ഗവ വി എച്ച് എസ് പുത്തൂർ/ചരിത്രം

വിദ്യാലയചരിത്രം

ഇരുപതാം നൂറ്റാണ്ടിന്റെ ആദ്യദശകങ്ങളിൽ നിലവിൽ വന്ന പുത്തൂർ പഞ്ചായത്തിന്റെ കിഴക്കൻ മേഖലകൾ ഭൂരിഭാഗവും വനപ്രദേശങ്ങളും കൃഷിയിടങ്ങളുമാണ് .വനപ്രദേശങ്ങൾ പശ്ചിമഘട്ടത്തോട് ബന്ധപെട്ടു കിടക്കുന്നു ഫലഭൂയിഷ്ഠമായ ഈ മണ്ണിൽ റബര് ,മലഞ്ചരക്കുകൾ ,പച്ചക്കറികൾ എന്നിവ കൃഷി ചെയ്യുന്നു. സ്കൂളിന് അടുത്ത് കൂടി ഒഴുകുന്ന മണലിപ്പുഴയുടെ തീരപ്രദേശങ്ങൾ സമതലങ്ങളാണ് .ഇവിടുത്തെ ജനങ്ങളിൽ അധികവും കൃഷിക്കാരായിരുന്നു.മഹാത്മാഗാന്ധിയുടെ ഗ്രാമോദ്ധാരണത്തിന്റെ ഭാഗമായ ഖാദി യൂണിറ്റുകൾ ഈ പഞ്ചായത്തിൽ നിലവിൽ വന്നു.നെയ്തു പരിശീലനത്തിന് വേണ്ടി ആരംഭിച്ച ചെറിയൊരു സംരംഭം പടിപടിയായി ഉയർന്ന് വളർന്നു പന്തലിച്ചതാണ് ഇന്നത്തെ ഈ വിദ്യാലയം .

പുത്തൂർ സെന്റ് തോമസ് പള്ളിക്കു സമീപം മണൽ എഴുത്തും നെയ്ത്തും പരിശീലിപ്പിച്ചിരുന്ന ഒരു ചെറിയ സ്ഥാപനമാണ് ഇന്നത്തെ വിദ്യാലയമായി മാറിയത് .അക്കാലത്ത ആശാൻകളരികൾ ആയിരുന്നു പ്രധാന വിദ്യാകേന്ദ്രങ്ങൾ .മണലിൽ എഴുതിയാണ് അക്കാലത്ത് അക്ഷരജ്ഞാനം നേടിയിരുന്നത് .അന്ന് മണൽ എഴുത്തും നെയ്‌ത്തും പരിശീലിപ്പിച്ചിരുന്ന ഈ സ്ഥാപനം കരിമ്പറ്റ രാഘവമേനോന്റെ പ്രത്യേക താല്പര്യത്തിൽ തുടങ്ങിയതാണ് .പിന്നീട് ശ്രീ അവണൂർ ശങ്കരൻ നായർ സൗജന്യമായി നൽകിയ മൂന്നര ഏക്കർ സ്ഥലത്തേക്ക് ഈ സ്ഥാപനം മാറ്റി.വിദ്യാലയമാക്കി മാറ്റാനുള്ള യുവാക്കളുടെ അശ്രാന്ത പരിശ്രമത്തിന്റെ ഫലമായി ശ്രീ പൊറ്റെക്കാട്ട് ശങ്കുണ്ണിയുടെ പേരിൽ ഒരു അപ്പർ പ്രൈമറി വിദ്യാലയം അനുവദിച്ചു.

ഒരു സർക്കാർ വിദ്യാലയത്തിന് വേണ്ടിയുള്ള പോരാട്ടങ്ങൾ പിന്നെയും നടന്നു.അന്നത്തെ എ. ഇ. ഒ ആയിരുന്ന വൈലോപ്പിള്ളി ശ്രീധരമേനോന്റെ ശ്രമത്തിൽ ഏതൊരു സർക്കാർ വിദ്യാലയമാക്കിയെടുത്തു.

തുടക്കത്തിൽ അപ്പർ പ്രൈമറി വിദ്യാലയമായിരുന്ന ഇത് 1962 ൽ ഹൈ സ്കൂൾ വിദ്യാലയമായി അപ്ഗ്രേഡ് ചെയ്തു.1965 ൽ ആണ് ആദ്യത്തെ എസ് എസ് എൽ സി ബാച്ച് പരീക്ഷ എഴുതിയത്.പരമാവധി പഠനസൗകര്യങ്ങൾ ചെയ്തുകൊടുക്കാനുള്ള പി ടി എ യുടെ അതീവ താല്പര്യവും അതെല്ലാം അതാതു സമയങ്ങളിൽ പ്രാവർത്തികമാക്കാനുള്ള പ്രിൻസിപ്പലിന്റെ അത്യുത്സാഹവും അദ്ധ്യാപകരുടെ അക്ഷീണപ്രയത്‌നവും നാട്ടുകാരുടെ സകലവിധത്തിലുള്ള സഹകരണവും ചേർന്നപ്പോൾ അഭിവൃദ്ധിയുടെ പടവുകളിലേക്ക് എത്തിച്ചേരാൻ ഈ വിദ്യാലയത്തിന് സാധിച്ചു.ഇന്ന് യു പി ,ഹൈസ്കൂൾ,ഹയർ സെക്കന്ററി,വി എച്ച് എസ് സി എന്നിവ ഉൾപ്പെട്ട പുത്തൂർ പഞ്ചായത്തിലെ ഏക സർക്കാർ സ്കൂൾ ആണിത്.