ജി.എൽ..പി.എസ്. ഒളകര/ക്ലബ്ബുകൾ/സാമൂഹ്യം

സ്കൂളിൽ നിന്ന് വിദ്യാർത്ഥികൾ നേടുന്ന അറിവുകൾ സമൂഹത്തിന് പ്രയോജനപ്പെടും വിധം അനുയോജ്യമായ രീതിയിൽ, പ്രവർത്തനങ്ങളിൽ കൊണ്ടുവരിക എന്ന ലക്ഷ്യത്തോടെ ഒളകര ജി.എൽ.പി സ്കൂളിൽ സാമൂഹ്യ ക്ലബ് ഓരോ വർഷവും രൂപീകരിക്കുന്നു. വിദ്യാർത്ഥികളുടെയും വിദ്യാലയത്തിന്റെയും പുരോഗതിക്കായി ക്ലബ്ബ് ചുമതലയുള്ള ഷീജ ടീച്ചറും ഫാത്വിമ മിൻഹ എന്ന വിദ്യാർത്ഥിയും വിവിധ പ്രവർത്തനങ്ങൾക്ക് ക്ലബ്ബിന് കീഴിൽ നേതൃത്വം നൽകുന്നു... ഓരോ വർഷവും ക്ലബ്ബിന് കീഴിൽ നടത്തി വരുന്ന പ്രവർത്തനങ്ങൾ പരിചയപ്പെടാം.

2022-2023

ബാല വേല വിരുദ്ധ ദിനത്തിലെ ദൃശ്യാവിഷ്കാരം

"ഇപ്പണിക്ക് ഞങ്ങളില്ല, ഞങ്ങൾക്കും അവരെപ്പോലെ സ്കൂളിൽ പോയി പഠിക്കണം"ജൂൺ 12 ബാലവേല വിരുദ്ധ ദിനവുമായി ബന്ധപ്പെട്ട് സ്കൂളിൽ സംഘടിപ്പിച്ച ദൃശ്യാവിഷ്കാരത്തിൽ കുട്ടികളുടെ നൊമ്പര വാക്കുകളാണിവ. സമൂഹത്തിലെ നിർണായകമായ ഘടകമാണ് കുട്ടികൾ. എന്നാൽ കളിച്ചു നടക്കേണ്ട പ്രായത്തിൽ ഒരു നേരത്തെ അന്നത്തിനായി പണിയെടുക്കേണ്ടി വരുന്ന നിരവധി കുട്ടികൾ ലോകമെമ്പാടുമുണ്ട്. രാജ്യത്തിന്റെ വികസന പ്രവർത്തനങ്ങൾക്ക് മുതൽക്കൂട്ടാവേണ്ടവരാണവർ. നല്ല വിദ്യാഭ്യാസവും ശാരീരികവും മാനസീകവുമായ ആരോഗ്യവും നൽകിയാണ് ഭാവി തലമുറകളെ വാർത്തെടുക്കേണ്ടത്. ബാലവേലയല്ല ബാല സംരക്ഷണമാണ് അനിവാര്യം എന്ന മുദ്രാവാക്യവുമായാണ് സ്കൂളിലെ കുരുന്നുകൾ അണി നിരന്നത്. എച്ച്.എം കെ.ശശികുമാർ ബാലവേല വിരുദ്ധ ദിന സന്ദേശം നൽകി.

ജനാധിപത്യത്തിന്റെ ബാലപാഠങ്ങളുമായി   ഇലക്ഷൻ

ബാലറ്റ് സംവിധാനം ഉപയോഗപ്പെടുത്തി സ്കൂളിൽ പാർലമെന്റ് ഇലക്ഷൻ നടന്നു.  ജനാധിപത്യത്തിന്റെ ബാലപാഠം പഠിപ്പിച്ചുള്ള വോട്ടെടുപ്പ് വളരെ ഭംഗിയായാണ് പൂർത്തിയായത്. സ്കൂൾ ലീഡർ, വിദ്യാഭ്യാസ മന്ത്രി, ആരോഗ്യ മന്ത്രി,  കലാ കായിക മന്ത്രി തുടങ്ങിയ പദവികളിലേക്കായിരുന്നു കുട്ടികൾ സ്ഥാനാർത്ഥികളായി രംഗത്തുണ്ടായിരുന്നത്. തെരഞ്ഞെടുപ്പ്, കന്നി വോട്ടർമാരായ കുരുന്നുകൾക്ക് നവ്യാനുഭവമായിരുന്നു.

ഇലക്ഷൻ പ്രഖ്യാപിച്ച ശേഷം രണ്ട് നോമിനിമാരുടെ സാന്നിധ്യത്തിൽ സ്ഥാനാർത്ഥികളിൽ നിന്ന് നാമ നിർദ്ദേശ പത്രികകൾ സ്വീകരിക്കുകയും സൂക്ഷ്മ പരിശോധന നടത്തുകയും തെരഞ്ഞെടുത്ത സ്ഥാനാർഥികളുടെ പേരും ചിഹ്നവും നോട്ടീസ് ബോർഡിൽ പ്രസിദ്ധപ്പെടുത്തുകയും ചെയ്തു. തുടർന്ന് രണ്ട് ദിവസം കൊട്ടിക്കലാശം ഉൾപ്പടെ ശക്തമായ പ്രചരണ പരിപാടികൾ, സ്ഥാനാർത്ഥികൾ കുട്ടി വേട്ടർമാരോട് നേരിട്ട് വോട്ടഭ്യാർത്ഥിക്കുന്ന 'മീറ്റ് ദി ക്യാൻഡിഡേറ്റ്'  സംഗമം, പിന്നീട് മൗന പ്രചരണം. എല്ലാ സ്ഥാനാർഥികളും നിരവധി വാഗ്ദാനങ്ങളുമായി വോട്ട് അഭ്യർത്ഥിച്ചതും പ്രചരണത്തിൽ സജ്ജീവമായി രംഗത്തിറങ്ങിയതും വിദ്യാർത്ഥികളിൽ കൗതുക കാഴ്ച്ചയായി.

പ്രിസൈഡിംഗ് ഓഫീസർ, റിട്ടേണിംഗ് ഓഫീസർ, പോളിംഗ് ഓഫീസർ, പോളിംഗ് ഏജന്റുമാർ എന്നിവരെയെല്ലം ഉൾപ്പെടുത്തി 3 ബൂത്തുകളിലായി നടന്ന തെരഞ്ഞെടുപ്പിൽ വളരെ ആവേശത്തോടെ ശക്തമായ പോളിംഗായിരുന്നു രേഖപ്പെടുത്തിയത്. പിന്നീട് സ്ഥാനാർത്ഥികൾക്ക് മുന്നിൽ തെരഞ്ഞെടുപ്പ് കമ്മറ്റി അംഗങ്ങളായ അധ്യാപകരുടെ നേതൃത്വത്തിൽ വോട്ടെണ്ണൽ, വിദ്യാർത്ഥികൾ ഫലപ്രഖ്യാപനം കാത്തിരുന്ന  ആശങ്കയുടെ ഒരു മണിക്കൂറിന് ശേഷം ഫലം പുറത്തു വന്നു.

സ്കൂൾ ലീഡറായി മുഹമ്മദ് ജുനൈദും വിദ്യാഭ്യാസ മന്ത്രിയായി ക്ഷേത്ര എസ് നായരും ആരോഗ്യമന്ത്രിയായി സയ്യിദത്ത് തഹാനിയും കലാകായിക മന്ത്രിയായി മൽബാ മുഹമ്മദും തെരഞ്ഞെടുക്കപ്പെട്ടു. പിന്നീട് സ്കൂൾ ഗ്രൗണ്ടിൽ വിദ്യാർത്ഥികളുടെ വിവിധ ആഘോഷ പരിപാടികളോടെ പരിസമാപ്തി. പ്രധാനാധ്യാപകൻ കെ.ശശികുമാർ, സ്കൂൾ സാമൂഹ്യ ക്ലബ്ബ് അംഗങ്ങൾ, അധ്യാപകരായ സോമരാജ് പാലക്കൽ, ഗ്രീഷ്മ, ഷീജ സിബി ജോസ്, സ്വദഖത്തുള്ള, നബീൽ തുടങ്ങിയവർ നേതൃത്വം നൽകി.

യുദ്ധ വിരുദ്ധ ദൃശ്യാവിഷ്കാരം

ഹിരോഷിമ-നാഗസാക്കി ദിനം വേറിട്ട രീതിയിൽ ആചരിച്ച് ഒളകര ജി.എൽ.പി സ്കൂൾ. സാമൂഹ്യ ശാസ്ത്ര ക്ലബ്ബിനു കീഴിൽ ഒരുക്കിയ  യുദ്ധത്തിന്റെ ഭീകരത വ്യക്തമാക്കുന്ന ദൃശ്യാവിഷ്കാരം ശ്രദ്ധേയമായി.

യുദ്ധം മനുഷ്യനു നൽകുന്നത് ദുരിതവും ദുഃഖവും മാത്രമാണെന്നു ചൂണ്ടിക്കാട്ടി, അമേരിക്ക ജപ്പാനു മീതെ വർഷിച്ച ആറ്റം ബോംബ് അക്രമണത്തിൽ നിലത്തു വീണ്ടുകിടക്കുന്ന കുട്ടികൾ, കൂടെ ദയനീയ രംഗം കാണാനായി സ്കൂൾ വിദ്യാർത്ഥികളോടൊപ്പം സഡാക്കോ കൊക്കുമായി ദുരിതം മാറാൻ 1000 സഡാക്കോ കൊക്കുകളെ ഉണ്ടാക്കുന്നതിനിടയിൽ മരണമടഞ്ഞ

സഡാക്കോ സസാക്കിയെന്ന ജപ്പാനി പെൺകുട്ടിയും. ഇതായിരുന്നു  ദൃശ്യാവിഷ്കാരം.

യുദ്ധവെറി അവസാനിപ്പിക്കണമെന്ന ആഹ്വാനവുമായി വിദ്യാർത്ഥികൾക്കായി നടത്തിയ സമാധാനത്തിന്റെ 1000 സഡാക്കോ കൊക്കുകളെ നിർമിക്കുന്ന ഒറിഗാമി ശിൽപശാല, ഡോക്യുമെന്ററി പ്രദർശനം, പ്രശ്നോത്തരി എന്നിവയും ദിനാചരണത്തിന്റെ ഭാഗമായി സംഘടിപ്പിച്ചു. യുദ്ധത്തിനെതിരെയുളള പ്രതിജ്ഞ ചൊല്ലിക്കൊടുത്തു പ്രധാന അധ്യാപകൻ കെ.ശശികുമാർ പരിപാടി ഉദ്ഘാടനം ചെയ്തു. അധ്യാപിക റംസീന ഹിരോഷിമ ദിന സന്ദേശം നൽകി. പി.ടി.എ പ്രസിഡന്റ് പി.പി. അബ്ദുസമദ് അധ്യക്ഷനായി. സോമരാജ് പാലക്കൽ, സൈതലവി, പ്രമോദ് കുമാർ, കുട്ടൻ മാഷ് എന്നിവർ സംസാരിച്ചു. അധ്യാപകരായ നബീൽ, വി.ജംശീദ്, സ്വദഖതുല്ല എന്നിവർ പരിപാടിക്ക് നേതൃത്വം നൽകി.

കോക്കനട്ട് ചലഞ്ച്

2020-2022

മനുഷ്യാവകാശ ലംഘനത്തിരെ കയ്യൊപ്പുകൾ

ലോക മനുഷ്യാവകാശ ദിനത്തിൽ അവകാശ ലംഘനത്തിനെതിരെ കൈയ്യൊപ്പ് ചാർത്താം ലംഘനം തടയാം എന്ന വേറിട്ട പ്രവർത്തനം നടത്തി ഒളകര ജി.എൽ.പി സാമൂഹ്യം ക്ലബ്ബ്. മനുഷ്യാവകശായ ദിനമായ ഡിസംബർ 10 ന് എല്ലാ വിദ്യാർത്ഥികളെയും ഉൾപ്പെടുത്തി  കയ്യൊപ്പ് ചാർത്താം ലംഘനം തടയാം എന്ന പരിപാടിയിലൂടെ സമൂഹത്തിൽ നടക്കുന്ന അനീതിയും അക്രമവും കുഞ്ഞുങ്ങളെ ബോധ്യപ്പെടുത്തുകയും അതിനെതിരെ ശബ്ദമുയർത്തേണ്ടതിന്റെ ആവശ്യകതയെക്കുറിച്ചും കുട്ടികളെ ബോധ്യപ്പെടുത്തി. പ്രസ്തുത പരിപാടിയിൽ  പ്രാധാനാധ്യാപകൻ ശശികുമാർ ആദ്യ കയ്യൊപ്പ് ചാർത്തി ഉദ്ഘാടനം നിർവഹിച്ച് മനുഷ്യാവകാശ ദിന സന്ദേശം നൽകി.  ശേഷം വിവിധ ഛായക്കൂട്ടുകൾ  ഉപയോഗിച്ച് കുരുന്നുകൾ കയ്യൊപ്പ് ചാർത്തുകയായിരുന്നു.  കുഞ്ഞു പ്രായത്തിൽ തന്നെ കുട്ടികളിൽ മനുഷ്യൻ്റെ അവകാശത്തിൻ മേലുള്ള കടന്നുകയറ്റത്തിനെതിരെ അവബോധം വളർത്തുക എന്നതായിരുന്നു ഈ ദിനാചരണത്തിലൂടെ  ലക്ഷ്യം വെച്ചത്.  കുട്ടികൾക്കായി ക്വിസ് മത്സരം, ഡോക്യുമെൻ്ററി പ്രദർശനം എന്നിവ നടത്തി.

വനിതാദിനം

സാമൂഹ്യം ക്ലബ്ബിന്റെ കീഴിൽ പുതുമയോടെ അന്താരാഷ്ട്ര വനിതാദിനം ഒളകര ജി.എൽ.പി സ്കൂളിൽ ആചരിച്ചു. യുക്രൈൻ റഷ്യ യുദ്ധക്കെടുതിക്കിരയായ വനിതകൾക്ക് ഐക്യദാർഢ്യം പ്രഖ്യാപിച്ച് അങ്ങാടിയിലിറങ്ങിയാണ് വിദ്യാർത്ഥികൾ വനിതാദിന പ്രതിജ്ഞ ചെയ്തത്. 1975 ലാണ് ഐക്യരാഷ്ട്ര സഭ ലോകവനിതാ ദിനത്തെ അംഗീകരിക്കുന്നത്. 1857 മാർച്ച് 8 ന് ന്യൂയോർക്കിലെ വനിതകൾ നടത്തിയ പ്രക്ഷോഭമായിരുന്നു തുടക്കം. അന്നുമുതൽ ഇന്നോളം തുടരുന്ന അതിക്രമങ്ങളെ ചെറുക്കാൻ, ഓരോ സ്ത്രീക്കും ഒപ്പം കൂടെ നിൽക്കുന്നൊരു സമൂഹം ഉയർന്നു വരണമെന്നും ദിനാചരത്തിൽ ആഹ്വാനം ചെയ്തു. അധ്യാപകരായ ഗ്രീഷ്മ പി കെ, ഷഹനാസ്, ഷീജ സി.ബി ജോസ്,  രമ്യ, എന്നിവർ സംസാരിച്ചു.

2019-2020

പൊതു തെരഞ്ഞെടുപ്പ് പ്രതീതിയിൽ സ്കൂൾ ഇലക്ഷൻ

ഒളകര ഗവൺമെന്റ് എൽ.പി സ്കൂൾ സാമൂഹ്യം ക്ലബ്ബ് വിദ്യാർഥികൾക്കായി  ഇത്തവണ പാർലമെന്റ് തെരഞ്ഞെടുപ്പ് ബാലറ്റ് പേപ്പർ ഉപയോഗിച്ച് നടന്നു. രാജ്യത്തെ പൊതു തെരഞ്ഞടുപ്പുകളിൽ വോട്ടിങ് മെഷീനെതിരേ വ്യാപക പരാതിയും ബാലറ്റ് പേപ്പർ തിരികെ കൊണ്ടുവരണമെന്ന ആവശ്യവും ശക്തമായ സാഹചര്യത്തിലാണ് സ്കൂളിൽ ഇത്തവണ ബാലറ്റ് പേപ്പറിലൂടെ തെരഞ്ഞെടുപ്പ് നടത്തിയതെന്ന് സാമൂഹ്യം ക്ലബ്ബ് ചുമതലയുള്ളവർ പറഞ്ഞു. തികച്ചും പൊതു തെരഞ്ഞെടുപ്പ് മാതൃകയിൽ തന്നെ ആയിരുന്നു സ്കൂൾ പാർലമെന്റ് തെരഞ്ഞെടുപ്പ്. സ്കൂൾ ലീഡർ, വിദ്യാഭ്യാസ മന്ത്രി, ആരോഗ്യ മന്ത്രി എന്നീ സ്ഥാനങ്ങളിലേക്കാണ് തെരഞ്ഞെടുപ്പ് നടന്നത്. തെരഞ്ഞെടുപ്പിന് മുന്നോടിയായി പ്രചാരണ കൊട്ടിക്കലാശവും അരങ്ങേരി. സ്കൂൾ തെരഞ്ഞെടുപ്പ് ഫലം പ്രഖ്യാപിച്ചപ്പോൾ പാർവതി നന്ദ (സ്കൂൾ ലീഡർ) അനാമിക (വിദ്യാഭ്യാസ മന്ത്രി) റിഫ ജബിൻ (ആരോഗ്യ മന്ത്രി) എന്നിവർ തെരഞ്ഞെടുക്കപ്പെട്ടു.

ജനസംഖ്യാ ദിനാചരണം

സാമൂഹ്യം ക്ലബ്ബിന്റെ കീഴിൽ ലോക ജനസംഖ്യാ ദിനത്തിൽ സ്ത്രീശാക്തീകരണം എന്ന മുദ്രാവാക്യമുയർത്തി പരസ്പരം കൈകോർത്ത് ഒളകര ഗവൺമെന്റ് എൽ.പി സ്കൂളിലെ പെൺ കുരുന്നുകൾ ജനസംഖ്യാ ദിനാചരണം ആഘോഷിച്ചു. കൗമാരക്കാരായ പെൺ കുട്ടികൾക്ക് വേണ്ടി നിക്ഷേപം എന്നതാണ് ഈ വർഷത്തെ ഐക്യ രാഷ്ട്രസഭയുടെ ജനസംഖ്യാ ദിനസന്ദേശം. ഈ പ്രമേയത്തെ മുൻനിർത്തി പെൺകുട്ടികളുടെ അവകാശങ്ങൾ സംരക്ഷിക്കുകയും തുടർ വിദ്യാഭ്യാസം ഉറപ്പാക്കി അവരെ ഉന്നമനത്തിൽ എത്തിക്കുക എന്ന ലക്ഷ്യത്തോടെയാണ് പരിപാടി സംഘടിപ്പിച്ചത്. പരിപാടിക്ക് സാമൂഹ്യം ക്ലബ്ബ് നേതൃത്വം നൽകി.

സ്റ്റാമ്പുകളുടെ പ്രദർശനം

ലോക തപാൽ ദിനത്തിൽ തപാൽ സ്റ്റാമ്പുകളുടെ വിസ്മയാവഹമായ കാഴ്ചകളൊരുക്കി ഒളകര ഗവൺമെന്റ് എൽ.പി സ്കൂൾ സാമൂഹ്യം ക്ലബ്ബ്. ഒളകര പോസ്റ്റ് ഓഫിസിനു മുന്നിലാണ് പി.ടി.എയുടെ സഹായത്തോടെ കാഴ്ചയ്ക്കപ്പുറം എന്ന പരിപാടിയിലൂടെ തപാൽ സ്റ്റാമ്പുകളുടെ കമനീയ ശേഖരം ഒരുക്കിയത്. ലോകത്തിൽ മൂന്നാമതായി ഇറങ്ങിയ റെഡ് പെന്നി സ്റ്റാമ്പും സ്വാതന്ത്ര്യ ഇന്ത്യയിലെ ആദ്യത്തെ സ്റ്റാമ്പ് , കൂടാതെ ഇരുന്നൂറോളം രാജ്യങ്ങളെ പ്രതിനിധീകരിക്കുന്ന സ്റ്റാമ്പുകൾ, ഖാദി തുണിയിൽ ഇറങ്ങിയ ഗാന്ധിജിയുടെ സ്റ്റാമ്പ്, ശ്രീനാരായണ ഗുരുവിന്റെ പേരിൽ ശ്രീലങ്കയിൽ ഇറങ്ങിയ സ്റ്റാമ്പ് , മലപ്പുറം ജില്ലയിൽ നിന്നും തപാൽ സ്റ്റാമ്പിൽ ഇടം നേടിയ ഇ.എം.എസ് വെളളത്തോൾ, ശിഹാബ് തങ്ങൾ എന്നിവരുടെ സ്റ്റാമ്പുകൾ തുടങ്ങി സ്റ്റാമ്പുകളുടെ - വൈവിധ്യവും വിജ്ഞാന പ്രദവുമായ ഒരു പ്രദർശനമാണ് ഒരുക്കിയത്. സ്കൂൾ പി.ടി.എ യുടെയും തപാൽ വകുപ്പിന്റെയും സംയുക്താഭിമുഖ്യത്തിലാണ് പരിപാടി സംഘടിപ്പിച്ചത്. ഒളകര പോസ്റ്റ് മാസ്റ്റർ എൻ.കെ പുകയൂർ, പി.ടി.എ അംഗം ഇബ്രാഹിം മൂഴിക്കൽ, സ്കൂൾ എച്ച് എം എൻ വേലായുധൻ സംസാരിച്ചു.

ദേശീയ ബാലികാ ദിന സന്ദേശം

സാമൂഹ്യം ക്ലബ്ബിന്റെ കീഴിൽ ദേശീയ ബാലികാ ദിനത്തിൽ ഞങ്ങളും സംരക്ഷിക്കപ്പെടേണ്ടവരാണെന്ന് ഓർമപ്പെടുത്തി കൈകോർത്ത് അവകാശ സംരക്ഷണ പ്രതിജ്ഞ ചൊല്ലി ഒളകര ഗവ എൽപി സ്കൂൾ വിദ്യാർഥികൾ. ഫാമിലി ആൻഡ് കമ്യൂണിറ്റി സയൻസ് അധ്യാപിക പി ജിജിന കലിക്കറ്റ് യൂണിവേഴ്സിറ്റി സ്കൂളിലെ വിദ്യാർഥിനികൾക്ക് ബോധവൽക്കരണ ക്ലാസെടുത്തു. സ്കൂൾ ഹെൽത്ത് ക്ലബ് പരിപാടിക്ക് നേതൃത്വം നൽകി .

2018-2019

ജനാധിപത്യത്തിന്റെ പൊരുളറിഞ്ഞ് ഇലക്ഷൻ

സാമൂഹ്യം ക്ലബ്ബിന്റെ കീഴിൽ ഒളകര ഗവ.എൽപി സ്കൂളിൽ പൊതുതെരഞ്ഞെടുപ്പിന്റെ പ്രതീതിയിൽ സ്കൂൾ പാർലമെന്റ് തെരഞ്ഞെടുപ്പ് നടത്തി. വോട്ടിംഗ് യന്ത്രവും തിരിച്ചറിയൽ കാർഡും എക്സിറ്റ് പോളുമെല്ലാം കുരുന്നുകൾക്കായുള്ള തെരഞ്ഞെടുപ്പിൽ ഒരുക്കിയിരുന്നു . സ്കൂൾ ലീഡറായി സഫ്വാനും വിദ്യാഭ്യാസ വകുപ്പിൽ ഫാത്തിമ ശിഫയും ആരോഗ്യ വകുപ്പിൽ ഫാത്തിമ ജാലിബയും സ്കൂളിൽ വകുപ്പ് മന്തികളായി തന്നെ തെരഞ്ഞെടുക്കപ്പെട്ടു . പി സോമരാജ് പി.കെ ഷാജി , വി ജംഷീദ് , കെ.കെ റഷീദ്, കരീം കാടപ്പടി , പി ഗ്രീഷമ , എ ജോസിന , ജിജിന നേതൃത്വം നൽകി .

ജനസംഖ്യാ കണക്കെടുത്തു വിദ്യാർത്ഥികൾ

ലോക ജനസംഖ്യാ ദിനത്തിൽ ഗ്രാമത്തിലെ ജനസംഖ്യാ കണക്ക് തേടി സാമൂഹ്യം ക്ലബ്ബിന്റെ കീഴിൽ വിദ്യാർഥികൾ പെരുവള്ളൂർ ഗ്രാമപഞ്ചായത്ത് ഓഫീസിലെത്തി. ഒളകര ഗവ.എൽ.പി സ്കൂൾ വിദ്യാർഥികളാണ് പെരുവള്ളൂർ ഗ്രാമപഞ്ചായത്ത് സന്ദർശിച്ച് വിവരശേഖരണം നടത്തിയത്. വിദ്യാർഥികളുടെ സംശയങ്ങൾ പഞ്ചായത്ത് പ്രസിഡന്റ് പി.കെ റംല , വൈസ് പ്രസിഡന്റ് എം.കെ വേണുഗോപാൽ , പി.സി ബീരാൻ കുട്ടി, ടി.പി ഷാലി, എം ബാലചന്ദ്രൻ എന്നിവർ മറുപടി നൽകി. പ്രധാനാധ്യാപകൻ എൻ വേലായുധൻ ജനസംഖ്യാദിന സന്ദേശം നൽകി. പി.ടി.എ പ്രസിഡന്റ് പി.പി സെയ്ത് മുഹമ്മദ് , യു സിറാജ് , പി.കെ ഷാജി , കെ.കെ റഷീദ് , പിസോമരാജ് എന്നിവർ വിദ്യാർഥികളെ അനുമോദിച്ചു.

ഇനി വേണ്ട ഒരു യുദ്ധം

ഹിരോഷിമ നാഗസാക്കി ദിനത്തോടനുബന്ധിച്ച് പുകയൂർ ഒളകര ജി.എൽ.പി സ്കൂളിൽ സാമൂഹ്യം ക്ലബ്ബിന്റെ കീഴിൽ ഭീമൻ സഡാക്കോ കൊക്കിനെ ഒരുക്കി ലോകസമാധാന സന്ദേശം നൽകി കുരുന്നുകൾ . എവിടെയും സമാധാനം ഇല്ലാതിരിക്കുന്ന വേളയിലാണ് ഒരു സമാധാനം ഉണ്ടാവട്ടെയെന്ന ലക്ഷ്യം വെച്ച് ഇത് ഒരുക്കിയത് . സോമരാജ പാലക്കൽ സമാധാന ദിന സന്ദേശം നൽകി . അധ്യാപകരായ കെ.കെ റഷീദ് , വി ജംഷീദ് , പി.കെ.ഷാജി , കെ ജിജിന നേതൃത്വം നൽകി .

സമാധാനത്തിനായ് ഒരു പീസ് ടവർ

സാമൂഹ്യം ക്ലബ്ബിന്റെ കീഴിൽ ഒളകര ഗവ.എൽ.പി സ്ക്കൂളിലെ വിദ്യാർഥികൾ പിസ് ടവർ ഒരുക്കി ലോക സമാധാന ദിനം ആചരിച്ചു. ലോകമെങ്ങും സമാധാനം നഷ്ടപ്പെട്ടു കൊണ്ടിരിക്കുന്ന സാഹചര്യത്തിൽ സമാധാനത്തിനായി കൈകോർത്ത് മാലോകരെ നന്മയുടെ ലോകത്തേക്ക് ആനയിക്കുകയെന്നതാണ് ഇതിലൂടെ ലക്ഷ്യമിടുന്നത്. പ്രധാനാധ്യാപകൻ എൻ വേലായുധൻ സമാധാന ദിന സന്ദേശം നൽകി. അധ്യാപകരായ പി സോമരാജ്, കെ.കെ റഷീദ്, വി ജംഷീദ്, പി.കെ ഷാജി, അബ്ദുൽ കരീം കാടപ്പടി, ഗ്രീഷ്മ, ജോസിന, ജിജിന, റംസീന നേതൃത്വം നൽകി .

പക്ഷികൾക്കു വേണ്ടിയൊരു ദിനം, സ്നേഹിക്കാം പക്ഷികള..

ജനുവരി അഞ്ച് ദേശീയപക്ഷി ദിനത്തിൽ സാമൂഹ്യം ക്ലബ്ബിന്റെ കീഴിൽ പക്ഷികളെ സ്നേഹിക്കുക എന്ന സന്ദേശവുമായി ഒളകര ഗവ.എൽ.പി സ്കൂളിലെ കരുന്നു വിദ്യാർഥികൾ. ഞങ്ങളും ഭൂമിയുടെ അവകാശികളാണെന്നും സംരക്ഷിക്കപ്പെടേണ്ടവരാണെന്നും ഓർമ്മപ്പെടുത്തി വിവിധ പക്ഷികൾക്ക് ധാന്യവും വെള്ളവും നൽകിയാണ ദേശീയ പക്ഷി ദിനാചരണം ആചരിച്ചത്. വേനൽ വരുന്നതിന്റെ മുന്നോടിയയി പറവകൾക്ക് ദാഹമകറ്റാൻ വിദ്യാലയത്തിലും പരിസരത്തും തണ്ണീർക്കുടങ്ങൾ സ്ഥാപിക്കുമെന്ന് പ്രധാനാധ്യാപകൻ വേലായുധൻ പറഞ്ഞു.

അനുഭവ പാഠഭാഗങ്ങളമായി വാർധക്യ പുരാണം, വൃദ്ധർ ഒരുമിക്കുന്നു

ലോക വൃദ്ധ ദിനത്തോടനുബന്ധിച്ച് പുകയൂർ ഒളകര ജി.എൽ.പി. സ്കൂളിൽ സാമൂഹ്യം ക്ലബ്ബിന്റെ കീഴിൽ വാർധക്യ പുരാണം 2018 സംഘടിപ്പിച്ചു. പഴയ കാലത്തെ അനുഭവങ്ങളും വിവിധ തരത്തിലുള്ള കളികളും ഓർമകളും എല്ലാം പങ്ക് വെച്ചു. പ്രായം അറുപത് കഴിഞ്ഞ അമ്പതിൽപരം വൃദ്ധ ജനങ്ങളാണ് പരിപാടിയിൽ പങ്കെടുത്തത് . പൊന്നാട അണിയിച്ചും ബോഡി ചെക്കപ്പ് നടത്തിയും അവരുടെ രോഗങ്ങൾക്കുള്ള മുഖ്യ മരുന്നുകൾ നൽകുകയും ചെയ്തു . വിവിധ വിനോദത്തിൽ പങ്കാളികളായതും വേറിട്ടൊരു കാഴ്ചയായി . ലിലമ്മ , കാളി , മാണി എന്നിവർ കായിക മത്സരത്തിലെ വിജയികളായി . വിവിധ ഡോക്ടർമാരെ ഉൾപ്പെടുത്തി സൗജന്യമായി ചികിത്സയും ഇവിടെ പങ്കെടുത്തവർക്ക് വാഗ്ദാനം ചെയ്തു. പരിപാടി തിരൂരങ്ങാടി ബ്ലോക്ക് പ്രസിഡന്റ് കെ കലാം മാസ്റ്റർ ഉദ്ഘാടനം ചെയ്തു. പി.ടി.എ പ്രസിഡന്റ് പി.പി സെയ്തു മുഹമ്മദ് അധ്യക്ഷത വഹിച്ചു. മഞ്ചേരി മെഡിക്കൽ കോളജ് പ്രഫസർ ബിജു, പെരുവള്ളൂർ പഞ്ചായത്ത് പരിരക്ഷാ കൺവീനർ അബ്ദുൽ ഗഫൂർ ക്ലാസെടുത്തു.

വിദ്യാലയ മുറ്റത്തൊരു തപാലോഫീസ്

ലോക തപാൽ ദിനത്തിൽ വിദ്യാലയത്തിൽ തപാൽ ഓഫിസ് ഒരുക്കി സാമൂഹ്യം ക്ലബ്ബിന്റെ കീഴിൽ ഒളകര ജി.എൽ.പിയിലെ കുരുന്നുകൾ. ലോകത്തിലെ മൂന്നാമത്തെ സ്റ്റാമ്പായി 1845 ൽ ഇറങ്ങിയ റെഡ് പെന്നി മുതൽ കഴിഞ്ഞ ഗാന്ധിജയന്തി ദിനത്തിൽ ഇറങ്ങിയ ഗാന്ധിജിയുടെ റൗണ്ട് സ്റ്റാമ്പ് വരെയുള്ള വിപുലമായ സാമ്പുകളുടെയും ബ്രിട്ടീഷ് കാലത്തെ ടെലിഗ്രാം, പോകാർഡുകൾ തുടങ്ങിയവയുടെയും പ്രദർശനവും ഒരുക്കി. ലോകത്തിന്റെ വിവിധ ഭാഗങ്ങളിൽ ഇറങ്ങിയ മണമുള്ള സാമ്പുകൾ, ലോകത്ത് ആദ്യമായി ഖാദി തുണിയിൽ ഇറക്കിയതുൾപ്പെടെ വിവിധ രാജ്യങ്ങൾ ഇറക്കിയ ഗാന്ധി സ്റ്റാമ്പുകൾ തുടങ്ങി 200 രാജ്യങ്ങളുടെ സ്റ്റാമ്പുകൾ പ്രദർശനത്തിനുണ്ടായിരുന്നു. തിരൂരങ്ങാടി പോസ്റ്റൽ അസിസ്റ്റൻറ് അശ്വതി ക്ലാസെടുത്തു . പ്രാചീന തപാൽ കൈമാറ്റ മാർഗങ്ങളെ അടുത്തറിയാനും അവസരമൊരുക്കിയിരുന്നു. സ്കൂളിലെ അധ്യാപകൻ അബ്ദുൽ കരീം കാടപ്പടിയുടെ നേതൃത്വത്തിൽ വിദ്യാർഥികൾ ശേഖരിച്ചവയാണ് സ്റ്റാമ്പുകളിൽ ഏറെയും. പരിപാടിയിൽ പി.ടി.എ പ്രസിഡൻറ് പി.പി സെയ്ദു മുഹമ്മദ്, പ്രധാനാധ്യാപകൻ എൻ.വേലായുധൻ, അധ്യാപകരായ സോമരാജ്, കെ.റഷീദ്, ഷാജി, വി.ജംഷീദ് എന്നിവർ നേതൃത്വം നൽകി .

ഈ ഓഡിയോ വിഷ്യൽ പ്രദർശനം നവ്യാനുഭവം

ലോക ഓഡിയോ വിഷ്വൽ ദിനത്തിൽ ഒളകര ഗവൺമെന്റ് എൽപി സ്കൂളിൽ സാമൂഹ്യം ക്ലബ്ബിന്റെ കീഴിൽ പുരാതനകാലം മുതൽ നവീന കാലഘട്ടം വരെയുള്ള ദൃശ്യ ശ്രാവ്യ ഉപകരണങ്ങളുടെ അതിവിപുലമായ പ്രദർശനവും വിദ്യാർഥികൾക്കായി ഡോക്യുമെന്ററി പ്രദർശനവും നടത്തി. ഹെഡ്മാസ്റ്റർ എൻ വേലായുധൻ പ്രദർശനോദ്ഘാടനം നിർവഹിച്ചു . പ്രാചീന കാലഘട്ടത്തിലെ ശ്രാവ്യ ഉപകരണമായ റേഡിയോയുടെ വ്യത്യസ്തമായ മാതൃകകളിൽ തുടങ്ങി ടേപ്പ് റിക്കാഡറിന്റെ ആദ്യകാല രൂപങ്ങളും ഗ്രാമഫോൺ പാട്ടുപെട്ടി, ഫ്ളോപ്പി ഡിസ്ക്, വിവിധതരം ടെലിഫോൺ, ഓഡിയോ വീഡിയോ കാസറ്റുകൾ, ആദ്യകാല കാമറകൾ, വിവിധ മൊബൈൽ ഫോണുകൾ, ജവഹർലാൽ നെഹ്റുവിനന്റേതടക്കം ശബ്ദം അടങ്ങിയ ഗ്രാമഫോൺ സീഡികൾ തുടങ്ങി ദൃശ്യശ്രാവ്യ ഉപകരണങ്ങളുടെ വൈവിധ്യമാർന്ന പ്രദർശനമാണ് വിദ്യാലയത്തിൽ ഒരുക്കിയത്. അതിപുരാതന ദൃശ്യ ശ്രാവ്യ ഉപകരണങ്ങളെ പരിചയപ്പെടാനും അവയെക്കുറിച്ചു പഠിക്കാനും പ്രദർശനത്തിലൂടെ വിദ്യാർഥികൾക്കു കഴിഞ്ഞു. പ്രദർശനം കാണാൻ പിടിഎ ഭാരവാഹികളും രക്ഷിതാക്കളുമെത്തിയിരുന്നു. അധ്യാപകരായ പി.സോമരാജ്, അബ്ദുൾകരീം കാടപ്പടി, വി.ജംഷീദ്, കെ.കെ. റഷീദ്, റജുല കാവൂട്ട് എന്നിവർ നതൃത്വം നൽകി.

യു.എൻ.ഒ ദിനാചരണം

സാമൂഹ്യം ക്ലബ്ബിന്റെ കീഴിൽ ഒളകര സർക്കാർ എൽപി സ്കൂൾ യുഎൻ ദിനത്തിൽ ഭൂമിയുടെ കൂറ്റൻ മാതൃകയൊരുക്കി. ഒക്ടോബർ 24 യുഎൻ ദിനാചരണത്തിന്റെ ഭാഗമായാണ് ഇത്തരമൊരു പരിപാടി സംഘടിപ്പിച്ചത് . 193 അംഗ രാജ്യങ്ങളെയും പ്രതിനിധീകരിച്ച് ഓരോ രാജ്യങ്ങളുടെയും പോക്കറ്റ് പതാകയുമേന്തി വിദ്യാർഥികൾ ഓരോ വർഷങ്ങളിലും പുറത്തിറങ്ങിയ യുഎൻ സന്ദേശങ്ങളടങ്ങിയ പ്ലക്കാർഡുകളും യുഎൻ സമാധാന ചിഹ്നവും കയ്യിലേന്തി ഭൂമിയുടെ ഭീമൻ മാതൃകയ്ക്കു മുന്നിൽ അണിനിരക്കുകയായിരുന്നു. ലോകസമാധാനത്തിനും ലോകജനതയുടെ സാമൂഹിക ഉന്നമനത്തിനും വേണ്ടിയാണ് ഇത്തരമൊരു ദിനം ആചരിക്കുന്നത്. വിദ്യാർഥികളിൽ സമാധാന സന്ദേശവും സാമൂഹിക ഉന്നമനവും ലക്ഷ്യമിട്ടാണ് ഇത്തരമൊരു പരിപാടി സംഘടിപ്പിച്ചത്. ഹെഡ്മാസ്റ്റർ എൻ.വേലായുധൻ യുഎൻ ദിന സന്ദേശം നൽകി. പിടിഎ പ്രസിഡന്റ് പി.പി.സെയ്തുമുഹമ്മദ് ചടങ്ങിൽ അദ്ധ്യക്ഷനായി.

കൈ കോർക്കാം മനുഷ്യാവകാശ ലംഘനത്തിനെതിരെ

മനുഷ്യാവകാശ ദിനത്തിൽ ജി.എൽ.പി സ്കൂളിലെ സാമൂഹ്യം ക്ലബ്ബിന്റെ കീഴിൽ വിദ്യാർഥികൾ വിദ്യാർഥിമതിലൊരുക്കി. മനുഷ്യാവകാശ ലംഘനങ്ങൾക്കെതിരെ ഉദ്ബോധനം നടത്തുക ലക്ഷ്യത്തോടെ മാനവരാശിയുടെ കെട്ടുറപ്പിന് എന്ന സന്ദേശമുയർത്തിയാണ് കുരുന്ന് വിദ്യാർഥികൾ അണിനിരന്ന് മതിലൊരുക്കിയത്.

സ്കൂളിൽ സഞ്ചരിക്കും കോടതി

തിരൂരങ്ങാടി താലൂക്ക് ലീഗൽ സർവീസസ് കമ്മിറ്റിയുടെ മൊബൈൽ ലോക് അദാലത്തിന്റെ ഭാഗമായി ഒളകര ജി എൽ.പി. സ്കൂളിൽ മൊബൈൽ കോടതി സജ്ജീകരിച്ചു. നിയമങ്ങളും കോടതിയുമായും ബന്ധപ്പെട്ട വിദ്യാർഥികളുടെ സംശയങ്ങൾ തീർക്കുന്നതായിരുന്നു കോടതി. പരപ്പനങ്ങാടി ബാർ അസോസിയേഷൻ സെക്രട്ടറി കെ.ടി. ബാലകൃഷ്ണൻ ക്ലാസെടുത്തു. സീനിയർ അഭിഭാഷകരായ മോഹൻദാസ്, കുഞ്ഞമ്മദ്, അനിഷ്, ലീഗൽ സർവീസസ് കമ്മിറ്റി സെക്രട്ടറി രാജൻ, പ്രഥമാധ്യാപകൻ എൻ.വേലായുധൻ എന്നിവർ പങ്കെടുത്തു. വിദ്യാർഥികൾക്കായി നിയമപാഠം എന്ന പുസ്തകം സൗജന്യമായി വിതരണം ചെയ്തു.

2017-2018

സ്കൂൾ ഇലക്ഷൻ

ഒളകര ഗവ.എൽപി സ്കൂളിൽ പൊതുതെരഞ്ഞെടുപ്പിന്റെ പ്രതീതിയിൽ സ്കൂൾ പാർലമെന്റ് തെരഞ്ഞെടുപ്പ് നടത്തി. സ്കൂൾ ലീഡറായി മുഹമ്മദ് റാസിയും വിദ്യാഭ്യാസ വകുപ്പിൽ അമേയയും ആരോഗ്യ വകുപ്പിൽ ഷാമിലയും സ്കൂളിൽ വകുപ്പ് മന്തികളായി തന്നെ തെരഞ്ഞെടുക്കപ്പെട്ടു. പി സോമരാജ് പി.കെ ഷാജി, വി ജംഷീദ്, കെ.കെ റഷീദ്, കരീം കാടപ്പടി, പി ഗ്രീഷമ നേതൃത്വം നൽകി.

സമാധാനത്തിനായ് ഒരുമിക്കാം

ഹിരോഷിമ നാഗസാക്കി ദിനത്തോടനുബന്ധിച്ച് പുകയൂർ ഒളകര ജി.എൽ.പി സ്കൂളിൽ സാമൂഹ്യം ക്ലബ്ബിന്റെ കീഴിൽ പുകയൂർ അങ്ങാടിയിലേക്ക് യുദ്ധ വിരുദ്ധ റാലി സംഘടിപ്പിച്ചു. സോമരാജ പാലക്കൽ ഹിരോഷിമ നാഗസാക്കി ദിന സന്ദേശം നൽകി. അധ്യാപകരായ കെ.കെ റഷീദ്, വി ജംഷീദ്, പി.കെ.ഷാജി, ശബീബ് നേതൃത്വം നൽകി .