ക്രൈസ്റ്റ് കിംഗ് ഹയർ സെക്കണ്ടറി സ്കൂൾ മണിമൂളി/മറ്റ്ക്ലബ്ബുകൾ
മാതൃഭൂമി സീഡ്
മാതൃഭൂമി സീഡ് ക്ലബ്ബിന്റെ നേതൃത്വത്തിൽ കുട്ടികളിലെ സമഗ്ര വ്യക്തിത്വ വികസനം പ്രോത്സാഹിപ്പിക്കുന്നതിനും പരിസ്ഥിതി സ്നേഹം ഊട്ടിയുറപ്പിക്കുന്നതിനുമായ പ്രവർത്തനങ്ങൾ നടന്നുവരുന്നു. "സാമൂഹ്യ നന്മ കുട്ടികളിലൂടെ" എന്ന ലക്ഷ്യവുമായി പ്രവർത്തിക്കുന്ന സീഡ്, പ്രകൃതി സംരക്ഷണത്തോടൊപ്പം ലഹരിക്കെതിരെയുള്ള പ്രവർത്തനങ്ങളിലും സജീവമാണ്. നൂറിലേറെ പ്രവർത്തനങ്ങൾ നടപ്പാക്കിക്കൊണ്ട് വണ്ടൂർ വിദ്യാഭ്യാസ ജില്ലയിൽ 2023 -24 വർഷത്തെ മികച്ച വിദ്യാലയത്തിനുള്ള അവാർഡും ക്ലബ്ബ് കരസ്ഥമാക്കി. കുട്ടികളിലെ ബഹുമുഖ കഴിവുകൾ തിരിച്ചറിയുന്നതിനായി നടത്തപ്പെടുന്ന ഫൈവ് സ്റ്റാർ മത്സരങ്ങളിൽ കുട്ടികൾ പങ്കെടുക്കുകയും സ്കൂൾതലത്തിൽ തിരഞ്ഞെടുക്കപ്പെട്ട മികച്ച രചനകൾ ജില്ലാതല മത്സരത്തിലേക്ക് അയക്കുകയും ചെയ്യുന്നു. കാലാവസ്ഥ മാറ്റത്തിനനുസരിച്ച് മരങ്ങളിൽ ഉണ്ടാകുന്ന മാറ്റങ്ങളെ കുറിച്ച് പഠനം നടത്തുന്ന സിറ്റിസൺ സയൻസ് പ്രോജക്ട് ആയ 'സീസൺ വാച്ച്', പ്ലാസ്റ്റിക് മാലിന്യം എന്ന വലിയ വിപത്ത് തടയുന്നതിനായി നടപ്പാക്കുന്ന 'ലവ് പ്ലാസ്റ്റിക്' എന്നീ പദ്ധതികളിൽ സീഡ് ക്ലബ് അംഗങ്ങൾ പങ്കാളികളാണ്. കൂടാതെ സ്കൂൾ പരിസര ശുചീകരണം, പൂന്തോട്ട നിർമ്മാണം, വ്യക്തിത്വ വികസന സെമിനാറുകൾ എന്നിവയിൽ സജീവമായി കുട്ടികൾ പങ്കെടുക്കുന്നു.