ഗവ.എൽ.പി.എസ്.തോട്ടുവാ/ക്ലബ്ബുകൾ

സുരക്ഷാ ക്ലബ്ബ്

സ്കൂളിലെ സുരക്ഷ ഉറപ്പാക്കുക എന്നതാണ് ഈ ക്ലബ്ബിന്റെ ലക്ഷ്യം. വാഹനത്തിൽ എത്തുന്നവരുടെ സുരക്ഷയും ഉറപ്പാക്കുന്നു. ഈ ക്ലബ്ബിൽ ഒരു അധ്യാപികയും ഓരോ ക്ലാസ്സിന്റെയും പ്രതിനിധികളുമാണുള്ളത്. സ് കൂൾ വാഹനമോടിക്കുന്ന ഡ്രൈവർമാരും ഇതിൽ അംഗങ്ങളായിട്ടുണ്ട്. സുരക്ഷാ ബോധവത്കരണ ക്ലാസ്സുകൾ ഈ ക്ലബ്ബിന്റെ ഭാഗമായി സംഘടിപ്പിച്ച് വരുന്നു

ഗണിത ക്ലബ്ബ്

ഗണിതപഠനം രസകരമാക്കുക, ഗണിതാഭിരുചി വളർത്തുക എന്നതുമാണ് ഈ ക്ലബ്ബിന്റെ ലക്ഷ്യം. ഈ ക്ലബ്ബിന്റെ ആഭിമുഖ്യത്തിൽ എല്ലാ കുട്ടികൾക്കും ഗണിതം മധുരം, ഉല്ലാസഗണിതം തുടങ്ങിയ പ്രവർത്തനങ്ങൾ നടന്നു വരുന്നു. ഈ ക്ലബ്ബിൽ ഗണിതത്തിൽ താത്പര്യമുള്ള ഓരോ ക്ലാസ്സിലേയും 3 കുട്ടികൾ വീതമാണുള്ളത്. ഗണിത ക്വിസ്, നമുക്കു ചുറ്റുമുള്ള ഗണിതരൂപങ്ങൾ കണ്ടെത്തൽ , ഗണിതപഠനോപകരണ നിർമ്മാണ ക്യാമ്പ് തുടങ്ങിയ പ്രവർത്തനങ്ങളും നടത്തിവരുന്നു.

വിദ്യാരംഗം സാഹിത്യവേദി

സാഹിത്യമേഖയിലെ രചനാപരവും ,വായനാ പരവുമായ വളർച്ച എന്നതാണ് ഈ ക്ലബ്ബിലൂടെ ഉദ്ദേശിക്കുന്നത്. വായനാ ദിനാചരണവുമായി ബന്ധപ്പട്ട് ഇതിന്റെ പ്രവർത്തനങ്ങൾ ആരംഭിക്കുന്നു. വായന പരിപോഷിപ്പിക്കുന്നതിനായി ലൈബ്രറി പുസ്കങ്ങൾ കുട്ടികൾക്ക് നൽകി വായനാ കുറിപ്പുകൾ തയാറാക്കി ക്ലാസ്സ് തലത്തിൽ അവതരിപ്പിച്ച് മികച്ചവ സ്കൂൾ അസംബ്ലിയിൽ അവതരിപ്പിക്കുന്നതാണ് ഒരു പ്രധാന പ്രവർത്തനം. കഥാരചന , കവിതാരചന മത്സരങ്ങളും ഈ ക്ലബ്ബിന്റെ നേതൃത്വത്തിൽ സംഘടിപ്പിച്ച് വരുന്നു. ഈ ക്ലബ്ബിൽ ഒരു ക്ലാസ്സിൽ നിന്നും രണ്ട് കുട്ടികളെ വീതം പ്രതിനിധി ആക്കിയിട്ടുണ്ട്. സാഹിത്യപഠന ക്യാമ്പുകളും സംഘടിപ്പിച്ച് വരുന്നു. ഇപ്പോൾ ഓരോ മേഖലയിലെ പ്രശസ്തരെ ഗസ്റ്റായി പങ്കെടുപ്പിച്ച് ഓൺ ലൈൻ ക്ലാസ്സുകൾ ഞായറാഴ്ചകളിൽ സംഘടിപ്പിച്ച് വരുന്നു.

പരിസ്ഥിതി ക്ലബ്ബ്

പ്രകൃതിയെ അറിയുക, സംരക്ഷിക്കുക എന്നതാണ് ഈ ക്ലബ്ബിന്റെ ലക്ഷ്യം. ഔഷധത്തോട്ടം, ജൈവവൈവിധ്യ ഉദ്യാനം, കൃഷിത്തോട്ടം എന്നിവയുടെ സംരക്ഷണം, പരിപാലനം എന്നിവ ഈ ക്ലബ്ബിന്റെ ചുമതലയാണ്. ചെറിയ ഫീൽഡ് ട്രിപ്പുകൾ അയലത്തുള്ള തണ്ണീർത്തടങ്ങളിലേക്കും, കൃഷി പാടത്തേക്കും ഈ ക്ലബ്ബിന്റെ ഭാഗമായി സംഘടിപ്പിക്കാറുണ്ട്. പരിസ്ഥിതി ദിനാഘോഷം ഓൺലൈനിൽ സംഘടിപ്പിക്കേണ്ട വന്ന സാഹര്യത്തിൽ " മുറ്റത്തൊരു പൂന്തോട്ടം ചലഞ്ചാണ്" ഈ വർഷം നടപ്പിലാക്കിയത് . (ഒരു ചെറിയ പൂന്തോട്ടം സ്വന്തമായി പരിപാലിച്ച് വളർത്തുക )

ലിറ്റിൽ കിഡ്സ് ഇംഗ്ലീഷ് ക്ലബ്ബ്

ഇംഗ്ലീഷ് ഭാഷ അനായാസമായി കൈകാര്യം ചെയ്യാൻ കുട്ടികളെ പ്രാപ്തരാക്കാൻ ഈവർഷം ഏറ്റെടുത്ത ഇംഗ്ലീഷ് ക്ലബ്ബിന്റെ ഒരു പ്രവർത്തനമാണ് "ലിറ്റിൽ കിഡ്സ് ഇംഗ്ലീഷ് " . ഈ പ്രവർത്തനം ഓൺലൈനാണ് നടത്തിവരുന്നത്. ജൂലൈ മുതൽ മാർച്ച് വരെയാണ് ഇതിന്റെ കാലാവധി. കുട്ടികൾക്ക് തങ്ങളുടെ ദൈനംദിന ജീവിതത്തിൽ ഉപയോഗിക്കാവുന്ന ഇംഗ്ലീഷ് പദങ്ങൾ മനസ്സിലാക്കി കൊടുത്ത് അത് പ്രയോഗിച്ച് സ്വായത്തമാക്കാനുള്ള അവസരമാണ് ഈ പ്രേജക്ടിലൂടെ നടപ്പിലാക്കി വരുന്നത്. ഈ ലിറ്റിൽ കിഡ്സ് ഇംഗ്ലീഷിന്റെ പ്രവർത്തനങ്ങൾ ഏകീകരിക്കുന്നത് ശ്രീമാൻ രാജേഷ് സുബ്രഹ്‌മണ്യം എന്ന ഇംഗ്ലീഷ് ലൈഫ് സ്കിൽ ട്രയിനറാണ്. ഇംഗ്ലീഷ് ഭാഷ അനായാസമാക്കാനുള്ള വിദ്യാഭ്യാസ വകുപ്പിന്റെ "ഹലോ ഇംഗ്ലീഷ് " പ്രവർത്തനങ്ങളും ഇംഗ്ലീഷ് ക്ലബ്ബിന്റെ ഭാഗമായി തുടർന്ന് വരുന്നു. വർഷാവസാനം കുട്ടികളുടെ ഇംഗ്ലീഷ് വിനിമയ ശേഷി പ്രകടിപ്പിക്കാനായി ക്ലാസ്സ് തലത്തിലും തുടർന്ന് സ്കൂൾ തലത്തിലും ഇംഗ്ലീഷ് ഫെസ്റ്റും സംഘടിപ്പിച്ച് വരുന്നു. 2019 -20 ൽ ഓൺലൈൻ പ്രവർത്തനമായാണ് ഇത് നടത്തിയത്.

സർഗ്ഗവേദി

കുട്ടികളുടെ കലാപ്രകടനങ്ങളുടെ അവതരണത്തിന് ഒരു വേദി എന്ന നിലയിലാണ് ഈ ക്ലബ്ബിന്റെ പ്രവർത്തനങ്ങൾ നടന്നു വരുന്നത്. ഈ ക്ലബ്ബിന് ക്ലാസ്സ് തലത്തിൽ ഒരു കൺവീനറുണ്ട്. ആ കൺവീനറിന്റെ നേതൃത്വത്തിൽ എല്ലാ വെള്ളിയാഴ്ചയും ക്ലാസ്സ് തലത്തിൽ സർഗ്ഗവേദി കൂടി കലാ പരിപാടികൾ അവതരിപ്പിക്കുന്നു. തുടർന്ന് മാസത്തിലെ രണ്ടാമത്തെ വെള്ളിയാഴ്ച്ച മികച്ചവ സ്കൂൾ തലത്തിൽ അവതരിപ്പിക്കുന്നു. കുട്ടികളുടെ കഴിവുകൾ കണ്ടറിഞ്ഞ് പ്രോത്സാഹിപ്പിക്കാനും, വേദികൾ നൽകാനും ഈ ക്ലബ്ബിന്റെ പ്രവർത്തനത്തിലൂടെ സാധിച്ചു വരുന്നു. ടാലന്റ് പൂൾ എന്ന വാട്ട്സാപ്പ് ഗ്രൂപ്പിലൂടെ വിവിധ മേഖലകളിലെ പ്രതിഭകളുമായി സംവദിക്കാനും അവസരം നൽകി വരുന്നു. ഇപ്പോൾ സർഗ്ഗവേദി അവതരണം ഓൺലൈനാണ് നടന്നു വരുന്നത്.