നൊച്ചാട് എച്ച്. എസ്സ്.എസ്സ്./ഹൈസ്കൂൾ

Schoolwiki സംരംഭത്തിൽ നിന്ന്
സ്കൂളിനെക്കുറിച്ച്സൗകര്യങ്ങൾപ്രവർത്തനങ്ങൾഹൈസ്കൂൾഹയർസെക്കന്ററിചരിത്രംഅംഗീകാരങ്ങൾ

തിരികെ വിദ്യാലയത്തിലേക്ക്:

പതിനെട്ട് മാസത്തിലധികം നീണ്ട അടച്ചിടലിനൊടുവിൽ സ്‍കൂളങ്കണത്തിൽ ആഹ്ലാദാരവമുണർത്തി 2020 നവംബർ ഒന്നിന്, കേരളപ്പിറവി ദിനത്തിൽ പ്രവേശനോൽസവത്തോടെ സ്‍കൂൾ അദ്ധ്യയനത്തിനായി തുറന്നു. വിദ്യാർത്ഥികളെ വരവേൽക്കാൻ അധ്യാപക രക്ഷാകർതൃ സമിതിയും തദ്ദേശസ്വയംഭരണ സ്ഥാപനങ്ങളും കുറേ ദിവസമായി പ്രയത്നിച്ച് കൊണ്ടിരിക്കുകയായിരുന്നു. സ്‍കൂൾ തല പ്രവേശനോൽസവം വളരെ ഗംഭീരമായി നടന്നു. ഒന്നരവർഷത്തിനു ശേഷം കൂട്ടുകാരെയും അധ്യാപകരെയും നേരിൽ കണ്ടതിന്റെ സന്തോഷം കുട്ടികളുടെ മുഖത്ത് കളിയാടുമ്പോൾ, മധുരവും സമ്മാനങ്ങളും നൽകി കരുതലോടെ ചേർത്തുനിർത്തി സാനിറ്റൈസറും തെർമൽസ്‍കാനറുമായി അദ്ധ്യാപകരും രക്ഷാകർതൃ സമിതിയും കുട്ടികളെ സ്‍കൂളിലേക്കാനയിച്ചു. കോവിഡ് മാനദണ്ഡങ്ങൾ പാലിച്ച് കൊണ്ട് 50%വിദ്യാർത്ഥികളാണ് ആദ്യ ദിനങ്ങളിൽ സ്‍കൂളിലെത്തിയിരുന്നത്. ബയോബബിൾ സംവിധാനത്തിൽ ക്ലാസ്‍സുകൾ ക്രമീകരിച്ച് ഉച്ചവരെയായിരുന്നു സ്‍കൂൾ പ്രവർത്തനം മുന്നോട്ടു പോയിരുന്നത്. കോവിഡ് കാല വിരസതയ്‍ക്കും പഠനരംഗത്തെ അനിശ്ചിതാവസ്ഥയ്‍ക്കും ശേഷം പള്ളിക്കൂട വാതിലുകൾ തുറക്കപ്പെട്ടെങ്കിലും അധ്യയനത്തിന്റെ ഗൗരവം തിരിച്ചറിയാൻ അത്രമേൽ കുട്ടികളുടെ നിഷ്‍കളങ്കതയ്‍ക്ക് കഴിഞ്ഞിരുന്നില്ല. എങ്കിലും നീണ്ട കുറെ നാളുകൾ സ്‍കൂൾ മുറ്റത്ത് നിന്നുമകന്ന്; മൊബൈൽ ഫോൺ സ്ക്രീനുകളെ അധ്യാപകരായി കണ്ടുകൊണ്ടുള്ള കുട്ടികളുടെ ശീലങ്ങളെ മാറ്റി, അവരെ യാഥാർത്ഥ്യത്തിന്റെ അധ്യയ ദിനങ്ങളിലേക്ക് തിരികെ കൊണ്ടുവരാൻ എന്തൊക്കെ ചെയ്യാൻ  കഴിയുമെന്നതിന്റെ അടിസ്ഥാനത്തിൽ കൃത്യമായ പദ്ധതികളാവിഷ്‍കരിച്ച് പ്രശ്‍ന പരിഹാര പ്രവർത്തനങ്ങളുമായി അധ്യാപകർ മുന്നോട്ടു പോയിക്കൊണ്ടിരിക്കുന്നു. ഊഷ്‍മളമായ അന്തരീക്ഷത്തിലേക്ക് കുട്ടികളുടെ മാനസികാവസ്ഥയെ എത്തിക്കാനുള്ള ഭഗീരഥ പ്രയത്നത്തിലാണ് രക്ഷിതാക്കൾക്കൊപ്പം അധ്യാപകരും. കോവിഡ് 19 മഹാമാരി ഉയർത്തിയ പ്രതിസന്ധികളെയെല്ലാം അതിജീവിച്ച് ആത്മ വിശ്വാസത്തോടെയും ആഹ്ലാദത്തോടെയും തിരികെ വിദ്യാലയത്തിലെത്തിയ മുഴുവൻ കുട്ടികളും കളിച്ചും ചിരിച്ചും കൂട്ട് കൂടാതെ പഠിച്ചും സിഗ്‌നൽ മുറിയാത്ത ക്ലാസ്‍സ് മുറികളിൽ പൂമ്പാറ്റകളെപ്പോലെ ചിറകുകൾ വീശി പറക്കാനുള്ള ശ്രമത്തിലാണ്.