മീനങ്ങാടി
ഒരു ക്ഷേത്രത്തിന്റെ പേരിലൊരുനാട്. അതാണ് മീനങ്ങാടി. മത്സ്യാവതാരം മുഖ്യപ്രതിഷ്ഠയായിട്ടുള്ള ക്ഷേത്രം മീനങ്ങാടി മാത്രമെയുള്ളുവെന്നാണ് പണ്ഡിത സാക്ഷ്യം. മീനങ്ങാടിയുടെ പേരും മത്സ്യാവതാര മഹാവിഷ്ണു ക്ഷേത്രവും തമ്മിലുള്ള ബന്ധം ഒരു മഹര്ഷിയെ ചുറ്റിപ്പറ്റിയാണ്. ഈ മഹര്ഷി എതെന്ന് തലമുറക്കാര് പകര്ന്നുതന്ന വാമൊഴികളിലെന്നുംതന്നെ ഇല്ല. മഹര്ക്ഷി യാത്രാ മധ്യേ ഇവിടെ ഒരു കുളത്തില് കുളിച്ചുകൊണ്ടിരിക്കുമ്പോള് ഒരു മത്സ്യം വെള്ളത്തില് നിന്ന് വായുവിലുയര്ന്നു നൃത്തമാടി.വെള്ളത്തില് തന്നെ ചാടി മറഞ്ഞു. മത്സ്യം പലതവണ ഇതാവര്ത്തിച്ചപ്പോള് മഹര്ഷിക്കു സംശയമായി. തന്റെ ദിവ്യ ദൃഷ്ടികൊണ്ട് ആലോചിച്ചപ്പോള് ഇവിടെ മഹാവിഷ്ണുവിന്റെ ശക്തമായ സാനിധ്യമുണ്ടെന്ന് തിരിച്ചറിഞ്ഞു. കുളിച്ചുകയറിയ മഹര്ഷി വെള്ളത്തില് നിന്ന് അധികം അകലെയല്ലാതെ പടിഞ്ഞാറ് ഭാഗത്ത് ഉയര്ന്ന ഒര് സ്ഥലത്ത് മത്സ്യാവതാരത്തെ ധ്യാനിച്ച് മഹാവിഷ്ണുവിനെ പ്രതിഷ്ഠിച്ചു. ക്ഷേത്രത്തിന് മത്സ്യാവതാരമെന്നും നാമകരണം ചെയ്തു. ഈ സ്ഥലത്തിനു മീനാടി ( മീന് നൃത്തം ചെയ്ത സ്ഥലം ) എന്ന പേരും ഇട്ടത്രേ. ക്രമേണ മീനാടി എന്ന സ്ഥലപേര് മീനങ്ങാടി എന്നായി മാറിയത്രേ.