ജി.എൽ.പി.എസ്. സി. യു. ക്യാമ്പസ്/പ്രവർത്തനങ്ങൾ/2025-26

എൽഎസ്എസ് വിജയികളെ അനുമോദിച്ചു.

ജി എൽ പി എസ് കാലിക്കറ്റ് യൂണിവേഴ്സിറ്റി ക്യാമ്പസിലെ എൽഎസ്എസ് വിജയികളെ അനുമോദിച്ചു. 30 കുട്ടികളെ വിജയിപ്പിച്ച് വേങ്ങര സബ്ജില്ലയിൽ രണ്ടാം സ്ഥാനത്തെത്തിയിരിക്കുകയാണ് വിദ്യാലയം. ചടങ്ങിൽ അധ്യാപകർ, രക്ഷിതാക്കൾ, പിടിഎ, എസ് എം സി, എം പി ടി എ കമ്മിറ്റി അംഗങ്ങൾ പങ്കെടുത്തു. ഹെഡ്മാസ്റ്റർ കെ. പി.ഗംഗാധരൻ, പി.ടി.എ. പ്രസിഡണ്ട് വി.ദിനേശ് എന്നിവർ ഉപഹാരം നൽകി. ശ്രീഗു, ജെയിംസ്, എം.അനിശ്രീ, എൻ.ടി.രജിത , സി.രജില പി.വി. സമീറ എന്നിവർ സംസാരിച്ചു.

പരിസ്ഥിതി ദിനത്തിൽ മധുരവനമൊരുക്കി ക്യാമ്പസ് എൽ. പി. സ്കൂൾ

തേഞ്ഞിപ്പലം: പരിസ്ഥിതി ദിനാഘോഷത്തിന്റെ ഭാഗമായി ഗവൺമെന്റ് എൽ പി സ്കൂൾ കാലിക്കറ്റ് യൂണിവേഴ്സിറ്റി ക്യാമ്പസിൽ ഫലവൃക്ഷത്തൈകൾ വച്ചു പിടിപ്പിക്കുന്ന മധുരവനം പദ്ധതിക്ക് തുടക്കം കുറിച്ചു. വിദ്യാലയത്തെ ഹരിത കാമ്പസ് ആക്കുന്നതിന്റെ ഭാഗമായി പോസ്റ്റർ നിർമ്മാണം,ക്വിസ്, കൊളാഷ് എന്നീ പ്രവർത്തനങ്ങൾ നടത്തി. സ്കൂൾ ഹെഡ്മാസ്റ്റർ കെ.പി. ഗംഗാധരൻ, കാർഷിക ക്ലബ് അംഗങ്ങൾ എന്നിവർ ചേർന്ന് വൃക്ഷത്തൈ നട്ട് ഉദ്ഘാടനം ചെയ്തു. പരിസ്ഥിതിദിന അസംബ്ലിയിൽ എം.അനിശ്രീ പരിസ്ഥിതി സംരക്ഷണ പ്രതിജ്ഞ ചൊല്ലി കൊടുത്തു. പ്ലാസ്റ്റിക്- മാലിന്യമുക്ത ക്യാമ്പസ് എന്ന ലക്ഷ്യം മുൻനിർത്തി എഴുതിത്തീർന്ന സമ്പാദ്യം, എന്റെ പിറന്നാൾ പുസ്തകം, പിറന്നാൾ ചെടി എന്നിങ്ങനെ നിരവധി പരിപാടികൾ നടത്തിവരുന്നതിനുള്ള അംഗീകാരമായി തിരൂരങ്ങാടി ബ്ലോക്ക് പഞ്ചായത്തിലെ ഏറ്റവും മികച്ച പൊതു സ്ഥാപനമെന്ന അംഗീകാരം ലഭിച്ച വിദ്യാലയമാണിത്. പിടിഎ പ്രസിഡണ്ട് വി.ദിനേശ് എക്സിക്യൂട്ടീവ് അംഗം പി.ജിനേഷ് , ജെയിംസ് എന്നിവർ പരിപാടിക്ക് നേതൃത്വം നൽകി.