ജി.എച്ച്.എസ് ഇരട്ടയാർ/ചരിത്രം

പ്രകൃതിയോട് പടപൊരുതിയ ഒരു അതിജീവനത്തിന്റെ കഥയുണ്ടാവും ഏതൊരു ഇടുക്കിക്കാരനും പറയാൻ നമ്മുടെ നാലുമുക്ക് സ്കൂളിനും ഉണ്ട് ഒരു കഥ മണ്ണിനോട് മല്ലിടുന്നതിനിടയിൽ ഹൈറേഞ്ച് കാരുടെ വിദ്യാഭ്യാസ സ്വപ്നങ്ങൾക്ക് ഒരുപാട് പരിമിതികൾ ഉണ്ടായിരുന്ന കാലം. നാലു മൂക്കിൽ ഉള്ളവരൊക്കെ അക്ഷരം പഠിക്കാൻ ഇരട്ടയാറോ, കട്ടപ്പനയോ പോകണമായിരുന്നു. അങ്ങനെയിരിക്കെ അന്നത്തെ എം.എൽ.എ ആയിരുന്ന ശ്രീ കെ. ടി ജേക്കബ് ചികിത്സക്കായി ഈ നാട്ടിലെത്തി. ആ സമയം നാട്ടുകാർ ഉന്നയിച്ച ആവശ്യപ്രകാരം ശ്രീ മുഹമ്മദ് കോയ വിദ്യാഭ്യാസ മന്ത്രി ആയിരിക്കെ നാലു മൂക്കിൽ സ്കൂൾ അനുവദിച്ചുള്ള ഓർഡർ 08/10/1973-ൽ ഇറങ്ങി... പക്ഷേ സ്കൂളിന് ആവശ്യമായ സ്ഥലവും കെട്ടിടവും നാട്ടുകാർ കൊടുക്കണം അതായിരുന്നു വ്യവസ്ഥ. ഈ വിഷമ സന്ധിയെ മറികടക്കാൻ സന്മനസ്സുള്ള നാട്ടുകാർ ഒരുമിച്ച് നിന്നു കടപ്ലാക്കൽ കേളൻ 25 സെൻറ് സ്ഥലം സ്കൂളിന് സംഭാവന നൽകി. ബാക്കി 50 സെൻറ് സ്ഥലം തറയിൽ വർക്കി അവർകളോട് ഏക്കറിന് 4000 രൂപ വിലവെച്ച് വെള്ളറയിൽ കുട്ടപ്പൻ ,ഔസേപ്പ് പണ്ണൂർ, മത്തായി ജോസഫ് ചക്കാലയിൽ, ജോസഫ് താന്നിക്കൽ എന്നിവർ ചേർന്ന് വാങ്ങി, ബാക്കി 25 സെൻ്റ് സ്ഥലം ഏക്കറിന് 6000 രൂപ വിലവെച്ച് വർക്കി തറയിൽ അവർകളോട്, ലൂക്കോസ് തച്ചാം പറമ്പത്ത്, ചാണ്ടി പാലക്കുഴ എന്നിവർ വാങ്ങി, തറയിൽ വർക്കി സംഭാവനയും നൽകി. അങ്ങനെ ഒരു ഏക്കർ സ്ഥലം സ്കൂളിനായി കണ്ടെത്തി. ചാക്കോ ചാക്കോ പുന്ന പ്ലാക്കൽ പ്രസിഡണ്ടായും, അവിരാ അവിരാ പാത്തീക്കൽ വൈസ് പ്രസിഡണ്ടായും, അവിരാ തോമസ് ചീരം കുന്നേൽ സെക്രട്ടറിയായും, അയ്യൻ കുട്ടപ്പൻ വെള്ളറയിൽ ഖജാൻജിയായും, ഒരു കമ്മിറ്റി രൂപീകരിച്ച സ്കൂളിന് വേണ്ടിയുള്ള പ്രവർത്തനം തുടങ്ങി. ബഹു ഉടുമ്പൻചോല AEO യൂടെ നിർദ്ദേശപ്രകാരം എം. എൻ ശിവരാമൻ സാർ ഹെഡ്മാസ്റ്ററായി 20/02/1973 ൽ ചാർജെടുത്തു. ഒരു അധ്യയന വർഷത്തിന്റെ പാതിയിൽ വച്ച് കുട്ടികളെ സ്കൂളിൽ ചേർക്കുക ശ്രമകരമായിരുന്നു. ശാന്തി ഗ്രാം ഇടിഞ്ഞമല പാറക്കടവ് എന്നീ സ്ഥലങ്ങളിലെ വീടുകൾ കയറി 35 കുട്ടികളെ ചേർത്ത് ഓലകൊണ്ട് മറിച്ച് ഒരു ഷെഡ്ഡിൽ ഡിസംബർ 20ന് ഒന്നാം ക്ലാസ് പ്രവർത്തനമാരംഭിച്ചു. താൽക്കാലിക ഷെഡ് പൊളിച്ച് പുതിയ കെട്ടിടം പണി തുടങ്ങി. ആ സമയത്ത് അമ്പാറ പാപ്പച്ചന്റെ കെട്ടിടത്തിൽ ഒരു വർഷത്തോളം ഒന്നും, രണ്ടും ക്ലാസുകൾ പ്രവർത്തനം നടത്തി. കമ്മിറ്റിക്കാരുടെ സഹായത്തോടെ പല ഘട്ടങ്ങളിലായി പിരിവെടുത്ത് കെട്ടിടം പണി പൂർത്തീകരിച്ചു. എൽ.പി വിഭാഗം പൂർത്തിയായപ്പോൾ യുപി വിഭാഗത്തിന് അനുമതി തേടി അനുവദിച്ചു കിട്ടുകയും ചെയ്തു. ശാന്തിഗ്രാമിൽ പ്രവർത്തിച്ചിരുന്ന ഗവൺമെൻറ് ഹൈസ്കൂൾ പ്രവർത്തനം നിറച്ചപ്പോൾ നാലുമുക്ക് സ്കൂളുമായി ലയിപ്പിച്ചു. കേരള ചരിത്രത്തിൽ ആദ്യമായിട്ടായിരുന്നു ഇങ്ങനെയൊരു സംഭവം.1998 ൽ ഹൈസ്കൂളും പ്രവർത്തനം തുടങ്ങി. സ്കൂളിൻ്റേ മുന്നോട്ടുള്ള പ്രവർത്തനങ്ങളിൽ ഗോപി സാറിൻറെ സാന്നിധ്യം വളരെ വലുതായിരുന്നു. അദ്ദേഹം ഈ നാടിൻറെ തന്നെ അവസാന വാക്കായും ആശ്രയമായും മാറി. തുടർന്നും ശിവരാമൻ സാർ,ഔസേപ്പ് കുട്ടി സാർ ,നാണപ്പൻ സാർ ഗോപി സാർ ,ആൻറണി സാർ ശ്രീരംഗൻ സാർ കാർത്യായനി ടീച്ചർ, അഷറഫ് സാർ, ചാക്കോ സാർ, അഹമ്മദ് സാർ, തങ്കപ്പൻ സാർ ,കുട്ടപ്പൻ സാർ ,പത്മിനി ടീച്ചർ ബിമ ബീഗം ടീച്ചർ, രമണിക്കുട്ടി ടീച്ചർ മേരിക്കുട്ടി ടീച്ചർ ജോസഫ് സാർ, അനിൽകുമാർ സാർ എന്നിങ്ങനെ ഒട്ടേറെ പ്രഗൽഭരായിട്ടുള്ള അധ്യാപകരും, മറക്കാനാവാത്ത സാന്നിധ്യമായ അനധ്യാപകരായ ചന്ദ്രശേഖരൻ, ഭാസ്കരൻ എന്നിവരും, ഈ സ്കൂളിൻറെ നടത്തിപ്പിന് ചുക്കാൻ പിടിച്ചു, അകാലത്തിൽ ഞങ്ങളെ വിട്ടുപിരിഞ്ഞ ബിന്ദു എം കോലംകുഴി ടീച്ചർ, പ്രവർത്തന സന്നദ്ധരായിരുന്ന പി.ടി.എ, ഇരട്ടയാർ ഗ്രാമപഞ്ചായത്ത്, കട്ടപ്പന ബ്ലോക്ക് പഞ്ചായത്ത്, ഇടുക്കി ജില്ലാ പഞ്ചായത്ത്, ബി. ആർ.സി കട്ടപ്പന, വിവിധ കാലഘട്ടങ്ങളിലെ എംഎൽഎമാർ എന്നിവരുടെ സഹായം സ്കൂളിൻറെ പ്രവർത്തനങ്ങളിൽ ലഭിച്ചിട്ടുണ്ട്. സർവ്വോപരി നല്ലവരായ നാലുമുക്ക് നിവാസികൾ സ്കൂളിന് എന്നും കൈത്താങ്ങായി പ്രവർത്തിക്കുന്നു