സെന്റ് പോൾസ് എൽ.പി.എസ്. മടക്കത്താനം/ചരിത്രം
| സ്കൂൾ | സൗകര്യങ്ങൾ | പ്രവർത്തനങ്ങൾ | ക്ലബ്ബുകൾ | ചരിത്രം | അംഗീകാരം |
മടക്കത്താനത്തെയും സമീപ പ്രദേശങ്ങളിലെയും കുട്ടികൾക്ക് പഠന സൗകര്യമൊരുക്കുക എന്ന ലക്ഷ്യത്തോടെ മൈലക്കൊമ്പ് സെന്റ് തോമസ് പള്ളിയുടെ നേതൃത്വത്തിൽ 1929 ജൂലൈ 29 നാണ് മടക്കത്താനം സെന്റ് പോൾസ് എൽ.പി സ്കൂൾ ആരംഭിച്ചത്. (അന്നത്തെ പേര് St.Pauls Vernakular Primary School). മടക്കത്താനം, കാപ്പ് , കദളിക്കാട്, പിരളിമറ്റം, തെക്കുംമല തുടങ്ങിയ പ്രദേശങ്ങളിലെ നാലഞ്ചു തലമുറകളിൽ പെട്ട ആയിരങ്ങളെ സ്കൂൾ അറിവിലും നെറിവിലും വളർത്തി. തുടക്കത്തിൽ 2 ക്ലാസ്സുകളും (ഒന്നും,രണ്ടും) രണ്ട് അധ്യാപകരും ആയിരുന്നു (സി അബ്രഹാം സാറും നാരായണൻ പിള്ള സാറും) ഉണ്ടായിരുന്നത്. ക്രമേണ അഞ്ചാം ക്ലാസ്‌ ഉൾപ്പെടെയുള്ള മലയാളം പ്രൈമറി സ്കൂൾ ആയി വളർന്നു . ജാതി മത സാമ്പത്തിക ഭേതമന്യേ ഈ പ്രദേശത്തെ മുഴുവൻ കുട്ടികളുടെയും പ്രിയപ്പെട്ട വിദ്യാഭാസ കേന്ദ്രമായിരുന്നു അക്കാലത്ത് സെന്റ് പോൾസ് എൽ.പി സ്കൂൾ .
പിന്നീട്, ഒന്ന് മുതൽ നാല് വരെയുള്ള ക്ലാസ്സുകളെ ലോവർ പ്രൈമറിയായും അഞ്ചു മുതൽ ഏഴു വരെയുള്ള ക്ലാസ്സുകളെ അപ്പർ പ്രൈമറിയായും വേർതിരിക്കാനും ലോവർ പ്രൈമറി സ്‌കൂളുകളിൽ ഷിഫ്റ്റ് സമ്പ്രദായം ഏർപ്പെടുത്തുവാനും ഗവൺമെന്റ് തീരുമാനിച്ചപ്പോൾ, ഇവിടുത്തെ 5-ആം ക്ലാസ്സ് നിർത്തലാക്കുകയും ഒന്ന് മുതൽ നാല് വരെയുള്ള ക്ലാസ്സുകൾ ഷിഫ്റ്റ് സമ്പ്രദായത്തിൽ ആക്കുകയും ചെയ്‌തു.
1962 വരെ എല്ലാ ക്ലാസ്സും ഒരോ ഡിവിഷൻ വീതം ആയിരുന്നു ഉണ്ടായിരുന്നത്. 1962-63 ൽ ഒന്നാം ക്ലാസ്സിന് പുതിയ ഡിവിഷൻ ആയി. 1966-67 ആയപ്പോഴേക്കും നാല് ക്ലാസ്സുകളും 4 ഡിവിഷൻ വീതമായി. 1966-ൽ സ്കൂൾ കോതമംഗലം രൂപത കോർപ്പറേറ്റ് മാനേജ്‌മെന്റിന് കീഴിലായി.
1972 ഒക്ടോബർ 20 ന് മൈലക്കൊമ്പ് സെന്റ് തോമസ് പള്ളി സ്‌കൂളിന്റെയും സ്ഥലത്തിന്റെയും അവകാശം കദളിക്കാട് വിമലമാതാ പള്ളിക്ക് കൈമാറി.
സമീപസ്ഥലങ്ങളിൽ നോൺ ഷിഫ്റ്റ് സമ്പ്രദായത്തിലുള്ള പുതിയ എയ്ഡഡ് സ്‌കൂളുകളും ഇംഗ്ലീഷ് മീഡിയം സ്‌കൂളുകളും പ്രവർത്തനം ആരംഭിച്ചതോടെ സെന്റ് പോൾസ് സ്‌കൂളിൽ കുട്ടികളുടെ എണ്ണം കുറഞ്ഞു. എല്ലാ ക്ലാസ്സുകളും ഒരോ ഡിവിഷൻ ആയി ചുരുങ്ങി. 1978-79 ൽ ഷിഫ്റ്റ് സമ്പ്രദായം അവസാനിപ്പിച്ചു. 1993-94 മുതൽ നഴ്‌സറി ക്ലാസ്സുകൾ കൂടി പ്രവർത്തനം തുടങ്ങി.