G. V. H. S. S. Kalpakanchery/History
| സ്കൂൾ | സൗകര്യങ്ങൾ | പ്രവർത്തനങ്ങൾ | പ്രൈമറി | എച്ച്.എസ് | എച്ച്.എസ്.എസ്. | ചരിത്രം | അംഗീകാരം |
ചരിത്രം
ആരംഭം
മലപ്പുറം ജില്ലയിലെ കല്പകഞ്ചേരി ഗ്രാമ പഞ്ചായത്തിലെ പുരോഗതിയിൽനിന്ന് പുരോഗതിയിലേയ്ക്ക് ഉയർന്നുകൊണ്ടിരിക്കുന്ന ഒരു വിദ്യാലയമാണ് ജി.വി.എച്ച്.എസ്.എസ്. കല്പകഞ്ചേരി. 1920 - കളിൽ മേലങ്ങാടി കേന്ദ്രമാക്കി പ്രവർത്തനം ആരംഭിച്ച ഈ സ്ഥാപനം 1933 - ൽ ഒരു എലിമെന്ററി സ്കൂളായി കടുങ്ങാത്തുകുണ്ടിൽ പ്രവർത്തനമാരംഭിച്ചു. നമ്മുടെ സ്‌ക്കൂളിനെ ഇന്നു കാണുന്ന നിലയിൽ എത്തിച്ചത് ഈ പ്രദേശത്തെ പൗരപ്രമുഖരുടെ അശ്രാന്ത പരിശ്രമവും സന്മനസ്സും ആണ്. കോടികൾ വിലമതിക്കുന്ന അഞ്ചേക്കർ സ്ഥലത്തിന്റെ മുഖ്യപങ്കും നൽകിയത് മർഹൂം എം.എ. മൂപ്പൻ അവർകളാണ്. വളരെപ്പെട്ടെന്നാണ് പാറയിൽ മുഹമ്മദ് സാഹിബിന്റെ നേതൃത്വത്തിൽ കുഞ്ഞിബാവ സാഹിബും, എം. അബ്ദുൽ ഖാദർ ഹാജി, പി.സി. അത്തു സാഹിബ്, എം.കെ. മൂപ്പൻ, പീച്ചി മാസ്റ്റർ, തങ്ങൾ മാസ്റ്റർ തുടങ്ങിയവരടങ്ങിയ കമ്മിറ്റി നാട്ടുകാരിൽ നിന്ന് പിരിവെടുത്ത് സർക്കാർ നിർദേശിച്ച പ്രകാരമുള്ള ബിൽഡിങ്ങ് തയാറാക്കിയത്. ഈ മുന്നേറ്റത്തിൽ അന്നത്തെ മണ്ഡലം എം.എൽ.എ സി.എച്ച്. മുഹമ്മദ് കോയ സാഹിബിന്റെ സവിശേഷ താല്പര്യം എടുത്തുപറയേണ്ടതാണ്.
ഹൈസ്കൂളായി മാറുന്നു
1933 ൽ ഹൈസ്കൂളായി അപ്ഗ്രേഡ് ചെയ്യപ്പെട്ടതോടുകൂടി. മലപ്പുറം ജില്ലയിലെ ഭൂരിഭാഗം പ്രദേശങ്ങളിലും ഉള്ള ആളുകളുടെ അക്ഷരകേന്ദ്രം ആയി ഈ വിദ്യാലയം മാറിക്കഴിഞ്ഞിരുന്നു.രാഷ്ട്രീയ സാമൂഹ്യ സാംസ്കാരിക വിദ്യാഭ്യാസ മണ്ഡലങ്ങളിലെ ഒട്ടേറെ പ്രമുഖരെ സൃഷ്ടിക്കുന്നതിന് ഈ കലാലയം സാക്ഷ്യം വഹിച്ചിട്ടുണ്ട്. 1980 കാലഘട്ടത്തിൽ ജില്ലയിലെ ഏറ്റവും കൂടുതൽ മുസ്ലിം പെൺകുട്ടികൾ പഠിക്കുന്ന സ്ഥാപനം എന്ന ഖ്യാതി നേടിയിട്ടുണ്ട്. അക്കാലത്ത് ഷിഫ്റ്റ് സമ്പ്രദായത്തിലായിരുന്നു സ്കൂൾ പ്രവർത്തിച്ചിരുന്നത്.
പഠനനിലവാരം
പഠനനിലവാരത്തിൽ സ്കൂൾ വളരെയേറെ മുന്നേറിയിട്ടുണ്ട്. ഹൈസ്കൂൾ ഹയർസെക്കൻഡറി വിഭാഗങ്ങളിൽ നല്ല വിജയശതമാനം ഉണ്ട് എന്നതിനു പുറമേ കലാ-കായിക-ശാസ്ത്രമേള മത്സരങ്ങളിൽ സ്കൂൾ വിജയം കൈവരിക്കാറുണ്ട്. എസ്.എസ്.എൽ.സി. പരീക്ഷയിൽ വിജയശതമാനം കൂടിക്കൊണ്ടിരിക്കുന്നു. 2018 ലെ പരീക്ഷയിൽ സേ പരീക്ഷയ്ക്ക് മുൻപ് 99% വിജയം എന്നത് സേ പരീക്ഷ കഴിഞ്ഞപ്പോൾ 100% ആയിട്ടുണ്ട്. 17 പേർക്ക് മുഴുവൻ വിഷയങ്ങൾക്കും A+ ലഭിച്ചു. 9 വിഷയങ്ങൾക്ക് A+ നേടിയവർ 7.
സഹായങ്ങൾ
സ്കൂളിന്റെ ഭൗതികസൗകര്യങ്ങൾ വർദ്ധിപ്പിക്കുന്നതിൽ കൽപകഞ്ചേരി ഗ്രാമപഞ്ചായത്ത്, മലപ്പുറം ജില്ലാ പഞ്ചായത്ത്, സ്ഥലം എം.എൽ.എ എം.പി തുടങ്ങിയവരുടെ സഹായസഹകരണങ്ങൾ നിസ്സീമമാണ്. കൂടാതെ സ്കൂളിനെ കോൺഫറൻസ് ഹാൾ നിർമ്മിച്ചുനൽകിയ പടിയത്ത് ബഷീർ, ഓപ്പൺ സ്റ്റേജ് നിർമ്മിച്ച തണൽ ചാരിറ്റബിൾ ട്രസ്റ്റ്, വൈജ്ഞാനിക രംഗത്ത് പ്രവർത്തിക്കുന്ന മൈൽസ് പൂർവ്വവിദ്യാർത്ഥി സംഘടന എന്നിവരുടെ സേവനങ്ങൾ ഈ അവസരത്തിൽ പ്രത്യേകം സ്മരിക്കുന്നു. സ്കൂൾ സുവർണ ജൂബിലി ആഘോഷത്തിന് ഭാഗമായി സംഘടിപ്പിച്ച ഗുരുവന്ദനം, സാഹിത്യ സല്ലാപം, ഘോഷയാത്ര എന്നീ പരിപാടികൾ സംഘാടനം കൊണ്ടും പങ്കാളിത്തം കൊണ്ടും മികവുറ്റതായിരുന്നു. ബഹുമാനപ്പെട്ട കേന്ദ്രമന്ത്രി ഇ അഹമ്മദ് ഉദ്ഘാടനം ചെയ്ത സുവർണജൂബിലി ആഘോഷ പരിപാടികളുടെ സമാപനവും ഹയർ സെക്കൻഡറി സ്കൂൾ ഉദ്ഘാടനവും ബഹുമാന്യനായ മുഖ്യമന്ത്രി ഉമ്മൻചാണ്ടി നിർവഹിച്ചു.
പ്രതികൂല സാഹചര്യങ്ങൾ
സമ്പന്നർക്ക് ഉള്ള നിരവധി സൗഭാഗ്യങ്ങളിൽ ഒന്നായിരുന്നു അക്കാലത്ത് വിദ്യാഭ്യാസം. അന്ന് ഇവിടെ പ്രാഥമിക വിദ്യാലയങ്ങൾ പോലും ഇല്ലാതായിരുന്നു. സാമൂഹ്യ കാര്യത്തിലും ദരിദ്രമായിരുന്നു ഈ സ്ഥലം. മൈലുകൾക്കപ്പുറം തിരൂർ കോട്ടക്കൽ തിരുനാവായ എന്നിവിടങ്ങളിൽ ഹൈസ്കൂളുകൾ ഉണ്ടായിരുന്നുവെങ്കിലും അവിടങ്ങളിലേക്ക് നടന്നുതന്നെ പോകേണ്ടതുണ്ടായിരുന്നു. ഇത്തരം പ്രതികൂല സാഹചര്യങ്ങൾ ഈ നാടിന്റെ പിന്നോക്കാവസ്ഥയ്ക്കുകാരണമായി.
ധനസമാഹരണം
ടിപ്പുസുൽത്താന്റെ വാഴ്ചക്ക് ശേഷം മലബാർ വാണ ബ്രിട്ടീഷ് ഗവൺമെൻറ് ആണ് കൽപ്പകഞ്ചേരി യിലെ ആദ്യ എൽപി സ്കൂൾ സ്ഥാപിച്ചത്. അക്കാലത്തു തന്നെയാണ് കൽപ്പകഞ്ചേരി പഞ്ചായത്തിന്റെ പ്രഥമ പ്രസിഡണ്ട് ആയിരുന്ന കൊച്ചുണ്ണി മൂപ്പൻ എന്നറിയപ്പെടുന്ന ആലിക്കുട്ടി മൂപ്പൻ മേലങ്ങാടിയിൽ സ്കൂൾ സ്ഥാപിച്ചത്. ഈ വിദ്യാലയം പിന്നീട് യുപി സ്കൂളായി ഉയർത്തപ്പെട്ടു. തുടർന്ന് സർക്കാർ ഏറ്റെടുത്ത സ്കൂൾ കടുങ്ങാത്തുകുണ്ട് ലേക്ക് മാറ്റി. 1958 ൽ ഇത് ഹൈസ്കൂളായി ഉയർത്തപ്പെട്ടു. അപ്പോഴേക്കും എൽപി സ്കൂൾ ഇതിന്റെ ഭാഗമായി നിലനിർത്തി. മേലങ്ങാടി യു.പി സ്കൂളിൽ പഠിച്ച നാട്ടുകാരായ അധ്യാപകർ ഏറെയുണ്ട്. അവരിൽ പലരും കാലയവനികയ്ക്കുള്ളിൽ മറഞ്ഞു. പെൺകുട്ടികൾക്ക് വിദ്യാഭ്യാസം നിഷിദ്ധമായി വിശ്വസിക്കപ്പെട്ടിരുന്ന കാലത്ത് വിദ്യ നേടി അധ്യാപകവൃത്തി സ്വീകരിച്ച പലരുമുണ്ട്. കത്ത് വായിക്കാൻ അധ്യാപകരെ അന്വേഷിച്ചു നടന്ന ഒരുകാലം ഈ നാട്ടിലുണ്ടായിരുന്നു. വിദ്യാഭ്യാസ സ്ഥാപനങ്ങളുടെ കുറവും, ദാരിദ്ര്യവും ബഹുഭൂരിപക്ഷത്തിനും വിദ്യ അപ്രാപ്യമായ ഒരു സാമൂഹിക പശ്ചാത്തലത്തിലാണ് മൂപ്പൻ കുടുംബം വിദ്യാഭ്യാസമേഖലയിൽ പ്രവർത്തനമാരംഭിക്കുന്നത്. വിദ്യാഭ്യാസത്തിൻറെ മഹത്വവും അത് നേടേണ്ടതിന്റെ ആവശ്യകതയും പ്രാധാന്യവും തിരിച്ചറിഞ്ഞത് എം.എം മൂപ്പനാണ്. സ്കൂൾ പ്രവർത്തിക്കുന്നതിനാവശ്യമായ ഭൂമിയും കെട്ടിടവും മറ്റ് സൗകര്യങ്ങളും നാട്ടുകാർ സൗജന്യമായി നൽകിയാൽ സ്‌കൂളിന് സർക്കാർ അനുമതി നൽകുന്ന രീതിയായിരുന്നു അന്ന്നിലവിലിരുന്നത്. സമ്പന്നർ ഒന്നുമില്ലാത്ത ഒരു ദരിദ്ര ഗ്രാമത്തിന് ഈ നിബന്ധന വിദ്യാഭ്യാസ മുന്നേറ്റത്തിൽ വലിയ തടസ്സമായിരുന്നു സൃഷ്ടിച്ചത്. എങ്കിലും നിശ്ചയദാർഢ്യത്തോടെ പ്രവർത്തിച്ച സമിതി ലക്ഷ്യം കണ്ടു സ്കൂളിനാവശ്യമായ മുഴുവൻ ഭൂമിയും മൂപ്പൻ കുടുംബം വിട്ടുനൽകി. കെട്ടിടത്തിനും മറ്റും ആവശ്യമായ പണം പൊതുപിരിവിലൂടെ കണ്ടെത്തി.
ആദ്യത്തെ സർക്കാർ ഓഫീസുകൾ
കല്പകഞ്ചേരി വള്ളവന്നൂർ ഗ്രാമങ്ങളുടെ സംഗമ കേന്ദ്രമായ കടുങ്ങാത്തുകുണ്ട് 1960 70 കാലഘട്ടത്തിൽതന്നെ വികസനത്തിന്റെ പാതയിൽ സാവധാനം ചലനം തുടങ്ങിയിരുന്നു. ഈ ചലനത്തിന് പ്രധാന ശക്തി അന്നത്തെ പ്രദേശം ഉൾക്കൊള്ളുന്ന താനൂർ മണ്ഡലത്തിലെ എം.എൽ.എ. പരേതനായ സി.എച്ച്. മുഹമ്മദ് കോയ സാഹിബ് ആയിരുന്നു. അദ്ദേഹത്തിന്റെ ആദ്യത്തെ സംഭാവനയാണ് കൽപ്പകഞ്ചേരി ഗവൺമെൻറ് ഹൈസ്കൂൾ. കൽപ്പകഞ്ചേരി രജിസ്റ്റാർ ഓഫീസും, തൊട്ടടുത്തുള്ള പോലീസ് സ്റ്റേഷനും, അതിനിടയിലായുള്ള വളവന്നൂർ വില്ലേജ് ഓഫീസും ആണ് ഈ പ്രദേശത്തെ ആദ്യത്തെ സർക്കാർ ഓഫീസുകൾ
അബ്ദുള്ള സാഹിബിന്റെ സേവനം
കൽപകഞ്ചേരി ഹൈസ്കൂളിനെ സംബന്ധിച്ചിടുത്തോളം വണ്ടൂർ കാരനും പൗര പ്രധാനിയും, ധനാഢ്യനുമായ അബ്ദുള്ള സാഹിബിന്റെ സേവനം എഴുതി തള്ളാൻ കഴിയുന്നതല്ല. അബ്ദുള്ള സാഹിബ് ഹെഡ്മാസ്റ്ററായി വരുമ്പോൾ സ്കൂളിൽ നാട്ടുകാർ നിർമ്മിച്ചു നൽകിയ 5 ക്ലാസ് റൂമുകൾ ഉള്ള ബിൽഡിംഗ് അല്ലാതെ മറ്റൊരു കെട്ടിടവും ഹൈസ്കൂളിനില്ലായിരുന്നു. ചുറ്റുമതിൽ ഇല്ലാതിരുന്നതുകാരണം ഇതിന്റെ വരാന്ത നാൽക്കാലികളുടെ രാത്രികാല വാസസ്ഥലം ആയിരുന്നു. സ്കൂളിലേക്ക് വരുമ്പോൾ അബ്ദുള്ള സാഹിബും രണ്ടുമൂന്നു സഹപ്രവർത്തകരും കൈക്കോട്ടുമായി നിന്ന് പണിയെടുക്കുന്നത് ഒരു സ്ഥിരം കാഴ്ചയായിരുന്നു. പൊതുപ്രവർത്തനത്തിനുള്ള ആദ്യമാതൃക അദ്ദേഹത്തിൽനിന്ന് വിദ്യാർത്ഥികൾക്കും അധ്യാപകർക്കും ലഭിച്ചിരുന്നു.
സ്കൂൾ അപ്ഗ്രേഡ് ചെയ്യുന്നതിനായുള്ള ശ്രമങ്ങൾ വളരെ നേരത്തെതന്നെ ആരംഭിച്ചിരുന്നു. മദിരാശി സർക്കാറിന്റെ കാലത്തുതന്നെ ഈ പ്രദേശത്തെ എം.എൽ.എ.ആയിരുന്ന കോട്ടാൽ കുട്ടി സാഹിബ് ആ ശ്രമങ്ങൾക്ക് നേതൃത്വം വഹിച്ചു. കോട്ടാൽ കുട്ടി സാഹിബ് മലബാർ ഡിസ്ട്രിക്ട് ബോർഡ് അംഗം എന്ന നിലയിൽ സ്കൂൾ അപ്ഗ്രേഡ് ചെയ്യുന്നതിനായി പ്രവർത്തിച്ചു. അതിന് മൊയ്തീൻകുട്ടി എന്ന ബാവ ഹാജി, പ്രസിഡൻറ് ഭാസ്കരൻനായർ എന്നിവർ ഒരുമിച്ച് നേതൃത്വം നൽകി.
ആദ്യത്തെ പ്രധാനാധ്യാപകൻ
സ്കൂളിന്റെ ആദ്യത്തെ പ്രധാനാധ്യാപകൻ അബ്ദുള്ള സാഹിബ് ആയിരുന്നു. അദ്ദേഹത്തിന്റെ സംഭാവന സ്മരണീയമാണ്. കല്പകഞ്ചേരി സ്കൂളിനെ സംബന്ധിച്ചെടുത്തോളം ഓരോ ഘട്ടത്തിലും ജനങ്ങളുടെ ശ്രദ്ധയും മേൽനോട്ടവും ഉണ്ടായിരുന്നു. സർക്കാരിന് കെട്ടിടങ്ങൾ ഉണ്ടാക്കാൻ കഴിഞ്ഞില്ല. ജനപിന്തുണയിൽ രണ്ട് കെട്ടിടങ്ങൾ ഉയർന്നു വന്നു.
ഷിഫ്റ്റ് സമ്പ്രദായം
കുട്ടികളുടെ ബാഹുല്യം കൊണ്ട് 1971 ൽ ഷിഫ്റ്റ് സമ്പ്രദായം തുടങ്ങി. 1975 ൽ കോൺക്രീറ്റ് കെട്ടിടം അനുവദിച്ചു കിട്ടി. വിദ്യാഭ്യാസ മന്ത്രിയും എം.എൽ.എ.യും ആയിരുന്ന ചാക്കീരി അഹമ്മദ് കുട്ടി സാഹിബ് മുഖേനയാണ് ഇത് ലഭിച്ചത്. 2004 ൽ ഷിഫ്റ്റ് സമ്പ്രദായം ഒഴിവാക്കി.
വളർച്ചയുടെ നെടുംതൂൺ
1958 - ൽ ഹൈസ്‌ക്കൂളായി ഉയർത്തപ്പെട്ട ഈ വിദ്യാലയം ഇന്ന് കൽപ്പകഞ്ചേരിയുടെ വിദ്യാഭ്യാസപരവും സാമൂഹികവുമായ വളർച്ചയുടെ നെടുംതൂണാണ്. ഇവിടെ പഠിച്ചു വളർന്ന് വിശ്വ പൗരന്മാരായി മാറിയ ഒട്ടേറെപ്പേർ സ്കൂളിന്റെ അഭിമാനം ആണ്, സ്കൂളിന്റെ ഏയൊരു വികസനത്തെയും പൊതു നന്മയായിക്കണ്ട് ഏറ്റെടുക്കുന്ന നാട്ടുകാരുടെ സ്വഭാവഗുണം സ്കൂളിന്റെ വളർച്ചയ്ക്ക് ഏറെ ഗുണം ചെയ്യുന്നു. നാടിന്റെ നന്മയും നാട്ടുകാരുടെ വിശാലതയും സമന്വയിച്ചപ്പോൾ അത്ഭുതങ്ങൾ സംഭവിക്കുകയായിരുന്നു. വിശ്വത്തോളം വളർന്ന ഈ കൊച്ചു ഗ്രാമത്തിന്റെ സവിശേഷ സാഹചര്യങ്ങളിൽ നിന്ന് വെള്ളവും വളവും വലിച്ചെടുത്ത് നമ്മുടെ സ്കൂളും വളർന്നുകൊണ്ടിരിക്കുന്നു. പി.ടി.എ, എസ്.എം.സി, ഒ.എസ്.എ. എവയുടെ നിസ്സീമമായ സഹകരണവും ഊർജസ്വലമായ നേതൃത്വവുമാണ് സ്കൂളിന്റെ എല്ലാ വിജയങ്ങളുടെയും അടിസ്ഥാനം എന്നത് പ്രത്യേകം പരാമർശിക്കുന്നു. ഈ അനുകൂല സാഹചര്യത്തെ യഥാവിധി തിരിച്ചറിഞ്ഞ് സ്കൂളിന്റെയും അതുവഴി കുട്ടികളുടെയും നന്മയ്ക്കും വികസനത്തിനും വേണ്ടി പാകപ്പെടുത്തിയെടുക്കുന്നതിൽ അധ്യാപകരും ഏറെ വിജയിച്ചു എന്നാണ് സ്കൂളിന്റെ സമകാലീന ചരിത്രം നമുക്കു ബോധ്യപ്പെടുത്തിയിരുന്നത്.
മേളകൾ
സമീപകാലങ്ങളിൽ ഇവിടെവെച്ച് നടന്ന മേളകൾ
സബ്ജില്ലാ കലാമേള 2017-2018
കഴിഞ്ഞവർഷത്തെ കുറ്റിപ്പുറം സബ്ജില്ലാ കലാമേള നടന്നത് ഇവിടെ വെച്ചായിരുന്നു. ഇതിൽ നിരവധി ഇനങ്ങൾക്ക് സമ്മാനങ്ങൾ ലഭിച്ചിരുന്നു. ഉദാഹരണമായി ഒന്നാം സ്ഥാനം നേടിയ രണ്ടിനങ്ങൾ.
| കോൽക്കളി | ഒപ്പന |
|---|---|
 |
 |
ജില്ലാ ശാസ്ത്രമേള 2013-2014
2013-2014 ൽ ജില്ലാ ശാസ്ത്രമേള നടന്നത് ഇവിടെ വെച്ചായിരുന്നു
ജില്ലാ കലോത്സവം 2005-2006
2005-2006 ൽ ജില്ലാ കലോത്സവം
അന്താരാഷ്ട്ര സ്കൂൾ
പാഠ്യ പാഠ്യേതര പ്രവർത്തനങ്ങളിൽ വേറിട്ട ശൈലിയിലൂടെ കുട്ടികൾ നേടിയെടുക്കുന്ന ഇത്തരം നേട്ടങ്ങൾ തിരിച്ചറിഞ്ഞതു കൊണ്ടാവാം അന്താരാഷ്ട്ര നിലവാരത്തിലേക്ക് ഉയർത്താനായി തിരൂർ നിയോജകമണ്ഡലത്തിൽ നിന്ന് നമ്മുടെ സ്കൂളിനെത്തന്നെ മണ്ഡലം എം.എൽ.എ ശ്രീ മമ്മൂട്ടി അവർകൾ തിരഞ്ഞെടുത്തത്.
.