മധുസൂദനൻ തങ്ങൾ സ്മാരക ജി.യു.പി.എസ്. മട്ടന്നൂർ/പ്രവർത്തനങ്ങൾ/2025-26

പ്രവേശനോത്സവം

    അക്ഷരലോകത്തേക്കുള്ള ചുവടുകൾ അക്ഷയലോകത്തിലേക്കുള്ള പടിവാതിലുകളാണ്. ജൂൺ  മാസത്തിൽ കേരളത്തിലെ പൊതുവിദ്യാലയങ്ങളിലെ പ്രവേശനോത്സവങ്ങൾ ലക്ഷ്യംവെക്കുന്നതും അതുതന്നെയാണ്. ജാതിമതവർഗവർണ വ്യത്യാസമില്ലാതെ എല്ലാവരേയും സ്വാഗതം ചെയ്യുന്ന പൊതുഇടങ്ങളാണ് നമ്മുടെ വിദ്യാലയങ്ങൾ. സമൂഹത്തിന്റെ പിന്തുണയോടെ സംഘടിപ്പിക്കപ്പെടുന്ന പ്രവേശനോത്സവങ്ങൾ, പ്രാദേശിക ഉത്സവങ്ങളായി മാറുന്നത് ഇതുകൊണ്ടുകൂടിയാണ്.

    വിദ്യാലയത്തിലെ ഈ വർഷത്തെ പ്രവേശനോത്സവപരിപാടികൾ ജൂൺ 2 ന് രാവിലെ 9.30ന്ആരംഭിച്ചു. പുതുതായി വിദ്യാലയത്തിലെത്തിയ എല്ലാവരേയും സ്വീകരിക്കാനായി ഗേറ്റിൽത്തന്നെ അധ്യാപകരുണ്ടായിരുന്നു. മനോഹരമായി അലങ്കരിച്ച ഓഡിറ്റോറിയത്തിലും ലൈബ്രറിയിലും സി ആർ സി ഹാളിലുമൊക്കെയായി നവാഗതരെ സ്വീകരിച്ചിരുത്തി. 10മണിക്ക് തിരുവല്ലയിൽ നടക്കുന്ന സംസ്ഥാനതല പ്രവേശനോത്സവത്തിന്റെ തത്സമയദൃശ്യങ്ങൾ വലിയ സ്ക്രീനിൽ പ്രദർശിപ്പിച്ചു.

    10.30 മണിക്ക് ശ്രീമതി നഗിന ടീച്ചറുടെ നേതൃത്വത്തിൽ പരിശീലിപ്പിച്ച കുട്ടികൾപ്രവേശനോത്സഗാനത്തിന്ചുവടുകൾവെച്ചു. ഏറെ ആകർഷണീയമായിരുന്നു കുട്ടികളുടെ പ്രകടനം. തുടർന്ന് കാര്യപരിപാടികളിലേക്ക് കടന്നു.

    പ്രാർത്ഥനക്ക് ശേഷം ഹെഡ്മാസ്റ്റർ ശ്രീ സി മുരളീധരൻ എല്ലാവരയും പുതുവർഷത്തിലേക്ക് വിദ്യാർത്ഥികളെ സ്വാഗതം ചെയ്തു. പൊതുവിദ്യാലയങ്ങളുടെ ആവശ്യകതക്കൊപ്പം വിദ്യാലയത്തിന്റെ കഴിഞ്ഞവർഷത്തെ നേട്ടങ്ങൾ എണ്ണിപ്പറഞ്ഞുകൊണ്ടാണ് PTA പ്രസിഡന്റ് അഡ്വ, എം രതീഷ് തന്റെ അധ്യക്ഷഭാഷണം അവസാനിപ്പിച്ചത്. നഗരസഭാധ്യക്ഷൻ ശ്രീ എൻ ഷാജിത്ത് മാസ്റ്റർ ഉപജില്ലാ പ്രവേശനോത്സവത്തിന്റെ ഔപചാരിക ഉദ്ഘാടനം നിർവ്വഹിച്ചു.

KG, 1 ആം ക്ലാസിലെ കുട്ടികൾക്കുള്ള സമ്മാനപ്പൊതി ഉപജില്ലാ വിദ്യാഭ്യാസ ഓഫീസർ രവീന്ദ്രൻ സാർ, മട്ടന്നൂര് BPC വിപിൻ സാർ എന്നിവർ നൽകി.

സ്റ്റാഫ് സെക്രട്ടറി ഐശ്വര്യ ടീച്ചർ, SRG കൺവീനർ സജിത്ത് മാഷ്, SMC ചെയർമാൻ ശ്രീധരൻ, നഗരസഭ കൗൺസിലർമാർ  തുടങ്ങിയവർ ചടങ്ങിൽ സംബന്ധിച്ചു.

മുഴുവൻ കുട്ടികൾക്കും പാൽപ്പായസം നൽകി അവരവരുടെ ക്ലാസിലേക്ക് നയിച്ചു  തുടർന്ന് സന്നദ്ധത പ്രവർത്തനങ്ങൾ ആയിരുന്നു.

പരിസ്ഥിതി ദിനം

കേവലം മരം നടുന്നതിനൊപ്പം പാരിസ്ഥിതിക അവബോധം ഉണ്ടാക്കിയെടുക്കുക എന്നതും പരിസ്ഥിതി പ്രവർത്തനങ്ങളിൽ പങ്കാളികളാക്കുക എന്നതും പ്രധാനമാണ്. നാം ഉപയോഗിക്കുന്ന ഓരോ വസ്തുവും അതിന്റെ പരമാവധിയിൽ ഉപയോഗിക്കുക എന്നതും വെള്ളം കവിഞ്ഞൊഴുകുന്ന ടാപ്പ് അടച്ചുപൂട്ടുന്നതും ആവശ്യമല്ലാത്ത പ്രകാശിക്കുന്ന ബൾബ് ഓഫാക്കുന്നതും വെള്ളം മിതമായി ഉപയോഗിക്കുന്നതുമെല്ലാം പരിസ്ഥിതിസംരക്ഷണ പ്രവർത്തനങ്ങൾ തന്നെ.

   വിദ്യാലയത്തിൽ ചേർന്ന പ്രത്യേക അസംബ്ലിയിൽ ഒരു തൈ നടാം നമുക്കമ്മയ്ക്കുവേണ്ടി.... പോലുള്ള ഗാനങ്ങൾ മുഴങ്ങുന്നണ്ടായിരുന്നു. ഹെഡ്മാസ്റ്റർ ശ്രീ സി മുരളീധരൻ പരിസ്ഥിതി ദിനത്തിന്റെ പ്രധാന്യത്തെക്കുറിച്ച് സൂചിപ്പിച്ചു. തുടർന്ന്ന വിദ്യാലയത്തിലെ ശ്രീമതി ഷീഷ്മ ദിനാചരണത്തിന്റെ പ്രാധാന്യം സ്ലൈഡുകളുടെ സഹായത്തോടെ വിശദീകരിച്ചു. ശ്രീമതി ഐശ്വര്യ ടീച്ചർ പരിസ്ഥിതിദിന പ്രതിജ്ഞ ചൊല്ലിക്കൊടുത്തു.ശ്രീമതി വിജിന ടീച്ചർ നന്ദിപ്രകാശിപ്പിച്ചു.

പരിസ്ഥിതി ദിനാഘോഷത്തിന്റെ ഔപചാരിക ഉദ്ഘാടനം കണ്ണൂർ സിറ്റി അഡീഷണൽ പോലീസ് സൂപ്രണ്ട് ശ്രീ. കെ വി വേണുഗോപാൽ സ്കൂളിലെ ശലഭോദ്യാനത്തിൽ ചാമ്പമരം നട്ട് നിർവ്വഹിച്ചു. ഭൂമി എങ്ങനെയാണ് നമുക്ക് പ്രിയങ്കരമാകുന്നതെന്നും ഭൂമിയെ സംരക്ഷിക്കാനായി നമുക്കെന്തെല്ലാം ചെയ്യാനാവുമെന്നും അദ്ദഹം സംസാരിച്ചത് കുട്ടികൾ ശ്രദ്ധാപൂർവ്വം ഉൾക്കൊണ്ടു. ചടങ്ങിൽ പി ടി എ പ്രസിഡണ്ട് ശ്രീ എം രതീഷ് അധ്യക്ഷനായിരുന്നു. സ്കൂൾ മാനേജ്മെന്റ് കമ്മറ്റി ചെയർമാൻ ശ്രീ എ കെ ശ്രീധരൻ, പി ടി എ വൈസ് പ്രസിഡണ്ട് ശ്രീ പി വിജിത്ത് കുമാർ, എസ് ആർ ജി കൺവീനർ ശ്രീ സജിത്ത് കുമാർ എന്നിവർ ആശംസകൾ നേർന്നു. ചടങ്ങിൽ ഹെഡ്മാസ്റ്റർ ശ്രീ സി മുരളീധരൻ സ്വാഗതവും സ്റ്റാഫ് സിക്രട്ടറി ശ്രീമതി ഐശ്വര്യ നന്ദിയും പറഞ്ഞു. കുട്ടികൾക്കായി ക്വിസ് മത്സരം, പോസ്റ്റർ രചന, എന്റെ മരം സെൽഫി, പരിസ്ഥിതി കവിതാലാപനം തുടങ്ങിയ പരിപാടികൾ നടന്നു.