Schoolwiki സംരംഭത്തിൽ നിന്ന്
' പങ്കുവിൻറെ ചിന്ത'
<
പങ്കു എൻറെ വീട്ടിലെ അരുമയായ നായ ആയിരുന്നു . അധികം വീടുകളിലും സംഭവിക്കാറുള്ളത് പോലെ തന്നെ അവൻ എൻ്റെ വീട്ടിലും വന്ന ആദ്യനാളുകളിൽ വീട്ടുകാരുടെ കണ്ണിലുണ്ണി ആയിരുന്നു . പതിയെ , പതിയെ ആരാലും ശ്രദ്ധിക്കപ്പെടാതെ വീടിൻ്റെ മൂലയിലെ അവൻ്റെ കൊച്ചു കൂട്ടിൽ ഒതുക്കപ്പെട്ടു . ആ വീട്ടിൽ അവനെ ഏറ്റവും ശ്രദ്ധിച്ചിരുന്ന കണ്ണൻ പോലും രണ്ടുനേരം ഭക്ഷണം കൊടുക്കുവാൻ മാത്രമേ അവൻ്റെ അടുത്തു പോകുന്നുള്ളൂ എന്ന അവസ്ഥയായി . അങ്ങനെ ആരാലും ശ്രദ്ധിക്കപ്പെടാതെ , സ്നേഹിക്കപ്പെടാതെ അവന് ജീവിക്കേണ്ടി വന്നു. അങ്ങനെ ഒരുനാൾ ആണ് പൊടുന്നനെ കൊറോണ വൈറസ് എന്ന മഹാമാരി ലോകത്തെ ബാധിച്ചത്. നാടും നാട്ടുകാരും ലോകവും പേടിച്ചു വിറച്ചു . ഭൂമിയിലെ സർവ്വചരാചരങ്ങളെയും അടക്കിവാണിരുന്ന മനുഷ്യൻ സ്വന്തം കണ്ണുകൊണ്ട് കാണുവാൻ സാധിക്കാത്ത ഒരു വൈറസിനെ പേടിച്ച് കഴിയുന്ന അവസ്ഥയായി . മൃഗങ്ങളെ കൂട്ടിലടച്ച വളർത്തുന്ന മനുഷ്യർ യാത്രാ സ്വാതന്ത്ര്യം എന്നതിൻറെ വില മനസ്സിലാക്കി. ഇപ്പോൾ വീട്ടുകാർ മത്സരത്തിലാണ് പങ്കുവിനെ സ്നേഹിക്കാൻ , കുളിപ്പിക്കാൻ , മരുന്ന് കൊടുക്കുവാൻ . പങ്കു സന്തോഷത്തിലാണ് നായ ആണെങ്കിലും അവനും കുറച്ചൊക്കെ കാര്യങ്ങൾ മനസ്സിലായി തുടങ്ങി . ക്രൂരം ആണെങ്കിലും ഈ കൊറോണ മാറാതെ ഇരുന്നെങ്കിൽ എനിക്ക് എപ്പോഴും വീട്ടുകാരുടെ സ്നേഹം കിട്ടുമല്ലോ . അല്ല ഇനി ഞാൻ മാത്രമേ ഇങ്ങനെ ചിന്തിക്കുന്നുള്ളുവോ ? അറിയില്ല. അവൻ നീട്ടിയൊരു കുര കുരച്ചു അത് സന്തോഷത്തിൻ്റെ ആണോ അതോ....?
|
