്യേക ശ്രദ്ധപതിപ്പിക്കുന്നു ഹരിത വിമല വിദ്യാലയം സ്കൂൾ പരിസരങ്ങളിൽ പൂച്ചെടികളും കൊച്ചുമരങ്ങളും നട്ടുപിടിപ്പിച്ച് മനേഹരമാക്കാൻ പ്രത്യേക ശ്രദ്ധപതിപ്പിക്കുന്നു

കരാട്ടെ

വിദ്യാർഥികൾക്ക് മനസ്സിനും ശരീരത്തിനും കരുത്തും ആത്മവിശ്വാസവും നൽകി പഠനമികവു നേടുന്നതിനായി കരാട്ടെ പരിശീലനം നടത്തിവരുന്നു

തായ്ക്കോണ്ട

സ്പോർട്സ് കൗൺസിലിന്റെ സഹായത്തോടെ, ഫാത്തിമ മാതാ സ്കൂളിൽ തായ്ക്കോണ്ട പരിശീലനം നടക്കുന്നു.കുട്ടികളുടെ സ്വയം പ്രതിരോധ പദ്ധതിയായ തായ്ക്കോണ്ടയിൽ ഈ അധ്യയന വർഷം അൻപതോളം കുട്ടികൾ പരിശീലനം നടത്തുന്നു.കഴിഞ്ഞ അദ്ധ്യയന വർഷത്തിൽ 18 കുട്ടികൾ സബ്ജില്ലാ മത്സരത്തിൽ പങ്കെടുക്കുകയും 12 കുട്ടികൾ ജില്ലാതലമത്സരത്തിലേയ്ക്ക് യോഗ്യത നേടുകയും ചെയ്തു. 8 കുട്ടികൾ സംസ്ഥാനതലത്തിൽ പങ്കെടുത്ത് സമ്മാനങ്ങൾ നേടി.ഈ അദ്ധ്യയന വർഷവും ധാരാളം കുട്ടികൾ തായ്ക്കോണ്ടയിൽ പരിശീലനം നേടുന്നു

യോഗ

കുട്ടികളുടെ കായിക ക്ഷമത മെച്ചപ്പെടുത്തുന്നതിനും ശരിര ഘടന രൂപീകരണത്തിനും യോഗാസനങ്ങളുടെ പ്രാധാന്യം വളരെ വലുതാണ്. കാര്യക്ഷമമായ രീതിയിൽ യോഗ പരിശീലനത്തിലൂടെ ദൈനംഗിന ജീവിതത്തിൽ ഉണ്ടാകാവുന്ന പല രോഗങ്ങളും മാറ്റാൻ കഴിയും. നല്ല ആരോഗ്യം, മനസ്സിന്റെ സന്തുലനം, ആത്മ സാക്ഷാത്ക്കാരം എന്നിവനേടിയെടുക്കാനും മനസിനെ നിയന്ത്രിക്കാനും വികസിപ്പിക്കാനുമുള്ള ക്രമാനുഗതമായ പ്രവർത്തനമാണ് യോഗ. ഫാത്തിമ മാതാ സ്കൂളിലും കുട്ടികൾക്ക് യോഗ ക്ലാസ്സുകൾ നൽകുന്നു.

പരിശീലനം കലയുടെ മികവിനായി...

നൃത്തം, സംഗീതം, അഭിനയം, ചിത്രരചന എന്നിവയിൽ അഭിരുചിയുള്ള കുട്ടികളെ കണ്ടെത്തി പ്രത്യേക പരിശീലനം നൽകുന്നു

വിനോദത്തിലൂടെ വിജ്ഞാനം

എല്ലാ വർഷവും ക്ലാസ്സടിസ്ഥാനത്തിൽ കുട്ടികളെ വിനോദയാത്രയ്ക്ക് കൊണ്ടുപോകുന്നു. കുട്ടികൾക്ക് കൂടുതൽ സ്ഥലങ്ങൾ അടുത്തറിയാനും വിവിധ സംസ്കാരങ്ങൾ മനസ്സിലാക്കുവാനും കൂടുതൽ വിജ്ഞാനം ആർജ്ജിച്ചെടുക്കുവാനും സാധിക്കുന്നു. അതുവഴി സാമൂഹ്യപ്രതിബദ്ധത വളർത്തിയെടുക്കുവാനും സാധിക്കുന്നു

ശലഭ പാർക്ക്

ചിത്രശലഭങ്ങളെ ആകർഷിക്കുന്ന ചെടികൾ പൂന്തോട്ടങ്ങളിൽ നട്ടു പരിപാലിക്കുകയും ധാരാളം ചിത്രശലഭങ്ങൾ തേൻ നുകരാനായി പൂന്തോട്ടങ്ങളിലേക്കെത്തുകയും ചെയ്യുന്നു.

ലാസ് മാഗസിൻ

ഒന്നു മുതൽ പത്ത് വരെയുള്ള ക്ലാസ്സുകളിലെ കട്ടികൾക്കായി ക്ലാസ്സടിസ്ഥാനത്തിൽ ക്ലാസ്സ് മാഗസിൻ തയ്യാറാക്കൽ മത്സരം നടത്തുന്നു. എൽ പി, യുപി എച്ച് വിഭാഗങ്ങളായി തരംതിരിച്ച് ഏറ്റവും മികച്ച ക്ലാസ്സ് മാഗസിനുകൾക്ക് സമ്മാനങ്ങൾ വിതരണം ചെയ്യുന്നു

കെ സി എസ് എൽ

മൂല്യബോധവും ധാർമ്മിക നിഷ്ഠയുമുള്ള ഒരു തലമുറയെ വാർത്തെടുക്കുന്നതിൽ ഫാത്തിമ മാതാ എന്നും ബദ്ധശ്രദ്ധയാണ്. അതിനായി കെ സി എസ് എൽ പോലുള്ള സംഘടനകൾ സ്കൂളിൽ പ്രവർത്തിക്കുന്നു. കെ സി എസ് എൽ ന്റെ നേതൃത്വത്തിൽ ബോധവൽക്കരണ ക്ലാസ്സുകളും മൂല്യ ബോധം നൽകുന്ന ക്ലാസ്സുകളും നടത്തപ്പെടുന്നു. നിർദ്ധനരായ കുട്ടികളെ സഹായിക്കുന്നതിനും അവരെ സാമ്പത്തികമായി സഹായിക്കുന്നതിനും കെ സി എസ് എൽ എന്നും മുൻനിരയിൽതന്നെ.

വിദ്യാരംഗം കലാ സാഹിത്യ വേദി

കലാ സാഹിത്യ മേഖലകളിൽ നൈപുണ്യം നേടുവാൻ വിദ്യാരംഗം കലാസാഹിത്യവേദി നടത്തുന്ന എല്ലാ മത്സരങ്ങളിലും പങ്കെടുക്കുന്നു. സബ് ജില്ലാ - ജില്ലാ - സംസ്ഥാന തലങ്ങളിൽ മികച്ച വിജയം കൈവരിക്കുന്നു. വിദ്യാരംഗം കലാസാഹിത്യവേദിയുടെ നേതൃത്വത്തിൽ കഥാരചന, കവിതാരചന, ചിത്രരചന. തിരക്കഥ, അഭിനയം എന്നിവയിൽ പ്രത്യേക പരിശീലനം നൽകുന്നു. സ്വഭാവികവും തനിമയാർന്നതുമായ പ്രവർത്തനത്തിലൂടെ തിരക്കഥ എഴുതുവാനും അത് അഭിനയിക്കുവാനും കുട്ടികളെ തയ്യാറാക്കുന്നു. പ്രത്യേക അവസരങ്ങളിൽ അതിന് അവർ തയ്യാറായി ചെയ്യാൻ പ്രാപ്തരാക്കുകയും ചെയ്യുന്നു. വിദ്യാരംഗം കലാസാഹിത്യവേദിയുടെ നേതൃത്വത്തിൽ വായനാവാരം പുതുമ നിറഞ്ഞതാക്കുന്നു. കഥാരചന, കവിതാരചന, ചിത്രരചന, കവിതാപാരായണം, നാടൻപാട്ട്, പുസ്തകപ്രദർശനം, ക്വിസ് മത്സരങ്ങൾ എന്നിവ നടത്തി സമ്മാനം നൽകുന്നു

ഐ ടി ക്ലബ്ബ്

തുടർച്ചയയായി എല്ലാ വർഷവും യു പി, എച്ച്. എസ്, എച്ച് എസ് എസ് വിഭാഗങ്ങളിലായി ഉപ ജില്ലാ, ജില്ലാ ഐ റ്റി മേളയിൽ ഓവറോൾ ചാമ്പ്യൻമാർ. സംസ്ഥാന ഐ ടി മേളയിലെ സജീവ സാന്നിദ്ധ്യം. 5 വർഷത്തോളമായി കുട്ടികൾ സംസ്ഥാന ഐ റ്റി മേളയിൽ പങ്കെടുത്ത് മികച്ച ഗ്രേഡുകൾ സ്വന്തമാക്കുന്നു.

സയൻസ് ക്ലബ്

വിദ്യാർത്ഥികളുടെ ശാസ്ത്രാഭിമുഖ്യവും ക്രിയാത്മകതയും വർദ്ധിപ്പിച്ച് ശാസ്ത്രലോകത്തിന്റെ നാൾ വഴികളിൽ നാഴികകല്ലുകളായി തീരുവാൻ അവരെ പ്രാപ്തരാക്കുക എന്ന ഉദ്ദേശ്യത്തോടെ ശാസ്ത്ര അദ്ധ്യാപകരോടൊപ്പം വിദ്യാർത്ഥികളും തങ്ങളുടെ സർഗ്ഗവാസനകളെ പരിപോഷിപ്പിക്കുന്ന വേദിയാണ് ഫാത്തിമ മാതയുടെ ശാസ്ത്ര ക്ലബ്ബ്. സ്കൂൾ വർഷാരംഭത്തിൽ തന്നെ സയൻസ് ക്ലബ്ബ് യോഗം ചേർന്ന് ക്ലബ്ബ് പ്രസിഡന്റ്, സെക്രട്ടറി എന്നിവരെ തെരഞ്ഞെടുക്കുന്നു.

സോഷ്യൽ സയൻസ് ക്ലബ്

ഞങ്ങളുടെ സ്കൂളിൽ സോഷ്യൽ സയൻസ് ക്ലബ്ബ് വളരെ നല്ല രീതിയിൽ പ്രവർത്തിക്കുന്നു. സ്കൂളിൽ എല്ലാ ദിവസവും ക്ലാസ്സുകളിൽ പത്രമെത്തിക്കുകയും ഓരോ ക്ലാസ്സുകളിലെയും ക്ലബ്ബംഗങ്ങളുടെ നേതൃത്വത്തിൽ പത്ര വായന പ്രോത്സാഹിപ്പിക്കുകയും ചെയ്യുന്നു. സാമൂഹ്യ ശാസ്ത്ര ദിനാചരണങ്ങൾ വളരെ ആകർഷകമായി വിവിധ പരിപാടികളോടെ നടത്തപ്പെടുകയും ദിനാചരണ സന്ദശങ്ങൾ നൽകി കുട്ടികളിൽ ബോധവൽക്കരണം നടത്തുകയും ചെയ്യുന്നു. ദിനാചരണങ്ങളോടനുബന്ധിച്ച് ക്വിസ്, ചുവർപത്രിക, സ്കിറ്റ്, റാലി എന്നിവ നടത്തുകയും ബുള്ളറ്റിൻ ബോർഡ് തയ്യാറാക്കുകയും ചെയ്യുന്നു.സ്കൂൾ തല സാമൂഹ്യ ശാസ്ത്രമേളയിൽ വിജയികളെ കണ്ടെത്തുകയും സബ്ജില്ലാ, ജില്ല, സംസ്ഥാന തലങ്ങളിലേയ്ക്ക് കുട്ടികൾക്ക് വേണ്ട നിർദ്ദേങ്ങൾ കുട്ടികളെ ഒരുക്കുകയും ചെയ്യുന്നു.

മാത്സ് ക്ലബ്

എന്തിനും ഒരു കണക്ക് വേണം അത് കാണാൻ ഒരു കണ്ണ് വേണം കണ്ണ് തെളിയാൻ അറിവ് വേണം അറിവുണ്ടാകാൻ ‍ വായിക്കണം ചിന്തിക്കണം പഠിക്കണം പണിയെടുക്കണം - വായിക്കാൻ, ചിന്തിക്കാൻ, പഠിക്കാൻ, പണികൾ പലതും ചെയ്യാൻ ഗണിത ക്ലബ്ബ് അവസരമൊരുക്കുന്നു.ഗണിതത്തിൽ കുറെയേറെ കാര്യങ്ങൾ ക്ലാസ്സ് മുറികളിൽ പഠിച്ച് ഉയർന്ന തലങ്ങളിലേയ്ക്കെത്തുന്നു.

ഇംഗ്ലീഷ് ക്ലബ്

കുട്ടികൾക്ക് ഇംഗ്ലീഷിൽ നന്നായി സംസാരിക്കുവാനും ആശയവിനിമയം നടത്തുന്നതിനുമുള്ള പ്രത്യേക പരിശീലനം ഇംഗ്ലീഷ് ക്ലബ്ബിന്റെ നേതൃത്വത്തിൽ നടത്തുന്നു. ആഴ്ചയിലൊരു ദിവസം നടത്തുന്ന ഇംഗ്ലീഷ് അസംബ്ലിയിൽ ഇംഗ്ലീഷ് ക്ലബ്ബിലെ കുട്ടികൾ നേതൃത്വം നൽകുന്നു. കൂടാതെ ഇംഗ്ലീഷിൽ എസ്സെ റൈറ്റിംഗ്, റെസ്സിറ്റേഷൻ, സ്പീച്ച്, സ്കിറ്റ് എന്നിവയിൽ പ്രത്യേക പരിശീലനവും നൽകുന്നു. കഴിഞ്ഞ അദ്ധ്യയന വർഷത്തിൽ സംസ്ഥാന തല കലോത്സവത്തിൽ ഇംഗ്ലീഷ് പ്രസംഗത്തിന് ഒന്നാം സ്ഥാനം നേടിയ അൽന സാജു ഫാത്തിമ മാതയുടെ മികവാർന്ന താരമായി

എക്കോ ക്ലബ്

എക്കോ ക്ലബ്ബിന്റെ നേതൃത്വത്തിൽ പ്രകൃതിയെ സംരക്ഷിക്കുക മനുഷ്യന്റെ കടമയാണ് എന്ന ബോധ്യം കുട്ടികളിൽ ജനിപ്പിക്കുക എന്ന ഉദ്ദേശ്യത്തോടെ പരിസ്ഥിതി ദിനാചരണം നടത്തുന്നു. വൃക്ഷത്തെകൾ നടുന്നു. പരിസ്ഥിതി ദിന സന്ദേശം നൽകുന്നു. ലഹരിയുടെ ദൂഷ്യ വശങ്ങളെക്കുറിച്ച് ബോധ്യപ്പെടുത്താൻ ലഹരി വിരുദ്ധ ദിനം വിവിധ പരിപാടികളോടെ ആചരിച്ചു. ഓസോൺ പാളിക്കുണ്ടാകുന്ന ശോഷണം, മനുഷ്യ ജീവിതത്തെ കാർന്ന് തിന്നുന്ന കാൻസർ പോലെയുള്ള മാരക രോഗങ്ങൽക്ക് കാരണമാകുന്നവെന്ന ബോധ്യം ജനിപ്പിക്കുവാൻ ഓസോൺദിനം ആചരിക്കുന്നു. ഹിരോഷിമാ ദിനാചരണം, ചാന്ദ്രദിനാചരണം, ആൽബർട്ട് ഐൻസ്റ്റീൻ ദിനാചരണം, സി വി രാമൻ ദിനാചരണം എന്നിവയെല്ലാം വിവിധ പരിപാടികളോടെ ആചരിക്കുന്നു.

നേച്ചർ ക്ലബ്

നേച്ചർ ക്ലബ്ബിന്റെ നേതൃത്വത്തിൽ സ്കൂളിൽ പഠനയാത്രകൾ സംഘടിപ്പിക്കുകയും മരങ്ങളെയും, പുഴകളെയും വനങ്ങളെയും പ്രകൃതിയെയും അടുത്തറിയാനൊരു സംഘ പഠനയാത്ര നടത്തുകയും ചെയ്യുന്നു

പച്ചക്കറി കൃഷി

കുട്ടികളുടെ നേതൃത്വത്തിൽ സ്കൂളിൽ പച്ചക്കറി കൃഷി നടത്തുകയും കുട്ടികളുടെ ഉച്ചഭക്ഷണത്തിൽ കറികൾക്കായി ഉപയോഗിക്കുകയും ചെയ്യുന്നു

ഔഷധത്തോട്ട നിർമ്മാണം

കുട്ടികളുടേയും അദ്ധ്യാപകരുടേയും നേതൃത്വത്തിൽ സ്കൂളിൽ ഒരു ഔഷധത്തോട്ടം നട്ടുപരിപാലിച്ചുവരുന്നു

പാഠ്യേതര മികവ്

പാഠ്യരംഗത്തും പാഠ്യേതര രംഗത്തും ഫാത്തിമമാതാ ഒരേപോലെ പ്രശോഭിക്കുന്നു. സംസ്ഥാന ശാസ്ത്ര മേളകളിലും കലോത്സവത്തിലും പങ്കെടുത്ത് വിജയങ്ങൾ നേടുന്ന കുട്ടികൾ ഫാത്തിമ മാതായ്ക്കെന്നും അഭിമാനം തന്നെ . ഈ അദ്ധ്യയന വർഷം സംസ്ഥാന ശാസ്ത്ര മേളയിൽ 34 കുട്ടികൾ പങ്കെടുത്ത് വിജയം നേടി. അതിൽതന്നെ 2 കുട്ടികൾ റണ്ടും മൂന്നും സ്ഥാനങ്ങളും നേടി. സംസ്ഥാന കലോത്സവത്തിൽ 106 കുട്ടികളാണ് മാറ്റുരച്ച് വിജയം കൈപ്പിടിയിലൊതുക്കിയത്. എച്ച് എസ് വിഭാഗം മാർഗ്ഗം കളിയിൽ സംസ്ഥാനതലത്തിൽ ഒന്നാമതെത്താനും ഫാത്തിമ മാതയിലെ കുട്ടികൾക്കായി.

രാജ്യപുരസ്കാർ

ഈ അദ്ധ്യയന വർഷത്തിൽ ഗൈഡിംഗിൽ 13കുട്ടികൾ രാജ്യപുരസ്കാർ അവാർഡിന് അർഹത നേടി. പാഠ്യരംഗത്തും പാഠ്യേതര രംഗത്തും അച്ചടക്കത്തിലും തങ്ങളുടെ വ്യക്തിമുദ്ര പതിപ്പിക്കുന്ന ഈ കുട്ടികൾ മറ്റുള്ളവർക്കെന്നും മാതൃകയാണ്.

സാമൂഹിക പ്രവർത്തനങ്ങൾ

സാമൂഹ്യ പ്രതിബദ്ധതയുടെ കാര്യത്തിൽ ഫാത്തിമമാതയിലെ കുട്ടികൾ എന്നും മുന്നിൽതന്നെ. സമൂഹത്തിലെ പാവപ്പെട്ടവരോടും രോഗികളോടും കാരുണ്യം കാണിക്കുന്ന, അവരുടെ സങ്കടങ്ങൾ മനസ്സിലാക്കുന്ന, നൻമ നിറഞ്ഞ മനസ്സ് കൈമോശം വന്നിട്ടില്ലാത്ത തലമുറ ഇവിടെ ഉണ്ട് എന്നത് ഏറെ അഭിമാനകരമാണ്. ഈ അദ്ധ്യയന വർഷത്തിൽ തന്നെ നിരവധി സാമൂഹിക പ്രവർത്തനങ്ങളിൽ കുട്ടികൾ പങ്കാളികളായി.

സ്കൂൾ പത്രം - ഉറവ്

കുട്ടികളുടേയും അദ്ധ്യാപകരുടേയും സഹകരണത്തോടെ തയ്യാറാക്കിയ ഉറവ് എന്ന് പേരിട്ടിരിക്കുന്ന സ്കൂൾ പത്രത്തിന്റെ ആദ്യ കോപ്പി പ്രകാശനം ചെയ്തത് നമ്മുടെ കേന്ദ്ര മന്ത്രിയായ ബഹുമാനപ്പെട്ട, ശ്രീ. റിച്ചാർഡ് ഹേ ആണ് എന്നത് ഫാത്തിമ മാതയ്ക്ക് ഏറെ സന്തോഷം പകരുന്നു. കുട്ടികളുടെ മികവുകൾ സമൂഹത്തിന് മുമ്പിൽ പങ്കുവയ്ക്കുന്നതിനായി ഓരോ ടേമിലും ഉറവ് എന്ന പേരിൽ സ്കൂൾ പത്രം തയ്യാറാക്കുകയും കുട്ടികൾ വഴി എല്ലാ വീടുകളിലും എത്തിക്കുകയും ചെയ്യുന്നു.

മികവുത്സവം

കുട്ടികളുടേയും സ്കൂളിന്റെയും മികവുകൾ പൊതുസമൂഹത്തെ അറിയിക്കുന്നതിനായി എല്ലാ വർഷവും കുട്ടികളുടെ പ്രവർത്തനങ്ങൾ ഏകോപിപ്പിച്ചുകൊണ്ട് മികവുത്സവം നടത്തുന്നു<

കേശദാനം - മഹാദാനം

ക്യാൻസർ രോഗികൾക്ക് വിഗ്ഗ് നിർമ്മിക്കുന്നതിനായി മുടി മുറിച്ചു നൽകി ഫാത്തിമ മാതയിലെ 230 ഓളം കുട്ടികൾ സമൂഹത്തിന് മാതൃകയായി. ജെ സി ഐ അടിമാലി ചാപ്റ്ററിന്റെ നേതൃത്വത്തിൽ സംഘടിപ്പിച്ച ചടങ്ങിൽ സ്കൂൾ മാനേജർ റവ. ഡോ. സി. ആലീസ് മരിയ, ഹെഡ്മിസ്ട്രസ് സി. ലാലി മാണി, പി ടി എ പ്രസിഡന്റ് ശ്രീ. ബിനു ആന്റണി എന്നിവർ പങ്കെടുത്തു.

ബോധവൽക്കരണ ക്ലാസ്സുകൾ

കുട്ടികൾക്കും രക്ഷിതാക്കൾക്കുമായി വിവിധ ബോധവൽക്കരണ ക്ലാസ്സുകൾ സംഘടിപ്പിക്കുന്നു. ക്ലാസ്സുകളിലെ കുട്ടികളുടേയും രക്ഷിതാക്കളുടേയും പങ്കാളിത്തം ഏറെ ശ്ലാഘനീയമാണ്.

ഉത്സവാഘോഷങ്ങളിലൂടെ ....

എല്ലാ വർഷവും ഓണം, ശിശുദിനം, ക്രിസ്തുമസ് എന്നിവ കുട്ടികൾ ഒരുമയോടെ ആഘോഷിക്കുന്നു. ഓണാഘോഷങ്ങളിൽ എൽ പി, യു പി, എച്ച് എസ്, എച്ച് എസ് എസ് വിഭാഗങ്ങളിലായി അത്തപ്പൂവിടൽ, ഓണപ്പാട്ട്, മാവേലി വടംവലി, പുലികളിഎന്നിവ നടത്തുകയും വിജയികൾക്ക് സമ്മാനങ്ങൾ നൽകുകയും ചെയ്യുന്നു. പി ടി എ പ്രതിനിധികൾ, എം പി ടി എ പ്രതിനിധികൾ, ക്ലാസ്സ് പ്രതിനിധികൾ എന്നിവരുടെ നേതൃത്വത്തിൽ ഓണസദ്യയും ഓണപായസവും തയ്യാറാക്കുകയും ക്ലാസ് തലത്തിൽ ഓണസദ്യ ക്രമീകരിക്കുകയും ചെയ്യുന്നു. കുട്ടികൾ ഏറെ സന്തോഷത്തോടെ ഒരുമയുടേയും പങ്കുവയ്ക്കലിന്റെയും പാഠങ്ങൾ ഈ ആഘോഷത്തിലൂടെ അനുഭവവേദ്യമാക്കുന്നു. എൽപി വിഭാഗത്തിലെ കുട്ടികളാണ് ശിശുദിനാഘോഷത്തിൽ പങ്കെടുക്കുന്നത്. പ്രസംഗം, ക്വിസ്, ചാച്ചാജി, പൂക്കളറാണി എന്നീ മത്സരങ്ങൾ നടത്തി വിജയികളെ കണ്ടെത്തുകയും സമ്മാനങ്ങൽ നൽകുകയും ചെയ്യുന്നു. കുട്ടികളുടെ വിവിധ കലാപരിപാടികൾ അവതരിപ്പിക്കുകയും മധുരപലഹാരങ്ങൾ വിതരണം ചെയ്യുകയും ചെയ്യുന്നു. ക്രിസ്തുമസ് ആഘോഷങ്ങൾ കുട്ടികൾക്ക് ഏറെ പ്രിയപ്പെട്ടതാണ്. പുൽക്കൂട് മത്സരം, കരോൾഗാന മത്സരം, സാന്താക്ലോസ്സ് എന്നീ മത്സരങ്ങൾ നടത്തി വിജയികളെ കണ്ടെത്തുകയും സമ്മാനങ്ങൾ നൽകുകയും ചെയ്യുന്നു. ക്ലാസ്സ് തലത്തിൽ കേക്ക് മുറിക്കുകയും കേക്ക് കഴിച്ച് സമ്മാനങ്ങൾ പങ്ക് വച്ച് സന്തോഷത്തോടെ കുട്ടികൾ പിരിയുന്നു

ഓരോ കുഞ്ഞിനുമേകാം പിറന്നാൾ ആശംസകൾ

ഓരോ ആഴ്ചയിലും എൽ പി, യു പി, എച്ച് എസ് വിഭാഗങ്ങളിലായി പ്രത്യേക അസംബ്ലികൾ നടത്തുകയും ആ ആഴ്ചയിൽ പിറന്നാൾ ആഘോഷിക്കുന്ന എല്ലാ കുട്ടികൾക്കും പിറന്നാൾ ആശംസകൾ നേരുകയും ബർത്ത്ഡേ കാർഡ് നൽകുകയും ചെയ്യുന്നു

പോഷക സമ‌ൃദ്ധമായ ഉച്ചഭക്ഷണം

കുട്ടികൾക്കായി പോഷക സമൃദ്ധമായ ഉച്ചഭക്ഷണം തയ്യാറാക്കി, ഓരോ ക്ലാസ്സിലും എത്തിക്കുകയും ക്ലാസ്സ് ടീച്ചേഴ്സ് തന്നെ കുട്ടികൽക്ക് ഭക്ഷണം വിതരണം നൽകുകയും ചെയ്യുന്നു

ഒരു ക്ലാസ്സിൽ ഒരു പത്രം

കുട്ടികളിൽ ദിവസവും പത്രം വായന പ്രോത്സാഹിപ്പിക്കുന്നതിനും സാമൂഹിക വീക്ഷണമുള്ളവരുമായി മാറുന്നതിനായി ഓരോ ക്ലാസിലും പത്രം എത്തിക്കുകയും കുട്ടികൾക്ക് വായിക്കുന്നതിനുള്ള അവസരം ഒരുക്കുകയും ചെയ്യുന്നു

പിറന്നാൾ പുസ്തകം

കുട്ടികൾ തങ്ങളുടെ പിറന്നാൽ ദിവസങ്ങളിൽ ക്ലാസ്സുകളിലെ മിഠായി വിതരണം ഒഴിവാക്കി മികച്ച മൂല്യമുള്ള പുസ്തകങ്ങൾ വാങ്ങി സ്കൂളിൽ ഏൽപ്പിക്കുന്നു. ആ പുസ്തകങ്ങൾ ക്ലാസ്സ് ലൈബ്രറിയിൽ ഏൽപ്പിക്കുന്നു

കൗൺസിംലിംഗ്

മാനസീകമായി ബുദ്ധിമുട്ടനുഭവിക്കുന്ന കുട്ടികൾക്കും രക്ഷിതാക്കൾക്കും കൗൺസിലിംഗ് നൽകുന്നതിനുള്ള സംവിധാനം

കുട്ടികളുടെ ഭവന സന്ദർശനം

ഓരോ ക്ലാസ്സുകളിലേയും കുട്ടികളുടെ വീടുകൾ ക്ലാസ്സ് ടീച്ചർമാരുടെ നേതൃത്വത്തിൽ സന്ദർശിക്കുകയും അവരുടെ ജീവിത സാഹചര്യങ്ങൾ കണ്ടെത്തി വേണ്ട നിർദ്ദേശങ്ങളും പ്രോത്സാഹനങ്ങളും നൽകി കുഞ്ഞുങ്ങളെ നയിക്കുകയും ചെയ്യുന്നു

കൈത്താങ്ങ്

സ്കൂളിൽ പ്രവർത്തിക്കുന്ന ജെ ആർ സി യൂണിറ്റിന്റെ നേതൃത്വത്തിൽ നിർധനരായ കുട്ടികളെ കണ്ടെത്തി അവർക്ക് പഠനം, ഭവന നിർമ്മാർന്നാണം, ചികിത്സാസഹായം എന്നിവ നൽകുന്നു. ഓരോ ക്ലാസ്സിലേയും നിർധനരായ കുട്ടികളെ സഹായിക്കുന്നതിനായി ക്ലാസ് തലത്തിൽ കുട്ടികളിൽ നിന്ന് കൊച്ചുകൊച്ചു സംഭാവനകൾ സ്വീകരിക്കുകയും അർഹരായ കുട്ടികൾക്ക് നൽകുകയും ചെയ്യുന്നു. കൂടാതെ ഈ കുട്ടികളുടെ പഠനച്ചിലവ് കുട്ടികളും അദ്ധ്യാപകരും ഏറ്റെടുത്ത് സമൂഹത്തിന് മാതൃകയാവുകയും ചെയ്യുന്നു.

കുട്ടികളുടെ ആരോഗ്യ പരിപാലനം

സ്കൂളിൽ പ്രവർത്തിക്കുന്ന ഹെൽത്ത് ക്ലബ്ബിന്റെ നേതൃത്വത്തിൽ ആരോഗ്യം, ശുചിത്വപാലനം എന്നീ വിഷയങ്ങളിൽ ബോധവൽക്കരണം നടത്തുകയും, സ്കൂളിൽ ആരോഗ്യ വകുപ്പ് ലഭ്യമാകുന്ന അയൺഫോളിക് ഗുളികകളും വിരഗുളികകളും നിർദ്ദേശിച്ചിരിക്കുന്ന സമയങ്ങളിൽ കുട്ടികൾക്ക് നൽകുകയും കഴിക്കുന്നുവെന്ന് ഉറപ്പുവരുത്തുകയും ചെയ്യുന്നു

കുട്ടികൾക്കായി ഒരു കുട്ടിത്തോട്ടം

സംസ്ഥാന കൃഷി വകുപ്പിന്റെ നേതൃത്വത്തിൽ സ്കൂളുകളിൽ എത്തിക്കുന്ന പച്ചക്കറി വിത്തുകൾ കുട്ടികൾക്കായി വിതരണം ചെയ്യുകയും, വീടുകളിൽ പച്ചക്കറിത്തോട്ടം നട്ടുപിടിപ്പിച്ച് പച്ചക്കറികളും ഇലക്കറികളും ഭക്ഷണത്തിൽ ഉൾപ്പെടുത്താനുള്ള പ്രേരണയും പ്രചോദനവും നൽകുകയും ചെയ്യുന്നു.

സമർപ്പിത വൈധവ്യം ഒരു അനുഗ്രഹമാക്കാൻ

അച്ഛൻമാരുടെ കൈത്താങ്ങില്ലാതെ സംരക്ഷിക്കപ്പെടുന്ന കുട്ടികളുടെ അമ്മമാർക്കായി ഒരു ദിവസത്തെ ക്ലാസ്സും ഭക്ഷണവും ക്രമീകരിക്കുന്നു. എല്ലാ അമ്മമാരും ഏറെ സന്തോഷത്തോടെ ഈ സംഗമത്തിൽ പങ്ക് ചേർന്നു. എല്ലാ അധ്യയന വർഷവും ഇങ്ങനെയൊരു സംഗമം സംഘടിപ്പിക്കണമെന്നും തങ്ങൾക്കിത് ഏറെ ആത്മ വിശ്വാസം പകരുന്നതായും, ഒരേ ജീവിത സാഹചര്യങ്ങളിലൂടെ കടന്നുപോകുന്നവർ ഒരുമിച്ചുചേരുമ്പോൾ ജീവിതത്തിൽ മുന്നേറാനുള്ള ഊർജ്ജം പകർന്നുകിട്ടുന്നതായും അമ്മമാർ അഭിപ്രായപ്പെട്ടു. കടുത്ത ജീവിത യാഥാർത്ഥ്യങ്ങളിലൂടെ കടന്നുപോകുമ്പോൾ തങ്ങൾക്ക് താങ്ങും തണലും കരുതലുമായി മാറുന്ന ഫാത്തിമ മാതയെ തങ്ങളുടെ നന്ദി അറിയിക്കാനും അമ്മമാർ മറന്നില്ല. ഈ അധ്യയന വർഷവും ഇങ്ങനെയൊരു സംഗമത്തിനായി തയ്യാറെടുക്കുകയാണ് ഫാത്തിമ മാതാ കുടുംബം

അണ്ണാറക്കണ്ണനും തന്നാലായത്

മഴക്കാലക്കെടുതിയിൽ ദുരിതമനുഭവിക്കുന്ന ഫാത്തിമമാതയിലെ കുട്ടികൾക്കായി സ്കൂളിലെ കുട്ടികൾ തന്നെ ധന സമാഹരണം നടത്തുകയും കുട്ടികൾക്കാവശ്യമായ ബുക്കുകളും പഠന വിഭവങ്ങളും വാങ്ങി സ്കൂളിൽ ഏൽപ്പിക്കുകയും ചെയ്തു. കട്ടികൾക്കായി അദ്ധ്യാപകർ പകർന്നുതന്ന പാഠങ്ങളും മൂല്യങ്ങളും സ്വജീവിതത്തിൽ പകർത്തിയപ്പോൾ കുട്ടികൾക്കും ആത്മസംതൃപ്തി.