"എ.യു.പി.സ്കൂൾ വെളിമുക്ക്/ചരിത്രം" എന്ന താളിന്റെ പതിപ്പുകൾ തമ്മിലുള്ള വ്യത്യാസം

1923 ൽ മലപ്പുറം ജില്ലയിലെ ചേളാരിക്ക് അടുത്തുള്ള പാണക്കാട് എന്ന സ്ഥലത്ത് എളിയ നിലയിൽ ലോവർ പ്രൈമറി സ്കൂൾ ആയിട്ടാണ് വെളിമുക്ക് യുപി സ്കൂളിൻ്റെ തുടക്കം. സ്കൂളിൻ്റെ സ്ഥാപക മാനേജർ ശ്രീ പൊതായ ശേഖരൻ നായരായിരുന്നു. അക്കാലത്ത് ചെറിയ കുട്ടികൾക്ക് വിദ്യാഭ്യാസത്തിന് അടുത്തൊന്നും വിദ്യാലയമുണ്ടായിരുന്നില്ല. പണികോട്ടും പടിയിൽ അക്കാലത്തെ മലബാർ ഡിസ്ട്രിക്ട് ബോർഡിൻ്റെ ഒരു മുസ്ലിം വിദ്യാലയം മാത്രമാണ് ഉണ്ടായിരുന്നത്. ശ്രീമാൻ ശേഖരൻ നായർ സ്ഥലത്തെ ഒരു നാട്ടുപ്രമാണി ആയിരുന്നു. അദ്ദേഹം യാതൊരു സ്വാർത്ഥ താൽപര്യവും ഇല്ലാതെ പൊതുജനസേവനം മാത്രം ലക്ഷ്യമാക്കിയാണ് ഈ വിദ്യാലയം സ്ഥാപിച്ചത്.

അന്നത്തെ ഏറനാട് താലൂക്കിലെ ഒരു ഭാഗമായിരുന്ന വെളിമുക്ക് അംശത്തിലെ പാപ്പന്നൂരും മറ്റു പ്രദേശങ്ങളും ഏറ്റവും പിന്നോക്കാവസ്ഥയിലായിരുന്നു. ഇവിടത്തുകാർ അധികപേരും കൂലിപ്പണിക്കാരും ദരിദ്രരുമായിരുന്നു. വളരെ കഷ്ടപ്പെട്ടാണ് അവർ ജീവിച്ചിരുന്നത്. സ്കൂളിൻ്റെ നാലയലത്തേക്ക് പോലും അവർ കടന്നു വന്നിരുന്നില്ല.

സ്കൂൾ ആരംഭിക്കുന്ന സമയത്തിനുമുമ്പ് സ്കൂളിൽ എത്തുകയും ക്ലാസുകളിലെത്താത്ത കുട്ടികളെ അവരുടെ വീടുകളിൽ പോയി പിടിച്ചുകൊണ്ടു വരുകയും ചെയ്യുക എന്നത് ക്ലാസ് അധ്യാപകരുടെ ചുമതലയായിരുന്നു. ശ്രീ ടി എം കുട്ടികൃഷ്ണൻ നായർ, ശ്രീമാൻ ചന്ദ്രശേഖരൻ നായർ, ശ്രീ കെ വി ചന്തുക്കുട്ടി എന്നിവരും സ്കൂളിനുവേണ്ടി നിരന്തരം പ്രയത്നിച്ചു കൊണ്ടിരുന്നു. അവർ ഇതൊരു ഹയർ എലമെൻ്റെറി സ്കൂളാക്കാൻ വേണ്ടി ശ്രമം തുടർന്നു.

ഈ വിദ്യാലയം ഹയർ എലിമെൻ്ററി ആയതോടെ കുട്ടികളുടെയും അധ്യാപകരുടെയും എണ്ണം വർദ്ധിച്ചു. അധ്യാപകരുടെ ഭാഗത്തുനിന്ന് അലസതയോ വീഴ്ചയോ വരാതിരിക്കാൻ അധ്യാപകർ തന്നെ പല നിബന്ധനകളും രൂപപ്പെടുത്തി. കൃത്യസമയത്ത് സ്കൂളിലെത്താതിരിക്കുക, ക്ലാസിൽ പോകാതിരിക്കുക, അധ്യാപകർ സ്കൂൾ വളപ്പിൽ വെച്ച് സിഗരറ്റ് - ബീഡി എന്നിവ വലിക്കുക, കുട്ടികളെ ഉപയോഗിച്ച് അത് വാങ്ങിക്കുക എന്നിങ്ങനെയൊക്കെ ചെയ്താൽ ആ അധ്യാപകൻ മറ്റുള്ള അധ്യാപകർക്ക് ചായയും പലഹാരവും നിർബന്ധമായും വാങ്ങി നൽകണമായിരുന്നു.