ജി.എച്ച്.എസ്.എസ്. നെടുങ്ങോം/ക്ലിന്റ് ഫോട്ടോ ആർട്ട് ഗാലറി
'മികവ്' പ്രവര്ത്തനത്തിന്റെ ഭാഗമായി വിദ്യാലയത്തില് തയ്യാറാക്കിയ അനന്യപദ്ധതിയാണ് ക്ലിന്റ് ഫോട്ടോ ആര്ട്ട് ഗാലറി. ജില്ലയിലെ മികച്ച വിദ്യാലയങ്ങളിലൊന്നായ നെടുങ്ങോം ഗവണ്മെന്റ് ഹയര് സെക്കന്ഡറി സ്കൂള് വിജയപര്വത്തിന്റെ നിറവില് മറ്റൊരു വര്ണക്കാഴ്ചയൊരുക്കിക്കൊണ്ട്, പഠിതാക്കളുടെയും പൊതുജനങ്ങളുടെയും ശ്രദ്ധാകേന്ദ്രമാക്കി മാറിയിരിക്കുന്നു. വിജ്ഞാനത്തിന്റെയും സര്ഗപ്രതിഭയുടെയും കൌതുകത്തിന്റെയും വിളനിലമായി സ്കൂള് ലൈബ്രറി ഹാളിലാണ് ഗാലറി ഒരുക്കിയിട്ടുള്ളത്. ആറു വയസ്സിനിടയില് അറുപതു വര്ഷത്തെ സര്ഗാര്ജ്ജവം തെളിയിച്ച് അകാലത്തില് പൊലിഞ്ഞുപോയ, ചിത്രകലാലോകത്തെ അത്ഭുതപ്രതിഭ എഡ്വിന് തോമസ് ക്ലിന്റിന്റെ നാമധേയത്തിലാണ് ഫോട്ടോ-ആര്ട്ട് ഗാലറി തയ്യാറാക്കിയിരിക്കുന്നത്. കുട്ടികള്ക്ക് എന്നെന്നും ഉപകാരപ്പെടുന്ന ഒരു പ്രവര്ത്തനമായിരിക്കണം 'മികവ്' എന്ന ചിന്തയുടെ അടിസ്ഥാനത്തിലാണ്, സ്കൂള് ലൈബ്രറിയില് ഒരു ഫോട്ടോ-ആര്ട്ട് ഗാലറി എന്ന പുതുമയുള്ള ആശയം പ്രാവര്ത്തികമാക്കിയത്.
മനുഷ്യസംസ്കൃതിയുടെ നാളിതുവരെയുള്ള പുരോഗതിയില് നിര്ണ്ണായകമായ പങ്കുവഹിച്ചിട്ടുള്ള നിരവധി പ്രതിഭകളുണ്ട്. സാമൂഹ്യ-കലാ-സാംസ്കാരിക-സാഹിത്യ-ശാസ്ത്രരംഗങ്ങളില് നിസ്തുലമായ സംഭാവനകള് നല്കിയ മഹദ് വ്യക്തിത്വങ്ങളെക്കുറിച്ച് പുതുതലമുറയില് അവബോധമുണ്ടാക്കുക എന്ന ഉദ്ദേശ്യമാണ് 'ഫോട്ടോ-ആര്ട്ട് ഗാലറി'യിലൂടെ സഫലമാവുന്നത്.
ലക്ഷ്യങ്ങള്
- അന്വേഷണാത്മക പഠനപ്രവര്ത്തനത്തെ ത്വരിതപ്പെടുത്തല്
- ലോകത്തിലെ സര്വകാലത്തെയും മികച്ച കലാസൃഷ്ടികള് കണ്ടെത്തി, അവയുടെ പകര്പ്പുകള് ശേഖരിക്കലും അവ കുട്ടികള്ക്കായി പ്രയോജനപ്പെടുത്തലും
- പ്രശസ്ത വ്യക്തികളെ ചിത്രവായനയിലൂടെ തിരിച്ചറിയല്
- പ്രവര്ത്തനാധിഷ്ഠിത പഠനപ്രക്രിയ ആസ്വാദ്യകരമാക്കല്
- ക്ലാസിക്കല് കലാസൃഷ്ടികളെ വായിച്ചറിയുവാനുള്ള അനുശീലനം എളുപ്പമാക്കല്
- ഗാലറിയുടെ ദൃശ്യാനുഭവം ഉള്ക്കൊണ്ട്, വിദ്യാര്ത്ഥികള്ക്ക് സ്വന്തം രചനകള് നടത്തുവാനുള്ള പ്രചോദനം നല്കല്
- കുട്ടികളുടെ സൃഷ്ടികളുടെ പ്രദര്ശനവും നിരൂപണബോധമുണര്ത്തലും
- ലൈബ്രറിയെ കൂടുതല് ആകര്ഷകമാക്കി കുട്ടികളില് പുതുവായനാശീലം രൂപപ്പെടുത്തല്
ഗാലറിയുടെ ഉദ്ഘാടനകര്മ്മം നിര്വഹിച്ചത്, പ്രശസ്ത ചിത്രകാരനും ദേശീയ അദ്ധ്യാപക അവാര്ഡ് ജേതാവുമായ കെ.എം.ശിവകൃഷ്ണന് മാസ്റ്ററാണ്. ഇവിടെ പ്രദര്ശിപ്പിച്ചിരിക്കുന്ന ചിത്രങ്ങളുടെ വൈവിധ്യവും ചിത്രങ്ങള് തെരഞ്ഞെടുത്തതിലെ വ്യതിരിക്തതയുമാണ് ഗാലറിയെ ഏറെ ആകര്ഷകമാക്കുന്നത്. സാഹിത്യം, സംസ്കാരം, സംഗീത-നൃത്ത-നാട്യ-ശില്പ്പ-ചിത്രകലകള്, രാഷ്ട്രതന്ത്രം, ശാസ്ത്രം, ചരിത്രം തുടങ്ങി, മനുഷ്യജീവിതത്തിന്റെ ബഹുമുഖമേഖലകളില് വ്യക്തിമുദ്ര പതിപ്പിച്ചവരുടെയും സ്മരിക്കപ്പെടേണ്ടവരുടെയും വലിയ ഛായാചിത്രങ്ങള്, കലാസൃഷ്ടികള്, വിദ്യാലയത്തിലെ സര്ഗപ്രതിഭകളുടെ മനോഹരരചനകള്, വിവിധ ദിനാചരണങ്ങളുടെ ഭാഗമായി വിദ്യാര്ത്ഥികള് തയ്യാറാക്കിയ സൃഷ്ടികള്, കുട്ടികളുടെ കരവിരുതില് രൂപപ്പെടുത്തിയ വൈവിധ്യമാര്ന്ന ആശംസാകാര്ഡുകളുടെ സമാഹാരം... തുടങ്ങി സന്ദര്ശകരെ അമ്പരപ്പിക്കുന്ന ഒരു വന് ചിത്രശേഖരമാണ് ഗാലറിയെ സമ്പന്നമാക്കിയിരിക്കുന്നത്.
ഗാലറിയുടെ സാധ്യതകള് തിരിച്ചറിഞ്ഞ് നിരവധി പഠനപ്രവര്ത്തനങ്ങള് വിദ്യാര്ത്ഥികള് ഇതിനകം നടത്തിക്കഴിഞ്ഞു. അവര്ക്കായി പുതുമയാര്ന്ന പ്രവര്ത്തനപദ്ധതികള് ആസൂത്രണം ചെയ്യുന്നതില് സജീവമായിരിക്കുകയാണ് അദ്ധ്യാപകര്. പിക്കാസോയുടെ 'ഗ്വെര്നിക്ക'യും, ദാലിയുടെ 'വിട്ടുമാറാത്ത സ്മരണ'യും, ഡാവിന്ചിയുടെ 'മൊണാലിസ'യും, മൈക്കേല് ആഞ്ജലോയുടെ 'അന്ത്യന്യായവിധി'യും, രവിവര്മ്മയുടെ 'ഹംസദമയന്തി'യുമെല്ലാം മുന്നില് തെളിഞ്ഞുനില്ക്കുമ്പോള്; റിയലിസവും സര്റിയലിസവും ക്യൂബിസവും ഇംപ്രഷനിസവുമെല്ലാം ചിത്രവായനയിലൂടെ തിരിച്ചറിയുന്ന സംതൃപ്തി വിദ്യാര്ത്ഥികളുടെ മുഖങ്ങളില് വിരിയുന്നു. ഐന്സ്റ്റൈന്റെ ചിന്തോദ്ദീപകമായ ദൃഷ്ടികളില് 'ആപേക്ഷികത'യുടെ ദ്രവ്യസ്ഥലകാലസാതത്യം കണ്ടെത്തുമ്പോള്, സ്റ്റീഫന് ഹോക്കിങ് എന്ന പ്രതിഭയുടെ നിഷ്കളങ്കമായ കണ്ണുകളില് അതിനു പുതിയ വ്യാഖ്യാനങ്ങള് അവര് തേടുന്നു.
