ഔവർ ലേഡീ ഓഫ് ഫാത്തിമ ഗേൾസ് എച്ച്.എസ്. കുമ്പളങ്ങി/അക്ഷരവൃക്ഷം/കൊറോണ ഭൂതവും ശുചിക്കുട്ടനും
കൊറോണ ഭൂതവും ശുചിക്കുട്ടനും
ഒരിടത്തൊരിടത്ത് അതി സുന്ദരനായ ഒരു ഭൂതം പിറന്നു. 'കൊറോണ ഭൂതം' എന്നാണ് നാട്ടുകാർ അവന് പേരിട്ടത്. ആരു കണ്ടാലും കൊതിക്കുന്ന ആ അഴകിയ രാവണനെ എല്ലാവർക്കും പേടിയായിരുന്നു. കൊറോണ ഭൂതം വന്ന് പിടികൂടുന്നവർ ആദ്യമാദ്യം തുമ്മാനും ചീറ്റാനും തുടങ്ങും. പിന്നെ അവർക്ക് ശ്വാസം മുട്ടും, ചുമയും ഉണ്ടാകും. അവസാനം കടുത്ത പനിയും വിറയലുമായി കിടപ്പിലാകും. അത്രയുമായാൽ കൊറോണ ഭൂതത്തിന് സന്തോഷമാകും. അവൻ നമ്മളെ പിടിച്ചു കൊന്ന് ചോര കുടിക്കും. ഇതായിരുന്നു അവന്റെ സ്വഭാവം. ഒരിക്കൽ കൊറോണ ഭൂതത്തിന് ലോകം ചുറ്റണമെന്നും കുറേ പേരെ പിടികൂടണമെന്നും തോന്നി. അങ്ങനെ അവൻ കറങ്ങാൻ തുടങ്ങി. ഞാനൊരു ഭൂതം കൊറോണ ഭൂതം നാടുകൾ ചുറ്റും പുതു ഭൂതം എന്നോടൊത്തു കളിച്ചു രസിക്കാൻ വായോ വായോ നാട്ടാരേ കൊറോണ ഭൂതത്തിന്റെ പാട്ടും ചിരിയും കേട്ട് പലരും അവന്റെ വലയിൽ വീണു പോയി. സത്യം പറഞ്ഞാൽ നാട് മുഴുവനും രോഗം വിതറാനിറങ്ങിയ ഭയങ്കരാനായിരുന്നു അവൻ. അവന്റെ ഓട്ടം തുടങ്ങിയതോടെ പലരും കിടപ്പിലായി. ആയിരങ്ങൾ മരിച്ചു. ആളുകൾ പേടിച്ചു നിലവിളിയായി. അതു കേട്ട് നാട്ടിലെ പള്ളിക്കൂടങ്ങളും സർക്കാർ ആഫീസുകളും അടച്ചു. എന്തിനു പറയുന്നു, നാട്ടിലുടെ ഓടുന്ന കാറുകളും, ബസുകളും, തീവണ്ടികളും ഓട്ടം നിർത്തി. ഇതെല്ലാം കണ്ടതോടെ കൊറോണ ഭൂതത്തിന് വലിയ സന്തോഷമായി. ചുറ്റിത്തിരിഞ്ഞ് കൊറോണ ഭൂതം ശുചീന്ദ്രത്ത് ശുചിക്കുട്ടന്റെ വീട്ടുമുറ്റത്തെത്തി. എപ്പോഴും കുളിച്ചു വൃത്തിയായി നടക്കുന്ന ശുചിക്കുട്ടനെയും കുടുംബത്തെയും വലയിലാക്കണമെന്നായിരുന്നു അവന്റെ മോഹം. അപ്പോഴാണ് മുഖത്തൊരു മാസ്കും വച്ച് ശുചിക്കുട്ടൻ വീട്ടിലേക്ക് പോകുന്നത് കൊറോണ ഭൂതം കണ്ടത്. അവൻ ഉച്ചത്തിൽ പാടാൻ തുടങ്ങി. ഭൂതം ഭൂതം കൊറോണ ഭൂതം നാടുകൾ ചുറ്റും പുതു ഭൂതം എന്നോടൊത്തു കളിച്ചു രസിക്കാൻ വായോ പൊന്നു ശുചിക്കുട്ടാ കൊറോണ ഭൂതത്തിന്റെ പാട്ട് കേട്ട് ശുചിക്കുട്ടൻ ചിരിച്ചു. നാട്ടിലെങ്ങും കൊറോണ ഭൂതം ഇറങ്ങി നടക്കുന്നുണ്ടെന്ന് അച്ഛൻ അവനെ പറഞ്ഞു മനസ്സിലാക്കിയിരുന്നു. ഭൂതത്തെ നാണം കെടുത്തി വിടണമെന്ന് അവൻ കരുതി. വീടിന്റെ ഇറയത്ത് അച്ഛൻ കൈകഴുകാനുള്ള വെള്ളവും ലിക്വിഡ് സോപ്പും കരുതി വച്ചിരുന്നു. വീട്ടിലുള്ള എല്ലാവരും കൈകാലുകൾ സോപ്പിട്ട് കഴുകുിയാണ് അകത്ത് പ്രവേശിച്ചിരുന്നത്. കൊറോണ ഭൂതം നോക്കി നിൽക്കെ ശുചിക്കുട്ടൻ ലിക്വിഡ് സോപ്പ് തേച്ച് നല്ലവണ്ണം കൈകാലുകൾ കഴുകി തുടച്ചു. ഇത് കണ്ടേ കൊറോണ ഭൂതം നാണിച്ചുപോയി. ഇവിടെ നിന്നാൽ രക്ഷയില്ലെന്ന് മനസ്സിലാക്കിയ ഭൂതം അപ്പോൾ തന്നെ അവിടെ നിന്ന് സ്ഥലം വിട്ടു. അവന്റെ തലയും താഴ്ത്തിയുള്ള പോക്കു കണ്ട് ശുചിക്കുട്ടന്ട കൈകൊട്ടി ചിരിച്ചു.
|