പ്രണവം എന്ന വാക്കിന്റെ അര്‍ത്ഥം 'എക്കാലവും നവമായത്' എന്നാണല്ലൊ.............
സഹോദരന്‍ മെമ്മോറിയല്‍ എല്‍ പി സ്ക്കൂള്‍ ഇക്കഴിഞ്ഞവര്‍ഷം സുവര്‍ണജൂബിലി ആഘോഷിച്ചു കഴിഞ്ഞിരിക്കുയാണ്. ഇപ്പോഴും ഇൗ മഹാസ്ഥാപനം തുടക്കത്തിലെ പുതുമയോടും പ്രൗഢിയോടും തന്നെ ശോഭിക്കുന്നു. അതെ..... നിത്യ നൂതനമായ പ്രണവം പോലെ തന്നെ.
അവനവനാത്മസുഗത്തിനാചരിപ്പത
പരനു സുഖത്തിനായ് വരേണം
എന്നുള്ള ഗുരുവചനത്തെ അന്വര്‍ത്ഥമാക്കിക്കൊണ്ട് പുതുതലമുറയെ അറിവിന്റെ ലോകത്തേക്ക് കൈപിടിച്ചു നടത്തുന്ന സേവനസന്നദ്ധരായ അധ്യാപകരും മാനേജ്മെന്റും അവര്‍ക്ക് പിന്‍ബലമായി വര്‍ത്തിക്കുന്ന മഹാമനസ്കരായ രക്ഷിതാക്കളും നാട്ടുകാരുമാണ് ഈ സ്ഥാപനത്തിന്റെ ഉള്‍ക്കരുത്ത്.
പാഠ്യ-പാഠ്യേതര വിഷയങ്ങളിലെ മികവുകളോടൊപ്പം തന്നെ വൈപ്പിന്‍ ഉപജില്ലയിലെ ഏറ്റവുമധികം വിദ്യാര്‍ത്ഥികളുള്ള പ്രൈമറി സ്കൂള്‍ എന്ന ഖ്യാതിയും നിലനിര്‍ത്തിക്കൊണ്ടാണ് സഹോദരന്‍ മെമ്മോറിയല്‍ സ്ക്കൂള്‍ അതിന്റെ പ്രയാണം തുടരുന്നത്.
ചരിത്രം
സഹോദരന്‍ മെമ്മോറിയല്‍ ലോവര്‍ പ്രൈമറി സ്കൂള്‍, ചെറായി
വാരിശ്ശേരി കൊച്ചിറ്റി ആശാന്റെ കുടിപ്പള്ളിക്കൂടമാണ് 1921 ല്‍ ബാലവിദ്യാരജ്ഞിനി എന്ന പേരില്‍ ഗ്രാന്റ് സ്ക്കൂളായി മാറിയത്. കൊച്ചി രാജ്യത്ത് പിന്നോക്ക സമുദായംഗങ്ങള്‍ക്ക് ഒരു പള്ളിക്കൂടം നടത്താന്‍ അനുവാദം കിട്ടിയതിന്റെ ഫലമായാണ് ഇങ്ങനെ ഒരു സ്ക്കൂള്‍, പൊതുജനതല്പരരായ ചിലര്‍ ചേര്‍ന്ന് സ്ഥാപിച്ചത്. പിന്നീട് ഇൗ സ്ഥാപനം വിജ്ഞാനവര്‍ദ്ധിനി സഭ ഏറ്റെടുക്കുകയും വിജ്ഞാനവര്‍ദ്ധിനി സഭാ എന്ന പേരില്‍ വളരുകയും 1952 ല്‍ ഹൈസ്ക്കൂളായി ഉയര്‍ത്തുകയും ഉണ്ടായി.
1962 വരെ ഒന്നാം ക്ലാസ്സു മുതല്‍ പത്താം ക്ലാസ്സുവരെ ഒരു ഹെഡ് മാസ്റ്ററുടെ കീഴില്‍ പ്രവര്‍ത്തിച്ചുവന്നു. 1962 ല്‍ ഇതിലെ നാലാം ക്ലാസ്സുവരെയുള്ള ലോവര്‍ പൈമറി വിഭാഗം ഒരു ഹെഡ്മാസ്റ്ററുടെ കീഴില്‍ പ്രത്യേക സ്ഥാപനമാക്കി വി.വി.സഭ എല്‍ പി. സ്ക്കൂള്‍ എന്ന പേരില്‍ ഹൈസ്ക്കൂള്‍ അങ്കണത്തില്‍ തന്നെ പ്രവര്‍ത്തിച്ചുവന്നു. കോതാറ വി. കൃഷ്ണന്‍ മാസ്റ്ററായിരുന്നു പ്രധാന അദ്ധ്യാപകന്‍. 1965 മാര്‍ച്ചില്‍ കൃഷ്ണന്‍ മാസ്റ്റര്‍ സര്‍വീസില്‍ നിന്നും വിരമിച്ചതിനെ തുടര്‍ന്ന് നാരായണ ഷേണായ് പ്രധാന അദ്ധ്യാപകനായി ചുമതലയേറ്റു. 1965 ജൂണില്‍ ഹൈസ്ക്കൂളും ലോവര്‍ പ്രൈമറി സ്ക്കൂളും സാമൂഹ്യപരിഷ്കര്‍ത്താവും ചെറായി സ്വദേശിയുമായ സഹോദരന്‍ അയ്യപ്പന്റെ സ്മരണയ്ക്കായി സഹോദരന്‍ മെമ്മോറിയല്‍ എന്ന പേര് നല്‍കുകയുണ്ടായി.
ആ വര്‍ഷം തന്നെ പ്രൈമറി വിഭാഗം ഇന്നു കാണുന്ന അങ്കണത്തിലേക്ക് മാറ്റി സ്ഥാപിച്ചു. അങ്ങനെ 1965 ല്‍ സ്ഥാപിതമായ സഹോദരന്‍ മെമ്മോറിയല്‍ ലോവര്‍പ്രൈമറി സ്കൂളിന്റെ തലവനായി നാരായണഷേണായി തുടര്‍ന്നു.
1986 ല്‍ നാരായണഷേണായി വിരമിച്ചപ്പോള്‍ ടി.എസ് ഭാരതി ടീച്ചര്‍ ഹെഡ്മിസ്റ്റ്രസ് ആയി ചുമതലയേറ്റു. തുടര്‍ന്ന് വി.എം പത്മാക്ഷി, ടി. ആര്‍ ഭൈമി, ടി. ജി വിലാസിനി, കെ. കെ ബാബു, ടി. എന്‍ രാധ, വി. ജി ലീല, സി. കെ തങ്ക, കെ. എന്‍ മോഹനന്‍ അങ്ങനെ നീളുന്നു വിരമിച്ച പ്രഥമസ്ഥാനീയര്‍. തുടര്‍ന്ന് ഇൗ സ്ഥാനം പി.ആര്‍ അനുപ വഹിക്കുന്നു.
ഞങ്ങളുടെ വിദ്യാലയം
ഭൗതികസൗകര്യങ്ങള്‍
സ്മാര്‍ട് ക്ലാസ്സ്റൂം.
9 ഡെസ്ക്ടോപ്പ് കമ്പ്യൂട്ടര്‍, 4 ലാപ്ടോപ്പ് കമ്പ്യൂട്ടര്‍, 3പ്രിന്റര്‍, പ്രൊജക്ടര്‍, സൗണ്ട് സിസ്റ്റം എന്നിവ അടങ്ങിയ അതി വിശാലമായ ഒരു കമ്പ്യൂട്ടര്‍ റൂം ഞങ്ങള്‍ക്കുണ്ട്.
1 മുതല്‍ 4 ക്ലാസ്സുകളിലെ എല്ലാ വിദ്യാര്‍ത്ഥികള്‍ക്കും ആഴ്ചയില്‍ 3 പിരീഡ് വീതം കമ്പ്യൂട്ടര്‍ പഠനത്തിന് അവസരം.
കളിപ്പെട്ടി പാഠപുസ്തകം വളരെ മികച്ച രീതിയില്‍ അധ്യാപകര്‍ കുട്ടികള്‍ക്ക് വിനിമയം ചെയ്യുന്നു.
കുട്ടികള്‍ക്ക് ആവശ്യമായ വര്‍ക്ക് ഷീറ്റ്, പ്രൊജക്റ്റുകള്‍ എന്നിവ പ്രിന്റ് എടുക്കുന്നതിന് പ്രിന്ററുകള്‍ പ്രയോജനപ്പെടുത്തുന്നു.
വിദ്യാഭ്യാസ വകുപ്പ് നടപ്പിലാക്കുന്ന പരിശീലനങ്ങളിലും മറ്റ് പരിപാടികളിലും ഞങ്ങളുടെ സ്മാര്‍ട് ക്ലാസ്സ്റൂം സൗകര്യം പ്രയോജനപ്പെടുത്തുന്നു.
ലൈബ്രറി.
1500 ല്‍ അധികം പുസ്തകങ്ങള്‍ ഉള്‍ക്കൊള്ളുന്ന അതി വിശാലമായ ലൈബ്രറി.
കബ്ബ്
24 കുട്ടികള്‍ അടങ്ങുന്ന കബ്ബ് യൂണിറ്റ് ദീപക് സാറിന്റെ നേതൃത്വത്തില്‍ വളരെ മികച്ച രീതിയില്‍ ഞങ്ങളുടെ വിദ്യാലയത്തില്‍ പ്രവര്‍ത്തിക്കുന്നു. കുട്ടികളെ ഞങ്ങള്‍ ദ്വിതീയ ചരണ്‍, തൃതീയ ചരണ്‍ ടെസ്റ്റ്കള്‍ക്ക് പ്രാപ്തരാക്കുന്നു.
ബുള്‍ബുള്‍
മികച്ച രീതിയില്‍ ബിന്ദു ടീച്ചറിന്റെ നേതൃത്വത്തില്‍ പ്രവര്‍ത്തിക്കുന്ന ബുള്‍ബുള്‍ യൂണിറ്റില്‍ 24 കുട്ടികള്‍ അംങ്ങളാണ്. രജത്പംഖ്, സുവര്‍ണ്ണപംഖ് എന്നീ ടെസ്റ്റ്കളില്‍ കുട്ടികളെ പ‍‍ങ്കെടുപ്പിക്കുകയും, മികച്ച വിജയം കൈവരിക്കുകയും ചെയ്തുവരുന്നു.
"കബ്ബ് & ബുള്‍ബുള്‍" സംയുക്തമായി സ്വാതന്ത്ര ദിനം, റിപ്പബ്ലിക് ദിനം, ഗാന്ധി ജയന്തി തുടങ്ങിയ ദിനാചരണങ്ങള്‍ സമുചിതമായി ആഘോഷിക്കുന്നു. സമൂഹ പ്രാര്‍ത്ഥന, വിദ്യാലയവും പരിസരവും വൃത്തിയാക്കല്‍, മറ്റ് സാമൂഹിക പ്രവര്‍ത്തനങ്ങള്‍ തുടങ്ങിയവ നടത്തി വരുന്നു. സ്കൗട് & ഗൈഡ് ലോക്കല്‍ ഘടകം, ജില്ലാ ഘടകം എന്നിവ നടത്തുന്ന എല്ലാവിധ പ്രവര്‍ത്തനങ്ങളിലും സജീവ പങ്കാളിത്തം.
ഗിരീഷ് സാറിന്റെ നേതൃത്വത്തില്‍ നടക്കുന്ന കാര്‍ഷിക ക്ലബ്ബിന്റെ ആഭിമുഖ്യത്തില്‍ മികച്ച രീതിയില്‍ ജൈവ പച്ചക്കറിത്തോട്ടവും പുഷ്പോദ്യാനവും കുട്ടികള്‍ പരിപാലിച്ചുപോരുന്നു. ജൈവ പച്ചക്കറിത്തോട്ടത്തില്‍ നിന്നുമുളള വിളവ് സ്കൂള്‍ ഉച്ചഭക്ഷണത്തില്‍ ഉള്‍പ്പെടുത്താറുണ്ട്.
ചതുഷ്ക്രീയകള്‍ ഉറപ്പിക്കുന്നതിനുള്ള പ്രവര്‍ത്തനങ്ങള്‍, സംഖ്യാ ബോധം ഉറപ്പിക്കാനായി സംഖ്യാ റിബണ്‍, ഗുണനപ്പട്ടിക മനഃപാഠമാക്കാനുള്ള തീവ്രപരിശീലനം എന്നിവ നടത്തുന്നു.
ഉപജില്ല, ജില്ലാ തല മത്സരങ്ങളില്‍ കുട്ടികളെ പ‍‍ങ്കെടുപ്പിക്കുന്നു.
ഗണിതച്ചെപ്പ് എന്ന പേരില്‍ എല്ലാ വര്‍ഷവും ഗണിത മാസിക തയ്യാറാക്കുന്നു.
സുരക്ഷാ ക്ലബ്ബ് വിദ്യാലയത്തിലും പുറത്തും കുട്ടികളുടെ സുരക്ഷ ഉറപ്പുവരുത്തുന്നതിനാവശ്യമായ പ്രവര്‍ത്തനങ്ങള്‍ ദീപക് സാറിന്റെ നേതൃത്വത്തില്‍ നടത്തി വരുന്നു. കുട്ടികളെ റോഡ് സുരക്ഷയെപ്പറ്റിയും ട്രാഫിക് നിയമങ്ങളെക്കുറിച്ചും ബോധവാന്മാരാക്കുന്നു.
ദീപ ടീച്ചറുടെ നേതൃത്വത്തില്‍ നടന്നുവരുന്ന സാമൂഹ്യശാസ്ത്ര ക്ലബ്ബ്
സ്കൂള്‍ പാര്‍ലമെന്റ് ഇലക്ഷന്‍ വളരെ കൃത്യതയോടും കാര്യക്ഷ്യമതയോടും നടത്തിവരുന്നു.
ഉപജില്ല, ജില്ലാ തല മത്സരങ്ങളില്‍ സ്റ്റില്‍ മോഡല്‍, ക്വിസ്സ് എന്നീ മത്സരങ്ങള്‍ക്ക് കുട്ടികളെ പ്രാപ്തരാക്കുകയും മികച്ച വിജയം കൈവരിക്കുകയും ചെയ്തുവരുന്നു.
കുട്ടികള്‍ക്കും രക്ഷിതാക്കള്‍ക്കുമായി നിരവധി ബോധവത്കരണ ക്ലാസ്സുകള്‍ നടത്തിവരുന്നു.
ലൈബ്രറിയില്‍ നിന്നും കുട്ടികള്‍ എടുത്തുവായിക്കുന്ന പുസ്തകങ്ങളില്‍ അവര്‍ കണ്ടെത്തിയ പുതിയ പദങ്ങള്‍ ഓരോ ക്ലാസ്സിലും എഴുതി പ്രദര്‍ശിപ്പിക്കാന്‍ അവസരം.
എല്ലാവര്‍ഷവും വൃദ്ധസദനം സന്ദര്‍ശിച്ച് അവര്‍ക്ക് വേണ്ട സഹായങ്ങള്‍ ചെയ്തുകൊടുക്കുന്നു.
