രാത്രിയുടെ വാതിൽ തുറന്നുവരുന്നൊരു-
സൗന്ദര്യവതിയായ പൂനിലാവ്.
കളങ്കമില്ലാത്തൊരു മന്ദഹാസത്തോടെ-
അതിഥിയായെത്തുന്ന വെൺനിലാവ്.
പടിവാതിലിൽ വന്നു നിൽക്കുന്നയെന്നെയും-
നോക്കി ചിരിക്കുന്ന പൊൻനിലാവേ.
രാവിനെ പകലാക്കി മാറ്റുന്നൊരീശോഭ-
എങ്ങുനിന്നെങ്ങുനിന്നാരുതന്നു?
തിങ്കളുദിക്കുന്ന നേരത്തു കൂട്ടത്തിൽ
അതിഥിയായെത്തുന്ന താരകങ്ങൾ
നിങ്ങളൊന്നിച്ചു ജ്വലിച്ചു നിൽക്കുമ്പോൾ
വിണ്ണിലൊരുദ്യാനമെന്നപോലെ.
വിണ്ണിൽ പ്രകാശം പരത്തുന്ന
നിങ്ങളെ നോക്കിയിരിക്കാനായെന്തുഭംഗി.
