ജി.എച്ച്.എസ്.എസ്. മൂത്തേടത്ത്/സ്റ്റൂഡന്റ് പോലീസ് കാഡറ്റ്

അച്ചടക്കം മുഖമുദ്രയാക്കി ദേശസ്നേഹം, പൗരബോധം, സഹജീവി സ്നേഹം, ഭരണഘടനയോടുള്ള വിശ്വസ്തത, ഉയർന്ന ചിന്താഗതി തുടങ്ങിയ മൂല്യങ്ങൾ നിത്യജീവിതത്തിന്റെ ഭാഗമാക്കുകയും നിയമങ്ങൾ അംഗീകരിക്കുകയും സ്വമേധയാ അനുസരിക്കുകയും ചെയ്യുന്ന ഒരു പുതു തലമുറയെ വാർത്തെടുക്കുക എന്ന മഹത്തായ ലക്ഷ്യത്തോടെ ആരംഭിച്ച പദ്ധതിയാണ് സ്റ്റുഡന്റ് പോലീസ് കേഡറ്റ് പദ്ധതി. കേരളത്തിന്റെ മണ്ണിൽ 2008 ൽ മൂന്ന് വിദ്യാലയങ്ങളിൽ തുടങ്ങിയ ഈ പദ്ധതി ഇന്ത്യയിലെ മറ്റ് സംസ്ഥാനങ്ങളിലും പ്രാവർത്തികമാക്കാൻ സാധിച്ചു. 22 ആൺകുട്ടികൾക്കും 22 പെൺകുട്ടികൾക്കുമാണ് ഒരു വർഷം പ്രവേശനം ലഭിക്കുക. എഴുത്തുപരീക്ഷ, കായിക ക്ഷമതാ പരീക്ഷ എന്നിവയുടെ അടിസ്ഥാനത്തിലാണ് സെലക്ഷൻ. ആഴ്ചയിൽ 2 ദിവസം കേഡറ്റുകൾക്കായി പി ടി യും പരേഡും.നടത്തുന്നു. വിദ്യാർത്ഥികളിലെ അലസതയും ആത്മവിശ്വാസക്കുറവും മാറ്റി നിർത്തി അവനിൽ അന്തർലീനമായി കിടക്കുന്ന കഴിവുകളെ പുറത്തെടുത്ത് നാളെയുടെ നായകരായി വളരാൻ 2 വർഷത്തെ ചിട്ടയായ പരിശീലനത്തിലൂടെ സാധിക്കുന്നു. 2008 ൽ മൂന്ന് വിദ്യാലയങ്ങളിൽ തുടങ്ങിയ ഈ പദ്ധതി 2010 ൽ 21 വിദ്യാലയങ്ങളിൽ കൂടി ആരംഭിച്ചു. ഇപ്പോൾ 984 സ്കൂളുകളിൽ ഈ പദ്ധതി വിജയകരമായി പ്രയാണം തുടരുന്നു. 2019-20 അധ്യയന വർഷത്തിൽ മൂത്തേടം ഗവൺമെന്റ് ഹയർ സെക്കണ്ടറി സ്കൂളിലും എസ്.പി.സി പദ്ധതിക്ക് തുടക്കം കുറിച്ചു.