യു പി എസ് നടുപ്പൊയിൽ/ചരിത്രം
ചരിത്രം
പതിതരും ചൂഷിതരുമായി ജീവിച്ച
തോൾമുണ്ടഴിക്കാനും തലകുനിക്കാനും
പഠിപ്പിക്കപ്പെട്ട ഒരു പാവം ജനതയെ
ആരുടെ മുന്നിലും തലയുയർത്തി നിൽക്കാനും
നെഞ്ചുറപ്പോടെ അവകാശങ്ങൾ ചോദിച്ചുവാങ്ങുവാനും
നീതിക്കായി പൊരുതാനും പഠിപ്പിച്ച
നടുപ്പൊയിൽ സ്കൂളിന്റെ ചരിത്രമാണിത്.
1952 ൽ പി സി നായർ എന്ന വിദ്യാഭ്യാസ പ്രവർത്തകൻ
കത്തിച്ചു വെച്ച കൈത്തിരിയാണ് ഈ ദീപസ്തംഭം.
അദ്ദേഹത്തിന് ശേഷം ഭാര്യയായ മാതുഅമ്മയും
പിന്നീട് മക്കളായ രാജഗോപാലൻ മാസ്റ്ററും
എം പി സൌദാമിനി അമ്മയും മാനേജർമാരായി.
കുറച്ചുകാലം കണ്ണൂരിലെ വിദ്യാഭ്യാസ പ്രവർത്തകനായ
വത്സൻ മഠത്തിലായിരുന്നു മാനേജർ.
ഇപ്പോഴത്തെ മാനേജർ ശശി മഠപ്പറമ്പത്ത്
ഈ സ്കൂളിലെ പൂർവവിദ്യാർത്ഥി കൂടിയാണ്.
പ്രവാസ ജീവിതത്തിന്റെ തിരക്കുകൾക്കിടയിലും
വിദ്യാലയത്തിൻ്റെ ദൈനം ദിന കാര്യങ്ങളിൽ പോലും
ജാഗ്രതയോടെ അദ്ദേഹം ഇടപെടുന്നു.
അദ്ധ്യാപകരെയും രക്ഷിതാക്കളെയും
കേൾക്കുവാനും ഒപ്പം നിർത്താനും
അദ്ദേഹം സമയം കണ്ടെത്തുന്നു.
സമൂഹത്തിന്റെ , കാലത്തിന്റെ മാറ്റങ്ങളോടൊപ്പം
നടുപ്പൊയിൽ യു പി സ്കൂളും മാറി.
ഇന്നും വിദ്യാർത്ഥി മനസ്സുകൾ ഓർത്തുവെക്കുന്ന
പ്രഗത്ഭരായ ഗുരുനാഥന്മാർ..
വിദ്യാലയത്തിന്റെ അഭിമാനം ഉയർത്തിപ്പിടിക്കുന്ന
ഉന്നതരായ പൂർവ വിദ്യാർഥികൾ..
സ്കൂളിന്റെ കുതിപ്പിന് പ്രചോദനമായി
എന്നും ഒപ്പം നിന്ന രക്ഷിതാക്കൾ..
ആ കൂട്ടായ്മ തന്നെയാണ് ഈ സ്കൂളിന്റെ
കിതക്കാത്ത കുതിപ്പിന് പിന്നിലെ പ്രേരക ശക്തി.