പ്രാചീന കാലം മുതൽ ശുചിത്വത്തിന്റെ കാര്യത്തിൽ ഏറെ ശ്രദ്ധ ഉള്ളവരായിരുന്നു നമ്മുടെ പൂർവികർ. ശുചിത്വം ഒരു സംസ്കാരമാണെന്ന് തിരിച്ചറിഞ്ഞവരായിരുന്നു അവർ.ആരോഗ്യം പോലെ തന്നെ വ്യക്തി ആയാലും സമൂഹത്തിനായാലും ശുചിത്വം ഏറെ പ്രാധാന്യമുള്ളതാണ്.
വ്യക്തികളും അവർ ജീവിക്കുന്ന ചുറ്റുപാടും അന്തരീക്ഷവും മാലിന്യ മുക്തമായിരിക്കുന്ന അവസ്ഥയാണ് ശുചിത്വം. എന്നാൽ ഇതിന് കാരണമാകുന്ന അവസ്ഥയാണ് മലിനീകരണം.
ആരോഗ്യ-വിദ്യാഭ്യാസ മേഖലകളിൽ ഏറെ മുൻപന്തിയിൽ നിൽക്കുന്നു എന്ന് അവകാശപ്പെടുമ്പോഴും ശുചിത്വത്തിന്റെ കാര്യത്തിൽ നാം ഏറെ പുറകിലാണ്. ആവർത്തിച്ചു വരുന്ന പകർച്ചവ്യാധികൾ നമ്മുടെ ശുചിത്വമില്ലായ്മയ്ക്ക് കിട്ടുന്ന പ്രതിഫലമാണെന്ന് നാം തിരിച്ചറിയുന്നില്ല. മാലിന്യകൂമ്പാരങ്ങളും ദുർഗന്ധം വമിക്കുന്ന പാതയോരങ്ങളും വൃത്തിഹീനമായ പൊതു സ്ഥലങ്ങളും ഗ്രാമ-നഗര വ്യത്യാസമില്ലാതെ നമ്മളെ നോക്കി പരിഹസിക്കുന്നു.
വ്യക്തികൾ സ്വയമായി പാലിക്കേണ്ട അനവധി ആരോഗ്യ ശീലങ്ങൾ ഉണ്ട്. അവ കൃത്യമായി പാലിച്ചാൽ പകർച്ചവ്യാധികളെയും ജീവിത ശൈലി രോഗങ്ങളെയും ഒഴിവാക്കാൻ കഴിയും.
മനുഷ്യരാശി നേരിടാൻ സാധ്യതയുള്ള ഏറ്റവും വലിയ വിപത്തായി മൂന്നാം ലോക മഹായുദ്ധത്തെ കണ്ടിരുന്ന ഒരു കാലമുണ്ടായിരുന്നു.എന്നാൽ ഇന്ന് അതിലേറെ ഭയാനകമായ കാര്യമാണ് ശുചിത്വമില്ലായ്മ .ഭൂമിയിലെ മണ്ണും വെള്ളവും വായുവും ഒരു പോലെ മലിനമായിരിക്കുന്നു.
ഇന്ന് നാം നേരിടുന്ന കൊറോണയും ശുചിത്വമില്ലായ്മയ്ക്ക് ഒരുദാഹരണമാണ്. ശുചിത്വത്തോടെ ഈ വ്യാധിയെ നമുക്ക് ഒറ്റകെട്ടായി മറികടക്കണം. സമ്പർക്കങ്ങൾ ഒഴിവാക്കിയും ശുചിത്വ ശീലങ്ങൾ പാലിച്ചും നാം മുന്നോട്ടു നീങ്ങേണ്ടത് ഇന്ന് അനിവാര്യമാണ്.ജനങ്ങളിൽ ശുചിത്വത്തെക്കുറിച്ചും മാലിന്യ സംസ്കരണത്തെക്കുറിച്ചും അവബോധം വളർത്തണം. വ്യക്തി ശുചിത്വത്തോടെയും പരിസര ശുചിത്വത്തോടെയും നമുക്ക് കൊറോണയേയും മറികടക്കാം. ശുചിത്വം എന്നത് ജീവിത ഭാഗമാക്കി നല്ല നാളയ്ക്കായി നമുക്ക് കൈകോർക്കാം.
