സൃഷ്ടികൾ

പൂമ്പാറ്റ

പുതിയൊരു വീടെടുക്കുമ്പോൾ, മുറ്റത്തൊരു വൃത്തിയുള്ള പൂന്തോട്ടവും ,അതിലെപ്പോഴും പറന്നുകളിക്കാൻ പൂമ്പാറ്റകളും വേണമെന്ന് മകൾക്ക് നിർബന്ധമുണ്ടായിരുന്നു. " എല്ലാം കൂടി എത്രയാവും?" ഞാൻ വീടുപണിക്കാരനോട് ചോദിച്ചു. " പത്ത് നാല്പത് ലക്ഷം ... " അയാൾ പറഞ്ഞു. " ചെറിയൊരു വീടാണ് ഞാനുദ്ദേശിക്കുന്നത്. " " ആയിരിക്കാം, പക്ഷേ പൂന്തോട്ടവും പൂമ്പാറ്റകളുമൊക്കെയാവുമ്പോൾ വലിയ വിലയാവും." " പൂമ്പാറ്റകളെ വേണ്ടെന്നു വെച്ചാലോ?" " ചെലവ് പാതി കുറയും." " പൂന്തോട്ടവും...?" " പിന്നെയും പാതി." " അപ്പോൾ പത്തുലക്ഷം മതിയാവും?" " ഏറെക്കുറേ... " വീടുപണിക്കാരൻ പറഞ്ഞ കാര്യം ഞാൻ മകളോട് വിശദീകരിച്ചു. അപ്പോൾ അവൾ പറഞ്ഞു, "എനിക്കും സമ്മതമാണച്ഛാ. അച്ഛനുമമ്മയ്ക്കും ജീവിക്കാൻ അത്തരമൊരു വീട് മതിയാവും." " അച്ഛനുമമ്മയ്ക്കും ... !?" " എന്നെ വേണ്ടെന്നല്ലേ അച്ഛൻ പറഞ്ഞത് ...." "ഞാനങ്ങനെ പറഞ്ഞോ!?" " പൂമ്പാറ്റകളെ വേണ്ടെന്നുവെച്ചാൽ ചെലവ് കുറയുമെന്ന് അച്ഛൻ പറഞ്ഞതോ?" ചിറകുകൾ പോലെ പിടയ്ക്കുന്ന അവളുടെ കൺപീലികളിലേക്കു നോക്കി ഏറെനേരം ഞാനങ്ങനെ ഇരുന്നു. ഒടുവിൽ ഒരു സ്വകാര്യം പോലെ ഞാനവളോട് ചോദിച്ചു, " അപ്പോൾ പൂക്കൾക്കു മീതെ പറന്നുകളിക്കുന്ന ആ പൂമ്പാറ്റ.... അത് നീയായിരുന്നോ ?" അവൾക്ക് ചിരിയടക്കാൻ വയ്യാതായി.

സ്ത്രീ

നീറിപ്പുകഞ്ഞു മെരിഞ്ഞു-

മടുക്കളയിൽ

നോവായണയുന്ന

തിരിനാളമാണു ഞാൻ .

കുറ്റപ്പെടുത്തിയെ-

ന്നൊറ്റപ്പെടുത്തുവോ-

രുറ്റവർത്തന്നെ

നിരാലംബയാണു ഞാൻ !

ചിറകുകൾ വീശിനീ -

ലാകാശ വീഥിയിൽ

പാറിപ്പറക്കാൻ

കൊതിയ്ക്കുവോളാണു ഞാൻ

ഭൂമിയോളം ക്ഷമി-

ച്ചെന്നിട്ടും ജീവിതം

പരചൂഷണത്തിന്നു

ഇരയായി തീരുകിൽ ,

രക്ഷകരാമവതാരം

വരുമെന്ന്

കാത്തിരാന്നലതു

പാഴ്ക്കനവായിട്ടും!

അബലകളല്ല നാ-

മിനിമേൽ നമുക്കൊരു

'ആർച്ചയും' 'താൻസി'യും

'നസ്റിനു,മായിടാം !

സ്ത്രീ =യാതന ..

ഇനിയീ ഭൂമി നിശ്ചലമാകും വരെ

നാമുറങ്ങണം , ഒടുവിൽ

മൗനത്തിന്റെ ഗർഭപാത്രത്തിൽ

ഉയിർത്തെഴുന്നേൽക്കണം .

ജനിച്ച തെറ്റിന് കുരിശു ചുമക്കണം .

പതറിയ പാദങ്ങളുടെ ജീവിതം പോണം

ലക്ഷ്യത്തിലെത്താൻ ദീർഘദൂരമേറണം

കൊഴിഞ്ഞ സന്ധ്യകളിലെ അപ്രതികളുടെ

രുധിരാമൃതം ആവോളം കോരിക്കുടിക്കണം .

പ്രകടനങ്ങളുടെ പ്രഹസനങ്ങളിൽ

പകച്ചുനിൽക്കാൻ നിഴൽ പോലെ കൂട്ടിനുണ്ടാവണം

എങ്കിലും ഓരോ അണുവും മന്ത്രിക്കുന്നു ഇന്നും ;

" നഃസ്ത്രീ സ്വാതന്ത്രമർഹതീം.......!

നീ..

പറയാൻ മറന്ന

പങ്കിടാൻ മറന്ന സ്നേഹം

ഹൃദയത്തിനൊരു

വിങ്ങലായ് മാറവേ ...

പ്രണയം പൂത്തിറങ്ങിയ

ഇടവഴികൾ മൂകമായ് മാറവേ

മഞ്ഞുമൂടിയ പൂക്കൾക്കിടയിലേക്ക്

നിന്റെ രൂപവും

മാഞ്ഞുപോകുന്നു .