ഗവ. എച്ച്.എസ്. പുളിക്കമാലി
പുളിക്കമാലി ഗവ. ഹൈസ്‌ക്കൂള്‍ തൃപ്പൂണിത്തുറ ഉപജില്ലയുടെ കിഴക്കുഭാഗത്തായി സ്ഥിതി ചെയ്യുന്നു. 223 കുട്ടികള്‍ 1 മുതല്‍ 10 വരെ ക്ലാസുകളില്‍ പഠിക്കുന്നു. തികച്ചും ഗ്രാമപ്രദേശത്തു സ്ഥിതിചെയ്യുന്ന സ്‌കൂള്‍ ആണിത്. 96 വര്‍ഷം മുമ്പ് 4 കോളനികള്‍ക്കായി ആരംഭിച്ചതാണ് ഈ സ്‌കൂള്‍. പാലാല്‍ കുടുംമ്പക്കാര്‍ നല്‍കിയ 22 സെന്റ് സ്ഥലത്ത് ചാലി കുടുംമ്പക്കാര്‍ കെട്ടിടം പണിതാണ് സ്‌കൂള്‍ ആരംഭിച്ചത്. സ്‌കൂളിന്റെ ആദ്യനാമം മലയാളം സ്‌കൂള്‍ പുളിക്കമാലി എന്നായിരുന്നു. പിന്നീട് ഗവ. എല്‍.പി. സ്‌കൂള്‍ എന്നായി 1958-ല്‍ മുണ്ടശ്ശേരി മാഷ് വിദ്യഭ്യാസ മന്ത്രിയായിരിക്കെ ഗവ. ജൂനിയര്‍ ബേസിക്ക് സ്‌കൂള്‍ ആയി ഉയര്‍ത്തപ്പെട്ടു. 74-75 കാലഘട്ടത്തില്‍ ഗവ.യു.പി. സ്‌കൂളായി ഉയര്‍ത്തപ്പെട്ടു. 1980-ല്‍ പോള്‍ പി. മാണി മന്ത്രിയായിരുന്നപ്പോള്‍ മന്ത്രി ബേബി ജോണിന്റെ സഹായത്താല്‍ ഹൈസ്‌കൂളായി ഉയര്‍ത്തപ്പെട്ടു. 1983-ല്‍ ആദ്യ എസ്.എസ്.എല്‍.സി ബാച്ച് പുറത്തിറങ്ങി.
സ്‌കൂളില്‍ പി.ടി.എ ആരംഭിച്ചത് 1965-ലാണ്. ഹൈസ്‌കൂളാക്കിയപ്പോള്‍ ആദ്യ ചാര്‍ജ്ജ് വഹിച്ചത് കുറുമ്പന്‍ മാഷായിരുന്നു. ശരിയായ ഫയലിംഗ് സിസ്റ്റവും ഭരണ സ്ഥിരതയുമായി കെ.വി. പൗലോസ് സാര്‍ ആദ്യ ഹെഡ്മാസ്റ്ററായി. ആദ്യത്തെ മലയാള അദ്ധ്യാപകന്‍ ഐ.റ്റി. മത്തായി ആയിരുന്നു. സ്‌കൂളിലെ പ്രഥമ ഹെഡ്മിസ്ട്രസ് ഡപ്യൂട്ടി ഡയറക്ടറായി സര്‍വ്വീസില്‍ നിന്ന് വിരമിച്ച കെ.സരോജം ടീച്ചറായിരുന്നു. പുളിക്കമാലിയുടെ സാമൂഹിക-സാംസ്‌കാരിക ചരിത്രത്തില്‍ നിര്‍ണ്ണായക സ്ഥാനം വഹിച്ചത് ഈ സ്‌കൂളാണ്. മഹാന്മാരായ നിരവധി പൂര്‍വ്വ വിദ്യാര്‍ത്ഥികള്‍ ഈ സ്‌കൂളിന്റേതായുണ്ട്. ഇന്ത്യയിലെ ഓര്‍ത്തോപീഡിക് സര്‍ജന്‍മാരില്‍ പ്രധാനിയായ പെരുന്തല്‍മണ്ണ അല്‍-ഷിഫ ആശുപത്രിയിലെ ഡോ. ഇ.ജി. മോഹന്‍കുമാര്‍, യാക്കോബായ സുറിയാനി സഭയുടെ മലേകുരിശ് ദയറ അധിപനും ബാംഗ്ലൂര്‍ ഭദ്രാസന മെത്രാപൊലിത്തയുമായ കുര്യാക്കോസ് മാര്‍ ദിയാസ് കോറോസ്, കൊച്ചി യൂണിവേഴ്‌സിറ്റി സ്റ്റാറ്റിസ്റ്റിക്‌സ് ഡിപ്പാര്‍ട്ട്‌മെന്റ് റീഡര്‍ ഡോ. പി.ജി. ശങ്കരന്‍ ബീഹാര്‍ ടൂറിസം ഡവലപ്പ്‌മെന്റ് കോര്‍പ്പറേഷന്റെ ആയുര്‍വേദ ചികിത്സ പദ്ധതി മുഖ്യ ഉപദേഷ്ടാവ് ഡോ.സി.ഡി. സഹദേവന്‍, പലക്കാട് എന്‍.എസ്.എസ് കോളേജ് ഓഫ് എന്‍ജിനിയറിംഗ് അദ്ധ്യാപകന്‍ ഡോ.കെ.ജി.വിശ്വനാഥന്‍ എന്നിവരെല്ലാം ഈ സ്‌കൂളിലെ പൂര്‍വ്വ വിദ്യാര്‍ത്ഥികളാണ്.
കഴിഞ്ഞ കുറെ വര്‍ഷങ്ങളായി കുട്ടികളുടെ എണ്ണം വളരെ കുറവാണ്. എസ്.എസ്.എല്‍.സി റിസല്‍ട്ട് കഴിഞ്ഞ വര്‍ഷങ്ങളിലെല്ലാം 97ശതമാനം ഉണ്ടായിരുന്നു. കഴിഞ്ഞ 2 വര്‍ഷമായി സ്‌കൂള്‍ പുതിയ രീതിയിലുള്ള പഠന പ്രവര്‍ത്തനങ്ങള്‍ നടപ്പാക്കുന്നതിലൂടെ സംസ്ഥാനത്തിന്റെ ആകെ ശ്രദ്ധ നേടിയിരിക്കുകയാണ്. പി.സി രാജലക്ഷ്മി ടീച്ചറാണ് സ്‌കൂളിലെ ഇപ്പോഴത്തെ ഹെഡ്മിസ്ട്രസ്.
പുളിക്കമാലി ഗവ. ഹൈസ്‌കൂള്‍ ഡ്രാമ ക്ലബ്
തികച്ചും ആകസ്മികമായി രൂപപ്പെട്ട ഒന്നാണ് പുളിക്കമാലി ഗവ.ഹൈസ്‌കൂള്‍ ഡ്രാമ ക്ലബ്. ഒന്നര വര്‍ഷം കൊണ്ട് 9 നാടകങ്ങള്‍ ചെയ്ത് 28-ഓളം വേദികളില്‍ അവതരിപ്പിച്ച് ഏകദേശം 60,000/- രൂപയോളം സ്വരൂപിക്കുവാന്‍ നാടക ക്ലബിനായി. 108 കുട്ടികള്‍ ഇതിനോടകം നാടകവുമായി ബന്ധപ്പെട്ടു കഴിഞ്ഞു. ഇന്ന് കേരളത്തിലെ ആദ്യത്തെ പ്രൊഫഷണല്‍ നാടക സ്‌കൂള്‍ ടീം എന്ന ഖ്യാതി നമ്മള്‍ നേടിയിരിക്കുകയാണ്. അര മണിക്കൂര്‍ മുതല്‍ ഒന്നര മണിക്കൂര്‍ വരെ നാടകങ്ങളാണ് കുട്ടികള്‍ അവതരിപ്പിക്കുന്നത്. വര്‍ണ്ണങ്ങള്‍, അമ്മയുടെ ഉണ്ണികള്‍, പാല്‍പ്പായസം, കുന്താപ്പി ഗുലു ഗുലു, രാജാത്തി, മുചീട്ടു കളിക്കാരന്റെ മകള്‍, ഇയാഗോ, ഒരിടത്തൊരു പാവകൂട്ടം, ഒരു വിവാഹ ആലോചന എന്നിവയാണ് ഡ്രാമ ക്ലബ് ഇതുവരെ ചെയ്ത നാടകങ്ങള്‍. രാജാത്തി കഴിഞ്ഞ വര്‍ഷം നടന്ന ജില്ലാ കലോത്സവത്തില്‍ 3-ാം സ്ഥാനവും എ-ഗ്രേഡും നേടി. ഒരിടത്ത് ഒരു പാവകൂട്ടം എന്ന നാടകം സംവിധാനം ചെയ്തത് ശ്രീകുട്ടി ശശിധരന്‍ എന്ന 9-ാം ക്ലാസ് വിദ്യാര്‍ത്ഥിനിയാണ്. ഈ നാടകം 7 വേദികളില്‍ അവതരിപ്പിച്ചു കഴിഞ്ഞു. എഷ്യനെറ്റിന്റെ കണ്ണാടി, കൈരളി ചാനലിന്റെ കൊച്ചി കാഴ്ച, വനിത മാസികയുടെ 2009 ഓണപതിപ്പ് എന്നിവയില്‍ ഡ്രാമ ക്ലബിനെക്കുറിച്ച് റിപ്പോര്‍ട്ട് വന്നു.
നാടകത്തെ മികച്ചൊരു പഠന പ്രവര്‍ത്തനം എന്ന നിലയിലാണ് സ്‌കൂളില്‍ അവതരിപ്പിക്കുന്നത്. നാടകം കളിച്ചു കിട്ടിയ പൈസയില്‍ ഒരുവിഹിതമെടുത്ത് രണ്ട് ക്ലാസ് മുറികള്‍ക്ക് വാതില്‍ വെച്ച് നല്‍കി. നാഷണല്‍ സ്‌കൂള്‍ ഓഫ് ഡ്രാമ ന്യൂഡല്‍ഹി ഫെസ്റ്റിവലില്‍ സെലക്ഷന്‍ ഏകദേശം തയ്യാറായിരിക്കുകയാണ്. പ്രമുഖരായ പല നാടക, സിനിമ പ്രവര്‍ത്തകര്‍ എത്തിചേര്‍ന്ന് തുടങ്ങി.
കാഴ്ച പത്രം
10-ാം ക്ലാസിലെ മലയാളം വിദ്യാര്‍ത്ഥികള്‍ പഠനത്തിന്റെ ഭാഗമായി പുറത്തിറക്കിയ കാഴ്ച പത്രം ഇപ്പോള്‍ പുളിക്കമാലി ഗ്രാമത്തിന്റെ സ്വന്തം പത്രമായി മാറി. 29 കുട്ടികള്‍ പത്രം നടത്തിപ്പിന്റെ വിവിധ വിഭാഗങ്ങളില്‍ പ്രവര്‍ത്തിച്ചുകൊണ്ട് ഇറക്കിയ കാഴ്ച പത്രം ഒരു മികച്ച പഠന പ്രവര്‍ത്തനമായി. 2009 ജനുവരി 13-നാണ് ആദ്യ പത്രം ഇറങ്ങിയത്. ഇതുവരെ 5 പത്രം ഇറങ്ങി കഴിഞ്ഞു. നോബിന്‍ ബാബു ആയിരുന്നു ആദ്യ എഡിറ്റര്‍. ഇപ്പോഴത്തെ എഡിറ്റര്‍ ചന്തു രവിനാഥ്. സ്‌കൂളിന്റെ പ്രധാന ദിവസങ്ങളില്‍ പത്രം ഇറക്കും.
സ്‌കൂള്‍ ലൈബ്രററി
9 പത്രങ്ങളും 26 ആനുകാലികങ്ങളും വരുത്തുന്ന കേരളത്തിലെ ഏക സ്‌കൂള്‍ ലൈബ്രററി. കുട്ടികള്‍ തന്നെ ഭാരവാഹികള്‍. പണം സ്വരൂപിക്കുന്നത് 50 പൈസ മുതല്‍. ആദ്യത്തെ മാസം പത്രക്കാരന് കൊടുത്ത് കഴിഞ്ഞ് 8 രൂപ 75 പൈസ ലാഭം.
ജൂനിയര്‍ റെഡ് ക്രോസ്, ഹെല്‍ത്ത് ക്ലബ്, സയന്‍സ് ക്ലബ്, പരിസ്ഥിതി ക്ലബ്, സാമുഹിക ശാസ്ത്ര ക്ലബ്, ഗണിത ശാസ്ത്ര ക്ലബ്, ഹിന്ദി ക്ലബ്, സംസ്‌കൃതം ക്ലബ്, വിദ്യാരംഗം കലാസാഹിത്യ വേദി എന്നിവയെല്ലാം വളരെ ഭംഗിയായി തന്നെ സ്‌കൂളില്‍ പ്രവര്‍ത്തിക്കുന്നു.