അസംപ്ഷൻ എച്ച്.എസ്. പാലമ്പ്ര/എന്റെ ഗ്രാമം

പാലമ്പ്ര എന്റെ ഗ്രാമം

ആത്മീയമായ ഉണർവ്വോടെ മുന്നോട്ടു നീങ്ങുന്ന, മൂന്നു മത വിഭാഗങ്ങളും സമഭാവനയോടെ വളരുന്ന, വിദ്യാഭ്യാസപരമായി ഏറെ വളർച്ച നേടിക്കൊണ്ടിരിക്കുന്ന, കാർഷികസംസ്കാരം സ്വന്തമായുള്ള, നൻമകളുടെ സമൃദ്ധി അവകാശപ്പെടാവുന്ന ഒരു കൊച്ചുഗ്രാമമാണ് പാലമ്പ്ര. കാഞ്ഞിരപ്പള്ളി താലൂക്കിൽ പാറത്തോട് ഗ്രാമപഞ്ചായത്തിൽ പെടുന്ന ഒരു ഗ്രാമമാണിത്

ഭൂമിശാസ്ത്രം

കാഞ്ഞിരപ്പള്ളിയിൽനിന്നും എരുമേലി ശബരിമല റൂട്ടിൽ സ്ഥിതി ചെയ്യുന്ന മേരി ക്ചീൻസ് ഹോസ്പിറ്റൽ മുതൽ തുടങ്ങുന്നു പാലമ്പ്രയുടെ സ്ഥലപരിധി.വലിയ മരങ്ങളും കുന്നിൻ പ്രദേശങ്ങളും നിറഞ്ഞ ഗ്രാമമാണിത്. പ്രകൃതി അതിന്റെ ഉന്നതിയിൽ സംരക്ഷിക്കപ്പെടുന്ന ഈ ഗ്രാമത്തിൽ അന്തരീക്ഷ മലിനീകരണം വളരെ കുറവാണ്.കാർഷികസംസ്കാരം കൂട്ടിനുള്ള, റബ്ബറിനെ ഏറെക്കുറെ ആശ്രയിച്ചു വളരുന്ന നാടാണിത്. റബ്ബർ എസ്റ്റേറ്റുകളാൽ സമൃദ്ധമാണ് ഈ കൊച്ചു നാട്. സാംസ്കാരികമായ ഉയർച്ചയും പാലമ്പ്രക്ക് അവകാശപ്പെടാം.

പേരിന്റെ ഉത്പത്തി

പണ്ട് കാലത്ത് ഇരുപത്താറാം മൈലിലുള്ള തോട് കടന്നാണ് ആളുകൾ ശബരിമലയ്ക്ക് പൊയ്ക്കൊണ്ടിരുന്നത്. ഇപ്രകാരം പോയിരുന്നവർക്ക് പാലം പോലെ ഉപകരിച്ചിരുന്ന ഒരു പാറ ഈ തോട്ടിലുണ്ടായിരുന്നു. അങ്ങനെ ഈ പ്രദേശത്തിന് പാലംപാറ എന്ന പേരുണ്ടായി എന്നും അത് പിന്നീട് പാലമ്പ്ര ആയി മാറി എന്നും പറയപ്പെടുന്നു.