വഴിത്താരകൾ വിജനമായി ഉണരുബോൾ
ആരവമടങ്ങി മൂവന്തികൾ ചായുമ്പോൾ
മരണാനന്തരങ്ങൾക്കു മാംഗല്യവാഴ്വിനു
ആളൊരുക്കാം കുറഞ്ഞആചാരം ലുബ്ദമായ്
നാം വീടടച്ചുള്ളിലിരുപ്പായി
മുഖം കെട്ടി മറച്ചു ചിരികളും
നാം നമ്മിലേക്കോട്ടുമൊതുങ്ങാതെ
കരം കോർക്കാതെ തെല്ലുമടുക്കാതെ
മനസാക്ഷി കൊണ്ടേറ്റമടുത്തു നിന്ന്
ലോകമൊറ്റ ഭാവത്തിലേക്കെത്തി നിൽക്കുന്നത്
തെല്ലു ഭയത്തോടെ കണ്ടിരുന്നു
കൊന്നൊടുക്കി തുടങ്ങിയ കോവിഡിൻ
ഭീതിയിൽ ലോകരാജ്യങ്ങൾ കിതക്കുമ്പോൾ
ആരോഗ്യരംഗമത്യധ്വാനമോടിന്നു
അഗ്നി വിമുക്തമാക്കീടുമാ സേനകൾ
ചേരിതിരിവൊഴിഞ്ഞീന്നി സമൂഹത്തിൽ
വർഗീയമില്ല പൊതിച്ചോറൊരുങ്ങുന്നു
ഒത്തുചേരലിൻ ശ്രേണി മുറിച്ചു നാം
സമൂഹവ്യാപനമൊന്നായ് ചെറുക്കുമ്പോൾ
കാത്തിരിക്കാം നവപ്രഭാതത്തിൽ നാം
ഒന്നായി പുഞ്ചിരി ഒട്ടും മറയ്ക്കാതെ
കാണുമീലോകമതെത്രയോ ഹൃദ്യമാം .