സെൻറ് ഫിലോമിനാസ് ഗേൾസ് എച്ച്.എസ്. പൂന്തുറ/ആനുകാലികം
| സ്കൂൾ | സൗകര്യങ്ങൾ | പ്രവർത്തനങ്ങൾ | പ്രൈമറി | ഹൈസ്കൂൾ | ചരിത്രം | അംഗീകാരം |
സ്കൂളിലെ പ്രധാന പരിപാടികളും ദിനാചരണങ്ങളുമാണ് ഈ പേജിൽ ഉൾപ്പെടുത്തിയിരിക്കുന്നത്.
എസ് എസ് എൽ സി റിസൽട്ട് 2021
എസ്സ് എസ്സ് എൽ സി ക്ക് ഇത്തവണയും 100 ശതമാനം വിജയം പരീക്ഷയെഴുതിയ 241 കുട്ടികളും വിജയിച്ചു. 85 കുട്ടികൾക്ക് എല്ലാ വിഷയങ്ങൾക്കും എ പ്ലസ്.
സ്കൂൾതല പ്രവേശനോത്സവം
സ്കൂൾ തല പ്രവേശനോത്സവം ജൂൺ ഒന്നാം തിയതി VIRTUAL ആയി നടന്നു. അതിൽ ആദ്യഭാഗം LIVE ആയും ബാക്കി recorded ഉം ആയിരുന്നു. ഈശ്വരപ്രാർത്ഥനയ്ക്ക് ശേഷം ഹെഡ്മിസ്ട്രസ് സിസ്റ്റർ സിജി ഉത്ഘാടനം നിർവഹിച്ചു. ബഹുമാനപ്പെട്ട വിദ്യാഭ്യാസമന്ത്രിയുടെ സന്ദേശം ഓൺലൈൻ ആയി നൽകി. ഒപ്പം ബഹുമാനപെട്ട ഗതാഗതമന്ത്രി ശ്രീ ആന്റണി രാജു ഓൺലൈനായി സ്കൂളിന് പ്രത്യേകം ആശംസ അർപ്പിച്ചു. മൂന്നാംക്ലാസ്സിലെ അധീന ഡാൻസ് അവതരിപ്പിച്ചു. ഒന്നാം ക്ലാസ്സിന്റെ പ്രവേശനോത്സവം മദർ സുപ്പീരിയർ റവറന്റ് സിസ്റ്റർ അനു ഉത്ഘാടനം ചെയ്തു. PTA പ്രസിഡന്റ് ആശംസാ പ്രസംഗം നിർവഹിച്ചു. കുട്ടികൾ പ്രവേശനോത്സവ ഗാനം ആലപിച്ചു.
സ്കൂൾ പാർലമെന്റ്
സ്കൂൾ തലത്തിൽ പാർലമെന്റ് സമിതി അംഗങ്ങളുടെ നേതൃത്വത്തിൽ ജൂൺ 15 ന് സ്കൂൾ ലീഡർ, അസിസ്റ്റന്റ് സ്കൂൾ ലീഡർ, യു പി, എൽ പി ലീഡേഴ്‌സ് എന്നിവരുടെ തെരഞ്ഞെടുപ്പു ഓൺലൈനായി സംഘടിപ്പിച്ചു. പാർലമെന്റ് അംഗങ്ങളുടെ സത്യപ്രതിജ്ഞ ചടങ്ങു ജൂലൈ 30 ന് സ്കൂൾ ഓഡിറ്റോറിയത്തിൽ നടന്നു
ചാരിറ്റി ഗ്രൂപ്പ്
2021 - 22 അധ്യയനവർഷത്തിൽ ഏപ്രിൽ മാസം രൂപീകരിച്ച ചാരിറ്റി ഗ്രൂപ്പിലെ പ്രവർത്തനങ്ങൾ വളരെ കാര്യക്ഷമമായി നടന്നുവരുന്നു. ബഹുഭൂരിപക്ഷം കുട്ടികളുടെ കുടുംബങ്ങളെയും ദുരിതത്തിൽ ആഴ്ത്തിയ സമയത്ത് അവർക്ക് കൈത്താങ്ങായി മാറുന്നതിന് ഗ്രൂപ്പിന്റെ പ്രവർത്തനങ്ങൾക്ക് കഴിഞ്ഞു. ഒത്തിരി ഞെരുക്കത്തിൽ ആയിരുന്ന സമയത്ത് ഫുഡ് കിറ്റ് വിതരണം നടത്തി. കൂടാതെ ഓക്സിമീറ്റർ വാങ്ങുന്ന സർക്കാർ പദ്ധതിക്കായി അധ്യാപകർ സംഭാവന നൽകി. സ്കൂളിൽ പ്രവർത്തിക്കുന്ന ഗൈഡ് വിംഗിൽ നിന്നും തുക ഈ ചലഞ്ചിലേക്കായി സംഭാവന ചെയ്തു. ജൂൺ മുതൽ ആരംഭിച്ച ഓൺലൈൻ ക്ലാസ്സുകളിൽ പങ്കെടുക്കാൻ മൊബൈൽ സൗകര്യമില്ലാതിരുന്ന കുട്ടികൾക്കായി 'ഡിജിറ്റൽ ഫിലൈൻ' പദ്ധതി രൂപീകരിക്കുകയും അതിന്റെ വിപുലമായ പ്രവർത്തന ഫലമായി സ്കൂളിൽ നിന്നും ഏകദേശം 125 കുട്ടികൾക്ക് ഫോൺ വിതരണം നടത്തുകയും ചെയ്തു. ജൂലൈ 30 ന് ഡിജിറ്റൽ ഫിലൈൻ പ്രോജക്ടിന്റെ ഭാഗമായ ഒന്നാം ഘട്ട ഉപകരണവിതരണത്തോടനുബന്ധിച്ച് സംസ്ഥാന മന്ത്രിസഭയിലെ ഗതാഗതമന്ത്രിയും പൂന്തുറ യുടെ തന്നെ മകനുമായ ബഹുമാനപ്പെട്ട ശ്രീ ആന്റണി രാജുവിനെ ആയിരുന്നു വീശിഷ്ടാഥിതിയായി ക്ഷണിച്ചിരുന്നത്. തദവസരത്തിൽ അദ്ദേഹത്തെ ആദരിക്കുകയുണ്ടായി. കൊറോണയുടെ സാഹചര്യങ്ങളിലെല്ലാം വീണ്ടും കൂടുതൽ ഭക്ഷണ കിറ്റുകൾ വിതരണം ചെയ്തു. അഞ്ചാം ക്ലാസിൽ പഠിക്കുന്ന സുബ്ഹാന യുടെ ഹാർട്ട് സർജറിക്കുശേഷം കുടുംബത്തിലെ സാമ്പത്തിക ബുദ്ധിമുട്ട് പരിഗണിച്ച് 5000 രൂപ കുടുംബത്തിന് കൊടുത്തു. തുടർന്നും നിസ്സഹായരും നിർധനരും ആയി, രോഗികളുമായി, ജീവിതം വഴി മുട്ടി നിൽക്കുന്ന സഹോദരങ്ങളുടെ കൈകൾക്ക് കരുത്തേകാൻ ചാരിറ്റി ഗ്രൂപ്പ് ശ്രമിക്കുന്നതാണ്.
ഡിജിറ്റൽ ഫിലൈൻ
കോവിഡ് 19 വിദ്യാർത്ഥിനികളുടെ പഠന പ്രക്രിയയിൽ ഒരു വിടവ് സൃഷ്ടിച്ചു. സാമ്പത്തികമായി പിന്നാക്കം നിൽക്കുന്ന വിദ്യാർത്ഥിനികളെ ക്ലാസ്സ് തലത്തിൽ കണ്ടെത്തി അവർക്കാവശ്യമായ ഡിജിറ്റൽ പഠനോപകരണങ്ങൾ വിതരണം ചെയ്യുന്ന പ്രവർത്തങ്ങൾക്ക് രൂപകൽപന നൽകി. അധ്യാപകർ വ്യക്തിപരമായി ഒരു ടാബ്ലറ്റും അഞ്ച് മൊബൈൽ ഫോണുകളും സ്പോൺസർ ചെയ്തു. അധ്യാപകരുടെ ശ്രമഫലമായി, യുണൈറ്റഡ് ക്രിസ്ത്യൻ മൂവ്മെൻറ്റിൽ നിന്ന് 4 മൊബൈൽ ഫോണുകളും ഫിലിം ആക്ടർ ശ്രീ മമ്മൂട്ടി ഫാൻസ്‌ അസോസിയേഷനിൽ നിന്ന് 4 മൊബൈൽ ഫോണുകളും ലഭിക്കുകയുണ്ടായി. ഒരു ലക്ഷത്തി എഴുപത്തി ഏഴായിരത്തി ഇരുനൂറ്റി അൻപത് രൂപ അധ്യാപകരും അനധ്യാപകരും ചേർന്ന് സ്വരൂപിക്കുകയും 33 മൊബൈൽ ഫോണുകൾ വാങ്ങി നൽകുകയും ചെയ്തു. പൊതുജന സഹായത്തോടെ 70 ഫോണുകൾ കൂടി വാങ്ങി നൽകുകയും വിദ്യാർത്ഥിനികളുടെ പഠന പ്രക്രിയയിൽ സജീവ ഇടപെടലുകൾ നടത്തുകയും ചെയ്തു.
ഓണാഘോഷപരിപാടികൾ
2021- 2022 ലെ അധ്യാപകരുടെ ഓണാഘോഷം വിവിധ സ്‌ക്വാഡുകളുടെ നേതൃത്വത്തിൽ സംഘടിപ്പിച്ചു. എമറാൾഡ് സ്‌ക്വാഡ് അത്തപ്പൂക്കളം ഒരുക്കി. ഡയമണ്ട് സ്‌ക്വാഡ് വഞ്ചിപ്പാട്ട് ആലപിച്ചു. റൂബി സ്‌ക്വാഡിന്റെ നേതൃത്വത്തിൽ വിവിധ കലാപരിപാടികളും ഓണക്കളികളും സംഘടിപ്പിച്ചു. സഫയർ സ്‌ക്വാഡ് ആണ് ഓണസദ്യ ഒരുക്കിയത്. ഓണപ്പാട്ടുകളും തിരുവാതിരയുമൊക്കെയായി ഓണാഘോഷം വളരെ സന്തോഷപ്രദമായി .
സ്വാതന്ത്ര്യദിനാഘോഷം
ഓഗസ്റ്റ് 15, സ്വാതന്ത്ര്യദിനം SPC, Guides, സ്കൂൾ പാർലമെന്റ് എന്നിവയുടെ സംയുക്താഭിമുഖ്യത്തിൽ ആചരിച്ചു. SPC അംഗങ്ങളുടെ ഫ്ലാഗ് സല്യൂട്ടോടൊപ്പം റവറന്റ് മദർ സുപ്പീരിയർ സിസ്റ്റർ അന്നു, School PTA പ്രസിഡന്റ് ശ്രീ യുസഫ് എന്നിവർ പതാക ഉയർത്തി. കുമാരി സഫ്ന നസ്രിൻ സ്വാതന്ത്ര്യദിന സന്ദേശം നൽകി. ദേശീയഗാനാലപനത്തോടെ ചടങ്ങുകൾ അവസാനിച്ചു.
അധ്യാപകദിനാഘോഷം
സെപ്റ്റംബർ 5, അധ്യാപകദിനം ഞായറാഴ്ച ആയതിനാൽ 6 ന് തിങ്കളാഴ്ചയാണ് ബഹുമാനപ്പെട്ട ഹെഡ്മിസ്ട്രസ്സിന്റെ നേതൃത്വത്തിൽ അധ്യാപകദിനാഘോഷം സംഘടിപ്പിച്ചത്. പാർലമെന്റ് അംഗങ്ങളായ വിദ്യാർഥിനികൾ അധ്യാപകരെ ഓഡിറ്ററിയത്തിലേക്കു സ്വീകരിക്കുകയും പ്രാർത്ഥനാചടങ്ങുകൾക്കും ആശംസകൾക്കും ശേഷം മധുരം നൽകിയും സമ്മാനങ്ങൾ നൽകിയും ആദരിക്കുകയും ചെയ്തു. അന്നേദിവസം അധ്യാപകപ്രതിനിധികൾ ഹെഡ്മിസ്ട്രസ്സിനോടൊപ്പം സ്കൂളിലെ പൂർവാധ്യാപകരെ ഭവനങ്ങളിൽ സന്ദർശിച്ചു ആദരിക്കുകയും ചെയ്തു. അത് വേറിട്ട ഒരനുഭവമായിരുന്നു.
കേരളപിറവിദിനാഘോഷവും സ്കൂൾ തുറക്കലും
കേരളപിറവിദിനത്തിൽത്തന്നെ സ്കൂൾ തുറക്കുകയാൽ വിദ്യാർഥികളെ സ്വീകരിക്കാനായി കേരളീയവേഷം ധരിച്ച ഹൈസ്കൂൾ കുട്ടികൾ പ്രവേശനകവാടത്തിൽ അണിനിരന്നു. തലേദിവസം തന്നെ അധ്യാപകർ ക്ലാസ്സ്‌മുറികൾ തോരണങ്ങളാൽ അലങ്കരിച്ചിരുന്നു. കേരളീയവേഷത്തിലാണ് അന്നേദിവസം അധ്യാപകരും സ്കൂളിലെത്തിയത്. സ്കൂൾ മുറ്റത്തു ഒന്നാം ക്ലാസ്സിലെ കുരുന്നുകളെ അണിനിരത്തി സ്കൂൾ ഹെഡ്മിസ്ട്രസ്സിന്റെ നേതൃത്വത്തിൽ നടന്ന പ്രാർത്ഥനാചടങ്ങുകൾക്ക് ശേഷം അവരെ ക്ലാസ്സ്‌മുറികളിലേക്ക് ആനയിച്ചു. എല്ലാകുട്ടികൾക്കും മധുരം നൽകി.
ശിശു ദിനം
ഈ വർഷത്തെ ശിശുദിനം നവംബർ 14 ഞായറാഴ്ച്ച ആയിരുന്നതിനാൽ, 15 തിങ്കളാഴ്ച്ച സ്കൂളിൽ ആഘോഷ പരിപാടികൾ സംഘടിപ്പിച്ചു. ഈശ്വര പ്രാർത്ഥനയോടെ ആരംഭിച്ച ചടങ്ങിൽ PTA പ്രസിഡന്റ് ശ്രീ യൂസഫ് അധ്യക്ഷപദം അലങ്കരിച്ചു. നാലാം ക്ലാസ്സ് വിദ്യാർത്ഥിനി കുമാരി അഹസന ഹക്കീം ചാച്ചാജിയുടെ വേഷത്തിൽ കുട്ടികൾക്ക് ആശംസകൾ നേർന്നു. അധ്യാപകർ അവതരിപ്പിച്ച വിവിധ കലാപരിപാടികൾ കുട്ടികൾ വളരെ ആവേശത്തോടെ ആസ്വദിച്ചു. കുട്ടികളുടെ ചാച്ചാജി ജവഹർലാൽ നെഹ്റുവിനെക്കുറിച്ച് കൂടുതൽ അറിയുവാൻ അദ്ദേഹത്തിന്റെ ജീവചരിത്രക്കുറിപ്പും കുട്ടികൾക്ക് മുന്നിൽ അവതരിപ്പിച്ചു. അന്നേ ദിവസം കുട്ടികൾക്ക് മധുരവിതരണവും നടത്തിയിരുന്നു. മധുര സ്മരണകൾ ഉണർത്തുന്ന ഒരു ദിനം കുട്ടിൾക്ക് സമ്മാനിക്കാൻ അധ്യാപകർക്ക് ഈ ശിശുദിനത്തിൽ കഴിഞ്ഞു.
വിദ്യാരംഗം കലാസാഹിത്യവേദി
ജൂൺ മാസത്തിൽ വായനാവാരത്തോടനനുബന്ധിച്ചു വായനാകുറിപ്പ് തയ്യാറാക്കൽ, എന്റെ ലൈബ്രറി, പ്ലക്കാർഡ് നിർമ്മാണം, ആസ്വാദന കുറിപ്പ് തയ്യാറാക്കൽ, ഇഷ്ടപ്പെട്ട കഥാപാത്രത്തെ അനുകരിക്കൽ, ഇഷ്ടപ്പെട്ട എഴുത്തുകാരൻ, കൊളാഷ് നിർമാണം എന്നീ പ്രവർത്തനങ്ങൾ കുട്ടികൾ ഏറ്റെടുത്തു ചെയ്തു. ആഗസ്റ്റ് മാസം വിദ്യാരംഗം കലാസാഹിത്യവേദിയുടെ ആഭിമുഖ്യത്തിൽ സ്കൂൾതല രചനാമത്സരങ്ങൾ നടന്നു. തെരഞ്ഞെടുക്കപ്പെട്ട കഥ, കവിത, ചിത്രം, ആസ്വാദനക്കുറിപ്പ് തുടങ്ങിയ രചനാമത്സരങ്ങളും കാവ്യാലാപനം, നാടൻപാട്ട് എന്നിവയുടെ വീഡിയോകളും ഓഗസ്റ്റ് 16 ന് AEO യിൽ സമർപ്പിച്ചു. നവംബർ 1 ന് സ്കൂൾ തുറന്ന ദിവസം പ്രവേശനോത്സവവും കേരളപ്പിറവിദിനവും വിദ്യാരംഗത്തിന്റെ കീഴിൽ മനോഹരമായി സംഘടിപ്പിച്ചു. തുടർന്നുള്ള മാസങ്ങളിൽ സ്കൂൾ അസംബ്ലിയിൽ സാഹിത്യകാരന്മാരുടെ ചരമദിനം, ജന്മദിനം എന്നിവയുമായി ബന്ധപ്പെട്ട് ലഘുവിവരണം അവതരിപ്പിക്കുന്നുണ്ട്.
ഗാന്ധിദർശൻ ക്ലബ്
ഗാന്ധി ദർശൻ ക്ലബ്ബ് ഉദ്ഘാടനത്തോടനുബന്ധിച്ച് ഒരു ഓഫ് ലൈൻ മീറ്റിംഗ് സ്കൂളിൽ സംഘടിപ്പിക്കുകയും ക്ലബ്ബിന്റെ സ്കൂൾതല പ്രവർത്തനങ്ങളുടെ ഉദ്ഘാടനം ഹെഡ്മിസ്ട്രസ് സിസ്റ്റർ സിജി നിർവഹിക്കുകയും ചെയ്തു. കുട്ടികൾക്കും രക്ഷകർത്താക്കൾക്കും ആയി ഓൺലൈൻ മീറ്റിംഗ് സംഘടിപ്പിച്ചു.കുട്ടികൾ സ്കൂളിൽ വൃക്ഷ തൈകൾ നടുകയും സേവനവാരത്തോടനുബന്ധിച്ച് വിവിധ ശുചീകരണ പ്രവർത്തനങ്ങളിൽ പങ്കാളികളാവുകയും ചെയ്തു.
സോഷ്യൽ സയൻസ് ക്ലബ് പ്രവർത്തനങ്ങൾ
സ്കൂൾ സോഷ്യൽ സയൻസ് ക്ലബ്ബിന്റെ ആഭിമുഖ്യത്തിൽ ജൂലൈ 11 ന് ലോകജനസംഘ്യദിനത്തോട് അനുബന്ധിച്ചു കുട്ടികളെ ഉൾപ്പെടുത്തി ഒരു ബോധവൽക്കരണവീഡിയോ തയ്യാറാക്കി. ഓഗസ്റ്റ് 6 ഹിരോഷിമ ദിനത്തോടനുബന്ധിച്ചും വീഡിയോ തയ്യാറാക്കുകയുണ്ടായി. സ്വാതന്ത്ര്യത്തിന്റെ അമൃത മഹോത്സവവുമായി ബന്ധപ്പെട്ട് സ്കൂളിൽനിന്ന് സോഷ്യൽ സയൻസ് ക്ലബ്ബിന്റെ ആഭിമുഖ്യത്തിൽ വിദ്യാർഥികൾ തയ്യാറാക്കിയ പ്രാദേശിക ചരിത്രരചനകൾ AEO ആഫീസിൽ എത്തിച്ചു. അമൃത മഹോത്സവവുമായി ബന്ധപ്പെട്ട് യു ആർ സി സംഘടിപ്പിച്ച ദേശഭക്തിഗാന മത്സരത്തിൽ ഹൈ സ്കൂൾ വിഭാഗം മൂന്നാം സ്ഥാനവും, യു പി വിഭാഗം രണ്ടാം സ്ഥാനവും കിട്ടിയതിനാൽ സ്കൂൾ തല സർട്ടിഫിക്കറ്റും ട്രോഫിയും ബഹു AEO ശ്രീ ഗോപകുമാർ സാർ HM കോൺഫറൻസിൽ വിതരണം ചെയ്തു. തദവസരത്തിൽ ബഹു സൗത്ത് ബി പി ഓ ശ്രീ.നജീബ് സാർ സന്നിഹിതനായിരുന്നു.
ശാസ്ത്രരംഗം
ശാസ്ത്രരംഗത്തിന്റെ ആഭിമുഖ്യത്തിൽ URC തലത്തിൽ നടന്ന മത്സരങ്ങളിൽ സ്കൂളിലെ കുട്ടികൾ പങ്കെടുത്തു. അതിൽ പ്രവർത്തിപരിചയ മത്സരത്തിൽ നമ്മുടെ സ്കൂളിൽ നിന്നും മത്സരിച്ച 8C യിലെ ഗോകില ആർ ആർ ജില്ലാ തലത്തിലേക്കു തെരഞ്ഞെടുക്കപെട്ടു.
തിരികെ വിദ്യാലയത്തിലേക്ക്
കോവിഡ് കാലത്തെ അടച്ചിടലിനുശേഷം സ്കൂളുകൾ തുറന്നപ്പോഴുള്ള നിമിഷങ്ങൾ ചിത്രീകരിക്കുന്നതിന് 'തിരികെ വിദ്യാലയത്തിലേക്ക്' എന്ന തലക്കെട്ടിൽ കൈറ്റ് നടത്തിയ ഫോട്ടോഗ്രാഫി മത്സരത്തിൽ സ്കൂളിന് മൂന്നാം സ്ഥാനം ലഭിച്ചു. തിരുവനന്തപുരം ജില്ലയിൽ നിന്ന് ഉൾപ്പെടുത്തിയ ഏകദേശം 1194 ഫോട്ടോകളിൽ നിന്നും 30 ഫോട്ടോ തെരഞ്ഞെടുത്തു. അതിൽ നമ്മുടെ സ്കൂളിലെ 2 ഫോട്ടോ ഇടം നേടുകയും തിരുവനന്തപുരം ജില്ലയിൽ മൂന്നാം സ്ഥാനം കരസ്ഥമാക്കുകയും ചെയ്തു.
സീഡ്
ലോക പരിസ്ഥിതി ദിനത്തോടനുബന്ധിച്ച്, കുട്ടികൾക്കായി പെയിന്റിങ് മത്സരം സംഘടിപ്പിക്കുകയുണ്ടായി. എൽപി, യുപി വിഭാഗങ്ങളിൽ നിന്ന് ഇരുനൂറോളം കുട്ടികൾ മത്സരത്തിൽ പങ്കെടുത്തു. മത്സരവിജയികളെ കണ്ടെത്തി.ലഹരി വിരുദ്ധ ദിനത്തോടനുബന്ധിച്ച് സംഘടിപ്പിച്ച ഓൺലൈൻ വെബ്ബിനാറിൽ കുട്ടികൾ പങ്കെടുത്തു. ലഹരിവിരുദ്ധ ദിന സന്ദേശങ്ങൾ ഉൾക്കൊള്ളുന്ന പ്ലക്കാർഡുകൾ കുട്ടികൾ നിർമ്മിച്ചു.കുട്ടികൾക്ക് കൃഷിയിൽ താല്പര്യം ജനിപ്പിക്കുന്നതിന് ഉതകുന്ന പ്രവർത്തനങ്ങൾക്ക് രൂപം നൽകുകയും വിത്തുകൾ കുട്ടികൾക്ക് നൽകുകയും ചെയ്തു. വീട്ടിലെ കൃഷി പ്രോത്സാഹിപ്പിക്കുന്നതിനായി കുട്ടികൾ വീട്ടിൽ നട്ടു പരിപാലിക്കുന്ന സസ്യങ്ങളുടെ ഫോട്ടോസ് അയച്ചു നൽകി.
എസ് പി സി
ജൂൺ 5, പരീസ്ഥിതിദിനത്തിന്റെ ഭാഗമായി എല്ലാ കേഡറ്റുകളും തങ്ങളുടെ വീട്ടുപരിസരത്ത് ഫലവൃക്ഷത്തൈകൾ നട്ടിരുന്നു. ഓഗസ്റ്റ് 2, SPC ദിനത്തിന്റെ 12-ാമത് വാർഷികത്തോടനുബന്ധിച്ച് സ്കൂളിൽ പൂന്തുറ പോലീസ് സ്റ്റേഷൻ എസ് ഐ ഷിയാസ് എസ് പി സി പതാക ഉയർത്തി. ഓഗസ്റ്റ് 7 ന് എസ് പി സി യുടെ 12-ാമത് വാർഷികത്തോടനുബന്ധിച്ച് ഫ്രൻഡ്സ് അറ്റ് ഹോം എന്ന പ്രോജക്ടിന്റെ ഭാഗമായി ഭിന്നശേഷിക്കാരിയായ കുട്ടിക്ക് ധനസഹായം നൽകി. ഫലവൃക്ഷത്തോട്ടം നിർമ്മിക്കുന്നതിന്റെ ഭാഗമായി സ്കൂളിൽ ഫലവൃക്ഷത്തൈകൾ നട്ടുകൊണ്ട് ഹെഡ്മിസ്ട്രസ് സിസ്റ്റർ സിജി ഉദ്ഘാടനം നിർവഹിച്ചു.'ഒരു വയറൂട്ടാം' പദ്ധതിയുടെ ഭാഗമായി എസ് പി സി കേഡറ്റുകൾ എല്ലാവരും ചേർന്ന് തങ്ങളുടെ വീടിനു സമീപത്തെ പാവപ്പെട്ടവർക്ക് ആഹാരം നൽകി. ശിശുദിനത്തിന്റെ ഭാഗമായി സംഘടിപ്പിച്ച 'ചിൽഡ്രൻസ് ഡേ ചലഞ്ചിൽ' ശിശുക്ഷേമ സമിതിയിലെ നിരാലംബരായ കുഞ്ഞുങ്ങൾക്ക് ആവശ്യമായ സാധനങ്ങൾ നൽകി.
ഗൈഡ്സ്
2021 - 2022 അക്കാദമിക വർഷത്തെ ഗൈഡ് സംഘടനയുടെ പ്രവർത്തനങ്ങൾ ജൂൺ മാസത്തെ പരിസ്ഥിതി ദിനത്തോടെ ആരംഭിച്ചു. ഓൺലൈൻ മുഖേന മീറ്റിംഗ് സംഘടിപ്പിക്കുകയും അതിൻപ്രകാരം പരിസ്ഥിതി മലിനീകരണത്തെക്കുറിച്ച് ചുറ്റുപാടും ഉള്ള പത്ത് ഭവനങ്ങളിൽ ബോധവൽക്കരണം നടത്താനും സ്വഭവനങ്ങളിൽ വൃക്ഷങ്ങൾ നട്ടുപിടിപ്പിക്കാനും തീരുമാനിച്ചു. തുടർന്ന് വായനാദിനത്തിൽ വായനയുടെ പ്രാധാന്യം വിളിച്ചോതുന്ന പോസ്റ്ററുകളും പ്ലക്കാർഡുകളും മുദ്രാഗീതങ്ങളും തയ്യാറാക്കി കുട്ടികൾ ഓൺലൈനിൽ പ്രദർശിപ്പിച്ചു. August 15 ന് സ്കൂൾ തലത്തിൽ നടത്തിയ സ്വാതന്ത്ര്യദിന പതാക ഉയർത്തൽ കർമത്തിൽ എല്ലാ ഗൈഡുകളും പങ്കെടുത്തു. പുതുതായി 12 ഗൈഡുകളെ സംഘടനയിലേക്ക് ചേർത്തു. രാജ്യപുരസ്‌ക്കാർ പരീക്ഷയ്ക്ക് തയ്യാറെടുക്കുന്ന ഗൈഡുകൾ ഒക്ടോബർ മൂന്നാം വാരം, താത്കാലിക കൂടാരങ്ങളും വീട്ടിൽ ഉപയോഗിക്കാവുന്ന ഗാഡ്ജറ്റുകളും തയ്യാറാക്കി. OYMS ൽ കുട്ടികളുടെ ബയോഡേറ്റ അപ്ഡേറ്റ് ചെയ്യുകയും പുതിയ കുട്ടികളെ രജിസ്റ്റർ ചെയ്യുകയും ചെയ്തു
ലിറ്റിൽ കൈറ്റ്സ്
2021- 2023 ബാച്ചിലേക്കുള്ള ലിറ്റിൽ കൈറ്റ്സ് അംഗങ്ങളെ തെരഞ്ഞെടുക്കാനുള്ള പരീക്ഷ ലിറ്റിൽ കൈറ്റ്സ് മിസ്ട്രസ്മാരോടൊപ്പം സ്കൂളിലെ മറ്റു അധ്യാപകരുടെയും സഹകരണത്തോടെ നവംബർ മാസം 27 ന് നടന്നു. 95 പേരിൽ നിന്ന് 41 പേർ തെരഞ്ഞെടുക്കപ്പെട്ടു.
റെഡ്ക്രോസ്സ്
പരിസ്ഥിതി ദിനത്തോടനുബന്ധിച്ച് സ്കൂളിലെ റെഡ് ക്രോസ്സ് അംഗങ്ങൾ അധ്യാപകരോടൊത്ത് വൃക്ഷതൈകൾ നട്ടു.