ജി.വി.എച്ച്.എസ്.എസ്. വട്ടിയൂർക്കാവ്/എന്റെ ഗ്രാമം
വട്ടിയൂർക്കാവ്
കേരള സംസ്ഥാനത്തിൽ തിരുവനന്തപുരം ജില്ലയിൽ നഗരത്തിന്റെ വടക്കുകിഴക്ക് ഭാഗത്തായിട്ടാണ് പ്രശാന്തസുന്ദരമായ വട്ടിയൂർക്കാവ് ഗ്രാമം. ജലസമൃദ്ധിയാൽ അനുഗൃഹീതവും ഹരിതാഭവുമായ ഈ നാട്ടിൽ റസിഡൻഷ്യൽ ഏരിയകളും ഫ്ലാറ്റുകളും ഉണ്ട്. വിവിധ മതസ്ഥരായ ആളുകൾ ഇവിടെ സൗഹാർദ്ദത്തോടെ ജീവിക്കുന്നു.
തിരുവനന്തപുരം നഗരസഭയുടെ ഭാഗമായി മാറിയ ഈ ഗ്രാമത്തിന്റെ സാംസ്കാരികവും മതപരവും ബൗദ്ധികവും ആയ പൈതൃകത്തിന്റെ അടയാളങ്ങളായി വിവിധ വിദ്യാലയങ്ങൾ, സെൻട്രൽ പോളിടെക്നിക്, ആതുരാലയങ്ങൾ, ആരാധനാലയങ്ങൾ, ഐ. എസ്. ആർ. ഒ ബഹിരാകാശയൂണിറ്റ്, സാഹിത്യപഞ്ചാനനൻ സ്മാരകഗ്രന്ഥശാല, അന്തർദേശീയ ഷൂട്ടിങ് റേഞ്ച്, സർക്കാർ സ്ഥാപനങ്ങൾ എന്നിവ നിലക്കൊളളുന്നു.
സുപ്രസിദ്ധമായ ഗുരുഗോപിനാഥ് നടനഗ്രാമത്തിൽ കഥകളിയുടെ ജനകീയരുപമായ കേരളനടനത്തിലും മറ്റു ഭാരതീയനൃത്തരൂപങ്ങളിലും പഠനവും ഗവേഷണവും പരിശീലനവും നൽകിവരുന്നു.
ചരിത്രപ്രശ്സ്തമായ തിരുവിതാംകൂർ സേ്റ്ററ്റ് കോൺഗ്രസിന്റെ വട്ടിയൂർക്കാവ് സമ്മേളനം, ഉത്തരവാദിത്തഭരണത്തിലേക്കുളള പാതയിലെ നാഴികക്കല്ലാണ്. വിവിധ രാഷ്ട്രീയപ്രവർത്തകരും സാംസ്കാരിക പ്രവർത്തകരും നാടിന്റെ നൻമയ്ക്കും പുരോഗതിക്കും ഒത്തൊരുമിച്ച് പ്രവർത്തിക്കുന്നു.
വട്ടിയൂർക്കാവിൽ നിയമസഭാമണ്ഡലവും ലോകസഭാമണ്ഡലവും ഉളളതിനാൽ ഈ നാട്ടിലെ ജനത, ജനാതിപത്യഭരണത്തിൽ നിർണായകസ്ഥാനം വഹിക്കുന്നു. വട്ടിയൂർക്കാവ് ജംങ്ഷനിലെ റോഡുകളും സർക്കാർ ഓഫീസുകളും വ്യാപാരസ്ഥാപനങ്ങളും നവീകരണത്തിന്റെയും വികസനത്തിന്റെയും അതിവേഗപാതയിലാണ്.