ഇത് കൊറോണക്കാലം
മാനവരാശിയെ ഞെട്ടിച്ചകാലം
സമ്പത്തധികാരമഹങ്കാരമെല്ലാം
നിഷ്പ്രഭമായൊരുനല്ലകാലം
ദൈവങ്ങളെല്ലാം ഭയന്നകാലം
രോഗങ്ങൾക്കെല്ലാമവധിക്കാലം
ആഡംബരമെല്ലാമഹങ്കാരമെന്ന്
തിരിച്ചറിഞ്ഞ കാലം
ഇത് കൊറോണക്കാലം
ആഘോഷമെല്ലാം ധൂർത്തായിരുന്നെന്നു
കണ്ണുതുറപ്പിച്ചകാലം
തിരക്കുകളെല്ലാംവ്യർത്ഥമാണെന്നതു
ബോധ്യപ്പെടുത്തിയകാലം
പാർക്കുകൾ കൊട്ടക നക്ഷത്രഹോട്ടലും
വീട്ടിലൊതുങ്ങിയകാലം
സ്നേഹത്തിൻ കരുതലിൻ സാഹോദര്യത്തിൻ
പുഴ നിറഞ്ഞൊഴുകിയകാലം
ഇത് കൊറോണക്കാലം
ലോകപൊലീസ് പേടികൊണ്ടു
വിറങ്ങലിച്ച കാലം
കൊച്ചുകേരളത്തിൻ മഹിമ
ലോകംവാഴ്ത്തിയ കാലം
ഭയന്നിടാതെ ജാഗരൂകരാകുവാൻ
നാംപഠിച്ച കാലം
ഒപ്പമല്ല മുന്നിലെന്ന്
ബോധ്യമായകാലം
ഇത് കൊറോണക്കാലം
