കേരളത്തിലെ പാലക്കാട് ജില്ലയിലെ ഒരു ചെറിയ ഗ്രാമമാണ് പള്ളിപ്പുറം. (ഭൂമദ്ധ്യരേഖയ്ക്ക് 11.8 ഡിഗ്രീ വടക്ക്, 76.10 ഡിഗ്രീ കിഴക്ക്). പാലക്കാട് ജില്ലയുടെ പടിഞ്ഞാറേ അതിരിലാണ് പള്ളിപ്പുറം സ്ഥിതിചെയ്യുന്നത്. പട്ടാമ്പിക്ക് 9 കിലോമീറ്റർ വടക്കു-പടിഞ്ഞാറായി ആണ് പള്ളിപ്പുറം സ്ഥിതിചെയ്യുന്നത്. പരുതൂർ ഗ്രാമത്തിന്റെ ഭാഗമാണ് പള്ളിപ്പുറം. ഭാരതപ്പുഴയുടെയും തൂതപ്പുഴയുടെയും സംഗമത്തിലാണ് ഈ ഗ്രാമം. ഈ ഗ്രാമത്തിന്റെ തെക്കുവശത്ത് ഭാരതപ്പുഴയും പടിഞ്ഞാറുവശത്ത് തൂതപ്പുഴയും ഒഴുകുന്നു. അടുത്തുള്ള ഗ്രാമങ്ങളാണ് മുതുതല, ഇരിമ്പിളിയം, തിരുവേഗപ്പുറ, ആനക്കര,കൂടല്ലൂര് പട്ടിത്തറ, തൃത്താല എന്നിവ.
മംഗലാപുരം-തിരുവനന്തപുരം റെയിൽ പാത ഈ ഗ്രാമത്തിലൂടെ കിഴക്കു-പടിഞ്ഞാറ് ദിക്കിൽ കടന്നുപോകുന്നു. ബ്രിട്ടീഷുകാർ ഇവിടെ നിർമ്മിച്ച റെയിൽവേ സ്റ്റേഷൻ കേരളത്തിലെ തന്നെ ഏറ്റവും പുരാതനമായ റെയിൽവേ സ്റ്റേഷനുകളിൽ ഒന്നാണ്. പ്രാദേശിക തീവണ്ടികൾ മാത്രം നിറുത്തുന്ന ഒരു റെയിൽവേ സ്റ്റേഷനും ഇവിടെ ഉണ്ട്. തൂതപ്പുഴയ്ക്ക് കുറുകെ ഒരു പഴയ റെയിൽവേ പാലവും ഇവിടെ ഉണ്ട്. ബ്രിട്ടീഷുകാർ 1867-ൽ ആണ് ഈ റെയിൽവേ പാലം നിർമ്മിച്ചത്. ഇന്ന് ഈ പാലത്തിനു പകരം ഒരു പുതിയ റെയിൽവേ പാലം നിർമ്മിച്ചിരിക്കുന്നു.
