ജി.എച്ച്.എസ്.എസ്. വെട്ടത്തൂർ/HS/എന്റെപരിസ്ഥിതി കാഴ്ച

22:29, 19 ഏപ്രിൽ 2020-നു ഉണ്ടായിരുന്ന രൂപം സൃഷ്ടിച്ചത്:- 48076 (സംവാദം | സംഭാവനകൾ) ('{{BoxTop1 | തലക്കെട്ട്=എന്റെപരിസ്ഥിതി കാഴ്ച <!-- തല...' താൾ സൃഷ്ടിച്ചിരിക്കുന്നു)
എന്റെപരിസ്ഥിതി കാഴ്ച
             ഭൂമിയുടെ അടിസ്ഥാനമായ പരിസ്ഥിതിയെ കുറിച്ച് വിവരിക്കേണ്ട കാര്യമില്ല. ഏതൊരു മനുഷ്യനും പരിസ്ഥിതിയെക്കുറിച്ച് തികച്ചും ബോധവാനാണ്. പക്ഷെ തന്റെ സ്ഥായിയായ സ്വഭാവത്തിൽ മാറ്റം വരുത്താൻ അവൻ ആഗ്രഹിക്കുന്നില്ല. വ്യത്യസ്തത സൃഷ്ടിക്കാത്തതിന്റെ പരിണാമമായി കഴിഞ്ഞ രണ്ടു വർഷം നമ്മൾ ഏറെ ബുദ്ധിമുട്ടി. പ്രളയവും, കൊടുങ്കാറ്റും, ഉരുൾപ്പൊട്ടലും പിന്നെ തീരാത്ത ദുരിതങ്ങളും . ഈ ഇരുപത്തിയൊന്നാം നൂറ്റാണ്ടിൽ പ്രകൃതിയുടെ മാറ്റങ്ങൾ ഓരോ ശ്വാസത്തിലും പ്രകടമാണ്. നവകേരള നിർമ്മിതിയും, പ്രതിരോധ പ്രവർത്തനങ്ങളും താൽകാലികമായ ആശ്വാസം നൽകുന്നു എന്നുമാത്രം.
      പരശുരാമൻ മഴുവെറിഞ്ഞ് രൂപപ്പെട്ടു എന്നു കരുതപ്പെടുന്ന നമ്മുടെ കൊച്ചു കേരളം സമുദ്ധമായ പ്രകൃതിയാലും, മനുഷ്യരാലും ദൈവത്തിന്റെ സ്വന്തം നാടായി പറയപ്പെട്ടു. മനുഷ്യർക്ക് സർവ്വചരാചരങ്ങളോടും ഒരു ആത്മബന്ധം ഉണ്ടായിരുന്നു. ആ ആത്മബന്ധം ആർത്തിയായി മാറി. ചൂഷണമായി മാറി. തിരിച്ചു ആക്രമിക്കില്ല എന്നുറപ്പുള്ളതു കൊണ്ടായിരിക്കാം പ്രകൃതിയിലെ ഓരോ അംശങ്ങളും മനുഷ്യന്റെ ക്രൂരതയുടെ പാത്രമായി. മരത്തിലും, മണ്ണിലും തുടങ്ങി അത് വായുവിലും, വെള്ളത്തിലുമായി എത്തി നിൽക്കുന്നു. അമിതമായ ചൂഷണം പ്രകൃതി ദുരന്തങ്ങളിൽ ചെന്ന് കലാശിച്ചു. മറ്റു സംസ്ഥാനങ്ങളെപ്പോലെ വന്നത് വിധി എന്നു കരുതി സമാധാനിക്കുന്നവരല്ല മലയാളികൾ. പ്രതിരോധിച്ചു, വിജയിച്ചു.
         പ്രകൃതി അമ്മയാണ്. അമ്മയ്ക്ക് സന്തോഷവും, സമാധാനവും, ശാന്തിയും നൽ കാനായി ചൈനയിൽ നിന്ന് കോവിഡ് എന്ന മഹാമാരി ഉടലെടുക്കേണ്ടി വന്നു. ലോകത്തെ വിരൽത്തുമ്പിൽ പിടിച്ചു കുലുക്കി പടർന്നത് ചൈനയുൾപ്പെടെ 180 ൽ പരം രാജ്യങ്ങളിൽ. എന്തിനേറെ പറയുന്നു ചൈനയിൽ നിന്നും 3951 കിലോമീറ്റർ അകലെയുള്ള കേരളത്തിലേക്കും അത് വ്യാപിച്ചു. പിന്നീട് ഉണ്ടായത് കടുത്ത പ്രതിരോധത്തിന്റെ തീജ്വാലകൾ. ലോക്ക് ഡൗൺ എന്ന ആശയം നല്ലൊരു നാളേക്കായും കോവിഡിന്റെ പ്രതിരോധത്തിനായും ഏർപ്പെടുത്തി. അവിടെ എല്ലാവർക്കും അസ്വസ്ഥത അനുഭവപ്പെട്ടപ്പോൾ ആശ്വാസം ലഭിച്ചത് പ്രകൃതിക്കും മറ്റു ജീവജാലങ്ങൾക്കും ആയിരിക്കും . ഇന്ത്യയിലെ വായു മലിനീകരണത്തിൽ പ്രധാനമായും കാണപ്പെടുന്നവയിൽ നൈട്രജൻ ഡയോക്സൈടിന്റെ സാന്നിധ്യം 71% കുറവുണ്ട്. ഒപ്പം വാഹനങ്ങളുടെ കുറഞ്ഞ ഉപയോഗം കാർബൺ മോണോക്സൈടിലും കുറവുണ്ടാക്കി. ജലസ്രോതസ്സുകളിൽ ഒഴുകുന്ന മാലിന്യങ്ങളുടെ അളവിലും മാറ്റം കൈവന്നു. 
     ഇതൊരു ഉയർത്തെഴുന്നേൽപ്പാണ്. നല്ലൊരു ഭാവിയുടെ ആദ്യ പടിയിൽ ഒരു രാജ്യം പ്രതിരോധിക്കുന്നു. ഇപ്പോൾ പ്രകൃതി സംസാരിക്കുന്നു പ്രതിരോധത്തിന്റെ ഭാഷയിൽ . ജാതിയുടേയും മതത്തിന്റേയും വർഗ്ഗത്തിന്റേയും വർണ്ണത്തിന്റേയും രാഷ്ട്രീയത്തിന്റേയും ലിംഗത്തിന്റേയും പേരിൽ കലഹിച്ചിരുന്ന മനുഷ്യൻ, ഈ ലോകം തന്റെ കാൽ കീഴിലാണെന്ന് അഹങ്കരിച്ചു. എന്നാൽ കണ്ണു കൊണ്ട് കാണാത്ത സൂഷ്മാണുവിനെ പോലും തളയ്ക്കാൻ കഴിയാത്തത്ര നിസ്സാരനാണ് മനുഷ്യൻ എന്ന തിരിച്ചറിവ് ഇനിയെങ്കിലും  ഉണ്ടായിട്ടില്ലെങ്കിൽ പ്രകൃതി അതിന്റെ മറ്റൊരായുധം പുറത്തെടുത്ത് മനുഷ്യ വർഗത്തെ ഈ ഭൂമിയിൽ നിന്ന് ഉന്മൂലനം ചെയ്യും എന്ന് തീർച്ച. പ്രകൃതിയിൽ നിന്നകന്നു പോകാതെ ചേർന്നു നിന്നു കൊണ്ട് ഉൾക്കാഴ്ച്ചയോടെ പ്രവർത്തിക്കുന്ന ഒരു തലമുറ ഇനിയെങ്കിലും ഉയർന്നുവരട്ടെ. അതാവട്ടെ ഈ കൊറാണ എന്ന സൂഷ്മാണു നമുക്കു നൽകുന്ന വലിയ ഗുണപാഠം .പ്രകൃതി നശിപ്പിക്കപെടാനുള്ളതല്ല മറിച്ച് ചേർത്തുപിടിച്ച് സംരക്ഷിക്കപെടാനുള്ളതാണ്. അതിനുതകുന്ന തരത്തിലുള്ളതായിരിക്കണം മനുഷ്യൻ ആർജ്ജിക്കുന്ന സാങ്കേതിക പുരോഗതിയും  വളർച്ചയും. 
സാന്ത്വന . കെ
9 D ജി എച് എസ് എസ് വെട്ടത്തൂർ
മേലാറ്റൂർ ഉപജില്ല
മലപ്പുറം
അക്ഷരവൃക്ഷം പദ്ധതി, 2020
ലേഖനം