"ഗവ.മോഡൽ എൽ.പി.എസ്സ് മെഴുവേലി" എന്ന താളിന്റെ പതിപ്പുകൾ തമ്മിലുള്ള വ്യത്യാസം

കൊല്ലവർഷം 1090-ൽ തിരുവിതാംകൂർ ഗവൺമെന്റിനു വേണ്ടി ദിവാൻജി അവർകളുടെ പേരിൽ ചെങ്ങന്നൂർ സബ് രജിസ്റ്റർ ആഫീസിൽ 2808-ാം നമ്പരായി രജിസ്റ്റർ ചെയ്ത് ആധാരത്തിൽ ഇപ്രകാരം കാണുന്നു. "കുട്ടികളുടെ വിദ്യാഭ്യാസത്തിന്റെ ഉപയോഗത്തിലേക്ക് ഒരു കെട്ടിടം പണിയിക്കുന്നതിനായി ഞങ്ങൾ മുതൽ പേർക്ക് പൂങ്കിഴാമണ്ണിൽ മാത്തൻ ചാക്കോ ഈയാണ്ട് മകരമാസം അഞ്ചാംതീയതി 1310-ാം നമ്പരായി രജിസ്റ്റർ ചെയ്ത് വാങ്ങിയിരിക്കുന്ന ദാനപത്രപ്രകാരം കൈവശം വച്ച് ഞങ്ങളുടെ പൊതു മുതൽ ചെലവ് പള്ളിക്കൂട കെട്ടിടം പണികഴിപ്പിച്ച് ബാക്കിയുള്ള സ്ഥലം പള്ളിക്കൂടത്തിന്റെ കോമ്പൗണ്ടായി ഉപയോഗപ്പെടുത്തിയിട്ടും ഇരിക്കുന്നതായി എന്നും തുടർന്ന് ഈ സ്ഥലത്ത് 90 അടി നീളവും 18 അടി വീതിയും 10 അടി പൊക്കവും കൽ ഭിത്തിയും മുൻ വശത്തും വടക്കു വശത്തും ആറടിവീതിയിൽ വരാന്തയും ആഞ്ഞിലി, പ്ലാവ് മുതലായ കട്ടിയും ബലവുമുള്ള മരങ്ങളാൽ മേക്കൂടുമായി പണികഴിപ്പിച്ചിട്ടുള്ള പള്ളിക്കൂടം ഒന്നിലും അതിൽ ഞങ്ങൾ പണി കഴിപ്പിച്ചിട്ടുള്ള ഡ്രോയോടുകൂടി മേശ ഒന്നും ഡ്രോയില്ലാത്തതായ മേശ നാലും, കസേര ഒന്നും, സ്റ്റൂൾ നാലും, രണ്ടരകോൽ നിളത്തിൽ ബഞ്ച് മുപ്പതും, നാലരഅടിനീളം മൂന്നേകാൽ അടിവീതിയിൽ ബോർഡ് അഞ്ചും അതിന്റെ സ്റ്റാന്റ് അഞ്ചും ഈ മരസാമാനങ്ങളിൽ മേലും ഞങ്ങൾക്കുള്ള സർവ്വഅവകാശവും ബാദ്ധ്യതയും യാതൊരു വ്യവസ്ഥയും കൂടാതെ വിദ്യാഭ്യാസത്തിന്റെ ഉപയോഗത്തിനായി ഗവൺമെന്റിലേക്ക് തീറായി ഒഴിഞ്ഞു നൽകിയിരിക്കുന്ന തായും " രേഖപ്പെടുത്തിയിരിക്കുന്നു.

ശ്രീനാരായണ ഗുരുസ്വാമികളുടെ അരുവിപ്പുറം പ്രതിഷ്ഠയോടുകൂടി കേരള ചരിത്രത്തിൽ ഒരു നവയുഗം പിറന്നു. ഗുരുസ്വാമികളെ കൂടാതെ ചട്ടമ്പിസ്വാമികൾ, വാക്ഭടാനന്ദസ്വാമികൾ, മഹാനായ അയ്യങ്കാളി, ക്രൈസ്തവ മിഷനറിമാർ തുടങ്ങിയവരുടെ പ്രവർത്തനങ്ങൾ കേരളീയ സമൂഹത്തെ പുതിയ ഒരു ചിന്താധാരയിലേക്ക് നയിച്ചു. ജാതിവ്യവസ്ഥയുടെയും ജന്മിത്വത്തിന്റെയും അനാചാരങ്ങളുടെയും കൂത്തരങ്ങായിരുന്ന കേരളനാട് പുതിയ ഒരുണർവ്വോടുകൂടി ഉയിർത്തെഴുന്നേറ്റ കാലമായിരുന്നു അത്. സാമൂഹ്യനീതിക്കും സ്വാതന്ത്ര്യ ത്തിനും വേണ്ടി ജനങ്ങൾ പൊരുതുവാൻ തുടങ്ങി. ഗ്രന്ഥശാലകളും വിദ്യാലയങ്ങളും നാട്ടിൽ ധാരാളമായി ഉടലെടുത്തു.