എ എം യു പി എസ് കുറ്റിത്തറമ്മൽ/ചരിത്രം

ഇരിങ്ങല്ലൂർ പ്രദേശത്തിന്റെ വിദ്യാഭ്യാസപുരോഗതി കുറ്റിത്തറമ്മൽ എ എം യു പി സ്കൂളിന്റെ വികസന ചരിത്രം കൂടിയാണ്. 1922ൽ വള്ളിൽ കുഞ്ഞലവി മുസ്ലിയാർ സ്ഥാപിച്ച ഓത്തുപള്ളിയിൽ നിന്നാണ് ഇന്നത്തെ സ്കൂൾ രൂപപ്പെടുന്നത്. രാവിലെ വളരെ നേരത്തെ ഓത്തുപള്ളിയിൽ മതപഠനവും അതിനുശേഷം സ്കൂൾ വിദ്യാഭ്യാസവും ആയിരുന്നു ഉണ്ടായിരുന്നത്. ആദ്യകാലങ്ങളിൽ രണ്ടിടത്തും സ്ഥാപകനായ വള്ളിൽ കുഞ്ഞലവി മുസ്ലിയാർ തന്നെയായിരുന്നു ക്ലാസുകൾ എടുത്തിരുന്നത്. 1931 ൽ നാട് ഭരിച്ചിരുന്ന ബ്രിട്ടീഷ് ഗവൺമെൻറ് സ്കൂൾ ആയി പ്രവർത്തിക്കാൻ അനുമതി നൽകി.

സ്കൂളിന്റെ ആരംഭ കാലഘട്ടം

3 അധ്യാപകരുമായിട്ടാണ് സ്കൂൾ പഠനം ആരംഭിച്ചത്. കുഞ്ഞലവി മുസ്ലിയാർ ,കുഞ്ഞാലൻ മാസ്റ്റർ, കുഞ്ഞിമ്മുട്ടി മാസ്റ്റർ, കുഞ്ഞുകുട്ടി മാസ്റ്റർ എന്നിവരായിരുന്നു ആദ്യകാല അധ്യാപകർ .പിന്നീട് വാസു മാസ്റ്റർ, കുഞ്ഞഹമ്മദ് കുട്ടി മാസ്റ്റർ, മീനാക്ഷി ടീച്ചർ ഗോപാലകൃഷ്ണപിള്ള എന്നിവർ അധ്യാപകരായി എത്തി. അന്നു തന്നെ വളരെ മികവുറ്റ രീതിയിൽ ക്ലാസ്സുകൾ എടുക്കാൻ ചാർട്ടുകൾ ഉപയോഗിച്ചിരുന്നു. കുട്ടികളിലെ സർഗാത്മക ശേഷി വളർത്തിയെടുക്കാൻ ആഴ്ചകൾ തോറും സാഹിത്യസമാജം നടത്തിയിരുന്നു. ജനാധിപത്യരീതിയിൽ നോമിനേഷൻ സമർപ്പിച്ച് പ്രചാരണം നടത്തി ബാലറ്റ് പേപ്പർ ഉപയോഗിച്ച് വോട്ടു ചെയ്താണ് ക്ലാസ് ലീഡർ തിരഞ്ഞെടുപ്പ് നടത്തിയിരുന്നത്. തെരഞ്ഞെടുപ്പ് ചിഹ്നങ്ങളായി പൂക്കൾ, ഇല, പൂമ്പാറ്റ, പുസ്തകം എന്നിവ മുള്ളീലത്തിന്റെ മുള്ളു കൊണ്ട് നിർമ്മിച്ചെടുക്കാറുണ്ടായിരുന്നു. സ്കൂൾ അസംബ്ലികളും കൃത്യമായി നടത്തി പോന്നു. സ്കൂളിലെ വാസു മാഷ് രചിക്കുന്നതായിരുന്നു അന്നത്തെ പ്രാർത്ഥനാ ഗീതവും സ്വാതന്ത്ര്യദിന ഗീതവും എല്ലാം .

സ്കൂളിലെ ആദ്യത്തെ പ്രാർത്ഥനാഗീതം

ഉലകിതിലഖിലചരാചരമകമേ

വാണരുളും ഭൂവനേശാ

ആകാശഭൂമി സമീരന്ന സലിലു

പാവകനെന്നിവയെല്ലാം

നിൻ്റെയനുഗ്രഹമല്ലയോ ഞങ്ങൾ

സ്കൂളിന്റെ വളർച്ച

കുട്ടികൾ വർധിച്ചത് അനുസരിച്ച് സ്കൂളിന്റെ അടിസ്ഥാന ഭൗതിക സൗകര്യങ്ങളിൽ കാര്യമായ പുരോഗതികൾ ഉണ്ടായി. 1976 ൽ യു.പി. സ്കൂളായി ഉയർത്തപ്പെട്ടു. എന്നാൽ അതിനു മുമ്പ് തന്നെ ഗവൺമെന്റിന്റെ സ്പെഷൽ ഓർഡർ പ്രകാരം അഞ്ചാം ക്ലാസ് വരെ ക്ലാസ് നടന്നിരുന്നു. 15 വർഷങ്ങൾക്കു മുമ്പ് സ്കൂളിൽ നഴ്‍സറി വിഭാഗവും പ്രവർത്തനമാരംഭിച്ചു. നൂറു വർഷങ്ങൾക്കിപ്പുറം 34 സ്റ്റാഫും 788 വിദ്യാർത്ഥികളും 24 ഡിവിഷനുകളുമുള്ള സ്കൂൾ സബ്ജില്ലയിലെ തന്നെ മികച്ച സ്കൂളുകളിലൊന്നാണ്. വിദ്യാഭ്യാസപ്രവർത്തനങ്ങളിലെ മികവിനൊപ്പം സമഗ്രമേഖലകളിലും സ്കൂൾ തുടർച്ചയായി നേട്ടങ്ങൾ കൊയ്യുന്നു.