ഗവ. മോഡൽ ബോയ്സ് ഹയർ സെക്കണ്ടറി സ്കൂൾ, ഹരിപ്പാട്

Schoolwiki സംരംഭത്തിൽ നിന്ന്
15:50, 21 ഒക്ടോബർ 2020-നു ഉണ്ടായിരുന്ന രൂപം സൃഷ്ടിച്ചത്:- GBHSS HARIPAD (സംവാദം | സംഭാവനകൾ) (ADD NAME OF FORMER HM)
ഗവ. മോഡൽ ബോയ്സ് ഹയർ സെക്കണ്ടറി സ്കൂൾ, ഹരിപ്പാട്
GMBHSS.jpg
വിലാസം
ഹരിപ്പാട്

ഹരിപ്പാട് പി.ഒ, ,
ആലപ്പുഴ
,
690514
സ്ഥാപിതം01 - 06 - 1862
വിവരങ്ങൾ
ഫോൺ0479 241 2722
ഇമെയിൽ35027alappuzha@gmail.com
വെബ്‍സൈറ്റ്
കോഡുകൾ
സ്കൂൾ കോഡ്35027 (സമേതം)
വിദ്യാഭ്യാസ ഭരണസംവിധാനം
റവന്യൂ ജില്ലആലപ്പുഴ
വിദ്യാഭ്യാസ ജില്ല ആലപ്പുഴ
സ്കൂൾ ഭരണ വിഭാഗം
സ്കൂൾ വിഭാഗംപൊതു വിദ്യാലയം
പഠന വിഭാഗങ്ങൾ
എൽ.പി

യു.പി

ഹൈസ്കൂൾ
മാദ്ധ്യമംമലയാളം‌, ഇംഗ്ലീഷ്
സ്കൂൾ നേതൃത്വം
പ്രിൻസിപ്പൽബി. ഹരികുമാർ
പ്രധാന അദ്ധ്യാപകൻശശികുമാർ എസ്
അവസാനം തിരുത്തിയത്
21-10-2020GBHSS HARIPAD
ക്ലബ്ബുകൾ
പ്രോജക്ടുകൾ
തിരികെ വിദ്യാലയത്തിലേക്ക്
എന്റെ ഗ്രാമം
നാടോടി വിജ്ഞാനകോശം
സ്കൂൾ പത്രം
അക്ഷരവൃക്ഷം
ഓർമ്മക്കുറിപ്പുകൾ
എന്റെ വിദ്യാലയം
Say No To Drugs Campaign
ഹൈടെക് വിദ്യാലയം
കുഞ്ഞെഴുത്തുകൾ



ചരിത്രം

1862-’63 ൽ സ്ഥാപിതമായ ഈ മഹദ് വിദ്യാലയം 1949-ൽ അന്നത്തെ തിരു-കൊച്ചി മുഖ്യമന്ത്രിയായിരുന്ന പറവൂർ ടി കെ നാരായണപിള്ളയുടെ ശ്രമഫലമായി ഹൈസ്കൂൾ പദവിയിലേക്കുയർത്തപ്പെട്ടു. കേരളത്തിലാദ്യമായി ഹൈസ്കൂൾ തലത്തിൽ ഇംഗ്ലീഷ് മീഡിയം ആരംഭിച്ച് ‘ഇംഗ്ലീഷ് പള്ളിക്കൂടം’ എന്ന പേര് സമ്പാദിച്ച ഖ്യാതിയും ഈ സ്കൂളിനുണ്ട്. 1980-ൽ വിദ്യാലയം മോഡൽ സ്കൂൾ മോഡൽ പദവിയിലേക്കുയർന്നു. 1997-ൽ ആരംഭിച്ച ഹയർ സെക്കണ്ടറി കോഴ്സിൽ നിലവിൽ അഞ്ചു ബാച്ചുകളിലായി 600 വിദ്യാർത്ഥികൾ പഠിക്കുന്നു. അഞ്ചു മുതൽ പത്തു വരെ ക്ലാസുകളിലായി 386 വിദ്യാർത്ഥികളും പഠിക്കുന്നു.

ഭൗതികസൗകര്യങ്ങൾ

കാർത്തികപ്പള്ളി താലൂക്കിൽ ഹരിപ്പാട് വില്ലേജിൽ ബ്ലോക്ക് നമ്പർ 8-ൽ റീ സർവ്വേ 296-ൽ 02 ഹെക്ടർ 85 ച:മീ: ഭൂമിയിലാണ് വിദ്യാലയം സ്ഥിതി ചെയ്യുന്നത്. അപ്പർ പ്രൈമറി സ്കൂളിന് ഒരു കെട്ടിടത്തിലായി 3 ക്ലാസ് മുറികളും ഹൈസ്കൂളിന് 2 കെട്ടിടങ്ങളിലായി 8 ക്ലാസ് മുറികളും ഹയർ സെക്കണ്ടറിക്ക് 3 കെട്ടിടങ്ങളിലായി 10 ക്ലാസ് മുറികളുമുണ്ട്. ഹയർ സെക്കണ്ടറിക്ക് സസ്യശാസ്ത്രം, ജന്തു ശാസ്ത്രം, ഭൗതികശാസ്ത്രം, രസതന്ത്രം എന്നിവയ്ക്കായി ലാബുകളും, ഹൈസ്കൂളിനു ജീവശാസ്ത്രം, ഭൗതികശാസ്ത്രം ലാബുകളും ലൈബ്രറി സൗകര്യവുമുണ്ട്. അതിവിശാലമായ ഒരു കളിസ്ഥലം വിദ്യാലയത്തിനുണ്ട്.

അപ്പർ പ്രൈമറി സ്കൂളിനും ഹൈസ്കൂളിനും ഹയർ സെക്കണ്ടറിക്കും വെവ്വേറെ കമ്പ്യൂട്ടർ ലാബുകളുണ്ട്. മൂന്ന് ലാബുകളിലുമായി ഏകദേശം ഇരുപത്തിയഞ്ചോളം കമ്പ്യൂട്ടറുകളും ഹൈസ്കൂൾ, ഹയർ സെക്കണ്ടറി സ്കൂൾ കമ്പ്യൂട്ടർ ലാബുകളിൽ ഒപ്റ്റിക്കൽ ഫൈബർ അധിഷ്ഠിത ബ്രോഡ്ബാന്റ് ഇന്റർനെറ്റ് സൗകര്യവും ലഭ്യമാണ്. ഹയർ സെക്കണ്ടറി, ഹൈസ്കൂൾ തലങ്ങളിലെ ക്ലാസ് മുറികൾ പൂർണ്ണമായും ഹൈടെക്ക് നിലവാരമുള്ളവയാണ്.

സംസ്ഥാനത്തെ പ്രഥമ ‘ഐഡിയൽ ലാബ്’ ഉദ്ഘാടനം ഹരിപ്പാട് ഗവ. മോഡൽ ബോയ്സ് ഹയർ സെക്കണ്ടറി സ്കൂളിൽ വച്ച് നടത്തുവാൻ തീരുമാനിച്ചിരിയ്ക്കുകയാണ്. ഇതോടൊപ്പം നബാർഡ് ഫണ്ട് ഉപയോഗിച്ച് ഹയർ സെക്കണ്ടറി വിഭാഗത്തിനായി പുതുതായി നിർമ്മിച്ച ഇരുനിലക്കെട്ടിടത്തിന്റെ ഉദ്ഘാടനവും നടത്തപ്പെടുകയാണ്.

പൊതുവിദ്യാഭ്യാസ സംരക്ഷണ യജ്ഞത്തിന്റെ ഭാഗമായി വിദ്യാർത്ഥികളുടെ കഴിവുകൾ ലോക നിലവാരത്തിൽ ഉയർത്തുന്നതിനൊപ്പം പുതിയവ കണ്ടെത്തുകയും ചെയ്യുന്നതിനായി രാഷ്ട്രീയ മാദ്ധ്യമിക് ശിക്ഷാ അഭിയാനും കേരള സർക്കാർ പൊതുവിദ്യാഭ്യാസ വകുപ്പും സംസ്ഥാനത്തെ കാസർഗോഡ്, കണ്ണൂർ, പാലക്കാട്, തൃശൂർ, ആലപ്പുഴ ജില്ലകളിലെ ഓരോ സ്കൂളുകൾ തെരഞ്ഞെടുത്ത് ‘ഐഡിയൽ ലാബു’കൾ വിഭാവനം ചെയ്ത് നടപ്പിലാക്കി വരുന്നു. പരീക്ഷണ നിരീക്ഷണങ്ങളിലൂടെ പുതുതലമുറയെ ശാസ്ത്രത്തിന്റെ ലോകത്തിലേക്ക് നയിയ്ക്കുവാനും സ്വയം പഠനത്തിന്റെ വാതായനങ്ങൾ തുറന്നു കൊടുക്കുവാനും പര്യാപ്തമായ രീതിയിലാണ് ഐഡിയൽ ലാബ് സജ്ജീകരിച്ചിട്ടുള്ളത്. മറ്റു സ്കൂളുകളിലെ കുട്ടികൾക്കു കൂടി സന്ദർശിയ്ക്കുവാനും ഉപയോഗപ്പെടുത്തുവാനും തക്കവിധമാണ് ലാബ് പ്രവർത്തിയ്ക്കുക. ഇത്തരത്തിൽ ഒൻപത്, പത്ത്, പതിനൊന്ന്, പന്ത്രണ്ട് ക്ലാസ്സുകളിലെ വിദ്യാർത്ഥികൾക്ക് പ്രയോജനപ്പെടുത്താൻ കഴിയുന്ന നൂതന ലാബ് ഇന്ത്യയിലാദ്യമായി കേരളത്തിലാണ് ഒരുക്കുന്നത്. ഈ ശ്രേണിയിലെ രാജ്യത്തെ പ്രഥമ ലാബ് ഹരിപ്പാട് ഗവ. മോഡൽ ബോയ്സ് ഹയർ സെക്കണ്ടറി സ്കൂളിലാണ്.

പാഠ്യേതര പ്രവർത്തനങ്ങൾ

വിജയശതമാനം

കാലയളവ് എസ്. എസ്. എൽ. സി. ഹയർ സെക്കണ്ടറി (പ്ലസ്സ് ടു)
2007-08 98
2008-09 97
2009-10 99
2010-11 100
2011-12 100
2012-13 100
2013-14 100
2014-15 99
2015-16 100
2016-17 100
2017-18 100
2018-19 100
2019-20 100

പി. റ്റി. എ.

അധ്യാപകനും രക്ഷിതാവും പരസ്പരം അറിയുകയും വിദ്യാർഥിയുടെ പ്രവർത്തനങ്ങളിൽ ബന്ധപ്പെടുകയും ചെയ്യുക, വിദ്യാലയത്തിലെ പ്രവർത്തനങ്ങളിൽ രക്ഷകർത്താക്കൾ പൊതുവേ താത്പര്യം കാണിക്കുക, അധ്യാപകർ വിദ്യാർഥികളുടെ വീടുകൾ സന്ദർശിച്ച് രക്ഷകർത്താക്കളുമായി അടുത്ത പരിചയം സ്ഥാപിക്കുക, രക്ഷകർത്താക്കൾ ഇടയ്ക്കിടയ്ക്ക് വിദ്യാലയങ്ങൾ സന്ദർശിക്കുകയും വിദ്യാലയ പ്രവർത്തനങ്ങൾ മനസ്സിലാക്കുകയും ചെയ്യുക എന്നിവ അധ്യാപക രക്ഷാകർത്തൃ സംഘടനയുടെ പരിപാടികളിൽ ഉൾപ്പെടുന്നു. സ്കൂളിന്റെ യശസ്സ് വളർത്തുന്നതിനും നിലനിർത്തുന്നതിനും അച്ചടക്കപാലനത്തിലും പി.ടി.എ. കടപ്പെട്ടിരിക്കുന്നു. നിലവിൽ സതീശ് ആറ്റുപുറം സ്കൂൾ അധ്യാപക രക്ഷാകർത്തൃ സംഘടനയുടെ പ്രസിഡന്റായി പ്രവർത്തിയ്ക്കുന്നു.

പി റ്റി എ അംഗങ്ങൾ 2018-’19
സതീശ് ആറ്റുപുറം (പ്രസിഡന്റ്)
ശ്രീദേവി പിള്ള (വൈസ് പ്രസിഡന്റ്)
ജയകൃഷ്ണൻ
പ്രശാന്ത് കുമാർ എസ്സ് ആർ
പരമേശ്വരൻ പിള്ള
ശശികുമാർ എസ്സ്
ഹരികുമാർ
ശ്രീമോഹൻ
വിക്രമൻ പിള്ള
പ്രഭാ നമ്പൂതിരി
വിജി മേനോൻ
സുമ
അശോക് കുമാർ
പ്രഭ
ശ്രീകല ആർ

മുൻ സാരഥികൾ

സ്കൂളിന്റെ മുൻ പ്രധാനാദ്ധ്യാപകർ.

കാലയളവ് പ്രഥമാദ്ധ്യാപകൻ/പ്രഥമാദ്ധ്യാപിക
1924-1950 സി.ജി. സുബ്രഹ്മണ്യയ്യർ
1950-1951 കെ. ഗോപാലപിള്ള
1951-1952 ആർ. സുബ്രഹ്മണ്യയ്യർ
1952-1953 സി.ജി. സുബ്രഹ്മണ്യയ്യർ
1953 വി. നൈനാൻ
1953-1957 എൻ .കെ.മാധവനായിക്
1957 വി. വി.ജോൺ
1957-1960 കെ. ലക്ഷ്മിപ്പിള്ളക്കൊച്ചമ്മ
1960-1964 വി നാണുക്കുട്ടൻ നായർ
1965-1972 കെ.കെ. മാത്യു
1972-1974 കെ. ഗോദവർമരാജ
1974-1978 ത്രിവിക്രമവാര്യർ
1979-1982 എൻ പി കേശവകുറുപ്പ്
1982-1984 പി രാമചന്ദ്രൻ
1984-1989 എം ചിദംബരൻ
1989-1990 എസ് രാമചന്ദ്രൻ ഉണ്ണിത്താൻ
1990-1991 പി വര്ഗീസ്
1991-1993 ബി ശാന്തമ്മ
1993-1995 വത്സ അലക്‌സാണ്ടർ
1995-1997 സൂസമ്മ വര്ഗീസ്
1997-1999 ജി ഹരിഹരപുത്രൻ
1999-2001 എ അബ്ദുൾറഹ്മാൻ കുഞ്
2001-2002 എ മുഹമ്മദ് കുഞ്
2002-2004 എ കൃഷ്ണകുമാരി
2004-2005 എം തുളസി
2005-12/2005 പി എസ് ജീജാഭായ്
12/2005-2006 യു ശാന്തകുമാരി
2007-2009 ഹേമലത
2009 അലിപ്പ വല്ലംചിറ
2009-2011 വിമല
2011-2013 പുഷ്പകുമാരി കെ.
2013-2013 കനകമ്മ
11/2013-2019 ഉഷ എ പിള്ള
2019-2020 സി വിഷ്ണുകുമാരി
കാലയളവ് പ്രിൻസിപ്പാൾ
2008 എൽ. പൊന്നമ്മ
2009 അജിത പുന്നൻ
2013 - 2018 ഉഷ വി. ജോർജ്ജ്

പ്രശസ്തരായ പൂർവവിദ്യാർത്ഥികൾ

ഈ വിദ്യാലയത്തിൽ നിന്നും നിരവധി പ്രശസ്തരായ വ്യക്തികൾ പഠനം പൂർത്തിയാക്കിയിട്ടുണ്ട്. ജസ്റ്റിസ് അന്നാ ചാണ്ടി, പ്രമുഖ സിനിമാ സംവിധായകനും ഗാനരചയിതാവുമായ ശ്രീകുമാരൻ തമ്പി, ലളിതാംബികാ അന്തർജനം, മുൻ മന്ത്രി എ. അച്യുതൻ, സി.ബി.സി. വാര്യർ, വി. തുളസിദാസ്, പൊതുമരാമത്ത് വകുപ്പ് സ്പെഷ്യൽ സെക്രട്ടറിയും മുൻ പൊതുവിദ്യാഭ്യാസ വകുപ്പ് ഡയറക്ടറുമായിരുന്ന ബിജു പ്രഭാകർ ഐ. എ. എസ്സ്., മുൻ പോലീസ് സൂപ്രണ്ട് സുരേഷ് കുമാർ ഐ.പി.എസ്സ്, കലാമണ്ഡലം മുൻ ചെയർമാനും, കേരള സർവ്വകലാശാല മലയാള വിഭാഗം മുൻ മേധാവിയും ആയിരുന്ന ഡോ. വി.എസ് ശർമ്മ, പ്രശസ്തകവി പി. നാരായണ കുറുപ്പ്, പ്രശസ്ത ജ്യോതിഷ പണ്ഡിതൻ എൻ. എം. സി. വാര്യർ, ഹരിപ്പാട് മുൻ എം എൽ എ. ടി. കെ. ദേവകുമാർ, സിനിമാ സംഗീത സംവിധായകൻ എം. ജി. രാധാകൃഷ്ണൻ എന്നിവർ ഈ വിദ്യാലയത്തിൽ പഠനം നടത്തിയവരാണ്.

പ്രശസ്തമായ വിജയങ്ങൾ ആദ്യകാലങ്ങളിൽ തന്നെ നേടിയെടുക്കുവാൻ ഈ വിദ്യാലയത്തിന് കഴിഞ്ഞിട്ടുണ്ട്. ഡോ. വി. രാമകൃഷ്ണപിള്ള (1966) പി. രാജശേഖരൻപിള്ള (1967), മാത്യു തരകൻ, ബാലകൃഷ്ണൻ എന്നിവർ ആദ്യ റാങ്കുകൾ നേടി വിദ്യാലയത്തിന്റെ യശസ്സിനെ വാനോളമുയർത്തി. 1960-80 കാലഘട്ടങ്ങളിൽ പ്രവേശന പരീക്ഷ നടത്തിയാണ് ഇംഗ്ലീഷ് മീഡിയം ക്ലാസ്സുകളിലേക്ക് കുട്ടികളെ തെരഞ്ഞെടുത്തിരുന്നത്.

പ്രശസ്തരായ വിദ്യാർത്ഥി‍കൾ

  • 2008-2009-ലെ ധീരതയ്ക്കുള്ള ദേശീയ അവാർഡ് 10-ബി-യിലെ ആർ. സുജിത്ത് നേടി.
  • ആദിത്യ ചന്ദ്ര പ്രശാന്ത്

എക്കോകുക്ക് പവർ പ്ലസ് എന്ന മലിനീകരണം കുറഞ്ഞ, വൈദ്യുതിയുൽപ്പാദിപ്പിക്കുന്ന, കുറഞ്ഞ വിറകിൽ പ്രവർത്തിപ്പിക്കാവുന്ന വിറകടുപ്പിന്റെ ഉപജ്ഞാതാവ്. XII സയൻസ് (ബയോമാത്സ്) -

  1. സംസ്ഥാന സ്കൂൾ ശാസ്ത്രമേള 2016 ഹൈസ്കൂൾ വിഭാഗം സയൻസ് വർക്കിംഗ് മോഡൽ ഒന്നാം സ്ഥാനം എ ഗ്രേഡ്
  2. സംസ്ഥാന സ്കൂൾ ശാസ്ത്രമേള 2017 ഹയർ സെക്കണ്ടറി വിഭാഗം സയൻസ് വർക്കിംഗ് മോഡൽ എ ഗ്രേഡ്
  3. ആറാമത് നാഷണൽ ഇൻസ്പയർ അവാർഡ് പ്രൊജക്റ്റ് കോമ്പറ്റീഷനിൽ കേരളത്തിൽ നിന്നുള്ള ഏക സമ്മാ‍ന ജേതാവ്
  4. ആദിശങ്കര യങ് സയന്റിസ്റ്റ് അവാർഡ് ഒന്നാം സ്ഥാനത്തോടൊപ്പം മികച്ച പ്രൊജക്റ്റ്, മികച്ച പോസ്റ്റർ, മികച്ച വീഡിയോ എന്നിവയ്ക്കുള്ള അവാർഡുകളും
  5. മൂന്നാമത് ഫെസ്റ്റിവൽ ഓഫ് ഇന്നവേഷൻ, രാഷ്ട്രപതി ഭവൻ - കേരളത്തിൽ നിന്നുള്ള ഏക വിദ്യാർത്ഥി
  6. നാൽപ്പത്തിനാലാമത് ജവഹർലാൽ നെഹ്രു നാഷണൽ സയൻസ്, മാത്തമാറ്റിക്സ്, എൻവയോണ്മെന്റ് എക്സിബിഷൻ, ഭോപ്പാൽ - കേരളത്തിൽ നിന്നുള്ള ഏക ഹൈസ്കൂൾ വിദ്യാർത്ഥി
  7. ഫെലോ, സാക്കുറ സയൻസ് ക്ലബ്ബ്, ജപ്പാൻ ശാസ്ത്ര സാങ്കേതിക ഏജൻസി
  8. മെന്റർ, യൂണിവേഴ്സിറ്റി ഓഫ് കൊളറാഡോ ഡെൻവർ, അമേരിക്ക
  9. മെന്റർ, ഡെന്മാർക്ക് ടെക്നിക്കൽ യൂണിവേഴ്സിറ്റി – യു എൻ ഇ പി
  10. ഇമ്പ്ലിമെന്റർ പാർട്ണർ / കാർബൺ അസറ്റ് പ്രൊജക്റ്റ് ഡവലപ്പർ, ഗ്ലോബൽ അലയൻസ് ഫോർ ക്ലീൻ കുക്ക് സ്റ്റൌ, യു എൻ ഫൌണ്ടേഷൻ
  11. 18 വയസ്സിൽ താഴെയുള്ള ഏക ഡവലപ്പർ, ഗ്ലോബൽ അലയൻസ് ഫോർ ക്ലീൻ കുക്ക് സ്റ്റൌ പ്രോഗ്രാം, യു എൻ ഫൌണ്ടേഷൻ
  12. പി എം ഫൗണ്ടേഷൻ അക്കാഡമിക് എക്സലൻസ് അവാർഡ് 2016
  13. പി എൻ പണിക്കർ മെമ്മോറിയൽ യുവ പ്രതിഭാ പുരസ്കാരം 2017
  14. കേന്ദ്ര ശാസ്ത്ര സാങ്കേതിക വകുപ്പ്, കാസർഗോഡ് കേരളാ കേന്ദ്ര സർവ്വകലാശാലയിൽ സംഘടിപ്പിച്ച ഇൻസ്പയർ ഇന്റേൺഷിപ്പ് റസിഡൻഷ്യൽ ക്യാമ്പിൽ പങ്കെടുത്തു
  15. 2017 മേയ് –ജൂൺ മാസങ്ങളിൽ ജപ്പാൻ ശാസ്ത്ര സാങ്കേതിക ഏജൻസിയുടെ അതിഥിയായി ജപ്പാനും, 2017 ഒക്ടോബർ മാസത്തിൽ ഏഷ്യാനെറ്റ് സ്പേസ് സല്യൂട്ട് സംഘാംഗമായി സ്കൂൾ പ്രഥമാദ്ധ്യാപിക ശ്രീമതി ഉഷാ എ പിള്ളയോടൊപ്പം അമേരിക്കയിലെ നാസയും മറ്റു ഗവേഷണ വിനോദ കേന്ദ്രങ്ങളും സന്ദർശിച്ചു. പ്രസ്തുത പരിപാടി എട്ട് ഭാഗങ്ങളായി പ്രമുഖ ടെലിവിഷൻ ചാനലായ ഏഷ്യാനെറ്റ് ന്യൂസ് സ്പേസ് സല്യൂട്ട് എന്ന പേരിൽ സംപ്രേഷണം ചെയ്തു.
  • 2016-17 ലെ സംസ്ഥാന സ്കുൂൾ കലോൽസവത്തിൽ സംസ്ക്ൃതോൽസവത്തിൽ ഗാനാലാപനത്തിന് സെക്കന്റ് A ഗ്രേഡ് ഹരികൃ‍ഷ്ണൻ എച്ച് നേടി.
  • തൃശൂരിൽ നടന്ന അൻപത്തിയെട്ടാമത് സംസ്ഥാന സ്കൂൾ കലോത്സവത്തിൽ ഹൈസ്കൂൾ വിഭാഗം ആൺകുട്ടികളുടെ സംസ്കൃതം ഗാനാലാപനം, മലയാളം അക്ഷരശ്ലോകം, സംസ്കൃതം അക്ഷരശ്ലോകം എന്നിനങ്ങളിൽ ഒൻപതാം ക്ലാസ് വിദ്യാർത്ഥി ഹരിശങ്കർ എസ്, എ ഗ്രേഡ് നേടി.
  • ഹയർ സെക്കണ്ടറി വിഭാഗം ഹിന്ദി പ്രസംഗത്തിൽ പ്ലസ് വൺ വിദ്യാർത്ഥി പ്രണവ് എസ്. എ ഗ്രേഡ് നേടി.

2017-‘18 അദ്ധ്യയന വർഷം സംസ്ഥാന തല ശാസ്ത്ര - ഗണിതശാസ്ത്ര - സാമൂഹ്യശാസ്ത്ര - ഐടി - പ്രവർത്തി പരിചയ മേളകളിൽ പങ്കെടുത്ത് എ ഗ്രേഡ് നേടിയ വിദ്യാർത്ഥികൾ‌

  • അശ്വിൻ വി (Fabric painting using vegetables HS Section)
  • അശ്വിൻ സുരേഷ് (Wood carving HS Section)
  • പ്രചേതസ് എ (Science working model UP Section)
  • അഭിരാം എസ് (Card & strawboard products HS Section)
  • സി എച്ച് വിവേക് നമ്പൂതിരി & ആൽബിൻ അനീഷ് (Social Science Quiz - HSS Section)
  • പാലായിൽ 2017 ഒക്ടോബർ 20 മുതൽ നടന്ന സംസ്ഥാന സ്കൂൾ കായികോത്സവത്തിൽ ജാവലിൻത്രോ ജൂനിയർ വിഭാഗത്തിൽ പത്താം സ്റ്റാൻഡേർഡ് വിദ്യാർത്ഥി ഉണ്ണി സുരേഷ് പങ്കെടുക്കാൻ അർഹത നേടി

പ്രധാന നേട്ടങ്ങൾ

2017-’18 അദ്ധ്യയന വർഷത്തിൽ ഹൈടെക്ക് ക്ലാസ് റൂം നിർമ്മാണവുമായി ബന്ധപ്പെട്ട് സ്കൂളിലെ ആറു ക്ലാസ്സ് മുറികൾ പി ടി എ, പൂർവ്വ വിദ്യാർത്ഥികൾ, അദ്ധ്യാപകർ, ട്രസ്റ്റുകൾ, സ്പെഷ്യൽ ഫീ എന്നിവയുടെ സഹായത്തോടെ സജ്ജമാക്കി.

സ്കൂളിലെ വിദ്യാർത്ഥിയായ ആദിത്യ ചന്ദ്ര പ്രശാന്ത് ബഹുമാനപ്പെട്ട രാഷ്ട്രപതി ഡോ. പ്രണബ് കുമാർ മുഖർജിയ്ക്ക് നൽകിയ നിവേദനത്തിന്റെ അടിസ്ഥാനത്തിൽ സ്കൂളിലെ 20 ക്ലാസ് മുറികൾ ഹൈടെക്ക് ആക്കുന്നതിനും ലൈബ്രറി / ലാബ് എന്നിവ നവീകരിക്കുന്നതിനും ഭരണാനുമതി നൽകി ഉത്തരവ് പൊതുവിദ്യാഭ്യാസ വകുപ്പിൽ നിന്നും ലഭിച്ചിട്ടുണ്ട്. കേരളകൌമുദി വാർത്ത

2018-’19 അദ്ധ്യയന വർഷം മുതൽ യു പി തലം മുതൽ ഹയർ സെക്കണ്ടറി തലം വരെ എല്ലാ ക്ലാസ്സ് മുറികളും സ്മാർട്ട് ക്ലാസ്സ് ആരംഭിച്ചു

ആലപ്പുഴ ജില്ലയിൽ അനുവദിച്ച ആർ എം എസ് എ യുടെ ഐഡിയൽ ലാബ് ആരംഭിയ്ക്കുവാൻ സ്കൂളിൽ പ്രവർത്തനങ്ങൾ ആരംഭിച്ചു. പൂർവ്വ വിദ്യാർത്ഥികളുടേയും സുമനസ്സുകളുടേയും സഹകരണത്തോടെ അറ്റകുറ്റപ്പണികൾ പൂർത്തിയാക്കി മൂന്നു മുറികളുള്ള കെട്ടിടം ആർ എം എസ് എ യ്ക്ക് ലാബ് സൌകര്യങ്ങൾ ഒരുക്കുവാനായി കൈമാറി. ഉദ്ഘാടനം 2018 ആഗസ്റ്റ് 10ന് പി ആർ ഡി വാർത്ത

2017-’18 അദ്ധ്യയന വർഷത്തിൽ കുട്ടികളുടെ എണ്ണത്തിൽ വർദ്ധനവുണ്ടാവുകയും 3 ഡിവിഷനുകൾ പുതിയതായി ലഭിക്കുകയും ചെയ്തു. ആയതിന്റെ അടിസ്ഥാനത്തിൽ അദ്ധ്യാപകരുടെ എണ്ണത്തിലും വർദ്ധനവുണ്ടായി.

ഇക്കഴിഞ്ഞ വർഷങ്ങളിൽ പി ടി എ, എം പി ടി എ, എസ് എം സി, പൂർവ്വ വിദ്യാർത്ഥികൾ, തദ്ദേശ സ്വയം ഭരണ സ്ഥാപന പ്രതിനിധികൾ, സർക്കാർ ഏജൻസികളായ ആർ എം എസ് എ, എൻ സി ഇ ആർ ടി, ഐ ടി @ സ്കൂൾ, ഡയറ്റുകൾ, എസ് സി ഇ ആർ ടി എന്നിവയുടെ സഹായത്തോടു കൂടി പൊതു വിദ്യാലയമായ ഹരിപ്പാട് ഗവണ്മെന്റ് ബോയ്സ് ഹൈസ്കൂളിന്റെ വിദ്യാഭ്യാസ നിലവാരം ഉയർത്താൻ സാധിച്ചിട്ടുണ്ട്.

അഞ്ചാം സ്റ്റാൻഡേർഡ് മുതൽ എട്ടാം സ്റ്റാൻഡേർഡ് വരെയുള്ള ക്ലാസ്സുകളിലെ വിദ്യാർത്ഥികൾക്ക് സൌജന്യ പാഠപുസ്തകങ്ങൾ, യൂണിഫോം, ഉച്ചഭക്ഷണം എന്നിവ നൽകുന്നതിലൂടെ സാമൂഹ്യനീതി ഉറപ്പുവരുത്താൻ സാധിച്ചു. സാമൂഹികമായി പിന്നോക്കം നിൽക്കുന്ന വിഭാഗങ്ങളിലെ അർഹരായ വിദ്യാർത്ഥികൾക്ക് ലംപ്സം ഗ്രാന്റ് പോലെയുള്ള സാമ്പത്തിക സഹായങ്ങൾ യഥാസമയം നൽകാൻ കഴിഞ്ഞിട്ടുണ്ട്.

ശാസ്ത്ര, കലാ, കായിക, പ്രവർത്തി പരിചയ മേഖലകളിൽ മികവ് തെളിയിക്കുന്ന വിദ്യാർത്ഥികളെ കണ്ടെത്തി ആവശ്യമായ പരിശീലനം നൽകി ദേശീയ-സംസ്ഥാന തല മത്സരങ്ങളിൽ വരെ എത്തിയ്ക്കുന്നതിനും സമ്മാനങ്ങൾ കരസ്ഥമാക്കുന്നതിന് ഈ സ്കൂളിന് സാധിച്ചിട്ടുണ്ട്.

വിദ്യാർത്ഥികളുടെ ആരോഗ്യം മെച്ചപ്പെടുത്തുന്നതിന്റെ ഭാഗമായി ഹരിപ്പാട് താലൂക്ക് ആശുപത്രിയുടെ സഹകരണത്തോടെ പ്രതിരോധ വാക്സിനുകളും വിറ്റാമിൻ, അയൺ ടാബ്ലെറ്റുകളും നൽകുന്നുണ്ട്. എല്ലാ വിദ്യാർത്ഥികൾക്കും തിളപ്പിച്ചാറിച്ചതും ഫിൽറ്ററിൽ അരിച്ച് മാലിന്യമുക്തമാക്കിയതുമായ കുടിവെള്ളം നൽകുന്നുണ്ട്. വിദ്യാർത്ഥികളുടെ ടോയ്ലെറ്റുകളും മൂത്രപ്പുരകളും ശുചിത്വപൂർണ്ണവും അണുവിമുക്തവുമാണ്. കായികശേഷി ഉറപ്പുവരുത്തുന്നതിന് എല്ലാ ദിവസവും പ്രഭാതത്തിൽ സ്കൂൾ അസംബ്ലിയിൽ കുട്ടികളെക്കൊണ്ട് വ്യായാമം, യോഗ എന്നിവ ചെയ്യിയ്ക്കുന്നുണ്ട്.

ഭിന്നശേഷിക്കാരായ കുട്ടികൾക്ക് അർഹമായ പരിഗണന നൽകിക്കൊണ്ടുള്ള പ്രവർത്തനങ്ങൾ നടപ്പിലാക്കുന്നുണ്ട്. ഇത്തരത്തിൽ വിദ്യാലയ വികസന സമിതിയുടെ സഹായത്തോടെ സ്കൂളിന് ഭൌതികവും, സാമൂഹികവും, അക്കാദമികവുമായ മേഖലകളിൽ മികവ് പുലർത്താൻ മുൻ വർഷങ്ങളിൽ സാധിച്ചിട്ടുണ്ട്.

എൻ സി സി, എൻ എസ്സ് എസ്സ്, എസ് പി സി, അസാപ്പ്, കരിയർ ഗൈഡൻസ്, ഹെൽത്ത് ക്ലബ്, നേച്ചർ ക്ലബ്, ടൂറിസം ക്ലബ്, നല്ലപാഠം പ്രവർത്തനങ്ങൾ എന്നിവ സക്രിയമായ പ്രവർത്തനങ്ങൾ കാഴ്ച വെയ്ക്കുന്നു.

പൂർവ്വ വിദ്യാർത്ഥി സംഘടനയുടെ നേതൃത്വത്തിൽ അഞ്ചു മുതൽ പന്ത്രണ്ടാം ക്ലാസ്സുവരെയുള്ള ആവശ്യമുള്ള മുഴുവൻ വിദ്യാർത്ഥികൾക്കും സമ്പൂർണ്ണ ഉച്ചഭക്ഷണ വിതരണം ഭംഗിയായി നൽകി വരുന്നു. നല്ലപാഠം പ്രവർത്തകരുടെ ശ്രമഫലമായി ഒരു വിദ്യാർത്ഥിക്ക് വീട് നിർമ്മിക്കാൻ സാമ്പത്തിക സഹായം നൽകുവാൻ കഴിഞ്ഞു. നല്ലപാഠം പദ്ധതിയിലെ നാലാമത്തെ മികച്ച സ്കൂളായി ഈ വിദ്യാലയത്തെ തെരഞ്ഞെടുത്തിട്ടുണ്ട്.

ദേശീയ ശാസ്ത്രമേള, സംസ്ഥാന കായികമേള, സംസ്ഥാന ശാസ്ത്രമേള, സംസ്ഥാന സ്കൂൾ കലോത്സവം എന്നിവയിൽ അഭിമാനാർഹമായ വിജയം ഇവിടുത്തെ കുട്ടികൾ തുടർച്ചയായി നേടിക്കൊണ്ടിരിക്കുന്നു.

പൊതുവിദ്യാഭ്യാസ വകുപ്പും സർവ്വ ശിക്ഷാ അഭിയാനും നൽകിയ വിവിധ പരിശീലനങ്ങളിൽ മുഴുവൻ അദ്ധ്യാ‍പകരും പങ്കെടുക്കുകയും അവരവരുടെ കഴിവിനനുസരിച്ച് അവ ക്ലാസ് മുറികളിൽ ഫലപ്രദമായി കുട്ടികൾക്ക് പകർന്നു നൽകുകയും ചെയ്തിട്ടുണ്ട്. ഇതിന്റെ ഫലമായി കുട്ടികളുടെ അക്കാദമിക നിലവാരം മെച്ചപ്പെടുത്തുവാൻ കഴിഞ്ഞിട്ടുണ്ട്.

പ്രധാന ബഹുമതികൾ

സ്കൂളിലെ വിദ്യാർത്ഥിയായ ആദിത്യ ചന്ദ്ര പ്രശാന്ത്, കാലടി ആദി ശങ്കര ഇൻസ്റ്റിറ്റ്യൂട്ട് ഓഫ് എഞ്ചിനീയറിംഗ് & ടെക്നോളജി സംഘടിപ്പിച്ച പ്രഥമ ആദി ശങ്കര യങ് സയന്റിസ്റ്റ് അവാർഡ് കരസ്ഥമാക്കി സ്കൂൾ പ്രഥമാദ്ധ്യാപിക ഉഷ എ പിള്ളയോടൊപ്പം അമേരിക്കയിലെ നാസയും അനുബന്ധ ശാസ്ത്ര സാങ്കേതിക സ്ഥാപനങ്ങളും സന്ദർശിച്ചു. ഫ്ലോറിഡയിലെ അന്തർദേശീയ സംരക്ഷിത ജൈവമണ്ഡലവും (International Biosphere Reserve), അന്താരാഷ്ട്ര പ്രാധാന്യമുള്ള തണ്ണിർത്തടവും, ലോകപൈതൃക കേന്ദ്രവും ഒക്കെയായ എവർഗ്ലേഡ്സ് ദേശീയോദ്യാനത്തിൽ നിന്നായിരുന്നു സന്ദർശനത്തിന് തുടക്കമിട്ടത്. നയാഗ്രയും അമേരിക്കൻ നാവിക താവളവും വൈറ്റ് ഹൌസുമടക്കം അമേരിക്കയിലെ പ്രധാന സ്ഥലങ്ങളും സന്ദർശിച്ചു.

സ്കൂളിലെ കുട്ടികളുടെ സൃഷ്ടികൾ / മറ്റ് അംഗീകാരങ്ങൾ

സ്കൂൾ പ്രവർത്തി പരിചയ മേളയിലും ശാസ്ത്ര സാമൂഹ്യ ശാസ്ത്ര ഗണിതശാസ്ത്ര ഐ ടി മേളകളിൽ മികവ് തെളിയിച്ച വിദ്യാർത്ഥികൾ ഹരിപ്പാട് ഗവ. മോഡൽ ബോയ്സ് ഹയർ സെക്കണ്ടറി സ്കൂളിലുണ്ട്.

അമ്പലപ്പുഴയിൽ 2017 ജനുവരി 3 മുതൽ 7 വരെ നടന്ന ആലപ്പുഴ റവന്യുജില്ല കേരള സ്കൂൾ കലോത്സവത്തിനു വേണ്ടി എട്ടാം ക്ളാസ്സ് വിദ്യാർത്ഥി അനന്ദു രവീന്ദ്രൻ ഡിസൈൻ ചെയ്ത ലോഗോ ആണ് ഉപയോഗിച്ചത്.

ലോക ലഹരി വിരുദ്ധ ദിനം

പാഠ്യേതര പ്രവർത്തനങ്ങൾ

സ്കൂളിലെ കുട്ടികൾ പാഠ്യേതര പ്രവർത്തനങ്ങളിൽ മികച്ച നിലവാരം പുലർത്തുന്നു.

സ്കൂൾ കൃഷിത്തോട്ടം

സ്കൂളിലെ ഉച്ചഭക്ഷണക്കറികൾക്കുളള ജൈവ പച്ചക്കറി അദ്ധ്യാപക രക്ഷാകർത്തൃസംഘടനയുടെ നേതൃത്വത്തിൽ സ്കൂൾ വളപ്പിനുള്ളിൽ കൃഷി ചെയ്തെടുക്കുന്നു. സംസ്ഥാന സർക്കാർ കൃഷി വകുപ്പുമായി സംയോജിച്ചാണ് സ്കൂൾ കൃഷിത്തോട്ടം ക്രമീകരിച്ചിരിയ്ക്കുന്നത്.


ലക്ഷ്യങ്ങൾ

അന്താരാഷ്ട്ര നിലവാരമുള്ള പഠനസാഹചര്യങ്ങൾ ഒരുക്കുന്നതിനുള്ള ഭൌതീകവും, സാമൂഹികവും, അക്കാദമികവുമായ സാഹചര്യങ്ങൾ ഒരുക്കുക. വായന, എഴുത്ത്, ഗണിതം, ശാസ്ത്രം എന്നിവയിൽ ഓരോ കുട്ടിയുടേയും കഴിവുകൾ പരമാവധി വികസിപ്പിക്കുന്നതിന് ആവശ്യമായ പ്രവർത്തനങ്ങൾ ആസൂ‍ത്രണം ചെയ്യുക.

അക്കാദമിക നേട്ടങ്ങൾ കൈവരിക്കുന്നതിനുള്ള സൌകര്യങ്ങളുടെ അപര്യാപ്തത പരിഹരിക്കുക.

പഠനത്തിൽ പിന്നോക്കം നിൽക്കുന്ന വിദ്യാർത്ഥികൾക്കും, പ്രതിഭാ സമ്പന്നരായ വിദ്യാർത്ഥികൾക്കും അർഹമായ പരിഗണന നൽകിക്കൊണ്ടുള്ള അക്കാദമിക പ്രവർത്തനങ്ങൾ ആസൂത്രണം ചെയ്യുക.

വിദ്യാർത്ഥികളിൽ ശാസ്ത്രബോധം, ഗവേഷണ തൽപ്പരത എന്നിവ വളർത്തുന്നതിനും ശാ‍സ്ത്രപഠനം രസകരമാക്കുന്നതിനും ലാബുകൾ സജ്ജമാക്കുക. ഐസിടി സഹായത്തോടെ വിവിധ വിഷയങ്ങൾ പഠിക്കുന്നതിനും, സാങ്കേതിക പരിജ്ഞാനം നേടുന്നതിനുമുള്ള സൌകര്യങ്ങൾ ഉറപ്പുവരുത്തുക.

ക്ലാസ്സ് ലൈബ്രറി, സ്കൂൾ ലൈബ്രറി എന്നിവയുടെ ആധുനികവൽക്കരണത്തിലൂടെ വായനയെ പരിപോഷിപ്പിക്കുക.

ഭിന്നശേഷിക്കാർക്കും പഠനവൈകല്യങ്ങൾ ഉള്ള കുട്ടികൾക്കും വിദ്യാഭ്യാസം നേടുന്നതിനാവശ്യമായ സൌകര്യങ്ങൾ ഒരുക്കുക.

വിദ്യാർത്ഥികളുടെ കലാ-കായിക-ആരോഗ്യ മേഖലകളിലെ സമ്പൂർണ്ണ വികാസത്തിനുള്ള ഭൌതികവും അക്കാദമികവുമായ സാഹചര്യങ്ങൾ സൃഷ്ടിക്കുക.

പ്രതിമാസ ഫീൽഡ് ട്രിപ്പ്, സെമിനാർ, നാടകം, ശിൽപ്പശാല, ചിത്രീകരണം എന്നിവയ്ക്കാവശ്യമായ പഠനാന്തരീക്ഷം ഒരുക്കുക.

കാർഷിക സംസ്കാരം വളർത്തിയെടുക്കുന്നതിന്റെ ഭാഗമായുള്ള ജൈവകൃഷി പരിപോഷണം, ഔഷധോദ്യാനം എന്നിവ നടപ്പാക്കുക.


വഴികാട്ടി

കന്യാകുമാരി - പൻവേൽ ദേശീയ പാത(എൻ എച്ച് 66)യുടെ ഓരത്ത് ഹരിപ്പാട് കെ എസ് ആർ ടി സി ബസ്റ്റ് സ്റ്റാൻഡിൽ നിന്നും ഉദ്ദേശം അഞ്ഞൂറ് മീറ്റർ വടക്ക് മാറിയാണ് ഹരിപ്പാട് ഗവ. മോഡൽ ബോയ്സ് ഹയർ സെക്കണ്ടറി സ്കൂൾ സ്ഥിതി ചെയ്യുന്നത്. ഏറ്റവുമടുത്ത റെയിൽവേ സ്റ്റേഷൻ തീരദേശ പാതയിലെ ഹരിപ്പാട് റെയിൽവേ സ്റ്റേഷനാണ്. ഹരിപ്പാട് നഗരത്തിലെ പ്രധാന പാതയായ ടൌൺ റോഡ് ഒരു വശം പങ്കിടുന്നു.

Loading map...