അധ്യാപകദിനം2016
കഴിഞ്ഞ വർഷത്തെ(2016)അധ്യാപകദിനം വിപുലമായി ആചരിച്ചു. നമ്മുടെ സ്കൂളിൽ നിന്നും പെൻഷൻ പറ്റി പിരിഞ്ഞ എല്ലാ അധ്യാപകരെയും നേരിട്ട് കണ്ട് ക്ഷണിച്ച് സ്കൂളിലെത്തിച്ച് ആദരിക്കാൻ കഴിഞ്ഞതിന്റെ ആഹ്ലാദം വളരെ വലുതായിരുന്നു. നിറഞ്ഞ മനസ്സോടെ, അവശതകളും, അത്യാവശ്യങ്ങളും മാറ്റി വച്ച് അവർ സേവനമനുഷ്ഠിച്ച വിദ്യാലയത്തിൽ ഓടിയെത്തി.
'ഗുരവേ പ്രണാമം' എന്ന ഗാനത്തിന്റെ അകമ്പടിയോടെ ഓരോ അധ്യാപകന്റെയും പാദം നമസ്കരിച്ച് അവരെ കുട്ടികൾ സ്വാഗതം ചെയ്തു. നിറഞ്ഞ ചിരിയോടെ മനസ്സ് നിറഞ്ഞ് ആദരം സ്വീകരിക്കാനും കുട്ടികളെ മൂർദ്ധാവിൽ കരങ്ങൾ ചേർത്ത് അനുഗ്രഹിക്കാനും മുൻ അധ്യാപകരും ഉത്സുകരായി.
ഹയർ സെക്കന്ററി വിദ്യാർത്ഥിനിയുടെ നൃത്തപൂജ അധ്യാപകർക്ക് പുതിയ അനുഭവമായി. 'ലോകമേ തറവാട്' എന്ന കവിതയുടെ വരികൾക്ക് വേണുഗോപാലിന്റെ ആലാപനമാധുര്യം ഗുരുവന്ദനച്ചടങ്ങിന് കൊഴുപ്പേകി..പാട്ടിന്റെ വരികൾക്കൊപ്പം കുട്ടികൾ ആരതിയുഴിഞ്ഞ് ഓരോ അധ്യാപകരെയും ആദരിച്ചു. ഏതോ മായിക ലോകത്ത് എത്തിയ പ്രതീതിയാണ് ഓരോ മുഖത്തും കാണാൻ കഴിഞ്ഞത്. എന്തിനെയും അപമാനിക്കുന്ന ഇന്നത്തെ കാലത്ത് പുതിയ തലമുറയുടെ ആദരം അവരെ ആനന്ദത്തിലാറാടിച്ചു. ഓരോ മുഖത്തും അമ്പരപ്പും ആനന്ദവും നിറഞ്ഞു നിന്നു. ഈ വിദ്യാലയത്തിലെ പ്രിൻസിപ്പാൾ, പ്രഥമാധ്യാപിക, അധ്യാപകർ തുടങ്ങിയവർ വാക്കുകളിലൂടെ നല്കിയ സ്നേഹാദരങ്ങൾ ആവോളം ഏറ്റു വാങ്ങിയ മുൻ അധ്യാപകർ അവരുടെ മറുപടി പ്രസംഗത്തിൽ നമ്മുടെ സ്കൂളിനെയും ഇവിടത്തെ അധ്യാപകരുടെയും വിദ്യാർഥികളുടെയും നല്ല മനസ്സിനെയും വാനോളം പുകഴ്ത്തി.
തുടർന്ന് അക്യുപഞ്ചർ ചികിത്സയെക്കുറിച്ചുള്ള സജിസാറിന്റെ ക്ലാസ്സ്, പ്രായം അലട്ടുന്ന ചില രോഗങ്ങൾക്ക് മരുന്നില്ലാതെ പ്രതിവിധിയും കണ്ടെത്താൻ സഹായിച്ചു.
പോയ വർഷങ്ങളിലെ അദ്ധ്യാപകദിനങ്ങളേക്കാൾ മധുരതരമായ അനുഭവമായി മാറിയതായി അവർ പറഞ്ഞു. വൈകികിട്ടിയ ആദരവിൽ മനം നിറഞ്ഞ് നിറയെ അനുഗ്രഹങ്ങളും, സ്നേഹവായ്പും പകർന്ന് അവർക്കായി ഒരുക്കിയ സ്നേഹസദ്യയിൽ പങ്കെടുത്ത് നിറഞ്ഞ മനസ്സോടെ അതിഥികളും ആതിഥേയരും ഒരുപോലെ ആനന്ദത്തിലാറാടിയ ദിനമായിരുന്നു 2016-ലെ അദ്ധ്യാപകദിനം.
