ഗവ എച്ച് എസ് എസ് പട്ടിക്കാട്/എന്റെ ഗ്രാമം
പട്ടിക്കാട്
കേരളത്തിലെ തൃശ്ശൂർ ജില്ലയിലെ ഒരു ഗ്രാമമാണ് പട്ടിക്കാട്. പാണഞ്ചേരി ഗ്രാമപഞ്ചായത്തിന്റെ ഭാഗമാണിത്. തൃശ്ശൂർ നഗരത്തിൽ നിന്ന് 13 കിലോമീറ്റർ വടക്ക് കിഴക്കും പീച്ചി ഡാമിൽ നിന്ന് 7 കിലോമീറ്റർ വടക്കും മാറിയാണ് പട്ടിക്കാട് സ്ഥിതി ചെയ്യുന്നത്.
വെള്ളാനിമലയ്ക്കും പീച്ചിക്കാടുകൾക്കും ഇടയിൽ വ്യാപിച്ചു കിടക്കുന്ന ഗ്രാമമാണ് പട്ടിക്കാട്. ഗിരിവർഗ്ഗക്കാരായ മലയൻമാരാണ് ഇവിടത്തെ ആദ്യകാല ജനവിഭാഗം. കേരളത്തിൻടെ പലഭാഗത്ത് നിന്നായി കുടിയേറി പാർത്ത ജനങ്ങളാണ് പട്ടിക്കാടിന്റെ വള൪ച്ചയ്ക്ക് തുടക്കം കുറിച്ചത്.
വലിയവീട്ടിൽ കുഞ്ചപ്പ൯പണിക്കരുടെ നേതൃത്വത്തിൽ ചെമ്പൂത്രയിൽ നടന്നിരുന്ന അനൗപചാരിക വിദ്യാഭ്യാസത്തിൽ നിന്നാണ് ഗ്രാമീണ൪ അറിവി൯ടെ നെയ്ത്തിരി കൊളുത്തിയത്.കുഞ്ചപ്പ൯പണിക്കരുടെ കളരി 1905ൽ പട്ടിക്കാട് കൽദായ സുറിയാനി പള്ളിയോട് ചേ൪ന്ന വൈക്കോൽ ഷെഡ്ഢിലേയ്ക്ക് മാറ്റി സ്ഥാപിച്ചു. കൊച്ചി രാജ്യത്ത് സാ൪വത്രിക വിദ്യാഭ്യാസം പ്രചരിച്ചതോടെ രാജ്യമെമ്പാടും സ൪ക്കാ൪ മലയാള പാഠശാല' എന്ന പേരിൽ പ്രൈമറി സ്കൂളുകൾ ആരംഭിച്ചു.അക്കൂട്ടത്തിൽ 1909 -ൽ പട്ടിക്കാടും ഒരു സ്കുളിന് അംഗീകാരം ലഭിച്ചു. സ൪ക്കാ൪ വക സ്ഥലമോ കെട്ടിടമോ ഇല്ലാതിരുന്നതിനാൽ കൽദായ പള്ളിയോട് ചേ൪ന്ന് നടത്തിയിരുന്ന കുഞ്ചപ്പ൯പണിക്കരുടെ പള്ളിക്കൂടത്തെ മലയാള പാഠശാലയാക്കി.
തൃശ്ശൂർ നഗരത്തിന് ജലം നൽകുന്ന പീച്ചി ഡാം പാണഞ്ചേരി പഞ്ചായത്തിലാണ്. ദേശീയപാത 544 ഈ ഗ്രാമത്തിലൂടെ കടന്നുപോകുന്നു. ചെമ്പൂത്ര കൊടുങ്ങല്ലൂർക്കാവ് ഭഗവതി ക്ഷേത്രം ഇവിടത്തെ ഒരു പ്രധാന ആരാധന കേന്ദ്രമാണ്. ജി.എച്ച്.എസ്.എസ്. പട്ടിക്കാട് ഇവിടെയാണ് സ്ഥിതി ചെയ്യുന്നത്.
പേരിന് പറയാനുള്ളത്
ബിസി പത്താം നൂറ്റാണ്ടു വരെ ചേരസാമ്രാജ്യം തമിഴകത്തിന്റെ ഭാഗമായിരുന്നു. കൊടും തമിഴ് ആയിരുന്നു സംസാരഭാഷ. പാണർ ആയിരുന്നു ഇവിടുത്തെ പ്രധാന വർഗ്ഗം. ചേരി എന്നാൽ തമിഴിൽ ഊര് എന്നാണ് അർത്ഥം. പാണന്മാരുടെ ചേരി (പാണ മാരുടെ ഊര്) എന്നതിൽ നിന്നാണ് പാണഞ്ചേരി എന്ന സ്ഥലനാമത്തിന്റെ ഉദയം എന്നാണ് പ്രധാന വാദം. കുതിരാൻ ആസ്ഥാനമാക്കി വാണിരുന്ന ഗോത്രത്തിലെ ഗണാതി പനായ ബാണന്റെ കോട്ടയിൽ നിന്നാണ് പാണഞ്ചേരി എന്ന പേര് വന്നതെന്നും പറയപ്പെടുന്നു.
കൊച്ചി രാജ്യത്തെ ഭരണസമ്പ്രദായം
ജനഷേമത്തിന് പ്രാധാന്യം കൊടുത്തിരുന്ന കൊച്ചി രാജാവ് പഞ്ചായത്തുകൾ രൂപീകരിച്ചു. 1914 ലെ പാണഞ്ചേരി പഞ്ചായത്തിലെ ആദ്യ പ്രസിഡന്റ് നൊട്ടത്ത് ശങ്കര മേനോൻ ആയിരുന്നു. പ്രഖ്യാത വിഷഹാരിയായിരുന്ന ചെമ്പൂത്ര മാളിയേക്കൽ കർത്തായുടെ വീട്ടു പടിക്കലെ ഒരു വഴിവിളക്ക് ഇന്നും ചരിത്ര സ്മാരകമായി നിലനിൽക്കുന്നുണ്ട്. രാജ്യാധിർത്തിയായ വാണിയൻ പാറയിൽ കൊച്ചി മലബാർ രാജ്യങ്ങളുടെ ചുങ്കപുരകൾ ഉണ്ടായിരുന്നു. കർഷകർക്ക് ആവശ്യമായ നിർദ്ദേശങ്ങൾ കൊടുക്കാൻ പഞ്ചായത്തിനെ ചുമതലപ്പെടുത്തിയതിനൊപ്പം കൃഷിക്ക് ആവശ്യമായ കുളങ്ങളും ചിറകളും സംരക്ഷിച്ചിരുന്നു.
അതിർത്തി
വടക്കേ അക്ഷാംശം10 32' -10 35'നും കിഴക്കേ രേഖാംശം76 17'-76 28'നും ഇടയിലാണ് പാണഞ്ചേരി പഞ്ചായത്ത് സ്ഥിതി ചെയ്യുന്നത്. തൃശൂർ ജില്ലയുടെയും പാലക്കാട് ജില്ലയുടെയും അതിർത്തി പ്രദേശമാണിത്.
ഭൂപ്രകൃതി
പശ്‌ചിമഘട്ട മലനിരകൾക്കുള്ളിലായി കുന്നുകളും താഴ് വരകളും നിറഞ്ഞതാണ് പാണഞ്ചേരി പഞ്ചായത്ത്. ഈ പഞ്ചായത്തിന്റെ പകുതിയോളം പീച്ചി റിസർവോയറും സംരക്ഷിത വനമേഖലയും ഉൾക്കൊള്ളുന്ന മലയോര ഗ്രാമമാണിത്.ഭൂവിനിയോഗ ബോർഡിൻ്റെ കാർഷിക മേഖല തരംതിരിവിൽ ഈ പഞ്ചായത്ത് മലനാടിലാണ് ഉൾപ്പെട്ടിരിക്കുന്നത്.ഭൂപ്രകൃതിയനുസരിച്ച് ഈ പ്രദേശത്തെ മൂന്നായി തരംതിരിക്കാം ഉയർന്ന മലമ്പ്രദേശം (പശ്ചിമഘട്ടം ),കുന്നുകൾ,താഴ് വരകൾ എന്നിങ്ങനെ.
ചിത്രശാല
വിദ്യാഭ്യാസ ചരിത്രത്തിലൂടെ ...
പഴയ കൊച്ചി രാജ്യത്തിൻറെ ഭാഗമായിരുന്ന, അധികഭാഗവും വനപ്രദേശങ്ങളായിരുന്ന,ഭിന്ന ജാതി മതസ്ഥരടങ്ങിയ, പാണഞ്ചേരിയിലെ ജനതയിൽ പരിജ്ഞാനം ഉള്ളവർ കുടിപള്ളിക്കൂടങ്ങൾ, ആശാൻ കളരികൾ, പിതൃജനങ്ങൾ എന്നിവയിലൂടെ അറിവ് പകർന്നു കൊടുത്തിരുന്നു.
ആധുനിക വിദ്യാഭ്യാസം സ്റ്റേറ്റിന്റെ കടമയാണെന്ന് പ്രഖ്യാപിച്ചുകൊണ്ട് കൊച്ചിരാജ് സർക്കാർ 1818ൽ 33 വിദ്യാലയങ്ങൾ സ്ഥാപിച്ചതിന്റെ തുടർച്ചയായി 1908ൽ പട്ടിക്കാട് ആദ്യത്തെ മലയാളം എൽ പി സ്കൂൾ സ്ഥാപിച്ചു. കൽദായപള്ളി വക കെട്ടിടത്തിലാണ് ആദ്യം പ്രവർത്തിച്ചിരുന്നത്.
അന്നുമുതൽ തന്നെ ജാതിമത വ്യത്യാസമില്ലാതെ എല്ലാവരും സ്കൂളിൽ ചേർന്നിരുന്നു.കുടിയേറ്റക്കാർ കൂടുകയും പൊതുസ്ഥാപനങ്ങൾ ശക്തിപ്പെടുകയും ചെയ്തതോടെ 1950കളിൽ ചെമ്പൂത്ര ,മുടിക്കോട് ചുവന്ന മണ്ണ് , വാണിയംപാറ ,കണ്ണാറ പീച്ചി എന്നിവിടങ്ങളിൽ എൽപിയും യുപിയും സ്ഥാപിക്കപ്പെട്ടു.1964 ൽ 'പട്ടിക്കാട് സ്കൂളും 1974 ൽ പീച്ചി സ്കൂളും ഹൈസ്കൂളുകൾ ആക്കി. രണ്ട് ഗവൺമെൻറ് ഹയർ സെക്കൻഡറി സ്കൂളുകളുൾപ്പെടെ എയ്ഡഡ് , സിബി എസ് ഇ സ്കൂളുകളും ധാരാളം ട്യൂഷൻ സെൻ്ററുകളും ഇന്ന് ഈ പഞ്ചയത്തിലുണ്ട്.
ചിത്രശാല
പാണഞ്ചേരി പഞ്ചായത്തിലെ പ്രധാന പൊതുസ്ഥാപനങ്ങൾ
- KERI (കേരള എൻജിനീയറിങ് റിസർച്ച് ഇൻസ്റ്റിറ്റ്യൂട്ട് ) പീച്ചി
- KFRI (കേരള ഫോറസ്റ്റ് റിസർച്ച് ഇൻസ്റ്റിറ്റ്യൂട്ട് ) പീച്ചി
- വാഴ ഗവേഷണ കേന്ദ്രം , കണ്ണാറ
- വിത്തു സംരക്ഷണം കേന്ദ്രം , കണ്ണാറ
- ബനാന ഹണി പാർക്ക് , കണ്ണാറ
- ഗവൺമെൻ്റ് ITI പീച്ചി
- ജി എച്ച് എസ് എസ് പട്ടിക്കാട്
- ജി എച്ച് എസ് എസ് പീച്ചി
പാണഞ്ചേരി പഞ്ചായത്തിലെ പ്രധാന വിനോദസഞ്ചാരകേന്ദ്രങ്ങൾ
- പീച്ചി ഡാം
- ഒരപ്പൻ കെട്ട്
- പട്ടത്തിപ്പാറ