ജി.എം.എൽ.പി.എസ്. മേലങ്ങാടി/അക്ഷരവൃക്ഷം/ഭൗമദിനം

ഭൗമദിനം പരിസ്ഥിതി സംരക്ഷണത്തിനുള്ള പിന്തുണ പ്രകടിപ്പിക്കുന്നതിനായി ഏപ്രിൽ 22 -ന് ലോകമെമ്പാടും ആഘോഷിക്കുന്ന ഒരു വാർഷിക പരിപാടിയാണ് ഭൗമദിനം . അര നൂറ്റാണ്ട് മുൻപ് 1970- ലെ ഏപ്രിൽ 22 -ന് അമേരിക്കൻ ഐക്യനാടുകളിലാണ് ആദ്യമായി ഭൗമദിനം ആചരിച്ചത് .അഥവാ 2020 ഏപ്രിൽ 22 -ന് നാം ആചരിച്ചത് ഭൗമദിനത്തിന്റെ അൻപതാം വാർഷികമാണ് . അടുത്ത തലമുറയിലെ പരിസ്ഥിതി പ്രവർത്തകരെ വളർത്തുന്നതിനും പിന്തുണക്കുന്നതിനും ഭൗമദിനം ജനങ്ങളെ ആഹ്വാനം ചെയ്യുന്നു . വായുവിന്റെയും ജലത്തിന്റെയും ഗുണനിലവാരം , മലിനീകരണം ,മനുഷ്യ ആരോഗ്യം എന്നിവ മനസിലാക്കുന്നതിനുള്ള ഡാറ്റകൾ ശേഖരിക്കുക ഇതിന്റെ ഭാഗമാണ് . തങ്ങളുടെ അയൽപ്രദേശങ്ങൾ , ബീച്ചുകൾ, പാർക്കുകൾ എന്നിവയിൽ നിന്നുള്ള ചവറ്റുകൂനകൾ നീക്കം ചെയ്യുന്നതിനായി ലോകമെമ്പാടുമുള്ള വിദ്യാർഥികൾ ഇതിൽ പങ്കാളികളാകുന്നു . മനുഷ്യരാശിക്ക് ഏറെ ഭീഷണിയുയർത്തി കോവിഡ് -19 ലോകത്താകമാനം നാശം വിതക്കുന്ന സന്ദർഭത്തിലാണ് ഇത്തവണ നാം ഭൗമദിനം ആചരിച്ചത് .വൈറസ് ബാധയും കാലാവസ്ഥ മാറ്റവും തമ്മിൽ ബന്ധമുണ്ടെന്ന ചർച്ചയും ഇന്ന് സജീവമാണ് . കയ്യും കണക്കുമില്ലാതെ പ്രകൃതിയെ ചൂഷണം ചെയ്തതിന്റെ ഫലമായി പ്രകൃതിയുടെ താളം തെറ്റിത്തുടങ്ങി എന്നത് വാസ്തവമാണ് .അന്തരീക്ഷത്തിലും സമുദ്രോപരിതലത്തിലും ചൂട് കൂടിയതും അതോടൊപ്പം കൊടുങ്കാറ്റ് , കടൽക്ഷോഭം ,പ്രളയം തുടങ്ങിയ പ്രകൃതി ക്ഷോഭവും ഇന്ന് സാധാരണമാണ് .മനുഷ്യന്റെ ഇടപെടലിനെ ആശ്രയിച്ചിരിക്കുന്ന ഭൂമിയുടെ നിലനിൽപ് മനുഷ്യന് സംരക്ഷിക്കുകയോ നശിപ്പിക്കുകയോ ചെയ്യാം . നാം അധിവസിക്കുന്ന ഭൂമിയെ വരും തലമുറക്കായി സംരക്ഷിക്കണമെന്ന ആശയമാണ് ഓരോ ഭൗമദിനവും മുന്നോട്ട് വെക്കുന്നത് . നമ്മുടെ രാഷ്ട്രപിതാവ് പറഞ്ഞത് പോലെ " ഈ ലോകത്തിൽ എല്ലാവരുടെയും ആവശ്യകതകളെ നിറവേറ്റാനുള്ള വിഭവങ്ങൾ ലഭ്യമാണ് .എന്നാൽ അവരുടെ അത്യാർത്തി പരിഹരിക്കാനുള്ളത് ഇല്ല " ഷെസ മറിയം ഒ പി 4-C ജി എം എൽ പി സ്കൂൾ മേലങ്ങാടി കൊണ്ടോട്ടി ഉപജില്ല മലപ്പുറം അക്ഷരവൃക്ഷം പദ്ധതി, 2020 ലേഖനം  സാങ്കേതിക പരിശോധന - Santhosh Kumar തീയ്യതി: 25/ 04/ 2020 >> രചനാവിഭാഗം - ലേഖനം