തിരുമൂലവിലാസം യു.പി.എസ്./ചരിത്രം
1920 മെയ് 18 ന് തിരുമൂലപുരം ബാലികാമഠം സ്കൂൾ തുടങ്ങുന്നതിനു മുൻപുതന്നെ സിസ്റ്റേഴ്സും ഓക്സ്ഫോർഡ് യൂണിവേഴ്സിറ്റിയിൽ നിന്നും ബിരുദം സമ്പാദിച്ച എ. ഹോംസ് പി ആർ ബ്രുക്ക്സ്മിത്ത് എന്നിവരും അടുത്തുള്ള വീടുകളിൽ താമസിച്ചുകൊണ്ട് സ്കൂൾ പ്രവർത്തനങ്ങളിലും കുട്ടികളുടെ കാര്യങ്ങളിലും ശ്രദ്ധിച്ചിരുന്നു. ദൈവദാസൻ മാർ ഇവാനിയോസ് പിതാവിന്റെ ധീരമായ കാൽവെയ്പ്പും ത്യാഗ സമ്പന്നമായ ജീവിത സമർപ്പണവും ഇല്ലായിരുന്നുവെങ്കിൽ തിരുമൂലപുരത്ത് ബാലികാമഠം സ്കൂൾ ഉണ്ടാവുമായിരുന്നില്ല.
അടുത്ത യാത്ര തിരുമുലവിലാസത്തിലേക്ക് തിരിയുകയാണ്. ബാലികാമഠം സ്കൂൾ വളപ്പിൽ ചെങ്ങന്നൂർ കാരൻ ചാണ്ടി സാർ ഒരു ചെറിയ പ്രൈമറി സ്കൂൾ നടത്തിയിരുന്നു. ആ സ്കൂൾ മഠത്തിനോട് ചേർന്ന് ഒരു താൽക്കാലിക ഷെഡിലേക്ക് മാറ്റി. അതിന്റെ ക്രമീകരണങ്ങൾ പോളച്ചിറക്കൽ പെരുമ്പള്ളികാട്ട് പി കെ എബ്രഹാം തരകനാണ് നിർവഹിച്ചത്. പിന്നീട് മഠത്തിലേക്ക് മാറ്റിയ ഈ സ്കൂളിന്റെ ചുമതല സിസ്റ്റേഴ്സ് സിനെ ദൈവദാസൻ മാർ ഇവാനിയോസ് പിതാവ് ഏൽപ്പിച്ചു. 'നല്ലിടയൻ സ്കൂൾ' എന്നാണ് ഈ സ്കൂൾഅറിയപ്പെട്ടിരുന്നത്. ചെങ്ങന്നൂർ കൊട്ടാരത്തിലെ ചാണ്ടി സാർ ആയിരുന്നു പ്രഥമാധ്യാപകൻ. സാമ്പത്തികമായി പിന്നോക്കം നിൽക്കുന്ന വരും അ ക്രൈസ്തവരും ആയ കുട്ടികളായിരുന്നു പഠിതാക്കൾ.ജാതിവ്യവസ്ഥ നിലനിന്നിരുന്ന ആ കാലത്ത് വിദ്യാഭ്യാസം നിലച്ചിരുന്നതായ ഒരു ജനവിഭാഗത്തെ സമൂഹത്തിന്റെ മുഖ്യ ധാരയിൽ എത്തിക്കുക എന്ന ലക്ഷ്യമായിരുന്നു അഭിവന്ദ്യ പിതാവിന് ഉണ്ടായിരുന്നത്. താഴ്ന്ന ജീവിത നിലവാരത്തിൽ ജീവിച്ചിരുന്ന ആളുകളുടെ കുടിലുകൾ സന്ദർശിച്ച് അവരെബോധവൽക്കരിച്ച് അവരുടെ കുട്ടികൾക്ക് പ്രാരംഭ വിദ്യാഭ്യാസം നൽകാൻ മാതാപിതാക്കൾക്ക് പ്രചോദനം നൽകിയത് അന്നത്തെ സന്യാസിനികൾ ആയിരുന്നു. അതുകൊണ്ട് നല്ലിടയൻ സ്കൂളിന് 'പുലയ പള്ളിക്കൂടം' എന്ന ഒരു അപരനാമം കൂടി സമൂഹം ചാർത്തി കൊടുത്തിരുന്നു.
ഓർത്തഡോക്സ് സഭാ വിഭാഗത്തിൽ നിന്നും 1930 ൽ കത്തോലിക്കാസഭയുമാ യുള്ള പുനരൈക്യ ത്തിനു ശേഷം സിസ്റ്റേഴ്സ് ബാലികാമഠം സ്കൂളിലേക്ക് പോയിട്ടില്ല. തങ്ങളെ ഏൽപ്പിച്ച നല്ലിടയൻ സ്കൂളിന്റെ വളർച്ചയിൽ ശ്രദ്ധ പതിപ്പിച്ചു. സിസ്റ്റേഴ്സിന്റെ ശ്രമഫലമായി ഇത് ഒരു യുപിസ്കൂൾ ആയി 1939ൽ ഉയർത്തപ്പെട്ടു. നാടുഭരിച്ചിരുന്ന ശ്രീമൂലം തിരുനാൾ മഹാരാജാവിന്റെ ബഹുമാനാർത്ഥം "ശ്രീമൂല വിലാസം" യു പി സ്കൂൾ എന്ന പേരുണ്ടായി. കാലാന്തരത്തിൽ അത് ലോപിച്ച് തിരുമൂല വിലാസം എന്നായി. ഇന്ന് ബഥനി സിസ്റ്റേഴ്സ്എഡ്യുക്കേഷണൽ ട്രസ്റ്റിന്റെ നേതൃത്വത്തിൽ മുന്നേറുന്ന ഏറ്റവും കൂടുതൽ കുട്ടികൾ പഠിക്കുന്ന തിരുമുലവിലാസം യു പി സ്കൂൾ സബ്ജില്ലയിലെ ഒരു മികച്ച സ്കൂളായി പരിലസിക്കുന്നു എന്നത് വളരെ അഭിമാനത്തോടെ പ്രസ്താവിക്കട്ടെ. എല്ലാതലത്തിലും ഈ സ്കൂൾ മികവുറ്റതാണ്. അക്കാദമിക രംഗത്തെ ഉന്നത വിജയം, കലാകായിക മേളകളിലെ മികവ്, പാഠ്യപാഠ്യേതര രംഗത്തെ മികവ്, വിവിധ ക്ലബ്ബുകളുടെ പ്രവർത്തനം, സ്മാർട്ട് ക്ലാസ് റൂമുകൾ, കമ്പ്യൂട്ടർ അധിഷ്ഠിത വിദ്യാഭ്യാസം, മികച്ച ലൈബ്രറി, യോഗ പരിശീലനം, സ്കൂൾ ബസുകൾ, ബോർഡിംഗ് സൗകര്യം........ ഇങ്ങനെ വിവിധ തലങ്ങളിൽ ഈ സ്കൂൾ ഉന്നത നിലവാരം പുലർത്തുന്നു. അധ്യയന നിലവാരത്തോടൊപ്പം കുട്ടികളുടെ സ്വഭാവ രൂപീകരണത്തിലും അച്ചടക്കവും സന്മാർഗ ബോധവുമുള്ള കുഞ്ഞുങ്ങളെ രൂപീകരിക്കുന്നതിലും അധ്യാപകർ ബദ്ധശ്രദ്ധരാണ്.
2006ൽ പത്തനംതിട്ട ജില്ലയിലെ മികച്ച സ്കൂളിനുള്ള അവാർഡും ഈ സ്കൂളിന് ലഭിക്കുകയുണ്ടായി. ഈ സ്കൂളിലെ ലൈബ്രറി ജില്ലയിലെ ഏറ്റവും നല്ല ലൈബ്രറി എന്ന അംഗീകാരവും നേടിയെടുത്തു. ഇങ്ങനെ എല്ലാതലത്തിലും ഈ സ്കൂൾ മുൻപന്തിയിൽ നിൽക്കുന്നുവെന്നത് അഭിമാനാർഹമായ വസ്തുതയാണ്. 2020 മെയ് മാസത്തിൽ തിരുമുല വിലാസം യു പി സ്കൂൾ അതിന്റെ നൂറാം ജന്മദിനം ആഘോഷിച്ചു. മൺമറഞ്ഞവരും ജീവിച്ചിരിക്കുന്നവരുമായ പ്രതിഭാസമ്പന്നരായ ഒരു അധ്യാപക സമൂഹം ഈ വിദ്യാലയത്തിലെ സമ്പത്താണ്. അവരുടെ ത്യാഗോജ്വലമായ ജീവിത സമർപ്പണം ആണ് ഈ ചരിത്രത്തിന് പിന്നിലുള്ളത്. കലാകായിക സാംസ്കാരിക രാഷ്ട്രീയ വിദ്യാഭ്യാസ മേഖലകളിൽ പ്രശസ്തരായ ധാരാളം വ്യക്തികളെ വാർത്തെടുത്തതിൽ ഈ വിദ്യാലയത്തിന്റെ പങ്ക് ശ്ലാഘനീയം ആണ്. ശ്രീ എം ജി സോമൻ, ശ്രീ തിരുമൂലപുരംനാരായണൻ തുടങ്ങിയവർ ഈ ശ്രേണിയിൽ പെടുന്നു.