എഫ്.എം.ജി.എച്ച്. എസ്.എസ് കൂമ്പൻപാറ/പ്രവർത്തനങ്ങൾ/2019-20 -ലെ പ്രവർത്തനങ്ങൾ

Schoolwiki സംരംഭത്തിൽ നിന്ന്

അക്കാദമിക പ്രവർത്തനങ്ങൾ

ഫാത്തിമ മാതാ സ്കൂളിൽ വിവിധങ്ങളായ അക്കാദമിക പ്രവർത്തനങ്ങൾ നടക്കുന്നു. പൊതുവിദ്യാഭ്യസ വകുപ്പ് നിഷ്ക്കർഷിക്കുന്നതും വർശങ്ങളായി സ്കൂൾ തലത്തിൽ നടത്തി മികച്ച ഫലം നേടിയതുമായ അക്കാദമിക പ്രവർത്തനങ്ങളാണ് സ്കൂൾ തലത്തിൽ നടക്കുന്നത്. കുട്ടികളുടെയും അദ്ധ്യാപകരുടേയും രക്ഷിതാക്കളുടേയും മാനേജ്മെന്റിന്റെയും കൂട്ടായ പരിശ്രമമാണ് ഞങ്ങളുടെ വിജയം

ഹലോ ഇംഗ്ലീഷ്

പൊതുവിദ്യാലയങ്ങളിലെ ഇംഗ്ലീഷ് പഠനം മെച്ചപ്പെടുത്തുന്നതിന്റെ ഭാഗമായി സമഗ്രശിക്ഷാ അഭിയാൻ ആവിഷ്ക്കരിച്ച് നടപ്പിലാക്കുന്ന പഠന പരിപോഷണ പരിപാടിയാണ് ഹലോ ഇംഗ്ലീഷ്. ഇംഗ്ലീഷ് ഭാഷ അനായാസമായി കൈകാര്യം ചെയ്യാൻ കുട്ടികളെ പ്രാപ്തരാക്കുന്നതിനുള്ള ചിട്ടയായ പഠന പ്രവർത്തനങ്ങളാണ് ഇതിൽ ഉൾപ്പെട്ടിരിക്കുന്നത്. വിദ്യാർത്ഥികളുടെ ഇംഗ്ലീഷ് പഠനം ശാക്തീകരിക്കുന്നതിനുള്ള പൊതുവിദ്യാലയങ്ങളുടെ നിർണായകമായ ചുവട് വയ്പ്പാണ് ഹലോ ഇംഗ്ലീഷ്. ഫാത്തിമ മാതയിലും ഹലോ ഇംഗ്ലീഷ് പ്രോഗ്രാം വളരെ വിജയകരമായി നടത്തുന്നു. ഇംഗ്ലീഷ് പഠനം ഏറെ രസകരമാക്കിതീർക്കുവാനും പല വിധ ആക്ടിവിറ്റികളിലൂടെ ഇംഗ്ലീഷ് ഭാഷയിൽ പ്രാവീണ്യം നേടുവാനും കുട്ടികളെ സഹായിക്കുവാൻ ഇത് ഏറെ പ്രയോജനപ്പെടുന്നു.

ഹായ് ഇംഗ്ലീഷ്

ഒന്നു മുതൽ നാലു വരെ ക്ലാസ്സുകളിലായി കുട്ടികൾക്ക് ഇംഗ്ലീഷ് പഠനം ആസ്വാദ്യകരമാക്കാനായി ഹായ് ഇംഗ്ലീഷ് എന്ന പേരിൽ ക്ലാസ്സുകൾ നടത്തുന്നു. ഇംഗ്ലീഷിൽ കഥകളും പാട്ടുകളും കുട്ടിക്കവിതകളുമൊക്കെ പഠിപ്പിച്ച് അതിനൊപ്പം ആടാനും പാടാനും അവരെ പ്രാപ്തരാക്കുന്നു മാത്രമല്ല കൊച്ചുകൊച്ചു ഇംഗ്ലീഷ് വാക്കുകളിലൂടെ ഇംഗ്ലീഷിൽ സംസാരിക്കുവാനും ആശയവിനിമയം നടത്തുവാനും കുട്ടികളിൽ ശേഷി വളർത്തുന്നു.

ശ്രദ്ധ

ശ്രദ്ധ മികവിലേയ്ക്കൊരു ചുവട് പദ്ധതിയുടെ ഭാഗമായ പഠന പ്രവർത്തനങ്ങൾ എൽ പി, യു പി, എച്ച് എസ് തലങ്ങളിൽ വിഷയങ്ങൾ കൈകാര്യം ചെയ്യുന്ന അദ്ധ്യാപകരുടെ നേതൃത്വത്തിൽ നടത്തപ്പെടുന്നുണ്ട്. ഭൂരിഭാഗം കുട്ടികളും ഈ പദ്ധതിയിലൂടെ മികവിലേയ്ക്ക് കടന്നുവരുന്നുണ്ട്. ആത്മവിശ്വാസത്തോടെ മുമ്പോട്ട് വരുവാനും സ്വന്തം കഴിവുകൾ പ്രകടിപ്പിക്കുവാനും അവർക്ക് സാധിക്കുന്നു. ഞങ്ങളുടെ സ്കൂളിലെ ശ്രദ്ധ പ്രോഗ്രാം വിജയകരമായി മുൻപോട്ടുപോകുന്നു. കുട്ടികളിലെ ആത്മവിശ്വാസം വളർത്താൻ സാധിച്ചു എന്നതാണ് ഏറ്റവും വലിയ വിജയം. പിന്നാക്കം നിൽക്കുന്ന കുട്ടികളെ പ്രത്യേകം ശ്രദ്ധിക്കുന്നതിനാൽ മടികൂടാതെ ക്ലാസ്സിൽ വരുന്നതിന് സ്വന്തമായി ക്ലാസ്സ് പ്രവർത്തനങ്ങൾ ‌ചെയ്യുന്നതിനും അവർക്ക് കഴിയുന്നുണ്ട്.

നവപ്രഭ

ഒൻപതാം ക്ലാസ്സിൽ പഠനത്തിൽ പിന്നാക്കം നിൽക്കുന്ന കുട്ടികൾക്കായി ആവിഷ്ക്കരിച്ച പദ്ധതിയാണ് നവപ്രഭ. എല്ലാ വിഷയങ്ങൾക്കും കുട്ടികൾക്ക് പ്രത്യേക പരിശീലനം നൽകുന്നു.. ഭൂരിഭാഗം കുട്ടികളും ഈ പദ്ധതിയിലൂടെ മികവിലേയ്ക്ക് കടന്നുവരുന്നുണ്ട്. ആത്മവിശ്വാസത്തോടെ മുമ്പോട്ട് വരുവാനും സ്വന്തം കഴിവുകൾ പ്രകടിപ്പിക്കുവാനും അവർക്ക് സാധിക്കുന്നു. ഞങ്ങളുടെ സ്കൂളിലെ നവപ്രഭ പ്രോഗ്രാം വിജയകരമായി മുൻപോട്ടുപോകുന്നു. കുട്ടികളിലെ ആത്മവിശ്വാസം വളർത്താൻ സാധിച്ചു എന്നതാണ് ഏറ്റവും വലിയ വിജയം. പിന്നാക്കം നിൽക്കുന്ന കുട്ടികളെ പ്രത്യേകം ശ്രദ്ധിക്കുന്നതിനാൽ മടികൂടാതെ ക്ലാസ്സിൽ വരുന്നതിന് സ്വന്തമായി ക്ലാസ്സ് പ്രവർത്തനങ്ങൾ ‌ചെയ്യുന്നതിനും അവർക്ക് കഴിയുന്നുണ്ട്.

GK Information Universe

പ്രതിഭാധനരായ ഒട്ടേറെ വിദ്യാർത്ഥികൾ നമ്മുടെ വിദ്യാലയത്തിൽ ഉണ്ട്. അവർക്ക് സ്ക്കൂൾ സിലബസിന് അപ്പുറത്തുള്ള വിജ്ഞാനം ലഭിക്കേണ്ടതുണ്ട്. ഇത് കണക്കിലെടുത്ത് കുട്ടികൾക്ക് പ്രത്യേക പരിശിലനം നല്കി വരുന്നു. അതിനായി സ്കൂളിൽ തന്നെ വിദഗ്ദരായ അദ്ധ്യാപകരുടെ നേതൃത്വത്തിൽ തയ്യാറാക്കപ്പെട്ട GK Information Universe എന്ന പുസ്തകം കുട്ടികൾക്ക് വിതരണം ചെയ്യുന്നു. വിവിധ മത്സരങ്ങൾക്കായി ഒരുങ്ങുന്നതിനും വിജയം നേടുന്നതിനും ഇത് കുട്ടികളെ വളരെയധികം സഹായിക്കുന്നു. LP,UP, HS വിഭാഗത്തിലെ കുട്ടികൾക്കാണ് പുസ്തകം വിതരണം ചെയ്യുക.

എൽ എസ് എസ് പരിശീലനം

സംസ്ഥാനത്തെ പൊതുവിദ്യാലയങ്ങളിൽ നാലാംതരത്തിൽ പഠിക്കുന്ന വിദ്യാർഥികൾക്ക് പൊതുവിദ്യാഭ്യാസ വകുപ്പ് നടത്തുന്ന പരീക്ഷയാണ് എൽ.എസ്.എസ്. നാലാം തരത്തിൽ ആർജിച്ച അറിവുകൾ, അനുഭവങ്ങൾ എന്നിവ പരീക്ഷിക്കുന്ന ഒരു പരീക്ഷകൂടിയാണിത്. പരിസരപഠനം, ഭാഷ, ഇംഗ്ളീഷ്, ഗണിതം, പൊതുവിജ്ഞാനം എന്നീ മേഖലകളിൽനിന്നുമുള്ള ചോദ്യങ്ങളാണ് പരീക്ഷക്കുണ്ടാവുക. അതിനാൽ തുടക്കം മുതൽ തന്നെ നാലാം ക്ലാസ്സിൽ പഠിക്കുന്ന കുട്ടികൾക്കായി എൽ എസ് എസ് പ്രത്യേക പരിശീലനം നടത്തുന്നു. കഴിഞ്ഞ അദ്ധ്യയന വർഷം 23 കുട്ടികൾക്ക് എൽ എസ് എസ് സ്കോളർഷിപ്പ് നേടാനായി എന്നത് ഏറെ സന്തോഷം പകരുന്നു

യു എസ് എസ് പരിശീലനം

ഏഴാംക്ലാസിലെ മിടുക്കരെ കണ്ടെത്തുന്ന പരീക്ഷയാണ്‌ യു.എസ്.എസ്. ഒന്നാംടേം പരീക്ഷയിൽ ഉയർന്ന ഗ്രേഡുകൾ നേടുന്ന കുട്ടികൾക്കാണ്‌ പരീക്ഷയെഴുതാൻ യോഗ്യത. അതിനാൽ തുടക്കം മുതൽ തന്നെ നാലാം ക്ലാസ്സിൽ പഠിക്കുന്ന കുട്ടികൾക്കായി യു എസ് എസ് പ്രത്യേക പരിശീലനം നടത്തുന്നു. കഴിഞ്ഞ അദ്ധ്യയന വർഷം 3 കുട്ടികൾക്ക് എൽ എസ് എസ് സ്കോളർഷിപ്പ് നേടാനായി എന്നത് ഏറെ സന്തോഷം പകരുന്നു

ഉല്ലാസ ഗണിതം

കുട്ടികൾക്ക് ഏറെ ബുദ്ധിമുട്ടുള്ള വിഷയമായ ഗണിതത്തെ വിവിധ കളികളിലൂടെ വളരെ ലളിതമാക്കി പഠിപ്പിക്കാനുള്ള പുതിയ രീതിയാണ് ഉല്ലാസ ഗണിതം. ഒന്നു മുതൽ പത്ത് വരെയുള്ള സംഖ്യകൾ ഉൾപ്പെടുത്തിയുള്ള സംഖ്യാബോധം, വലുത്, ചെറുത്, കൂടുതൽ, കുറവ്, കൂട്ടങ്ങളാക്കൽ, സംഖ്യ തിരിച്ചറിയൽ, സംഖ്യകളെ എണ്ണൽ, സങ്കലനം, വ്യവകലനം തുടങ്ങിയ ശേഷികൾ കുട്ടികൾക്ക് വളരെ എളുപ്പത്തിൽ മനസ്സിലാക്കാൻ കഴിയുന്ന ഗെയിമുകളിലൂടെ ഗണിത പഠനം രസകരമാക്കുക എന്നതാണ് ഇതിന്റെ ഉദ്ദേശ്യം. വളരെ ഫലപ്രദമായ രീതിയിൽ ചെറിയ ക്ലാസ്സ് മുതൽ ഗണിത പഠനം കാര്യക്ഷമമാക്കുന്നതിനുള്ള പ്രവർത്തനമാണിത്.

മോർണിംഗ് ക്ലാസ്

പത്താം ക്ലാസ്സിലെ കുട്ടികൾക്കായി രാവിലെ 8.30 മുതൽ ക്ലാസ്സുകൾ നടത്തുന്നു. ഈ സമയങ്ങളിൽ പഠനത്തിൽ പിന്നാക്കം നിൽക്കുന്ന കുട്ടികൾക്ക് പ്രത്യേക ശ്രദ്ധ കൊടുന്നതിന് അദ്ധ്യാപകർ ശ്രദ്ധിക്കുന്നു.പ്രഭാത ക്ലാസ്സുകൾക്കായി രക്ഷിതാക്കളുടെയും കുട്ടികളുടേയും സഹകരണം വളരെ എടുത്തുപറയേണ്ടതാണ്. അദ്ധ്യാപകർ നിഷ്ക്കർഷിക്കുന്ന സമയത്തുതന്നെ കുട്ടികളെ കൃത്യമായി ക്ലാസ്സിലെത്തിക്കാൻ രക്ഷിതാക്കൾ പ്രത്യേകം ശ്രദ്ധിക്കുന്നു. കുട്ടികൾ ക്ലാസ്സിലെത്തിയാൽ നിശബ്ദരായി പഠനപ്രവർത്തനങ്ങളിൽ ഏർപ്പെടുന്നു.

ഈവനിംഗ് ക്ലാസ്

പത്താം ക്ലാസ്സിലെ കുട്ടികൾക്കായി വൈകുന്നേരം 4.30 വരെ ക്ലാസ്സുകൾ നടത്തുന്നു. ഈ സമയങ്ങളിൽ പഠനത്തിൽ പിന്നാക്കം നിൽക്കുന്ന കുട്ടികൾക്ക് പ്രത്യേക ശ്രദ്ധ കൊടുക്കുന്നു. കുട്ടികളുടെ സംശയങ്ങൾ ദുരീകരിക്കുന്നതിനും പാഠഭാഗങ്ങൾ ഏറെ ശ്രദ്ധയോടെ മനസ്സിലാക്കുന്നതിനും ഇതുവഴി കഴിയുന്നു.

എക്‌സ്‌ട്രാ ക്ലാസ്സ്

ശനിയാഴ്ച ദിവസങ്ങളിൽ ഹൈസ്കൂൾ വിഭാഗത്തിൽ എക്‌സ്‌ട്രാ ക്ലാസ്സുകളും യു പി, എൽ പി വിഭാഗങ്ങളിൽ പഠനത്തിൽ പിന്നാക്കം നിൽക്കുന്നവർക്കായി പ്രത്യേക പരിശീലനവും നൽകുന്നു. ഇത് കുട്ടികൾക്കേറെ സഹായകരമാണ്. ഇത്. സമയബന്ധിതമായി പാഠഭാഗങ്ങൾ പഠിച്ചുതീർത്ത് പഠനപ്രവർത്തനങ്ങളിൽ ഏർപ്പടുന്നതിനും പല തവണ ക്ലാസ്സ് തലത്തിലും ഗ്രൂപ്പ് തലത്തിലും റിവിഷൻ നടത്തി പാഠഭാഗങ്ങൾ ഹൃദിസ്ഥമാക്കി പരീക്ഷകൾക്കായി ഒരുങ്ങുന്നതിനും കുട്ടികളെ സഹായിക്കുന്നു. സിലബസ്സിനപ്പുറമുള്ള വിവിധ പ്രവർത്തനങ്ങളിൽ ഏർപ്പെട്ട് കൂടുതൽ കാര്യങ്ങൾ മനസ്സിലാക്കുന്നതിനും കുട്ടികൾക്ക് സാധിക്കുന്നു.

ബെസ്റ്റ് ക്ലാസ്

എൽ പി, യു പി, എച്ച് എസ് വിഭാഗങ്ങളിലെ ഏറ്റവും നല്ല ക്ലാസ്സിനെ കണ്ടെത്തി സമ്മാനം നൽകുന്നു. അച്ചടക്കം, ശുചിത്വം എന്നിവയാണ് മാനദണ്ഡങ്ങൾ. ക്ലാസ്സ് ലീഡേഴ്സിന്റെ നേതൃത്വത്തിൽ കുട്ടികൾ അച്ചടക്കത്തോടെ പഠനത്തിൽ ഏർപ്പെടുകയും ക്ലാസ്സ് ശുചിത്വം, കുട്ടികളുടെ ശുചിത്വം എന്നിവയിൽ പ്രത്യേക ശ്രദ്ധ പതിപ്പിക്കുകയും ചെയ്യുന്നു.

ബെസ്റ്റ് സ്റ്റുഡന്റ്സ്

ഓരോ ഡിവിഷനിലും പാഠ്യ രംഗത്തും പാഠ്യേതര രംഗത്തും പെരുമാറ്റത്തിലും മൂല്യാധിഷ്ഠിത പ്രവർത്തനം കാഴ്ച വയ്ക്കുന്ന, മറ്റുള്ള കുട്ടികൾക്ക് മാതൃകയാകുന്ന - കുട്ടികളെ കണ്ടെത്തുന്നു. ക്ലാസ്സ് ടീച്ചർമാരുടെയും മറ്റ് അദ്ധ്യാപകരുടേയും മേൽനോട്ടത്തിലാണ് കുട്ടികളെ തിരഞ്ഞടുക്കുന്നത്. തെരഞ്ഞെടുക്കപ്പെടുന്ന കുട്ടികൾക്ക് സ്കൂൾ വാർഷികത്തോടനുബന്ധിച്ച് മൊമന്റോ നൽകി ആദരിക്കുന്നു.

ഇംഗ്ലീഷിൽ പ്രാവീണ്യം നേടൽ

ഇംഗ്ലീഷിൽ സംസാരിക്കുന്നതിനും ആശയവിനിമയം നടത്തുന്നതിനുമായി കുട്ടികൾക്ക് പ്രത്യേക പരിശീലനം നൽകുന്നു. അതിനായി സ്പോക്കൺ ഇംഗ്ലീഷ് ക്ലാസ്സുകളും കമ്യൂണിക്കേറ്റീവ് ഇംഗ്ലീഷ് ക്ലാസ്സുകളും നടത്തുന്നു. ഡിബേറ്റ്, സ്കിറ്റ്, സ്പീച്ച് എന്നിവ നടത്തി കുട്ടികൾക്ക് ആത്മവിശ്വാസം പ്രദാനം ചെയ്യുന്നു. സംസ്ഥാന കലോത്സവത്തിൽ ഫാത്തിമ മാതയിലെ കുട്ടികൾ സ്കിറ്റ്, എലക്കൂഷൻ എന്നിവയിൽ പങ്കെടുത്ത് നേട്ടങ്ങൾ കൈവരിക്കുന്നു എന്നത് ഏറെ ശ്രദ്ധാർഹമാണ്.

ക്വിസ് മത്സരം

കുട്ടികളിൽ പൊതു വി‍ജ്ഞാനം വർദ്ധിപ്പിക്കുക എന്ന ലക്ഷ്യത്തോടെ ഓരോ ദിനാചരണങ്ങളിലും എല്ലാ കുട്ടികളെയും ഉൾപ്പെടുത്തി ക്വിസ്സ് മത്സരങ്ങൾ നടത്തുകയും വിജയികൾക്ക് സമ്മാനങ്ങൾ വിതരണം ചെയ്യുകയും ചെയ്യുന്നു.ഇത് കുട്ടികളിൽ തങ്ങളുടെ വിജ്ഞാനം വർദ്ധിപ്പിക്കാൻ ഏറെ സായിക്കുന്നു എന്ന് സാക്ഷ്യപ്പെടുത്തുന്നു.

വായനാമൂല

ഓരോ ക്ലാസ്സുകളിലും ക്ലാസ്സ് ലൈബ്രറികൾ ഒരുക്കുകയും വായനാമൂല ക്രമീകരിക്കുകയും ചെയ്യുന്നു. കുട്ടികൾ തങ്ങളുടെ ഫ്രീ സമയങ്ങൾ പുസ്തക വായനക്കായി ഉപയോഗിക്കുകയും തങ്ങൾ വായിക്കുന്ന പുസ്തകങ്ങളുടെ കുറിപ്പ് തയ്യാറാക്കി അദ്ധ്യാപകരെ ഏൽപ്പിക്കുകയും ചെയ്യുന്നു. വായനാമൂല കുട്ടികളുടെ വായനാ ശേഷിയെ ഏറെ പരിപോഷിപ്പിക്കുന്നു.

സംഘടിത പഠനം

കുട്ടികളുടെ സംഘടിത പഠനം ഏറെ പ്രധാനപ്പെട്ട ഒന്നാണ്. ഓരോ ക്ലാസ്സിലും കുട്ടികളെ പത്ത് പേരടങ്ങുന്ന ഒരു ഗ്രൂപ്പായി തിരിക്കുകയും അവരിൽ നിന്നും ഒരു ലീഡറിനെ തെരഞ്ഞെടുക്കുകയും ചെയ്യുന്നു. ഈ ലീഡറിന്റെ നേതൃത്വത്തിൽ കുട്ടികൾ ഗ്രൂപ്പ് പഠനം നടത്തുന്നു. കുട്ടികളുടെ പഠനത്തെ ഇത് ഏറെ സഹായിക്കുന്നു.

മന്ത്‌ലി ടെസ്റ്റ് - പ്രോഗ്രസ് റിപ്പോർട്ട്

അധ്യയന വർഷത്തിന്റെ ആരംഭം മുതൽ അവസാനം വരെ ഓരോ മാസവും കുട്ടികൾക്കായി ക്ലാസ്സ് ടെസ്റ്റുകൾ നടത്തുകയും മാർക്കുകളും ഗ്രേഡുകളും പ്രോഗ്രസ് റിപ്പോർട്ടിലേയ്ക്ക് എഴുതുകയും ചെയ്യുന്നു. ഇതുവഴി വളരെ എളുപ്പത്തിൽ കുട്ടിയുടെ പഠന പുരോഗതി വിലയിരുത്താൻ കഴിയുന്നു

ടേം മൂല്യനിർണയം

ഓരോ ടേമിലും കുട്ടികൾക്കായി പരീക്ഷകൾ നടത്തുകയും മാർക്കുകളും ഗ്രേഡുകളും പ്രോഗ്രസ് റിപ്പോർട്ടിലേയ്ക്ക് എഴുതുകയും ചെയ്യുന്നു. ക്ലാസ്സ് പി ടി എ നടത്തി കുട്ടികളുടെ പഠന പുരോഗതി രക്ഷിതാക്കളെ അറിയിക്കുകയും ചെയ്യുന്നു. ഓരോ കുട്ടിയുടേയുംപഠന നിലവാരം കൃത്യമായികണ്ടെത്താനും അതുവഴി കുട്ടികൾക്കാവശ്യമായ പഠന സപ്പോർട്ട് നൽകുന്നതിനും അദ്ധ്യാപകർക്ക് കഴിയുന്നു

ഹെൽപ്പ് ഗ്രൂപ്പ്

പഠനത്തിൽ പിന്നാക്കം നിൽക്കുന്ന കുട്ടികൾക്കായി, കുട്ടികളുടെ നേതൃത്വത്തിൽ ഒരു ഹെൽപ്പ് ഗ്രൂപ്പ് പ്രവർത്തിക്കുന്നു. ഇത് വഴി കൂട്ടുകാരിൽ നിന്നും കൂടുതൽ കാര്യങ്ങൾ പഠിക്കുന്നതിനും മനസ്സിലാക്കുന്നതിനും കഴിയുന്നു.

എസ് ആർ ജി

കുട്ടികളുടെ പഠന നിലവാരം ഉയർത്തുന്നതിനായി വിഷയാടിസ്ഥാനത്തിൽ അദ്ധ്യാപകർ മാസം തോറും ഒരുമിച്ചുകൂടി പഠന വിഭവങ്ങൾ തയ്യാറാക്കുകയും അദ്ധ്യാപകർ തങ്ങളുടെ മികവ് വികസിപ്പിക്കുന്നതിനുള്ള ഒരു വേദിയായി എസ് ആർ ജിയെ മാറ്റുകയും ചെയ്യുന്നു

അദ്ധ്യാപക ദിനം -ആഘോഷമാക്കി

”അധ്യാപകർ തലമുറകളുടെ ശില്പിയാണ്.” ശിലയിൽനിന്ന് ശില്പി ശില്പം മെനഞ്ഞെടുക്കുന്നതുപോലെ ഓരോ വിദ്യാർത്ഥിയെയും ഉത്തമ ശില്പങ്ങളായി വാർത്തെടുക്കാൻ ഓരോ അധ്യാപൿക്കും കഴിയുന്നു. തങ്ങളിലെ കഴിവുകളെ രാകിയെടുക്കാൻ കുട്ടികൾക്ക് അവസരം നൽകുന്നു. കുട്ടികൾക്ക് തത്പര്യമുള്ള പദ്ധതികളിൽ സ്വയം മുഴുകി മസ്തിഷ്‌കവും മനസും കൈകളും സ്വതന്ത്രമായി പ്രവർത്തിക്കുമ്പോഴാണ് സർഗശേഷി ഉണരുക. സർഗാത്മകതയുടെ പ്രവാഹത്തെ അധ്യാപകൻ ത്വരിതപ്പെടുത്തുന്നു. അതിന് അധ്യാപകർ കുട്ടികളെ സ്‌നേഹിക്കുന്നു. മാർഗദർശനം നടത്തുന്നു, ദിശാബോധം പകരുന്നു. സൗഹൃദപൂർണമായ ആശയവിനിമയം നടത്തുന്നതിനൊപ്പം വിദ്യാർത്ഥികളെ പ്രചോദിപ്പിക്കാനും പ്രോത്സാഹിപ്പിക്കാനും അഭിനന്ദിക്കാനും സമയം കണ്ടെത്തുന്നു. വിദ്യാർത്ഥികൾക്ക് കൈത്താങ്ങാകുവാനും അവരുടെ ജീവിതവഴികളിൽ ദിശാസൂചകങ്ങളാകുവാനും അദ്ധ്യാപകർക്ക് കഴിയുന്നു. ഓരോ വിദ്യാർത്ഥിയും ഓരോ നിധിയാണ്. അത് കണ്ടെത്തി സമൂഹത്തിന് സംലഭ്യമാക്കുവാൻ അധ്യാപകർക്ക് കഴിയുന്നു.എല്ലാ അദ്ധ്യയന വർഷവും അദ്ധ്യാപക ദിനം കുട്ടികളുടെ നേതൃത്വത്തിൽ ഏറെ സന്തോഷത്തോടെ ആഘോഷിക്കുന്നു. ക്ലാസ്സ് ലീഡർമാരുടെ നേതൃത്വത്തിലാണ് അന്നത്തെ എല്ലാ പരിപാടികളും ക്രമീകരിക്കുന്നത്. കുട്ടികളെല്ലാം ചേർന്ന് അന്നേ ദിവസം അവിസ്മരണീയമാക്കി തീർക്കുന്നു.

ക്ലബ്ബ് പ്രവർത്തനങ്ങൾ

ആശയവിനിമശേഷി, നേതൃപാടവം, പ്രശ്നപരിഹാരം, സംഘാടനം, സമയപാലനം തുടങ്ങി വ്യത്യസ്തശേഷികളെ വികസിപ്പിച്ചെടുക്കുന്നതിന്‌ ക്ളബ്ബ്‌ പ്രവർത്തനങ്ങൾ സഹായിക്കുന്നു. അഭിരുചിയും കഴിവും സ്വയം തിരിച്ചറിയാനും മെച്ചപ്പെടാനും കുട്ടികൾക്ക്‌ ഇതിലൂടെ അവസരമൊരുങ്ങുന്നു. കുട്ടികൾക്ക് നേതൃപാടവവും വിവിധ വിഷയങ്ങളിലെ പരിജ്ഞാനവും കൂടുതലായി ലഭിക്കുന്നതിന് വിവിധ ക്ലബ്ബ് പ്രവർത്തനങ്ങൾ സഹായിക്കുന്നു

വായനാമരം പൂത്തുലഞ്ഞപ്പോൾ

ഈ അദ്ധ്യയന വർഷം വായനാവാരത്തോടനുബന്ധിച്ച് വളരെ വ്യത്യസ്തങ്ങളായ പരിപാടികളാണ് സ്കൂളിൽ ഒരുക്കിയത്. അതിലെന്നായിരുന്നു വായനാമരം പൂത്തുലഞ്ഞത്. യു പി, ഹൈസ്കൂൾ വിഭാഗങ്ങളിലെ ഓരോ ക്ലാസ്സുകൾക്കും സ്കൂൾ കോമ്പൗണ്ടിലെ ഓരോ മരങ്ങൾ നൽകി. കുട്ടികൾ കൊച്ചുകൊച്ചു കഥകളും കവിതകളുമൊക്കെ എഴുതി തങ്ങൾക്കായി ലഭിച്ച പൂമരത്തിന്റെ ഇലകളിലും ശാഖകളിലും തങ്ങളുടെ സൃഷ്ടികൾ പതിപ്പിച്ചു. കുട്ടികൾ ഏറെ ഉത്സാഹത്തോടെ ഈ ഉദ്യമത്തിൽ പങ്ക് ചേർന്നു. സ്കൂളിലെ എല്ലാ കുട്ടികൾക്കും എല്ലാ ദിവസവും വായനാമരം സന്ദർശിക്കാനും വായിക്കാനുമുള്ള ക്രമീകരണവും ഒരുക്കിയിരുന്നു. വായനാവാര സമാപനത്തോടനുബന്ധിച്ച് ഏറ്റവും നന്നായി വായനാമരം ഒരുക്കിയ ക്ലാസ്സിലെ കുട്ടികൾക്ക് സമ്മാനം നൽകാനും മറന്നില്ല.

പാഠ്യേതര പ്രവർത്തനങ്ങൾ

പാഠ്യ പ്രവർത്തനങ്ങൾക്കൊപ്പം പാഠ്യേതര രംഗത്തും മികച്ച രീതിയിൽ മുന്നേറുകയാണ് ഫാത്തിമ മാത

ലിറ്റിൽ കൈറ്റ്സ്

ഇന്ത്യയിലെ കുട്ടികളുടെ ഏറ്റവും വലിയ ഐ.ടി. കൂട്ടായ്മയാണ്‌ ലിറ്റിൽ കൈറ്റ്‌സ്‌. ഐ.സി.ടി.യിൽ താത്‌പര്യമുള്ള കുട്ടികൾക്ക്‌ സോഫ്‌റ്റ്‌വേർ, ഹാർഡ്‌വേർ, ആനിമേഷൻ, സൈബർസുരക്ഷ, ഭാഷാകപ്യൂട്ടിങ്‌ തുടങ്ങിയവയിൽ പരിശീലനം നൽകുകയാണ്‌ ഇതിന്റെ ലക്ഷ്യം. അഭിരുചി പരീക്ഷയിലൂടെയാണ്‌ ലിറ്റിൽ കൈറ്റ്‌സിലേക്കുള്ള തിരഞ്ഞെടുപ്പ്‌. കേരളത്തിലെ പൊതുവിദ്യാലയങ്ങളിൽ ഐ.ടി അധിഷ്ഠിത പ്രവർത്തനങ്ങൾക്ക് നേതൃത്വം നൽകുന്ന കൈറ്റിനു കീഴിൽ ഫാത്തിമ മാതാ ഗേൾസ് ഹയർ സെക്കണ്ടറി സ്കൂളിൽ ലിറ്റിൽ കൈറ്റ്സ് പ്രവർത്തനങ്ങൾ വളരെ വിപുലമായ രീതിയിൽ നടക്കുന്നു.ഈ പദ്ധതിയിൽ സ്കൂളിലെ പത്താം ക്ലാസ് വിദ്യാർത്ഥിനികളായ 35 കുട്ടികളും ഒൻപതാം ക്ലാസ്സിലെ 35 കുട്ടികളും പങ്കെടുക്കുന്നു. യൂണിറ്റ് ലീഡറായി കുമാരി മന്ന ജോർജും ഡപ്യൂട്ടി ലീഡറായി ദിയ ഷജീറും പ്രവർത്തിക്കുന്നു. കൈറ്റ് മിസ്‌ട്രസ്സുമാരായി സി. ഷിജിമോൾ സെബാസ്റ്റ്യൻ, ശ്രീമതി റീന ജെയിംസ് എന്നിവർ പ്രവർത്തിക്കുന്നു. ചെയർമാൻ - ശ്രീ സി യു തോമസ്, കൺവീനർ - സി. ലാലി മാണി, വൈസ് ചെയർമാൻമാരായി ശ്രീമതി ലിജ ജോയിസൺ, ശ്രീ സുനീർ കാരിമറ്റം എന്നിവരും പ്രവർത്തിക്കുന്നു. മാനുഷീക മൂല്യങ്ങളോടൊപ്പം സാങ്കേതിക വിദ്യയിലും മികച്ച നിലവാരം പുലർത്തുന്ന ഒരു തലമുറയെ വളർത്തിയെടുക്കുന്നതിനായി കൈറ്റ് ആരംഭിച്ചിരിക്കുന്ന ഈ സംരംഭം പരമാവധി പ്രയോജനപ്പെടുത്താൻ ഫാത്തിമ മാതയിലെ കുട്ടികൾ പ്രതിജ്ഞാബദ്ധരാണ്. ലിറ്റിൽ കൈറ്റ്സ് ക്ലബ്ബിന്റെ നേതൃത്വത്തിലാണ് കുട്ടികൾക്ക് ഐ ടിമേളയിൽ പരിശീലനം നൽകുന്നത്. തുടർച്ചയയായി എല്ലാ വർഷവും യു പി, എച്ച്. എസ്, എച്ച് എസ് എസ് വിഭാഗങ്ങളിലായി ഉപ ജില്ലാ, ജില്ലാ ഐ റ്റി മേളയിൽ ഓവറോൾ ചാമ്പ്യൻമാർ. സംസ്ഥാന ഐ ടി മേളയിലെ സജീവ സാന്നിദ്ധ്യം. 5 വർഷത്തോളമായി കുട്ടികൾ സംസ്ഥാന ഐ റ്റി മേളയിൽ പങ്കെടുത്ത് മികച്ച ഗ്രേഡുകൾ സ്വന്തമാക്കുന്നു.

സ്കൗട്ട് & ഗൈഡ്സ്

ഭാരത് സ്കൗട്ട് ആൻഡ് ഗൈഡ് സ്ഥാപകനായ ബേഡൽ പവൽ വിഭാവനം ചെയ്ത ഉദ്യേശ്യം, തത്വങ്ങൾ, രീതി എന്നിവയ്ക്കനിസൃതമായി പരിശീലനം നടത്തുന്ന ഒരു സ്കൗട്ട് ട്രൂപ്പും ഗൈഡ് ഗ്രൂപ്പും ഞങ്ങളുടെ സ്കൂളിൽ പ്രവർത്തിക്കുന്നു. വ്യക്തിത്വ വികസനത്തിലൂടെ അച്ചടക്കമുള്ളവരായി സമൂഹത്തിൽ കൊള്ളാവുന്ന കുട്ടികളായി മാറാൻ പ്രസ്ഥാനം സഹായകരമാകുന്നു. നമ്മുടെ സ്കൂളുകളിൽ സേവന തൽപ്പരരായ ഒരു കൂട്ടം വിദ്യാർത്ഥികളുടെ കൂട്ടായ്മയാണ് സ്കൗട്ട് & ഗൈഡ്സ് .സ്കൂളിലെ ഏതൊരു പരിപാടിക്കും കുട്ടികൾ മുൻപിലുണ്ടാവും. സാമൂഹിക സേവനത്തിന്റെ മഹത്വം മനസ്സിലാക്കി പ്രവർത്തിക്കുകയാണ് കുട്ടികൾ ചെയ്യുന്നത്. അഞ്ച് മുതൽ ഏഴുവരെയുള്ള ക്ലാസ്സുകളിലെ ആൺകുട്ടികൾക്കായി സ്കൗട്ടും അഞ്ച് മുതൽ പത്ത് വരെയുള്ള ക്ലാസ്സുകളിലെ പെൺകുട്ടികൾക്കായി ഗൈഡ്സും പ്രവർത്തിക്കുന്നു.പരിസര ശുചീകരണം, മരത്തെ നട്ട് സംരക്ഷിക്കൽ , പച്ചക്കറികൃഷി എന്നിവയിലൂടെ വ്യക്തിത്വ വികസനവും സാമൂഹീക പ്രതിബദ്ധതയും കുട്ടികളിൽ വളർന്നുവരാൻ സഹായിക്കുന്നു. ഞങ്ങളുടെ സ്കൂളിൽ നിന്നും രാഷ്ട്രപതി ഗൈഡ് അവാർഡിനായുള്ള ടെസ്റ്റിൽ 4 കുട്ടികൾ പങ്കെടുത്തു. ഓരോ വർഷവും ധാരാളം കുട്ടികൾ രാജ്യപുരസ്കാർ അവാർഡ് നേടുന്നും. വിവിധ ഘട്ടങ്ങളിലായി 32 കുട്ടികൾ പരിശീലനം നേടുന്നു.

ജൂണിയർ റെഡ്ക്രോസ്

ജീവ കാരുണ്യം, പൗരബോധം, വ്യക്തിത്വ വികസനം, ആരോഗ്യം എന്നീ മേഖലകളിൽ ശ്രദ്ധ പതിപ്പിച്ച് സേവനം ലക്ഷ്യമാക്കി ഞങ്ങളുടെ സ്കൂളിലെ ജെ ആർ സി യൂണിറ്റ് വളരെ ക്രിയാത്മകമായി പ്രവർത്തിക്കുന്നു. എൽ പി, യു പി, എച്ച് എസ് വിഭാഗങ്ങളിലായി നൂറോളം കുട്ടികൾ ഈ ക്ലബ്ബിൽ പ്രവർത്തിക്കുന്നു. എല്ലാ വെള്ളിയാഴ്ചയും ജെ ആർ സി കുട്ടികൾ പ്രത്യേക യൂണിഫോം ധരിച്ച് സ്കൂളും പരിസരവും വൃത്തിയാക്കുന്നു. അപരന്റെ വേദന സ്വന്തം വേദനയായി കണ്ട് പുവർ ഫണ്ട് കളക്ഷൻ നടത്തുകയും ചികിത്സാസഹായം തേടുന്ന കുട്ടികൾക്ക് ആവശ്യാനുസരണം വിതരണം ചെയ്യുകയും ചെയ്യുന്നു. ഞങ്ങളുടെ അടുത്തുള്ള അനാഥാലയങ്ങളും ഗവൺമെന്റ് ആശുപത്രികളും സന്ദർശിച്ച് ഭക്ഷണവും വസ്ത്രവും വിവിധ ഉപയോഗ സാധനങ്ങളും വിതരണം ചെയ്യുന്ന ഈ കുട്ടികൾ നാടിന്റെ നൻമയും പ്രതീക്ഷയുമാണ്. സാമൂഹ്യ തിന്മകൾക്കെതിരെ ചുവർ പത്രികകൾ തയ്യാറാക്കിയും , മുദ്രാവാക്യ ഗീതങ്ങളും പ്ലക്കാർഡുകൾ തയ്യാറാക്കിയും റാലികൾ നടത്തി ഇവർ മറ്റ് കുട്ടികൾക്കും സമൂഹത്തിനും മാതൃകയായി മാറുന്നു.സ്കൂളുകളിൽ നടത്തുന്ന വിവിധ കർമ്മപരിപാടികൾക്ക് ജെ ആർ സി കുട്ടികൾ നേതൃത്വം നൽകുകയും നല്ല നേതൃത്വപാടവമുള്ളവരായി മാറുകയും ചെയ്യുന്നു. ജെ ആർ സി കുട്ടികൾക്കായി നടത്തുന്ന എ, ബി, സി ലെവൽ പരീക്ഷകളിൽ ഞങ്ങളുടെ എല്ലാകുട്ടികളും ഉന്നത വിജയം കരസ്ഥമാക്കുന്നു. ഞങ്ങളുടെ കുട്ടികൾ ഫസ്റ്റ് എയ്ഡിൽ പരിശീലനം ആർജ്ജിക്കുകയും എൽ പി, യു പി എച്ച് എസ് വിഭാഗങ്ങളിലേയ്ക്ക് ഫസ്റ്റ് എയ്ഡ് ബോക്സുകൾ തയ്യാറാക്കി നൽകുകയും ചെയ്തു. ഞങ്ങളുടെ സ്കൂളിലെ ജൈവവൈവിധ്യ പാർക്കിനെ മനോഹരമാക്കാൻ ജെ ആർ സി കുട്ടികൾ തങ്ങളുടെ കഴിവിന്റെ പരമാവധി ശ്രമിക്കുന്നു.കുട്ടികളിൽ നിന്നും വസ്ത്രങ്ങൾ, സോപ്പ്, പേസ്റ്റ്, ബ്രഷ് എന്നിവ ശേഖരിച്ച് ജൂണിയർ റെഡ്ക്രോസിൽ പ്രവർത്തിക്കുന്ന കുട്ടികൾ അദ്ധ്യാപകരുടെ സഹായത്തോടെ ഓർഫനേജുകളിലും അഗതി മന്ദിരങ്ങളിലും എത്തിക്കുന്നു.

ബാന്റ് ട്രൂപ്പ്

സ്കൂളിലെ ഇരുപതോളം കുട്ടികൾ ബാന്റ് ട്രൂപ്പിൽ പ്രവർത്തിക്കുന്നു. അച്ചടക്കം, ഏകാഗ്രത എന്നിവയിൽ പ്രത്യേക പരിശീലനം ലഭിക്കുകയും ബാന്റിൽ മികവ് നേടുകയും ചെയ്യുന്നു. സബ്ജില്ലാ, ജില്ലാ കലോത്സവങ്ങളിലെ സ്ഥിരം സാന്നിദ്ധ്യമാണ് ഫാത്തിമ മാതയിലെ കുട്ടികളുടെ ബാന്റ് ട്രൂപ്പ്

ജൈവ വൈവിധ്യ പാർക്ക്

ജൈവവൈവിധ്യത്തിന്റെ സംരക്ഷണവും അതിന്റെ സുസ്ഥിരമായ പരിപാലനവും നിലനിൽപ്പിന്റെ അവിഭാജ്യ ഘടകങ്ങളിലൊന്നാണ്. പരിസ്ഥിതിയിലും കാലാവസ്ഥയിലും മാറിമാറി സംഭവിക്കുന്ന വ്യതിയാനങ്ങൾക്കൊപ്പം ഭൂമിശാസ്ത്ര സാംസ്കാരിക പ്രത്യേകതകളും കൂടി ചേർന്ന് എല്ലാ തലങ്ങളിലും ജീവശാസ്ത്രപരമായ ഒരു വൈവിധ്യമാണ് നിലനിൽക്കുന്നത്.ഞങ്ങളുടെ സ്കൂളിലും വളരെ മനോഹരമായ ജൈവവൈവിധ്യ പാർക്ക് തയ്യാറാക്കിയിട്ടുണ്ട്. വൃക്ഷങ്ങളും ചെറുവൃക്ഷങ്ങളും, കുറ്റിച്ചെടികളും, ഫലവൃക്ഷങ്ങളും , വള്ളിപ്പടർപ്പുകളും , പടർന്നുവളരുന്ന ചെടികളും, പൂച്ചെടികളും ഒക്കെയായി ആരെയും ആകർഷിക്കുന്ന ജൈവവൈവിധ്യപാർക്ക്. 15 സെന്റ് സ്ഥലത്താണ് ഈ പാർക്ക് സ്ഥിതിചെയ്യുന്നത്. ജൈവവൈവിധ്യ പാർക്കിനായി മാറ്റി വച്ചിരിക്കുന്ന 15 സെൻറ് സ്ഥലത്ത് വിവിധ സസ്യങ്ങൾ നട്ടു നനച്ചു പരിപാലിച്ചു വരുന്നു. ജൈവവൈവിധ്യ ഉദ്യാനത്തിന്റെ ചുമതലയുള്ള അധ്യാപകരുടെ മേൽനോട്ടത്തിൽ, നേച്ചർ ക്ലബിന്റെ സഹകരണത്തോടെ പാർക്കിന്റെ പ്രവർത്തനങ്ങൾ സുഗമമായി നടന്നു വരുന്നു. വിവിധ പൂച്ചെടികൾ, ശലഭ പാർക്ക്, ചെറു മരങ്ങൾ, ഔഷധസസ്യങ്ങൾ, കള്ളിമുൾച്ചെടി, മുളക്കൂട്ടം, ഫലവൃക്ഷങ്ങൾ, വള്ളിച്ചെടികൾ, ആമക്കുളം, ആമ്പൽകുളം, മീൻകുളം, പക്ഷിക്കൂട് ഇവയെല്ലാം പരിമിതമായ സ്ഥലത്തു ക്രമീകരിച്ചിട്ടുണ്ട്. ശലഭ പാർക്കിൽ ശലഭങ്ങളെ പ്രത്യേകം ആകർഷിക്കുന്ന തരത്തിലുള്ള മെലസ്ട്രോമ, ചെമ്പരത്തി, ചെത്തി, കോസ്മോസ്, ജമന്തി, അരളി, സൗഗന്ധികം, ദശപുഷ്പങ്ങൾ, കൊങ്ങിണി തുടങ്ങിയ ചെടികൾ സുലഭമായുണ്ട്. ഇവിടെ ശലഭങ്ങളും, തുമ്പികളും, ചിലതരം പക്ഷികളും എപ്പോഴും ഉണ്ട്. വിവിധതരം ഔഷധസസ്യങ്ങളുടെ കലവറ തീർക്കാനുള്ള ശ്രമത്തിലാണ്. ഇപ്പോൾ അശോകം, അമൃത്, ആടലോടകം, ആവണക്ക്, ഉങ്ങ്, എരുക്ക്, കയ്യോന്നി,കറിവേപ്പ്, കരിനെച്ചി, കറ്റാർ വാഴ, കാറ്റെക്സ്, കീഴാർനെല്ലി, കുറുന്തോട്ടി, കല്ലുരുക്കി, കൂവളം, കുടകൻ, ചെമ്പരത്തി, തഴുതാമ, തിപ്പലി, തുമ്പ, തുളസി, ചെത്തി, തെച്ചി, തൊട്ടാവാടി, നന്ത്യാർവട്ടം, നീലയമരി, നെല്ലി, പനിക്കൂർക്ക, ചുമക്കൂർക്ക, പുളിയാറില, പൂവാംകുരുന്നില, ബ്രഹ്മി, മുക്കുറ്റി, മുയൽചെവിയൻ, മുറികൂട്ടി, മുത്തങ്ങ, മുരിങ്ങ, മൈലാഞ്ചി, രാമച്ചം, വിഷ്ണുക്രാന്തി, ശതാവരി, ശംഖുപുഷ്പം, മഞ്ഞൾ, വെളുത്തുള്ളി, ചതുരമുല്ല, പാഷൻഫ്രൂട്ട് എന്നിങ്ങനെ ധാരാളം ഔഷധസസ്യങ്ങൾ പരിപാലിച്ചുവരുന്നു.സ്ട്രോബറി, വെൽവെറ്റ് ആപ്പിൾ, മുള്ളാത്ത, മുന്തിരി, പാഷൻഫ്രൂട്ട്, ഓറഞ്ച്, നെല്ലി, മാവ്, അത്തി, ചെറുനാരകം, മംഗോസ്റ്റിൻ, മാതളം, റംബുട്ടാൻ, ബട്ടർ ഫ്രൂട്ട്, ചാമ്പ, കശുമാവ്, പേര, മാതളനാരകം, ലൂബിക്ക എന്നീ ഫലവൃക്ഷങ്ങളും ഉദ്യാനത്തിലും പരിസരത്തുമായി പരിപാലിക്കുന്നു.ആമയുടെ ആകൃതിയിൽ നിർമ്മിച്ചിരിക്കുന്ന ആമക്കുളത്തിലും ചെറിയ ആമ്പൽക്കുളത്തിലും ഗപ്പി മത്സ്യങ്ങളും, ചെറുമത്സ്യങ്ങളും, തവളകളും കൂടാതെ വിരിഞ്ഞു നില്ക്കുന്ന ആമ്പൽപ്പൂക്കളും ധാരാളം ഉണ്ട്. കൊച്ചുകുഞ്ഞുങ്ങളുടെ ആകർഷണ കേന്ദ്രമാണീ വർണ്ണക്കാഴ്ചകൾ.ജൈവവൈവിധ്യ ഉദ്യാനത്തോടു ചേർന്നുള്ള മീൻകുളത്തിൽ തീലാപ്പിയ, നട്ടർ, വാള, ഗൗര, ഗപ്പി എന്നീ മത്സ്യങ്ങൾ ധാരാളം ഉണ്ട്. ഈ കുളത്തിലെ വെള്ളം പ്രയോജനപ്പടുത്തി അക്വാപോണിക്സ് കൃഷിരീതി അവലംബിക്കാനുള്ള പ്രാരംഭ നടപടികൾ തുടങ്ങിക്കഴിഞ്ഞു. ലൗ ബേഡ്സ്, കുരുവികൾ എന്നീ അലങ്കാര പക്ഷികളുടെ കളകൂജനങ്ങളാൽ ശബ്ദ മുഖരിതമാണ് ഉദ്യാനം. സ്വാഭാവിക പ്രജനനത്തിലൂടെ വംശവർദ്ധനവ് നടത്തി ഇവ പെരുകുന്നു. ഇവയുടെ വിവിധവർണ്ണങ്ങളും, കലപിലകളും, കുഞ്ഞുങ്ങളെ ഇവരുടെ നിത്യസന്ദർശകരാക്കുന്നു.സ്ട്രോബെറി ഗാർഡൻ ജൈവ വൈവിധ്യ ഉദ്യാനത്തിൽ ഏതാണ്ട് ഇരുപത്തിയഞ്ച് കടയോളം സ്ട്രോബെറി ചെടികൾ നട്ടുപിടിപ്പിച്ചിട്ടുണ്ട്. മത്സ്യക്കുളത്തോടും പക്ഷിക്കൂടിനോടും ചേർന്ന സ്ഥലത്തായതിനാൽ കുട്ടികൾ ഇവയെ നിരീക്ഷിക്കുകയും പഠന വിഷയമാക്കുകയും ചെയ്യുന്നു. സ്കൂളിന്റെ പരിസരങ്ങളിലും ജൈവവൈവിധ്യ ഉദ്യാനത്തിലും വിവിധയിനം മുളകൾ നട്ടുപിടിപ്പിച്ചിരിക്കുന്നു. പലതരത്തിലുള്ള കാറ്റെക്സുകൾ ഇവിടെ ധാരാളമായി നട്ടുപിടിപ്പിച്ചിരിക്കുന്നു. ഭൂപ്രകൃതിയനുസരിച്ച്, സ്കൂളിന്റെ വിവിധ ഇടങ്ങളിലായി പരിപാലിക്കപ്പെട്ടിരിക്കുന്ന വൃക്ഷലതാദികളാൽ സ്കൂൾ പരിസരം ഹരിതാഭമാണ്. വിവിധ ഇലച്ചെടികളും, വള്ളിച്ചെടികളും, മനോഹാരിത വർദ്ധിപ്പിക്കുന്നു. ഉദ്യാനം സംരക്ഷിക്കുന്നതിൽ കുട്ടികൾക്ക് നല്ല ശ്രദ്ധയുണ്ട്. 2018-19 അദ്ധ്യയന വർഷത്തിൽ മികച്ച ജൈവവൈവിധ്യ പാർക്കുകളിലൊന്നായി ഫാത്തിമ മാതായുടെ ജൈവവൈവിധ്യ പാർക്ക് തെരഞ്ഞെടുക്കപ്പെട്ടു എന്നത് ഏറെ സന്തോഷം പകരുന്നു

കാരുണ്യ ഫണ്ട്

ജെ ആർ സിയിൽ പ്രവർത്തിക്കുന്ന കുട്ടികളുടെ നേതൃത്വത്തിൽ എല്ലാ വെള്ളിയാഴ്ചയും ഓരോ ക്ലാസ്സിലെ കുട്ടികളിൽ നിന്നും ഫണ്ട് ശേഖരിക്കുന്നു. കാരുണ്യ ഫണ്ട് എന്ന പേരിൽ അറിയപ്പെടുന്ന പുവർ ഫണ്ട് കളക്ഷനിൽ ഏറെ സന്തോഷത്തോടെ കുട്ടികൾ സഹകരിക്കുന്നു. സ്കുളിലെ തന്നെ നിർധനരായ കുട്ടികളെ സഹായിക്കാനാണ് ഇത് പ്രയോജനപ്പെടുത്തുന്നത്.

ക്ലീൻ ക്യാംപസ് - ഗ്രീൻ ക്യാപസ്

വിവിധ ക്ലബ്ബുകളുടെ നേതൃത്വത്തിൽ സ്കുളും പരിസരവും ക്ലാസ്സ് മുറികളും വൃത്തിയായും പ്ലാസ്റ്റിക് രഹിതമായും സൂക്ഷിക്കാൻ പ്രത്യേക ശ്രദ്ധപതിപ്പിക്കുന്നു. ഓരോ ദിവസവും സ്കൂളും പരിസരവും വൃത്തിയായി സൂക്ഷിക്കാൻ നേതൃത്വം നൽകുന്നത് ഓരോ ക്ലബ്ബുകളിലും അംഗങ്ങളായ കുട്ടികളാണ്.

ഹരിത വിമല വിദ്യാലയം

സ്കൂൾ പരിസരങ്ങളിൽ പൂച്ചെടികളും കൊച്ചുമരങ്ങളും നട്ടുപിടിപ്പിച്ച് മനേഹരമാക്കാൻ പ്രത്യേക ശ്രദ്ധപതിപ്പിക്കുന്നു

തായ്ക്കോണ്ട

സ്പോർട്സ് കൗൺസിലിന്റെ സഹായത്തോടെ, ഫാത്തിമ മാതാ സ്കൂളിൽ തായ്ക്കോണ്ട പരിശീലനം നടക്കുന്നു.കുട്ടികളുടെ സ്വയം പ്രതിരോധ പദ്ധതിയായ തായ്ക്കോണ്ടയിൽ ഈ അധ്യയന വർഷം അൻപതോളം കുട്ടികൾ പരിശീലനം നടത്തുന്നു.കഴിഞ്ഞ അദ്ധ്യയന വർഷത്തിൽ 18 കുട്ടികൾ സബ്ജില്ലാ മത്സരത്തിൽ പങ്കെടുക്കുകയും 12 കുട്ടികൾ ജില്ലാതലമത്സരത്തിലേയ്ക്ക് യോഗ്യത നേടുകയും ചെയ്തു. 8 കുട്ടികൾ സംസ്ഥാനതലത്തിൽ പങ്കെടുത്ത് സമ്മാനങ്ങൾ നേടി.ഈ അദ്ധ്യയന വർഷവും ധാരാളം കുട്ടികൾ തായ്ക്കോണ്ടയിൽ പരിശീലനം നേടുന്നു

യോഗ

കുട്ടികളുടെ കായിക ക്ഷമത മെച്ചപ്പെടുത്തുന്നതിനും ശരിര ഘടന രൂപീകരണത്തിനും യോഗാസനങ്ങളുടെ പ്രാധാന്യം വളരെ വലുതാണ്. കാര്യക്ഷമമായ രീതിയിൽ യോഗ പരിശീലനത്തിലൂടെ ദൈനംഗിന ജീവിതത്തിൽ ഉണ്ടാകാവുന്ന പല രോഗങ്ങളും മാറ്റാൻ കഴിയും. നല്ല ആരോഗ്യം, മനസ്സിന്റെ സന്തുലനം, ആത്മ സാക്ഷാത്ക്കാരം എന്നിവനേടിയെടുക്കാനും മനസിനെ നിയന്ത്രിക്കാനും വികസിപ്പിക്കാനുമുള്ള ക്രമാനുഗതമായ പ്രവർത്തനമാണ് യോഗ. ഫാത്തിമ മാതാ സ്കൂളിലും കുട്ടികൾക്ക് യോഗ ക്ലാസ്സുകൾ നൽകുന്നു.

പരിശീലനം കലയുടെ മികവിനായി...

നൃത്തം, സംഗീതം, അഭിനയം, ചിത്രരചന എന്നിവയിൽ അഭിരുചിയുള്ള കുട്ടികളെ കണ്ടെത്തി പ്രത്യേക പരിശീലനം നൽകുന്നു. പരിശീലനം ലഭിക്കുന്ന കുട്ടികൾ ഉപജില്ലാ, ജില്ലാ, സംസ്ഥാന കലോത്സവങ്ങളിൽ തിളങ്ങുന്നു. ഈ അദ്ധ്യയനവർഷം ഫാത്തിമ മാതാ സ്കൂളിൽ നിന്നും 75 കുട്ടികൾ സംസ്ഥാന കലോത്സവത്തിൽ പങ്കെടുത്ത് ഗ്രേഡുകൾ സ്വന്തമാക്കി

വിനോദത്തിലൂടെ വിജ്ഞാനം

എല്ലാ വർഷവും ക്ലാസ്സടിസ്ഥാനത്തിൽ കുട്ടികളെ വിനോദയാത്രയ്ക്ക് കൊണ്ടുപോകുന്നു. കുട്ടികൾക്ക് കൂടുതൽ സ്ഥലങ്ങൾ അടുത്തറിയാനും വിവിധ സംസ്കാരങ്ങൾ മനസ്സിലാക്കുവാനും കൂടുതൽ വിജ്ഞാനം ആർജ്ജിച്ചെടുക്കുവാനും സാധിക്കുന്നു. അതുവഴി സാമൂഹ്യപ്രതിബദ്ധത വളർത്തിയെടുക്കുവാനും സാധിക്കുന്നു

ക്ലാസ് മാഗസിൻ

ഒന്നു മുതൽ പത്ത് വരെയുള്ള ക്ലാസ്സുകളിലെ കട്ടികൾക്കായി ക്ലാസ്സടിസ്ഥാനത്തിൽ ക്ലാസ്സ് മാഗസിൻ തയ്യാറാക്കൽ മത്സരം നടത്തുന്നു. എൽ പി, യുപി എച്ച് വിഭാഗങ്ങളായി തരംതിരിച്ച് ഏറ്റവും മികച്ച ക്ലാസ്സ് മാഗസിനുകൾക്ക് സമ്മാനങ്ങൾ വിതരണം ചെയ്യുന്നു

വിദ്യാരംഗം കലാ സാഹിത്യ വേദി

കലാ സാഹിത്യ മേഖലകളിൽ നൈപുണ്യം നേടുവാൻ വിദ്യാരംഗം കലാസാഹിത്യവേദി നടത്തുന്ന എല്ലാ മത്സരങ്ങളിലും പങ്കെടുക്കുന്നു. സബ് ജില്ലാ - ജില്ലാ - സംസ്ഥാന തലങ്ങളിൽ മികച്ച വിജയം കൈവരിക്കുന്നു. വിദ്യാരംഗം കലാസാഹിത്യവേദിയുടെ നേതൃത്വത്തിൽ കഥാരചന, കവിതാരചന, ചിത്രരചന. തിരക്കഥ, അഭിനയം എന്നിവയിൽ പ്രത്യേക പരിശീലനം നൽകുന്നു. സ്വഭാവികവും തനിമയാർന്നതുമായ പ്രവർത്തനത്തിലൂടെ തിരക്കഥ എഴുതുവാനും അത് അഭിനയിക്കുവാനും കുട്ടികളെ തയ്യാറാക്കുന്നു. പ്രത്യേക അവസരങ്ങളിൽ അതിന് അവർ തയ്യാറായി ചെയ്യാൻ പ്രാപ്തരാക്കുകയും ചെയ്യുന്നു. വിദ്യാരംഗം കലാസാഹിത്യവേദിയുടെ നേതൃത്വത്തിൽ വായനാവാരം പുതുമ നിറഞ്ഞതാക്കുന്നു. കഥാരചന, കവിതാരചന, ചിത്രരചന, കവിതാപാരായണം, നാടൻപാട്ട്, പുസ്തകപ്രദർശനം, ക്വിസ് മത്സരങ്ങൾ എന്നിവ നടത്തി സമ്മാനം നൽകുന്നു. ഈ അധ്യയന വർഷവും വിദ്യാരംഗം കലാ സാഹിത്യ വേദി വളരെ വിപുലമായ രീതിയിലാണ് സ്കൂളിൽ വായനാവാരം ആഘോഷിച്ചത്. ഓരോ ദിവസവും വളരെ വ്യത്യസ്തങ്ങളായ പരിപാടികൾ സ്കൂളിൽ സംഘടിപ്പിച്ചു. പി എൻ പണിക്കരെ പണിക്കരെ പരിചയപ്പെടൽ, വായനാദിനത്തിന്റെ പ്രാധാന്യം, പുസ്തകാസ്വാദനം, കുട്ടികൾ എഴുതിത്തയ്യാറാക്കിയ കഥ, കവിത എന്നിവ അവതരിപ്പിക്കൽ, ക്വിസ് മത്സരങ്ങൾ, വായനാ വൃക്ഷ നിർമ്മാണം എന്നിവ കുട്ടികൾ ഏറെ സന്തോഷത്തോടെ സ്വികരിച്ചു

സയൻസ് ക്ലബ്

വിദ്യാർത്ഥികളുടെ ശാസ്ത്രാഭിമുഖ്യവും ക്രിയാത്മകതയും വർദ്ധിപ്പിച്ച് ശാസ്ത്രലോകത്തിന്റെ നാൾ വഴികളിൽ നാഴികകല്ലുകളായി തീരുവാൻ അവരെ പ്രാപ്തരാക്കുക എന്ന ഉദ്ദേശ്യത്തോടെ ശാസ്ത്ര അദ്ധ്യാപകരോടൊപ്പം വിദ്യാർത്ഥികളും തങ്ങളുടെ സർഗ്ഗവാസനകളെ പരിപോഷിപ്പിക്കുന്ന വേദിയാണ് ഫാത്തിമ മാതയുടെ ശാസ്ത്ര ക്ലബ്ബ്. പരിസ്ഥിതി ക്ലബിനോടൊപ്പം വ്യക്ഷതൈ നട്ട് പരിപാലിക്കുന്നതിലും പച്ചക്കറിവിത്ത് വിതരണത്തിലും സയൻസ് ക്ലബ്പ്രചോദനവും പ്രോത്സാഹനവും നൽകുന്നു. ദിനാചരണങ്ങളുമായി ബന്ധപ്പെട്ട് ബോധവൽക്കരണ റാലികളും വിവിധ മത്സരങ്ങളും നടത്തുന്നു. ശാസ്ത്ര‍ജ്ഞൻമാരുടെ ജീവചരിത്രക്കുറിപ്പ് തയ്യാറാക്കി അവതരിപ്പിക്കുന്നതിനുള്ള അവസരവും കുട്ടികൾക്ക് നൽകുന്നു. ഫീൽഡ് ട്രിപ്പുകൾ സംഘടിപ്പിച്ച് കുട്ടികളിലെ ശാസ്ത്രാഭിരുചികളെ വളർത്താൻ അവസരമൊരുക്കുന്നു. ശാസ്ത്രപ്രവർത്തനത്തിന്റെ ഭാഗമായി LP, UP, HSവിഭാഗങ്ങൾക്ക് വിവിധ മത്സരങ്ങൾ നടത്തുകയും മികവ് തെളിയിച്ചവരെ ഉപജില്ലാമത്സരങ്ങളിൽപങ്കെടുപ്പിക്കുകയും ചെയ്യുന്നു. സംസ്ഥാന ശാസ്ത്ര മേളകളിൽ ഫാത്തിമ മാതയിലെ കുട്ടികൾ സജീവ സാന്നിദ്ധ്യമാണ്.

സോഷ്യൽ സയൻസ് ക്ലബ്

ഞങ്ങളുടെ സ്കൂളിൽ സോഷ്യൽ സയൻസ് ക്ലബ്ബ് വളരെ നല്ല രീതിയിൽ പ്രവർത്തിക്കുന്നു. സ്കൂളിൽ എല്ലാ ദിവസവും ക്ലാസ്സുകളിൽ പത്രമെത്തിക്കുകയും ഓരോ ക്ലാസ്സുകളിലെയും ക്ലബ്ബംഗങ്ങളുടെ നേതൃത്വത്തിൽ പത്ര വായന പ്രോത്സാഹിപ്പിക്കുകയും ചെയ്യുന്നു. സാമൂഹ്യ ശാസ്ത്ര ദിനാചരണങ്ങൾ വളരെ ആകർഷകമായി വിവിധ പരിപാടികളോടെ നടത്തപ്പെടുകയും ദിനാചരണ സന്ദേശങ്ങൾ നൽകി കുട്ടികളിൽ ബോധവൽക്കരണം നടത്തുകയും ചെയ്യുന്നു. ദിനാചരണങ്ങളോടനുബന്ധിച്ച് ക്വിസ്, ചുവർപത്രിക, സ്കിറ്റ്, റാലി എന്നിവ നടത്തുകയും ബുള്ളറ്റിൻ ബോർഡ് തയ്യാറാക്കുകയും ചെയ്യുന്നു.സ്കൂൾ തല സാമൂഹ്യ ശാസ്ത്രമേളയിൽ വിജയികളെ കണ്ടെത്തുകയും സബ്ജില്ലാ, ജില്ല, സംസ്ഥാന തലങ്ങളിലേയ്ക്ക് കുട്ടികൾക്ക് വേണ്ട നിർദ്ദേങ്ങൾ കുട്ടികളെ ഒരുക്കുകയും ചെയ്യുന്നു. ഈ അധ്യയന വർഷത്തെ സ്കൂൾതല ഗണിതശാസ്ത്ര മേള സാമൂഹ്യ ശാസ്ത്ര ക്ലബ്ബിന്റെ നേതൃത്വത്തിൽ ജൂലൈ 23 ന് നടത്തുകയും വിജയികളെ കണ്ടെത്തി ഉപജില്ല സാമൂഹ്യ ശാസ്ത്ര മേളയ്ക്കായി കുട്ടികളെ ഒരുക്കുകയും ചെയ്യുന്നു.

മാത്സ് ക്ലബ്

എന്തിനും ഒരു കണക്ക് വേണം അത് കാണാൻ ഒരു കണ്ണ് വേണം കണ്ണ് തെളിയാൻ അറിവ് വേണം അറിവുണ്ടാകാൻ ‍ വായിക്കണം ചിന്തിക്കണം പഠിക്കണം പണിയെടുക്കണം - വായിക്കാൻ, ചിന്തിക്കാൻ, പഠിക്കാൻ, പണികൾ പലതും ചെയ്യാൻ ഗണിത ക്ലബ്ബ് അവസരമൊരുക്കുന്നു. സ്കൂൾതല ഗണിതശാസ്ത്ര മേള ഗണിത ക്ലബ്ബിന്റെ നേതൃത്വത്തിൽ ജൂലൈ 23 ന് നടത്തുകയും വിജയികളെ കണ്ടെത്തി ഉപജില്ല ഗണിത മേളയ്ക്കായി കുട്ടികളെ ഒരുക്കുകയും ചെയ്യുന്നു.

ഇംഗ്ലീഷ് ക്ലബ്

കുട്ടികൾക്ക് ഇംഗ്ലീഷിൽ നന്നായി സംസാരിക്കുവാനും ആശയവിനിമയം നടത്തുന്നതിനുമുള്ള പ്രത്യേക പരിശീലനം ഇംഗ്ലീഷ് ക്ലബ്ബിന്റെ നേതൃത്വത്തിൽ നടത്തുന്നു. ആഴ്ചയിലൊരു ദിവസം നടത്തുന്ന ഇംഗ്ലീഷ് അസംബ്ലിയിൽ ഇംഗ്ലീഷ് ക്ലബ്ബിലെ കുട്ടികൾ നേതൃത്വം നൽകുന്നു. കൂടാതെ ഇംഗ്ലീഷിൽ എസ്സെ റൈറ്റിംഗ്, റെസ്സിറ്റേഷൻ, സ്പീച്ച്, സ്കിറ്റ് എന്നിവയിൽ പ്രത്യേക പരിശീലനവും നൽകുന്നു. കഴിഞ്ഞ അദ്ധ്യയന വർഷത്തിൽ സംസ്ഥാന തല കലോത്സവത്തിൽ ഇംഗ്ലീഷ് സ്കിറ്റിന് എ ഗ്രേഡ് നേടുവാൻ ഫാത്തിമ മാതയുടെ കുട്ടികൾക്കായി.

എക്കോ ക്ലബ്

എക്കോ ക്ലബ്ബിന്റെ നേതൃത്വത്തിൽ പ്രകൃതിയെ സംരക്ഷിക്കുക മനുഷ്യന്റെ കടമയാണ് എന്ന ബോധ്യം കുട്ടികളിൽ ജനിപ്പിക്കുക എന്ന ഉദ്ദേശ്യത്തോടെ പരിസ്ഥിതി ദിനാചരണം നടത്തുന്നു. വൃക്ഷത്തെകൾ നടുന്നു. പരിസ്ഥിതി ദിന സന്ദേശം നൽകുന്നു. ലഹരിയുടെ ദൂഷ്യ വശങ്ങളെക്കുറിച്ച് ബോധ്യപ്പെടുത്താൻ ലഹരി വിരുദ്ധ ദിനം വിവിധ പരിപാടികളോടെ ആചരിച്ചു. ഓസോൺ പാളിക്കുണ്ടാകുന്ന ശോഷണം, മനുഷ്യ ജീവിതത്തെ കാർന്ന് തിന്നുന്ന കാൻസർ പോലെയുള്ള മാരക രോഗങ്ങൽക്ക് കാരണമാകുന്നവെന്ന ബോധ്യം ജനിപ്പിക്കുവാൻ ഓസോൺദിനം ആചരിക്കുന്നു. ഹിരോഷിമാ ദിനാചരണം, ചാന്ദ്രദിനാചരണം, ആൽബർട്ട് ഐൻസ്റ്റീൻ ദിനാചരണം, സി വി രാമൻ ദിനാചരണം എന്നിവയെല്ലാം വിവിധ പരിപാടികളോടെ ആചരിക്കുന്നു.

നേച്ചർ ക്ലബ്

നേച്ചർ ക്ലബ്ബിന്റെ നേതൃത്വത്തിൽ സ്കൂളിൽ പഠനയാത്രകൾ സംഘടിപ്പിക്കുകയും മരങ്ങളെയും, പുഴകളെയും വനങ്ങളെയും പ്രകൃതിയെയും അടുത്തറിയാനൊരു സംഘ പഠനയാത്ര നടത്തുകയും ചെയ്യുന്നു.

നേച്ചർ ക്യാംപ് @ തേക്കടി

2019 ഡിസംബർ 26, 27 തീയതികളിലായി 35കുട്ടികളും 2 അദ്ധ്യാപകരും അടങ്ങുന്ന സംഘമാണ് നേച്ചർ ക്യാംപിനായി തേക്കടിയിലെത്തിയത്. സമുദ്രനിരപ്പിൽ നിന്ന് 900 മുതൽ - 1800 വരെ മീറ്റർ ഉയരത്തിലാണ് തേക്കടിയും പരിസരവും. തേക്കടിയിലെ വനപ്രദേശങ്ങൾ ഇന്ത്യയിലെ തന്നെ ഏറ്റവും മികച്ച വന്യജീവി സങ്കേതമാണ്. തേക്കടി എന്ന് കേട്ടാലുടൻ മനസ്സിൽ വരുന്നത് സ്വതന്ത്രമായി വിഹരിക്കുന്ന ആനക്കൂട്ടങ്ങളും സുഗന്ധവിളതോട്ടങ്ങളുമാണ്. 5 മണികൂർ നീണ്ട യാത്രയ്ക്ക് ശേഷമാണ് സംഘാംഗങ്ങൾ പെരിയാർ ടൈഗർ റിസർവ്വിലെത്തിച്ചേർന്നത്. ആദ്യം തന്നെ ഒരു ക്ലാസ്സ് സെഷനായിയുന്നു അവിടെ ഞങ്ങൾക്കായി ഒരുക്കിയിരുന്നത്. നേച്ചർ എഡ്യൂക്കേഷൻ ആപീസറായ ശ്രീമതി ആശാറാണിയാണ് ക്ലാസ്സുകൾക്ക് നേതൃത്വം നൽകിയത്. 925ചതുരശ്ര കിലോമീറ്റർ ചുറ്റളവിലുള്ള പെരിയാർ വന്യജീവി സങ്കേതത്തിൽ കുട്ടികളെ കാത്തിരിക്കുന്നത് അതിമനോഹരമായ കാഴ്ച്ചകളാണെന്ന് മാഡം ഞങ്ങൾക്ക് പറഞ്ഞുതന്നു. കേരലത്തിലെ തന്നെ പ്രശസ്തമായ ശബരിമല ക്ഷേത്രവും മംഗളാദേവി ക്ഷേത്രവും പെരിയാറിന്റെ കിഴക്ക് പടിഞ്ഞാറ് ഭാഗത്തായി നിത്യഹരിത വനത്തിൽ സ്ഥിതിചെയ്യുന്ന രണ്ട് ക്ഷേത്രങ്ങളാണ്. ഴു മണിയോടുകൂടി ക്ലാസ്സുകൾ അവസാനിച്ചു. 27ാം തീയതി രാവിലെ 8.30തോടുകൂടി ട്രക്കിഗ് ആരംഭിച്ചു. ഓരോ കാലടികളും ഏകാഗ്രവും നിശബ്ദവുമായിരിക്കണം എങ്കിൽ മാത്രമേ കാടുണർന്നു വിളിക്കുന്നത് നമുക്ക് കേൾക്കാനാവൂ. ഇവിടെയിനി ശബ്ദിക്കുന്നത് കാടാണ്. കുട്ടികൾ കേൾവിക്ന്നതിന് കാർ മാത്രം. എല്ലാ ഭാരങ്ങളുമൊഴിഞ്ഞ മനസ്സോടെ, പ്രകൃതിയുടെ പച്ചപ്പട്ട് പുതച്ച വിരിമാറിലേയ്ക്ക്, മടിത്തട്ടിലേയ്ക്ക് കൗതുക കാവ്ച്ചകളിലേയ്ക്ക് ഒരു നടത്തം. ഞങ്ങൽക്ക് നിർദ്ദേശങ്ങൾ നൽകുന്നതിനായി നേച്ചർ ഒഫീസർ ആയ ശ്രീ. വിൽസൺ സാറു കൂടെയുണ്ടായിരുന്നു. ഇലപൊഴിയും കാടുകളും നിത്യഹരിത വനങ്ങളും അതിന്റെ എല്ലാ സൗന്ദര്യത്തോടും കൂടി നിറഞ്ഞുനിൽക്കുന്നു. പാട്ടുകളുടെ കളകളാരവത്തിൽ നിന്നും വിൽസൺ സാർ പക്ഷികളെ വേർതിരിച്ചുതന്നു. കരിങ്കുരങ്ങുകൾ മരങ്ങളിലൂടെ ചാടി നടക്കുന്നു. തെല്ലകലെ നിന്നിരുന്ന കാട്ടുപോത്ത് തിരിഞ്ഞ് ഒന്നെത്തിനോക്കി. ചതുപ്പിലും പുൽമേട്ടിലും പാറക്കെട്ടിലും ഇടതൂർന്ന വൃക്ഷങ്ങൾക്കിടയിലും വള്ളിപ്പടർപ്പിലും കൗതുകങ്ങൾ തിരയുന്നതിനിടയ്ക്കെപ്പോോഴോ നോട്ടം എപ്പോഴോ കാലുകളിലേയ്ക്കായി. എണ്ണിയെടുക്കാവുന്നതിലേറെ അട്ടകൾ. ട്രക്കിംഗിനു ശേഷം തിരിച്ചെത്തി ഭക്ഷണത്തിനു ശേഷം ഒരു ക്ലാസ്സ് സെഷനായിരുന്നു നടന്നത്. കടുവയുടെ വാസസ്ഥലം , അതിന്റെ ഇരപിടുത്തം, ഭക്ഷണ രീതി, പ്രജനനം എന്നിവയെക്കുറിച്ചുള്ള പുതു വിവരങ്ങളാണ് ഞങ്ങൾക്ക് ലഭിച്ചത്.ഒരു വനമേഖല എങ്ങനെ മനോഹരമായി സംരക്ഷിക്കാം എന്നതിനുദാഹരണമാണ് ഉത്തമോദാഹരണമാണ് പെരിയാർ വനവും വന്യജീവി സങ്കേതവും. ജില്ലയിലെമ്പാടുമായി വ്യാപിച്ചുകിടക്കുന്ന തേയില തോട്ടങ്ങളും കുന്നിൻപുറ പട്ടണങ്ങളും കൊണ്ട് ശ്രദ്ധേയമായ ഈ പ്രദേശങ്ങൾ ട്രക്കിംഗിൽ താത്പര്യമുളളവരെ ഏറെ ആകർഷിക്കും. പറഞ്ഞുകേട്ട കാര്യങ്ങൾക്കപ്പുറം ഏറെകാര്യങ്ങൾ കണ്ടുമനസ്സിലാക്കിയതിന്റെ സന്തോഷത്തിലാണ് ക്യാംപിൽ പങ്കെടുത്ത വിദ്യാർത്ഥികളും അദ്ധ്യാപകരും മടങ്ങിയത്.

കുട്ടിത്തോട്ടം

കുട്ടികളുടെ നേതൃത്വത്തിൽ സ്കൂളിൽ പച്ചക്കറി കൃഷി നടത്തുകയും കുട്ടികളുടെ ഉച്ചഭക്ഷണത്തിൽ കറികൾക്കായി ഉപയോഗിക്കുകയും ചെയ്യുന്നു

ഔഷധത്തോട്ട നിർമ്മാണം

കുട്ടികളുടേയും അദ്ധ്യാപകരുടേയും നേതൃത്വത്തിൽ സ്കൂളിൽ ഒരു ഔഷധത്തോട്ടം നട്ടുപരിപാലിച്ചുവരുന്നു. അശോകം, അമൃത്, ആടലോടകം, ആവണക്ക്, ഉങ്ങ്, എരുക്ക്, കയ്യോന്നി,കറിവേപ്പ്, കരിനെച്ചി, കറ്റാർ വാഴ, കാറ്റെക്സ്, കീഴാർനെല്ലി, കുറുന്തോട്ടി, കല്ലുരുക്കി, കൂവളം, കുടകൻ, ചെമ്പരത്തി, തഴുതാമ, തിപ്പലി, തുമ്പ, തുളസി, ചെത്തി, തെച്ചി, തൊട്ടാവാടി, നന്ത്യാർവട്ടം, നീലയമരി, നെല്ലി, പനിക്കൂർക്ക, ചുമക്കൂർക്ക, പുളിയാറില, പൂവാംകുരുന്നില, ബ്രഹ്മി, മുക്കുറ്റി, മുയൽചെവിയൻ, മുറികൂട്ടി, മുത്തങ്ങ, മുരിങ്ങ, മൈലാഞ്ചി, രാമച്ചം, വിഷ്ണുക്രാന്തി, ശതാവരി, ശംഖുപുഷ്പം, മഞ്ഞൾ, വെളുത്തുള്ളി, ചതുരമുല്ല, പാഷൻഫ്രൂട്ട് എന്നിങ്ങനെ ധാരാളം ഔഷധസസ്യങ്ങൾ പരിപാലിച്ചുവരുന്നു

പാഠ്യേതര മികവ്

പാഠ്യ രംഗത്തും പാഠ്യേതരരംഗത്തും മികച്ച പ്രവർത്തനം കാഴ്ച്ചവയ്ക്കുന്ന സ്കൂളാണ് ഫാത്തിമ മാതാ.ഈ അധ്യയന വർഷത്തിൽ പാഠ്യേതരരംഗത്ത് വളരെ മികച്ച പ്രവർത്തനം കാഴ്ച്ചവയ്ക്കുന്നതിന് ഫാത്തിമമാതയിലെ കുഞ്ഞുങ്ങൾക്കായി. സംസ്ഥാനതല ശാസ്ത്രോത്സവത്തിൽ ഹൈസ്കൂൾ വിഭാഗത്തിൽ 12 കുട്ടികളും ഹയർസെക്കൻഡറി വിഭാഗത്തിൽ 30 കുട്ടികളും പങ്കെടുത്ത് എ ഗ്രേഡുകൾ നേടി. സംസ്ഥാന കലോത്സവത്തിൽ ഹൈസ്കൂൾ വിഭാഗത്തിൽ 33 കുട്ടികളും ഹയർസെക്കൻഡറി വിഭാഗത്തിൽ 42 കുട്ടികളും പങ്കെടുത്ത് മികച്ച വിജയം നേടി. ശാസ്ത്രോൽസവത്തിൽ സംസ്ഥാന തലത്തിൽ സ്കൂൾ ആറാം സ്ഥാനം നേടി. കലോത്സവത്തിൽ സംസ്ഥാന തലത്തിൽ പത്താം സ്ഥാനവും നേടി ജില്ലയിലെ മികച്ച സ്കൂളായി മാറി.12കുട്ടികൾ രാജ്യ പുരസ്കാർ അവാർഡിന് അർഹരായി

രാജ്യപുരസ്കാർ

2019 - 2020 അദ്ധ്യയന വർഷത്തിൽ ഗൈഡിംഗിൽ 12 കുട്ടികൾ രാജ്യപുരസ്കാർ അവാർഡിന് അർഹത നേടി. പാഠ്യരംഗത്തും പാഠ്യേതര രംഗത്തും അച്ചടക്കത്തിലും തങ്ങളുടെ വ്യക്തിമുദ്ര പതിപ്പിക്കുന്ന ഈ കുട്ടികൾ മറ്റുള്ളവർക്കെന്നും മാതൃകയാണ്.

സാമൂഹിക പ്രവർത്തനങ്ങൾ

നന്മയുടെ വിത്തുകൾ കിളിർത്ത് ജലവും വളവും നേടി പരിപക്വമായി ഫലം ചൂടുന്നത് എന്നും സമൂഹത്തിലാണ്. സ്വയം ദാനം ചെയ്ത് താങ്ങാവുന്ന വ്യക്തിത്വങ്ങൾക്കിടയിലാണ് പുതു നാമ്പും പുത്തൻ ഫലങ്ങളും പുറപ്പെടുവിച്ച് സമൂഹം തഴച്ച് വളരുക. ഇത്തരം നന്മകൾ കൊടുക്കാനുള്ള മനസ്സിന്റെ ഭാരമാണ് സാമൂഹിക പ്രതിബന്ധത. മൂല്യാധിഷ്ഠവും പരസ്നേഹ പൂരിതവുമായ പുതുതലമുറയെ സ്വപ്നം കണ്ട് സമൂഹിക പ്രതിബന്ധതയുള്ള ഭാവിയെ വളർത്തിയെടുക്കാൻ അനുകൂലമായ അവസരങ്ങളും പ്രവർത്തന പരിപാടികളുമാണ് ഫാത്തിമാ മാതാ കുടുംബം കുട്ടികൾക്ക് ഒരുക്കി കൊടുക്കുന്നത്. സാമൂഹ്യ പ്രതിബദ്ധതയുടെ കാര്യത്തിൽ ഫാത്തിമമാതയിലെ കുട്ടികൾ എന്നും മുന്നിൽതന്നെ. സ്കൗട്ട് & ഗൈഡ്സ്, ജെ ആർസി, എൻ എസ് എസ് തുടങ്ങിയ സംഘടനകളും വിവിധ ക്ലബ്ബുകളും‍ അടിസ്ഥാനമാക്കി ധാരാളം കർമ്മ പരിപാടികൾ ഇതിനായി രൂപീകരിച്ചിട്ടുണ്ട്. സമൂഹത്തിലെ പാവപ്പെട്ടവരോടും രോഗികളോടും കാരുണ്യം കാണിക്കുന്ന, അവരുടെ സങ്കടങ്ങൾ മനസ്സിലാക്കുന്ന, നൻമ നിറഞ്ഞ മനസ്സ് കൈമോശം വന്നിട്ടില്ലാത്ത തലമുറ ഇവിടെ ഉണ്ട് എന്നത് ഏറെ അഭിമാനകരമാണ്. ഉള്ളത് പങ്കുവച്ച് അനേകരെ താങ്ങിയും ജീവകാരുണ്യ പ്രവർത്തനങ്ങളിൽ ആവേശത്തോടെ പങ്കുചേർന്നും ആഘോഷ വേളകളിൽ പിന്നോക്കം നിൽക്കന്നവരെ ചേർത്തു പിടിച്ചും പ്രകൃതിയെ അടുത്ത് അറിഞ്ഞും അതിനെ പരിപാലിക്കുന്നതിനായ് പ്രവർത്തന പരിപാടികൾ തയ്യാറാക്കിയും കർമ്മപഥത്തിൽ എത്തിച്ചും കുഞ്ഞുങ്ങൾ വളരുന്നു എന്നത് അഭിമാനകരമാണ്. സാമൂഹ്യ പ്രതിബദ്ധതയുള്ള പുതുതലമുറ നമ്മുടെ കരുത്താവട്ടെഈ അദ്ധ്യയന വർഷത്തിൽ തന്നെ നിരവധി സാമൂഹിക പ്രവർത്തനങ്ങളിൽ കുട്ടികൾ പങ്കാളികളായി.

സ്കൂൾ പത്രം - ഉറവ്

കുട്ടികളുടേയും അദ്ധ്യാപകരുടേയും സഹകരണത്തോടെ തയ്യാറാക്കിയ ഉറവ് എന്ന് പേരിട്ടിരിക്കുന്ന സ്കൂൾ പത്രത്തിന്റെ ആദ്യ കോപ്പി പ്രകാശനം ചെയ്തത് നമ്മുടെ കേന്ദ്ര മന്ത്രിയായ ബഹുമാനപ്പെട്ട, ശ്രീ. റിച്ചാർഡ് ഹേ ആണ് എന്നത് ഫാത്തിമ മാതയ്ക്ക് ഏറെ സന്തോഷം പകരുന്നു. കുട്ടികളുടെ മികവുകൾ സമൂഹത്തിന് മുമ്പിൽ പങ്കുവയ്ക്കുന്നതിനായി ഓരോ ടേമിലും ഉറവ് എന്ന പേരിൽ സ്കൂൾ പത്രം തയ്യാറാക്കുകയും കുട്ടികൾ വഴി എല്ലാ വീടുകളിലും എത്തിക്കുകയും ചെയ്യുന്നു. ഈ അദ്ധ്യയന വർഷത്തിലെ ഉറവ് എന്ന സ്കൂൾ പത്രത്തിന്റെ പണിപ്പുരയിലാണ് അദ്ധ്യാപകരും കുട്ടികളും

വാർത്താ ബുള്ളറ്റിൻ - ഫാത്തിമ മാതാ ടൈംസ്

സ്കൂളിൽ പ്രവർത്തിക്കുന്ന ലിറ്റിൽ കൈറ്റ്സ് ക്ലബ്ബിലെ അംഗങ്ങളായ കുട്ടികളുടെ നേതൃത്വത്തിൽ ഒൻപതാം ക്ലാസ്സിലെ കുട്ടികളാണ് വാർത്താ ബുള്ളറ്റിൻ തയ്യാറാക്കിയിരിക്കുന്നത്. ആധുനീക സങ്കേതങ്ങളോട് കിടപിടിക്കത്തക്ക രീതിയിലുള്ള കുട്ടികളുടെ വാർത്താ ബുള്ളറ്റിൻ ആരെയും അതിശയിപ്പിക്കും. ബഹുമാനപ്പെട്ട സ്കൂൾ ഹെഡ്മിസ്ട്രസ് സി. ലാലി മാണി പാത്തിമ മാതാ ടൈംസിന്റെ പ്രകാശന കർമ്മം നിർവ്വഹിച്ചു. കുട്ടികളുടെ സ്വപ്നങ്ങൾക്ക് ചിറക് വിരിക്കാൻ .....പറന്നുയരാൻ .....ഫാത്തിമ മാതാ കുടുംബം നൽകുന്ന പ്രോത്സാഹനം ..... അതൊരിക്കലും വിസ്മരിക്കാനാവില്ല.

ബോധവൽക്കരണ ക്ലാസ്സുകൾ

കുട്ടികൾക്കും രക്ഷിതാക്കൾക്കുമായി വിവിധ ബോധവൽക്കരണ ക്ലാസ്സുകൾ സംഘടിപ്പിക്കുന്നു. ക്ലാസ്സുകളിലെ കുട്ടികളുടേയും രക്ഷിതാക്കളുടേയും പങ്കാളിത്തം ഏറെ ശ്ലാഘനീയമാണ്. സൗകര്യാർത്ഥം ഓരോ വിഭാഗങ്ങളായി തിരിച്ചാണ് ബോധവൽക്കരണ ക്ലാസ്സുകൾ സംഘടിപ്പിക്കുന്നത്.

'കുഞ്ഞേ നിനക്കായ്'

കുട്ടികൾക്കെതിരെ വർദ്ധിച്ചു വരുന്ന ലൈംഗിക അതിക്രമങ്ങൾക്കെതിരെ സമൂഹത്തെ ബോധവത്ക്കരിക്കാനും, കുട്ടികളെ ലൈംഗിക ചൂഷണത്തിൽ നിന്ന് സംരക്ഷിക്കാൻ ആവിഷ്‌കരിച്ച പോക്‌സോ നിയമത്തെക്കുറിച്ച് സമൂഹത്തിൽ അവബോധം വളർത്താനുമായി കേരള പോലീസ് ആവിഷ്‌കരിച്ചു നടത്തുന്ന കർമ്മ പരിപാടിയായ 'കുഞ്ഞേ നിനക്കായ്' കൂമ്പൻപാറ ഫാത്തിമ മാതാ ഗേൾസ് ഹയർ സെക്കൻഡറി സ്കൂളിൽ നടത്തപ്പെട്ടു. കുട്ടികൾക്ക് ശോഭനമായ സുരക്ഷിതമായ ജീവിത സാഹചര്യം ഒരുക്കാൻ ഉദ്ദേശിച്ചാണ് പദ്ധതി രൂപപ്പെടുത്തിയിരിക്കുന്നതെന്ന് പോലീസ് അധികാരികൾ പറഞ്ഞു. സഞ്ചരിക്കുന്ന മിനി വാനിൽ തയ്യാറാക്കിയ സ്‌ക്രീനിൽ പോക്‌സോ നിയമത്തെക്കുറിച്ചുള്ള അവതരണവും ചാക്യാര് ‍കൂത്തും കുഞ്ഞേ നിനക്കായി എന്ന പരിപാടിയുടെ ഭാഗമായി അവതരിപ്പിക്കപ്പെട്ടു.

ഉത്സവാഘോഷങ്ങളിലൂടെ ....

എല്ലാ വർഷവും ഓണം, ശിശുദിനം, ക്രിസ്തുമസ് എന്നിവ കുട്ടികൾ ഒരുമയോടെ ആഘോഷിക്കുന്നു. ഓണാഘോഷങ്ങളിൽ എൽ പി, യു പി, എച്ച് എസ്, എച്ച് എസ് എസ് വിഭാഗങ്ങളിലായി അത്തപ്പൂവിടൽ, ഓണപ്പാട്ട്, മാവേലി വടംവലി, പുലികളിഎന്നിവ നടത്തുകയും വിജയികൾക്ക് സമ്മാനങ്ങൾ നൽകുകയും ചെയ്യുന്നു. പി ടി എ പ്രതിനിധികൾ, എം പി ടി എ പ്രതിനിധികൾ, ക്ലാസ്സ് പ്രതിനിധികൾ എന്നിവരുടെ നേതൃത്വത്തിൽ ഓണസദ്യയും ഓണപായസവും തയ്യാറാക്കുകയും ക്ലാസ് തലത്തിൽ ഓണസദ്യ ക്രമീകരിക്കുകയും ചെയ്യുന്നു. കുട്ടികൾ ഏറെ സന്തോഷത്തോടെ ഒരുമയുടേയും പങ്കുവയ്ക്കലിന്റെയും പാഠങ്ങൾ ഈ ആഘോഷത്തിലൂടെ അനുഭവവേദ്യമാക്കുന്നു. ഇത്തവണ ഫാത്തിമ മാതാ സ്കൂളിൽ വളരെ വ്യത്യസ്തമായ ഓണാഘോോഷ പരിപാടികളാണ് നടന്നത്. നിഷ്ക്കളങ്ക പുഞ്ചിരികൾക്കിടയിലെ നന്മ നിറഞ്ഞ ഒാണാഘോഷം. സന്തോഷത്തിന്റേയും സാഹോദര്യത്തിന്റേയും ഓർമ്മകൾ വിളിച്ചോതുന്ന ഓണാഘോഷപ്പരിപ്പാടികളെ ഏറ്റവും മനോഹരമാക്കുന്ന ദിനമായിരുന്നു ഫാത്തിമ മാത സ്കൂളിലെ 2019-20 വർഷത്തെ ഓണാഘോഷം. മനുഷ്യരെല്ലാവരും ഒന്നാണെന്നും ഈ ലോകത്തിലെ കൊച്ചു ജീവിതം പരസ്പ്പരം സ്നേഹിച്ചും സഹകരിച്ചും ഒന്നിച്ച് ജീവിക്കണമെന്ന സന്ദേശംത്തോടെയാണ് ഈ വർഷത്തെ ഓണം കടന്നുപോയത്. നേരത്തെ തന്നെ ബഹുമാനപ്പെട്ട ഹെഡ്മിസ്ട്രസ്സിന്റെ നേതൃത്വത്തിൽ ചുമതലകൾ വിഭജിച്ചു നൽകി. അധ്യാപകരുടെ ച്ചുമതലകൾ, P.T.A അംഗങ്ങളുടെ പങ്കാളിത്തം, രക്ഷിതാക്കളുടെ പങ്കാളിത്തം, ഓണസദ്യ, ഓണപ്പായസം, ഓണപ്പാട്ടുകൾ, വിവിധ മത്സരങ്ങൾ, മച്ചിപ്ലാവ് കാർമ്മൽ ജ്യോതി സ്പെഷ്യൽ സ്കൂളിലെ കുട്ടികളെയും അദ്ധ്യാപകരെയും ക്ഷണിയ്ക്കക്കൽ, കുട്ടികൾക്ക് സമ്മാനങ്ങൾ നൽകൽ, വിവിധ കലാപരിപാടികൾ, അധ്യാപകരുടെ സംഭാവനകൾ ..... അങ്ങനെ എല്ലാ മുന്നൊരുക്കങ്ങളും നടത്തി. ആകാംഷയോടെ അധ്യാപകരും കുട്ടികളും കാത്തിരുന്ന ആ സുന്ദര സുദിനം വന്നെത്തി. അതെ....ഫാത്തിമ മാത സ്കൂളിലെ 2019-20 വർഷത്തെ ദിനാഘോഷം. ഓരോരുത്തർക്കും കിട്ടിയിരിക്കുന്ന ഉത്തരവാദിത്വങ്ങൾ അധ്യാപകരും P.T.A അംഗങ്ങളും ഒന്നിച്ച് ചെയ്യുന്നു. കുട്ടികൾ പൂക്കളമിട്ടും പാട്ടുപ്പാടിയും, ഓണക്കളികൾ നടത്തിയും ഓണാഘോഷം പൊടിപ്പൂരമാക്കുന്നു. ഉച്ചയ്ക്ക് വിഭവസമൃദ്ധമായ കേരളീയ തനിമയാർന്ന ചോറും കറികളും പായസവും. ഞങ്ങളുടെ സ്കൂളിലേയ്ക്ക് കടന്നുവരുന്ന ഭിന്നശേഷിക്കാരായ കുട്ടികളെ സ്വാഗതം ചെയ്യുന്ന തിരക്കിലാണ് എല്ലാവരും. ഭിന്നശേഷിയുള്ള കുട്ടികൾ സമൂഹത്തിൽനിന്നും ഒരിക്കലും മാറ്റിനിർത്തപ്പെടേണ്ടവരല്ല ചേർത്തുനിർത്തേണ്ടവരാണെന്ന ബോധ്യം കുട്ടികളിലുണ്ടായി. നിഷ്ക്കളങ്കമായ പുഞ്ചിരികൾക്കിടയിൽ അവരുടെ വിവിധതരം കഴിവുകളും നിറകണ്ണുകളോടെ തന്നെ ഞങ്ങൾ കണ്ടു. അവർക്കായി സമ്മാനങ്ങൾ നൽകി. ഓണത്തിന്റെ ആഘോഷങ്ങൾക്കിടയിലും സാമൂഹ്യപ്രതിബദ്ധതയെ മുറുകെപ്പിടിക്കാൻ ഈ ആഘോഷപ്പരുപാടികൾക്ക് കഴിഞ്ഞു എന്നത് ഞങ്ങൾ അഭിമാനത്തോടെ ഓർക്കുന്നു. അവരോടൊപ്പം പങ്കിട്ട ആ ഒന്നരമണിക്കൂർ സമയം ജീവിതത്തിൽ വിലപ്പെട്ട ഒന്നായി ഫാത്തിമ മാത സ്കൂളിലെ കു‍ഞ്ഞുങ്ങൾക്ക് അനുഭവപ്പെട്ടു. സമൂഹത്തിൽ ഭിന്നശേഷിക്കാരെ അവഗണിക്കാതെ കളങ്കപ്പെടുത്താതെ മുറിപ്പെടുത്താതെ ജീവിക്കണം എന്ന സന്ദേശം കുട്ടികൾക്ക് ലഭിച്ചു. എൽപി വിഭാഗത്തിലെ കുട്ടികളാണ് ശിശുദിനാഘോഷത്തിൽ പങ്കെടുക്കുന്നത്. പ്രസംഗം, ക്വിസ്, ചാച്ചാജി, പൂക്കളറാണി എന്നീ മത്സരങ്ങൾ നടത്തി വിജയികളെ കണ്ടെത്തുകയും സമ്മാനങ്ങൽ നൽകുകയും ചെയ്യുന്നു. കുട്ടികളുടെ വിവിധ കലാപരിപാടികൾ അവതരിപ്പിക്കുകയും മധുരപലഹാരങ്ങൾ വിതരണം ചെയ്യുകയും ചെയ്യുന്നു. ക്രിസ്തുമസ് ആഘോഷങ്ങൾ കുട്ടികൾക്ക് ഏറെ പ്രിയപ്പെട്ടതാണ്. പുൽക്കൂട് മത്സരം, കരോൾഗാന മത്സരം, സാന്താക്ലോസ്സ് എന്നീ മത്സരങ്ങൾ നടത്തി വിജയികളെ കണ്ടെത്തുകയും സമ്മാനങ്ങൾ നൽകുകയും ചെയ്യുന്നു. ക്ലാസ്സ് തലത്തിൽ കേക്ക് മുറിക്കുകയും കേക്ക് കഴിച്ച് സമ്മാനങ്ങൾ പങ്ക് വച്ച് സന്തോഷത്തോടെ കുട്ടികൾ പിരിഞ്ഞു

ഓരോ കുഞ്ഞിനുമേകാം പിറന്നാൾ ആശംസകൾ

ഓരോ ആഴ്ചയിലും എൽ പി, യു പി, എച്ച് എസ് വിഭാഗങ്ങളിലായി പ്രത്യേക അസംബ്ലികൾ നടത്തുകയും ആ ആഴ്ചയിൽ പിറന്നാൾ ആഘോഷിക്കുന്ന എല്ലാ കുട്ടികൾക്കും പിറന്നാൾ ആശംസകൾ നേരുകയും ബർത്ത്ഡേ കാർഡ് നൽകുകയും ചെയ്യുന്നു.കുട്ടികൾക്ക് ഏറെ സന്തോഷം നിറഞ്ഞ അനുഭവമാണിത്. കുഞ്ഞിളം മനസ്സുകളിൽ സ്നേഹത്തിന്റെയും കരുതലിന്റെയും കാവലാളുകൾ ആകാൻ ഫാത്തിമ മാതാ വിദ്യാലയം എന്നും മുന്നിൽ തന്നെ

പോഷക സമ‌ൃദ്ധമായ ഉച്ചഭക്ഷണം

കുട്ടികൾക്കായി പോഷക സമൃദ്ധമായ ഉച്ചഭക്ഷണം തയ്യാറാക്കി, ഓരോ ക്ലാസ്സിലും എത്തിക്കുകയും ക്ലാസ്സ് ടീച്ചേഴ്സ് തന്നെ കുട്ടികൾക്ക് ഭക്ഷണം വിതരണം നൽകുകയും ചെയ്യുന്നു. ഇതിനായി സ്കൗട്ട്സ് ആന്റ് ഗൈഡ്സിന്റെ നേത്യത്വത്തിൽ പച്ചക്കറിത്തോട്ടം തയ്യാറാക്കിയിരിക്കുന്നു.

ഒരു ക്ലാസ്സിൽ ഒരു പത്രം

കുട്ടികളിൽ ദിവസവും പത്രം വായന പ്രോത്സാഹിപ്പിക്കുന്നതിനും സാമൂഹിക വീക്ഷണമുള്ളവരുമായി മാറുന്നതിനായി ഓരോ ക്ലാസിലും പത്രം എത്തിക്കുകയും കുട്ടികൾക്ക് വായിക്കുന്നതിനുള്ള അവസരം ഒരുക്കുകയും ചെയ്യുന്നു. കുട്ടികളിൽ പൊതു വിജ്ഞാനം വർദ്ധിപ്പിക്കുന്നതിൽ പത്രവായന വളരെ സഹായകരമാകുന്നു.

പിറന്നാൾ പുസ്തകം

കുട്ടികൾ തങ്ങളുടെ പിറന്നാൽ ദിവസങ്ങളിൽ ക്ലാസ്സുകളിലെ മിഠായി വിതരണം ഒഴിവാക്കി മികച്ച മൂല്യമുള്ള പുസ്തകങ്ങൾ വാങ്ങി സ്കൂളിൽ ഏൽപ്പിക്കുന്നു. ആ പുസ്തകങ്ങൾ ക്ലാസ്സ് ലൈബ്രറിയിൽ ഏൽപ്പിക്കുന്നു. എല്ലാ ക്ലാസ്സുകളിലും വളരെ മനോഹരമായി ക്ലാസ്സ് ലൈബ്രറി ഒരുക്കിയിരിക്കുന്നു.

കൗൺസിംലിംഗ്

ഒരിക്കലും കുറച്ചു ഉപദേശങ്ങൾ കൊടുക്കലല്ല കൗൺസിലിങ് , മറിച്ച് തന്റെ പ്രശ്നങ്ങൾ എന്തൊക്കെയാണെന്ന് തിരിച്ചറിയാൻ ഒരു വ്യക്തിയെ പരിശീലനം നേടിയ ഒരാൾ സഹായിക്കുകയാണ് കൗൺസിലിങിലൂടെ ചെയ്യുന്നത്. സ്വന്തം പ്രശ്നങ്ങൾ എന്തൊക്കെയാണെന്ന് ആലോചിച്ചു കണ്ടെത്താൻ സഹായിക്കുന്നു. ആ പ്രശ്ങ്ങളെ വ്യത്യസ്തമായ രീതിയിൽ എങ്ങനെ പരിഹരിക്കാം എന്ന് ചിന്തിച്ചു മനസിലാക്കാൻ സഹായിക്കുന്നു. അനവധി പരിഹാര മാർഗങ്ങൾ ഉള്ളതിൽ ഓരോന്നിന്റെയും നല്ലതും മോശവും ആയിട്ടുള്ള വശങ്ങൾ പറഞ്ഞു മനസിലാക്കിത്തരുവാൻ അല്ലെങ്കിൽ വിവേചിച്ചറിയാനായിട്ട്‌ കൗൺസിലിങ് പരിശീലിച്ചവർ സഹായിക്കുന്നു. ഇതിൽ തന്നെ ഏറ്റവും ഉചിതമായ പരിഹാരമാർഗം തെരഞ്ഞെടുക്കാൻ സഹായിക്കുന്നു. ഇത്തരം പരിഹാരമാർഗങ്ങൾ ജീവിതത്തിൽ പൂർണ്ണ ഉത്തരവാദിത്തത്തോടു കൂടി നടപ്പിലാക്കാൻ ഉള്ള ദിശാബോധം നല്കുന്ന പ്രക്രിയയാണ് കൗൺസിലിങ്. അതുകൊണ്ടു തന്നെ കൗൺസിലിങ് ഒരു ഉപദേശം കൊടുക്കലല്ല . ഒരു ശാക്തീകരണപ്രക്രിയയാണ്‌. മാനസീകമായും ശാരീരികമായും ബുദ്ധിമുട്ടനുഭവിക്കുന്ന കുട്ടികൾക്കും രക്ഷിതാക്കൾക്കും കൗൺസിലിംഗ് നൽകുന്നതിനുള്ള സംവിധാനം സ്കൂളിൽ പ്രവർത്തിക്കുന്നു. പലപ്പോഴും ജീവിതവിജയത്തിലെത്തിച്ചേരാൻ, നഷ്ടപ്പെട്ടെന്ന് കരുതിയ ജീവിതത്തെ തിരികെ പിടിക്കാൻ കുട്ടികൾക്കും രക്ഷിതാക്കൾക്കും കൈത്താങ്ങൊരുക്കുന്നു ഫാത്തിമമാത

കുട്ടികളുടെ ഭവന സന്ദർശനം

ഓരോ ക്ലാസ്സുകളിലേയും കുട്ടികളുടെ വീടുകൾ ക്ലാസ്സ് ടീച്ചർമാരുടെ നേതൃത്വത്തിൽ സന്ദർശിക്കുകയും അവരുടെ ജീവിത സാഹചര്യങ്ങൾ കണ്ടെത്തി വേണ്ട നിർദ്ദേശങ്ങളും പ്രോത്സാഹനങ്ങളും നൽകി കുഞ്ഞുങ്ങളെ നയിക്കുകയും ചെയ്യുന്നു. ഈ സന്ദർശനം വഴി കുട്ടികളുടെ ജീവിത സാഹചര്യം മനസ്സിലാക്കാനും അവരെ വേണ്ടരീതിയിൽ പ്രോത്സാഹിപ്പിക്കാനും അദ്ധ്യാപകർക്ക് കഴിയുന്നു.

കൈത്താങ്ങ്

സ്കൂളിൽ പ്രവർത്തിക്കുന്ന ജെ ആർ സി യൂണിറ്റിന്റെ നേതൃത്വത്തിൽ നിർധനരായ കുട്ടികളെ കണ്ടെത്തി അവർക്ക് പഠനം, ഭവന നിർമ്മാർന്നാണം, ചികിത്സാസഹായം എന്നിവ നൽകുന്നു. ഓരോ ക്ലാസ്സിലേയും നിർധനരായ കുട്ടികളെ സഹായിക്കുന്നതിനായി ക്ലാസ് തലത്തിൽ കുട്ടികളിൽ നിന്ന് കൊച്ചുകൊച്ചു സംഭാവനകൾ സ്വീകരിക്കുകയും അർഹരായ കുട്ടികൾക്ക് നൽകുകയും ചെയ്യുന്നു. കൂടാതെ ഈ കുട്ടികളുടെ പഠനച്ചിലവ് കുട്ടികളും അദ്ധ്യാപകരും ഏറ്റെടുത്ത് സമൂഹത്തിന് മാതൃകയാവുകയും ചെയ്യുന്നു.

കുട്ടികളുടെ ആരോഗ്യ പരിപാലനം

സ്കൂളിൽ പ്രവർത്തിക്കുന്ന ഹെൽത്ത് ക്ലബ്ബിന്റെ നേതൃത്വത്തിൽ ആരോഗ്യം, ശുചിത്വപാലനം എന്നീ വിഷയങ്ങളിൽ ബോധവൽക്കരണം നടത്തുകയും, സ്കൂളിൽ ആരോഗ്യ വകുപ്പ് ലഭ്യമാകുന്ന അയൺഫോളിക് ഗുളികകളും വിരഗുളികകളും നിർദ്ദേശിച്ചിരിക്കുന്ന സമയങ്ങളിൽ കുട്ടികൾക്ക് നൽകുകയും കഴിക്കുന്നുവെന്ന് ഉറപ്പുവരുത്തുകയും ചെയ്യുന്നു. ഹെൽത്ത് ഇൻസ്പെക്ടർമാരുടെ നേതൃത്വത്തിൽ കുട്ടികളുടെ ആരോഗ്യ പരിപാലനവുമായി ബന്ധപ്പെട്ട ബോധവൽക്കരണ ക്ലാസ്സുകൾ നടത്തുകയും ചെയ്യുന്നു.

കുട്ടികൾക്കായി ഒരു കുട്ടിത്തോട്ടം

സംസ്ഥാന കൃഷി വകുപ്പിന്റെ നേതൃത്വത്തിൽ സ്കൂളുകളിൽ എത്തിക്കുന്ന പച്ചക്കറി വിത്തുകൾ കുട്ടികൾക്കായി വിതരണം ചെയ്യുകയും, വീടുകളിൽ പച്ചക്കറിത്തോട്ടം നട്ടുപിടിപ്പിച്ച് പച്ചക്കറികളും ഇലക്കറികളും ഭക്ഷണത്തിൽ ഉൾപ്പെടുത്താനുള്ള പ്രേരണയും പ്രചോദനവും നൽകുകയും ചെയ്യുന്നു. ഫാത്തിമ മാതാ സ്കൂളിൽ സ്കൗട്ട്സ് ആന്റ് ഗൈഡ്സിന്റെ നേതൃത്വത്തിൽ എല്ലാ വർഷവും പച്ചക്കറികൃഷി വളരെ വിപുലമായ രീതിയിൽ നടത്തുകയും അതിൽ നിന്നും ശേഖരിക്കുന്ന പച്ചക്കറികൾ കുട്ടികളുടെ ഉച്ചഭക്ഷണത്തിന് കറികൾക്കായി ഉപയോഗിക്കുകയും ചെയ്യുന്നു

സമർപ്പിത വൈധവ്യം ഒരു അനുഗ്രഹമാക്കാൻ

അച്ഛൻമാരുടെ കൈത്താങ്ങില്ലാതെ സംരക്ഷിക്കപ്പെടുന്ന കുട്ടികളുടെ അമ്മമാർക്കായി ഒരു ദിവസത്തെ ക്ലാസ്സും ഭക്ഷണവും ക്രമീകരിക്കുന്നു. ഫാത്തിമ മാതയുടെ ചരിത്രത്തിലാദ്യമായാണ് ഇങ്ങനെയൊരു സംഗമം 2017-18 അധ്യയന വർഷത്തിലാണ് നടന്നത്. എല്ലാ അമ്മമാരും ഏറെ സന്തോഷത്തോടെ ഈ സംഗമത്തിൽ പങ്ക് ചേർന്നു. എല്ലാ അധ്യയന വർഷവും ഇങ്ങനെയൊരു സംഗമം സംഘടിപ്പിക്കണമെന്നും തങ്ങൾക്കിത് ഏറെ ആത്മ വിശ്വാസം പകരുന്നതായും, ഒരേ ജീവിത സാഹചര്യങ്ങളിലൂടെ കടന്നുപോകുന്നവർ ഒരുമിച്ചുചേരുമ്പോൾ ജീവിതത്തിൽ മുന്നേറാനുള്ള ഊർജ്ജം പകർന്നുകിട്ടുന്നതായും അമ്മമാർ അഭിപ്രായപ്പെട്ടു. കടുത്ത ജീവിത യാഥാർത്ഥ്യങ്ങളിലൂടെ കടന്നുപോകുമ്പോൾ തങ്ങൾക്ക് താങ്ങും തണലും കരുതലുമായി മാറുന്ന ഫാത്തിമ മാതയെ തങ്ങളുടെ നന്ദി അറിയിക്കാനും അമ്മമാർ മറന്നില്ല. തുടർന്ന് എല്ലാ വർഷവും ഈസംഗമം നടത്തുന്നു. ഈ അധ്യയന വർഷവും ഈ അധ്യയന വർഷം ഓഗസ്റ്റ് മാസം 24-ാം തീയതിയാണ് ഈ സംഗമം നടത്തിയത്.

വയനാടിനൊരു കൈത്താങ്ങ്

മഴക്കാലക്കെടുതിയിൽ ദുരിതമനുഭവിക്കുന്ന വടക്കൻ ജില്ലയിലെ സഹോദരങ്ങൾക്കായി ഫാത്തിമമാതയിലെ കുട്ടികളും അദ്ധ്യാപകരും വിഭവസമാഹരണം നടത്തുകയും ദുരിതമനുഭവിക്കുന്ന ആളുകളിലേയ്ക്ക് എത്തിക്കുകയും ചെയ്തു. അരി, പലചരക്ക് സാധനങ്ങൾ, സോപ്പ്, സോപ്പുപെട്ടി, പേസ്റ്റ്, ടൂത്ത്ബ്രഷ്, സാനിട്ടറി നാപ്കിനുകൾ, ബിസ്ക്കറ്റ് എന്നിവയാണ് ശേഖരിച്ചത്. കട്ടികൾക്കായി അദ്ധ്യാപകർ പകർന്നുതന്ന പാഠങ്ങളും മൂല്യങ്ങളും സ്വജീവിതത്തിൽ പകർത്തിയപ്പോൾ കുട്ടികൾക്കും ആത്മസംതൃപ്തി. തങ്ങളുടെ മാതൃക കുട്ടികൾ സ്വീകരിച്ചപ്പോൾ അദ്ധ്യാപകർക്ക് അതിലേറെ ആത്മസംതൃപ്തി.

ഹെൽത്ത് കോർണർ

സ്കൂളിൽ പ്രവർത്തിക്കുന്ന ഹെൽത്ത് ക്ലബ്ബിന്റെ നേതൃത്വത്തിൽ ഹെൽത്ത് കോർണർ പ്രവർത്തിക്കുന്നു. അടിമാലിയിലെ ഗവ. ഹോസ്പിറ്റലിലെ ജീവനക്കാരുടെ നേതൃത്വത്തിൽ ജീവിതശൈലി രോഗ നിർണ്ണയ ക്യാംപുകൾ സ്കൂളിൽ സംഘടിപ്പിക്കുന്നു.

കൂട്ടിനൊരു ഭവനം കൂട്ടായൊരു ഭവനം

മൂല്യങ്ങൾ പകർന്നുകൊടുക്കുക മാത്രമല്ല, സ്വജീവിതത്തിലും അത് പകർത്തുകയാണ് ഫാത്തിമ മാതയിലെ അദ്ധ്യാപകരും ശിഷ്യഗണങ്ങളും. ഞങ്ങളുടെ സ്കൂളിൽ പഠിക്കുന്ന വീടും സ്ഥലവുമില്ലാത്ത ഒരു കുട്ടിക്ക് വീട് നിർമ്മിച്ചു നൽകുന്ന പ്രവർത്തനമാണ് ഇപ്പോൾ നടന്നുകൊണ്ടിരിക്കുന്നത്. വീട് നിർമ്മിച്ചു നൽകുന്നതിനായി സ്ഥലം നൽകി ഞങ്ങളുടെ പ്രിയപ്പെട്ട അദ്ധ്യാപിക മാതൃകയായി. വീട് നിർമ്മാണത്തിനാവശ്യമായ സാമഗ്രികളോരോന്നും സംഭാവന ചെയ്യുന്നത് അദ്ധ്യാപകർ തന്നെയാണ്. വിവിധ ക്ലബ്ബംഗങ്ങളുടെ സഹകരണവും ഉണ്ടെന്നുള്ളത് ശ്രദ്ധേയമാണ്. ഈ ഉദ്യമത്തിൽ ഫാത്തിമ മാതയോട് സഹകരിക്കുന്ന ഓരോരുത്തരെയും നന്ദിയോട് സ്മരിക്കുന്നു.

കരിയർ ഗൈഡൻസ് - പാസ്‍വേഡ് 2019

കേരള സംസ്ഥാന ന്യൂനപക്ഷ ക്ഷേമ വകുപ്പ് മുഖേന ന്യൂനപക്ഷ വിഭാഗത്തിൽ പെട്ട ഹൈസ്കൂൾ വിദ്യാർത്ഥികൾക്കായി പാസ്‍വേഡ് 2019 എന്ന പേരിൽ വ്യക്തിത്വ വികസനം, കരിയർ ഗൈഡൻസ് എന്നിവ ലക്ഷ്യമാക്കി സൗജന്യ ഏകദിന ക്യാംപ് സംഘടിപ്പിച്ചു. ഇടുക്കി ജില്ലയിലെ തെരഞ്ഞെടുക്കപ്പെട്ട 5 സ്കൂളുകളിൽ ഒന്നാണ് ഫാത്തിമ മാത എന്നത് ഞങ്ങൾക്ക് ഏറെ സന്തോഷം നൽകുന്നു.ശ്രീ. നൈസൺ പി നൈനാൻ, ശ്രീ. ഷാമോൻ സി എസ്, മിസ്. ജിസ്മി പി ഖാൻ എന്നിവർ ക്ലാസ്സുകൾ നയിച്ചു. കുട്ടികളെ ലക്ഷ്യ ബോധമുള്ളവരാക്കി മാറ്റുന്നതിനും ഭാവിയെക്കുറിച്ച് ബോധ്യമുള്ളവരുമാക്കിത്തീർക്കുവാൻ ഈ ക്യാംപ് സഹായിച്ചു.

FATHIMA MATHA LITTLE KITES 2020 – YOUTUBE CHANNEL

ഫാത്തിമ മാതാ ഗേൾസ് ഹയർ സെക്കൻഡറി സ്കൂളിൽ പ്രവർത്തിക്കുന്ന ലിറ്റിൽ കൈറ്റ്സ് ക്ലബ്ബിന്റെ നേതൃത്വത്തിൽ FATHIMA MATHA LITTLE KITES 2020 എന്ന പേരിൽ യൂ ട്യൂബ് ചാനൽ ആരംഭിക്കുകയും പൊതു വിദ്യാഭ്യാസ സംരക്ഷണ യജ്ഞത്തിന്റെ ഭാഗമായി സ്കൂളിലെ വിവിധ പ്രവർത്തനങ്ങളുടെ ‍ വീഡിയോ ഡോക്കുമെന്റേഷനുകൾ അപ്‍ലോഡ് ചെയ്യുകയും ചെയ്യുന്നു. ലിറ്റിൽ കൈറ്റ്സ് അംഗങ്ങളുടെ നേതൃത്വത്തിലാണ് ഡോക്കുമെന്റേഷനുകൾ തയ്യാറാക്കപ്പെടുന്നത്.

<a href="https://www.youtube.com/channel/UCN0FMNhK8eiqqdxacMfll2w" >ഞങ്ങളുടെ ചാനൽ കാണുന്നതിനായി നൽകിയിരിക്കുന്ന ലിങ്കിൽ ക്ലിക്ക് ചെയ്യുക</a>