പി.എച്ച്.എം.കെ.എം.വി.എച്ച്.എസ്. പനവൂർ/സ്റ്റൂഡന്റ് പോലീസ് കാഡറ്റ്-17
കാര്യശേഷി,സാമൂഹിക പ്രതിബദ്ധത,പൗരബോധം തുടങ്ങി നിരവധി ഗുണങ്ങളുള്ള ഉത്തമപൗരൻമാരെ വാർത്തെടുക്കുക എന്ന ലക്ഷ്യത്തോടെ കേരള പോലീസും വിദ്യാഭ്യാസവകുപ്പും സംയുക്തമായി ഗവർമെന്റ് ഉത്തരവനുസരിച്ച് തെരഞ്ഞെടുക്കപ്പെട്ട സ്കൂളുകളിൽ ആവിഷ്കരിച്ച് നടപ്പിലാക്കി വരുന്ന സ്കൂൾതല പരിശീലന പരിപാടിയാണ് സ്റ്റുഡന്റ് പോലീസ് കേഡറ്റ് പദ്ധതി.പനവൂർ പി.എച്ച്.എം.കെ.എം.വി.എച്ച്.എസ്.എസിൽ ഈ പദ്ധതിയുടെ യൂണിറ്റ് 2014 നവംബർ മാസം അനുവദിക്കുകയും 2015 ജനുവരി 8 ന് ബഹു.വാമനപുരം നിയോജകമണ്ഢലം എം.എൽ.എ ശ്രീ കോലിയക്കോട് എൻ കൃഷ്ണൻ നായർ ഉദ്ഘാടനം നിർവ്വഹിക്കുകയും ചെയ്തു.പനവൂർ ഗ്രാമത്തിന്റെ തിരുനെറ്റിയിൽ ഒരു തിലകച്ചാർത്തായി എസ്.പി.സി പനവൂർ പി.എച്ച്.എം.കെ.എം.വി.എച്ച്.എസ്.എസ് യൂണിറ്റ് 5ാം വർഷത്തിലേക്ക് ജൈത്രയാത്ര തുടർന്ന് കൊണ്ടിരിക്കുന്നു.
അവധിക്കാല ക്യാമ്പുകൾ
എസ്.പി.സി ഓണം,ക്രിസ്തുമസ്,വേനൽ അവധിക്കാലങ്ങളിൽ മൂന്ന് ത്രിദിന അവധിക്കാല ക്യാമ്പുകൾ നടത്താറുണ്ട്.നമ്മുടെ യൂണിറ്റ് ഓണനിലാവ് എന്നപേരിൽ ത്രിദിന ഓണം അവധിക്കാല ക്യാമ്പ്,ശിശിരസംഗമം എന്നപേരിൽ ത്രിദിന ക്രിസ്തുമസ് അവധിക്കാല ക്യാമ്പ്,തണൽ എന്നപേരിൽ ത്രിദിന വേനൽ അവധിക്കാലക്യാമ്പ് എന്നിവ ഓരോവർഷവും നടത്തിവരുന്നു
ഓണനിലാവ് 2019
പനവൂർ പി എച്ച് എം കെ എം വി എച്ച്.എസ്എസിൽ ബഹു.സ്കൂൾ മേധാവി ശ്രീമതി ഐ.ജി പ്രേംകല എസ്.പി.സി പതാക ഉയർത്തി ഓണനിലാവ് 2019 ത്രിദിന അവധിക്കാല ക്യാമ്പ് വർണ്ണാഭമായി തുടക്കം കുറിച്ചു
പനവൂർ പി എച്ച് എം കെ എം വി എച്ച് എസ് എസിൽ ത്രിദിന അവധിക്കാല ക്യാമ്പ് ഓണനിലാവ് 2019 ബഹു. പനവൂർ ഗ്രാമപഞ്ചായത്ത് പ്രസിഡന്റ് ശ്രീ എസ്. വി കിഷോർ ഭദ്രദീപം തെളിച്ച് ഉദ്ഘാടനം ചെയ്തു. പി. ടി എ പ്രസിഡന്റ് ശ്രീ ഒ. പി കെ ഷാജി അവർകളുടെ മഹനീയ അദ്ധ്യക്ഷതയിൽ നടന്ന ഉദ്ഘാടന സമ്മേളനത്തിൽ സ്കൂൾമേധാവി ശ്രീമതി ഐ. ജി പ്രേംകല സ്വാഗതവും സ്റ്റാഫ് സെക്രട്ടറി ശ്രീ ജി. എൽ അനിൽകുമാർ നന്ദിയും രേഖപ്പെടുത്തി
കായികപരിശീലനം,പരേഡ് പരിശീലനം,യോഗ,ഊഷു പരിശീലനങ്ങൾ,റോഡ് വാക്ക് ആന്റ് റൺ,പഠനക്ളാസ്സുകൾ,ഫീൽഡ് വിസിറ്റുകൾ,ബോധവൽക്കരണ പരിപാടികൾ,കലാകായിക വേദികൾ തുടങ്ങി നിരവധി പ്രവർത്തനങ്ങൾ ഉൾപ്പെടുത്തിയ മൂന്നു ദിനങ്ങൾ കേഡറ്റുകൾ നന്നായി പ്രയോജനപ്പെടുത്തി.
എസ്.പി.സിക്ക് തണൽ വിരിച്ച് കേഡറ്റുകളുടെ രക്ഷകർത്താക്കളുടെ സംഗമം
പനവൂർ .പി.എച്ച്.എം.കെ.എം.വി ആന്റ് എച്ച്.എസ്.എസിൽ എസ്.പി.സി രക്ഷകർത്താക്കളുടെ സംഗമം പി.ടി.എ പ്രസിഡന്റ് ശ്രീ ഷാജി ഒ.പി.കെ യുടെ അദ്ധ്യക്ഷതയിൽ നടന്നു.സ്കൂൾ മേധാവി ശ്രീമതി ഐ.ജി പ്രേംകല സ്വാഗതം ആശംസിച്ചു .ഡ്രിൽ ഇൻസ്ട്രക്ടർ ശ്രീ ഷിബുകുമാർ എസ്.പി.സി യിൽ രക്ഷകർത്താക്കളുടെ പങ്കിനെ സംബന്ധിച്ച് രക്ഷകർത്താക്കളുമായി സംവദിച്ചു.തിരുവനന്തപുരം റൂറൽ ജില്ലാ നോഡൽ ഓഫീസർ ശ്രീ അനിൽകുമാർ രക്ഷകർത്താക്കളുമായി സംവദിച്ചു.അവരുടെ പരാതികൾ കേൾക്കുകയും ഉചിതമായ മറുപടി നൽകുകയും ചെയ്ത്കൊണ്ട് രക്ഷകർത്താക്കളുടെ തെറ്റായ ധാരണകൾ മാറ്റി.
എസ്.പി.സി നോഡൽ ഓഫീസറുടെ സന്ദർശനം
എസ്.പി.സി കേഡറ്റുകൾക്ക് ആവേശം പകർന്ന് തിരുവനന്തപുരം റൂറൽ ജില്ലാ അസിസ്റ്റന്റ് നോഡൽ ഓഫീസർ ശ്രീ അനിൽകുമാർ പനവൂർ പി.എച്ച്.എം.കെ.എം.വി.ആന്റ് എച്ച്.എസ്എസിൽ.
പരമ്പരാഗത കൃഷിരീതികൾ പഠന ക്ളാസ്സ്
പരമ്പരാഗത കൃഷിരീതികൾ എന്ന വിഷയവുമായി എസ്.പി.സി കേഡറ്റുകളിലേക്ക് മുൻ ഡ്രിൽ ഇൻസ്ട്രക്ടറും പ്രമുഖ കർഷകനുമായ ശ്രീ ശ്രീകുമാർ . കഥകളും കൃഷി വിജ്ഞാനവുമായി ശ്രീകുമാർ സാർ കേഡറ്റുകളിൽ കൃഷിയോടുള്ള താൽപര്യം വളർത്താൻ ശ്രമിച്ചു.
ഗാന്ധിജയന്തി ആഘോഷം 2019
മഹാത്മജിയുടെ ദീപ്തസ്മരണയിൽ 150 ചിരാതുകൾ തെളിയിച്ച് ഭാരതത്തിന്റെ ഭൂപടം മാതൃകയിൽ ക്രമീകരിച്ച് പനവൂർ പി.എച്ച്.എം.കെ .എം.വി ആന്റ് എച്ച്.എസ്.എസിലെ സ്റ്റുഡന്റ് പോലീസ് കേഡറ്റുകൾ ഒരുക്കിയ ദീപാലങ്കാരം കാണികളുടെ കണ്ണിനും മനസ്സിനും കുളിർമ്മ നൽകി.ഭാരത ജനതയുടെ മനസ്സകത്ത് പ്രിയപ്പെട്ട ബാപ്പുജിയുടെ സ്മരണകൾ എത്രകാലം കഴിഞ്ഞാലും കെടാവിളക്കായി ജ്വലിച്ചു തന്നെ നിൽകുമെന്ന സന്ദേശമാണ് ഈ ദീപാലങ്കാരത്തിലൂടെ കേഡറ്റുകൾ സമൂഹത്തിന് നൽകിയത്.ബഹുമാന്യനായ സ്കൂൾ മാനേജർ ശ്രീ മുഹ്സിൻ തിരികൊളുത്തി ഗാന്ധി ജയന്തി ആഘോഷങ്ങൾ ഉദ്ഘാടനം ചെയ്തു.തുടർന്ന് സ്കൂൾ മേധാവി ശ്രീമതി ഐ.ജി പ്രേംകല ,ഗാർഡിയൻ എസ്.പി.സി പ്രസിഡന്റ് ശ്രീ വിനോദ് കുമാർ,ഹയർ സെക്കന്ററി അധ്യാപിക ശ്രീമതി വീണ എം.ഡി ,ഡ്രിൽ ഇൻസ്ട്രക്ടർമാരായ ശ്രീ ഷിബുകുമാർ,ശ്രീമതി സ്മിത ,അധ്യാപകരായ ശ്രീമതി സന്ധ്യ,ശ്രീമതി ജയ എന്നിവരും ചിരാതുകൾ തെളിച്ചു. ശേഷം ഓരോകേഡറ്റുകളും ചിരാതുകൾ തെളിച്ചു.
ഭക്ഷ്യ സുരക്ഷാ പാഠങ്ങൾ
നമ്മുടെ ഭക്ഷ്യവിഭവങ്ങൾ നാം തന്നെ ഉല്പാദിപ്പിക്കണമെന്ന ഗാന്ധിജിയുടെ സന്ദേശത്തെ അന്വർത്ഥമാക്കി എസ്.പി.സി കേഡറ്റുകൾ 150 മരിച്ചീനിക്കമ്പുകൾ നടീൽ യജ്ഞത്തിന് പി.എച്ച്.എം.കെ.എം.വി ആന്റ് എച്ച്.എസ്.എസിൽ തുടക്കം കുറിച്ചു.പ്രമുഖ കർഷകൻ ശ്രീ.ശ്രീകുമാരൻ നായരാണ് മരിച്ചീനി കൃഷിക്ക് നേതൃത്വം നൽകുന്നത്.