ക‍ൂട‍ുതൽ വായിക്ക‍ുക

രണ്ടു കെട്ടിടങ്ങളിലായി പെൺകുട്ടികൾക്കും ആൺകുട്ടികൾക്കുമുള്ള വെവ്വേറെ സ്കൂളുകളായാണ് പ്രവർത്തനമാരംഭിച്ചതെങ്കിലും അന്നത്തെ സാമൂഹിക ചുറ്റുപാടിൽ പഠിക്കാനെത്തിയ പെൺകുട്ടികളുടെ എണ്ണം പരിമിതമായതിനാൽ കുറച്ചുവർഷങ്ങൾക്കുുശേഷം ഇന്ന് നമ്മുടെ സ്കൂൾ നിൽക്കുന്ന അതേ സ്ഥലത്ത് ഒരു കെട്ടിടത്തിൽ സ്കൂൾ പ്രവർത്തനം തുടർന്നു. 1914-ൽ കുഞ്ചുമേനോൻമാഷിനുപകരം മാധവൻമാഷ് വന്നുചേർന്നു. പഴയ കാലംമുതൽക്കുതന്നെ പഠനത്തിലും പാഠ്യേതരമേഖലകളിലും വിദ്യാലയത്തിന്റെ കേളി നാടുംകടന്ന് മറുനാടുകളിൽ പോലുമെത്തിയിട്ടുണ്ട്. പഠനത്തിനപ്പുറം പെരുമാറ്റത്തിലും വൃത്തിയിലും കുട്ടികൾ കേമരാകണമെന്നതുകൊണ്ടാകാം കുളിക്കാത്ത കുട്ടികളെ തൊട്ടടുത്ത അയനിക്കുളത്തിൽ കൊണ്ടുപോയി കുളിപ്പിച്ചിരുന്ന അധ്യാപകർ ഇവിടെയുണ്ടായിരുന്നുവെന്ന് പ്രായമുള്ള പലരും ഓർത്തെടുക്കുന്നു. കാലംമാറിയതോടെ വിദ്യാലയം പൊതുജനത്തിന്റേതായി. നാട്ടുകാർ ഇതിനെ നെഞ്ചേറ്റി. ഓല മേഞ്ഞ കെട്ടിടങ്ങൾ ഓടിനും വാർപ്പിനും വഴിമാറി. വിദ്യാലയത്തിന്റെ മതിലടക്കം നാട്ടുകാർ ചേർന്ന് കെട്ടിക്കൊടുക്കുന്ന അവസ്തയുണ്ടായി. രക്ഷാകർതൃസമിതിയും നാട്ടുകാരും അധ്യാപകസന്നദ്ധസംഘടനകളും തീരദേശവിഗസനവകുപ്പിന്റെ സഹായത്തോടെ നിർമിച്ച ലൈബ്രറി മികച്ച ഒരു മാതൃകതന്നെയാണ്. രക്ഷാകർതൃസമിതി വേദനം നൽകി ഒരു ലൈബ്രേറിയനും സ്കൂളിൽ പ്രവർത്തിച്ചുവരുന്നു. ലൈബ്രേറിയന്റെ സേവനം ലഭിക്കുന്ന പ്രാഥമികവിദ്യാലയങ്ങൾ സംസ്ഥാനത്തുതന്നെ അപൂർവമാണ്. കലാകായികശാസ്ത്രമേളകളുടെ ഭൂപടത്തിൽ ജില്ലയിൽ ഒന്നാമതായി അടയാളപ്പെടുത്തുന്ന പേരുകളിൽ മിക്ക വർഷവും ഈ വിദ്യാലയം സ്ഥാനംപിടിക്കാറുണ്ട്. എന്തിന് ! ഈ മഹാമാരിക്കാലത്തും മാറ്റത്തിന്റെ നവമാതൃകകൾ തീർക്കാൻ വിദ്യാലയത്തിന് കഴിഞ്ഞിട്ടുണ്ട്. പൊതുവിദ്യാഭ്യാസ സംരക്ഷണയത്നം' വരുന്നതിന് മുമ്പുതന്നെ പൊതുസമൂഹം ഈ സർകാർ പള്ളിക്കൂടത്തെ ഏറ്റെടുത്തിട്ടുണ്ട്. അതുകൊണ്ടുതന്നെയാകണം, ചുറ്റുമുള്ള പ്രദേശങ്ങളിൽനിന്നുപോലും കുട്ടികൾ സ്കൂൾപ്രവേശനത്തിനായി ഇവിടേക്ക് കടന്നുവരുന്നത്. ഓരോ വർഷവും കുട്ടികളുടെ എണ്ണം വർധിച്ചുകൊണ്ടിരിക്കുന്ന അരിയല്ലൂർ ഗവ.യു.പി.സ്കൂൾ ഈ പ്രദേശത്തിന്റെ സാംസ്കാരിക തലസ്ഥാന്നമല്ലാതെ മറ്റെന്താണ്?