തൃശൂർ വിദ്യാഭ്യാസ ജില്ലയിലെ ചേർപ്പ് ഉപജില്ലയിൽ സ്ഥിതിചെയ്യുന്ന പ്രധാനപ്പെട്ട വിദ്യാലയമാണ് സി.എൻ.എൻ. ഗേൾസ് ഹൈസ്കൂൾ ചേർപ്പ്. 1916ൽ ബ്രഹ്മശ്രീ. ചിറ്റൂർ നമ്പൂതിരിപ്പാടിനാൽ സ്ഥാപിതമായ വിദ്യാലയം 106 വർഷം പിന്നിടുകയാണ്. അഞ്ച് മുതൽ പത്തുവരെ ക്ലാസുകളിലായി 1360 വിദ്യാർത്ഥികൾ നിലവിൽ ഇവിടെ പഠിക്കുന്നുണ്ട്. തൃശൂർ ജില്ലയിലെ ഏറ്റവും പഴക്കമേറിയ വിദ്യാലയങ്ങളിലൊന്ന് എന്ന നിലയിൽ ചരിത്രപരമായും സാംസ്കാരികപരമായും വളരെയേറെ പ്രാധാന്യമർഹിക്കുന്നതാണ് വിദ്യാലയം സമൂഹത്തിൽ സൃഷ്ടിച്ച മാറ്റങ്ങൾ. അന്താരാഷ്ട്ര പ്രശസ്തരായ ശാസ്ത്രജ്ഞർ, എഴുത്തുകാർ, വിദ്യാഭ്യാസവിചക്ഷണർ, ഭരണരംഗത്തെ വിവിധ ഉയർന്ന ഉദ്യോഗങ്ങൾ അലങ്കരിക്കുന്നവർ, കായിക പ്രതിഭകൾ, കലാപ്രതിഭകൾ തുടങ്ങി നിരവധി ഉയർന്ന വ്യക്തിത്വങ്ങളെ സൃഷ്ടിച്ചെടുക്കാൻ വിദ്യാലയത്തിന് സാധിച്ചിട്ടുണ്ട്. പ്രഗത്ഭരായ അദ്ധ്യാപകരും അതിപ്രഗത്ഭരായ വിദ്യാർത്ഥികളും മനോഹരമായ പ്രകൃതിയോടിണങ്ങിയ വിദ്യാലയക്കെട്ടിടങ്ങളും സർഗ്ഗാത്മകാന്തരീക്ഷം തീർക്കുന്ന സ്കൂൾ ക്യാമ്പസും മറ്റ് അടിസ്ഥാന സൗകര്യങ്ങളും അക്കാദമികവും ഇതരവും അനുബന്ധവുമായ വിദ്യാലയ പ്രവർത്തനങ്ങളുമെല്ലാം ഈയൊരു ദൗത്യം അനുസ്യൂതം തുടർന്നുകൊണ്ടിരിക്കുന്നു.
കേരളത്തിലെ പൊതുവിദ്യാലയങ്ങളിൽ ഒരുനൂറ്റാണ്ടിലധികം പഴക്കമേറിയതും പ്രാധാന്യമേറിയതുമായ വിദ്യാലയമാണ് സി.എൻ.എൻ. ഗേൾസ് ഹൈസ്കൂൾ. 1916ൽ ചിറ്റൂർ നാരായണൻ നമ്പൂതിരി എന്ന സാമൂഹ്യ പരിഷ്കർത്താവാൽ സ്ഥാപിതമായ സ്കൂൾ ചേർപ്പിന്റെയും തൃശൂരിന്റെയും ചരിത്രം രൂപപ്പെടുത്തുന്നതിൽ വളരെയധികം പങ്കുവഹിച്ചിട്ടുണ്ട്. സാമൂഹ്യ പരിഷ്കരണം ലക്ഷ്യമിട്ട് ആരംഭിച്ച വിദ്യാലയം നിരവധി ചരിത്ര സംഭവങ്ങൾക്ക് സാക്ഷ്യം വഹിച്ചിട്ടുണ്ട്. തുടർന്ന് വായിക്കുക...
ഭൗതികസൗകര്യങ്ങൾ
വിശാലമായ കോബൗണ്ടിൽ ഒരു നാല് കെട്ട് രൂപത്തിലുളള കെട്ടിടമാണ് ഞങളുടെ വിദ്യാലയം .നാല് കെട്ട് കൂടാതെ വേറേ രണ്ട് കെട്ടിടങ്ങൾ കൂടിയുണ്ട് . മൊത്തം 26 ക്ലാസ്സ് മുറികൾ ഉണ്ട്. നല്ല ഒരു ലാബും ലൈബ്രറിയും ഉണ്ട്. ഏറ്റവും കൂടുതൽ പഴയ പാഠപുസ്തകങ്ങളുടെ booന്റെ ശേഖരമുള്ള ലൈബ്രറിയാണ് ഞങ്ങളുടേത് . സുസജ്ജമായ ഇന്റർനെറ്റ് സൗകര്യമുളള കമ്പ്യൂട്ടർ ലാബും ഉണ്ട് . കുട്ടികൾക്കായി 32 യൂറിനൽസും 5 ടോയ്ലറ്റും ഉണ്ട് .വിശാലമായ ഒരു പ്ലേഗ്രൗണ്ടും അത്രയും വലുതല്ലാത്ത മുറ്റത്തെ പ്ലേ ഗ്രൗണ്ടും വിദ്യാലയത്തിന് ഉണ്ട്.സ്കൂളിലെ വേയ്സ്റ്റ് ഉപയോഗിച്ച് പ്രവ൪ത്തിക്കുന്ന ഗ്യാസ് പ്ലാ൯റ്റ് ഉണ്ട് . കുടിവെളളത്തിനായി കിണ൪ സൗകര്യമുണ്ട്. കുട്ടികളുടെ യാത്രാ സൗകര്യത്തിനായി 5 ബസ്സുകൾ ഉണ്ട്. ഹെഡ് മിസ് ട്രസിനും ടീച്ചേഴ്സിനും ഓഫീസ് സ്റ്റാഫിനുമായി വിശാലമായ നാല് മുറികൾ തന്നെയുണ്ട്.
നേട്ടങ്ങൾ
അക്കാദമികരംഗത്തും അക്കാദമികേതരരംഗത്തും അനുബന്ധ മേഖലകളിലുമായി നിരവധി നേട്ടങ്ങൾ വിദ്യാലയത്തിനുണ്ട്. എസ്.എസ്.എൽ.സി. പരീക്ഷയിൽ തുടർച്ചയായി നൂറുശതമാനം നേടിവരുന്ന വിദ്യാലയമാണ് സി.എൻ.എൻ. ഗേൾസ് ഹൈസ്കൂൾ. എസ്.എസ്. എൽ.സി.ക്ക് മുഴുവൻ വിഷയങ്ങളിലും എ.പ്ലസ്. നേടുന്ന വിദ്യാർത്ഥികളുടെ എണ്ണത്തിൽ ചേർപ്പ് ഉപജില്ലയിൽ ഒന്നാം സ്ഥാനത്തും തൃശൂർ വിദ്യാഭ്യാസ ജില്ലയിൽ മൂന്നാം സ്ഥാനത്തുമാണ് വിദ്യാലയം. വിദ്യാർത്ഥികളുടെ എണ്ണത്തിൽ ക്രമാനുഗതമായ വർദ്ധന വിദ്യാലയത്തിലുണ്ട് എന്നത് വിദ്യാലയ പുരോഗതിയുടെ ദൃഷ്ടാന്തമായി വിലയിരുത്തപ്പെടുന്നു. 2019-20 അദ്ധ്യയനവർഷത്തിൽ 209 വിദ്യാർത്ഥികളായിരുന്നു എസ്.എസ്.എൽ.സി. പരീക്ഷ എഴുതിയിരുന്നത്. അതിൽ 100% വിജയവും 43 കുട്ടികൾ മുഴുവൻ വിഷയങ്ങളിലും എ.പ്ലസ്. വിജയവും നേടി. 2020-21 വർഷത്തിൽ ഇത് 232 വിദ്യാർത്ഥികൾ പരീക്ഷ എഴുതുന്ന നിലയിലും 100% വിജയത്തോടൊപ്പം 143 കുട്ടികൾക്ക് എ.പ്ലസ്. വിജയം നേടുന്ന നേട്ടം കൈവരിച്ചു. 2021-22 അദ്ധ്യയന വർഷമായ ഈ വർഷം 254 കുട്ടികളാണ് എസ്.എസ്.എൽ.സി. പരീക്ഷ എഴുതുന്നത്.
നിവലിൽ 1360 വിദ്യാർത്ഥികൾ ഇവിടെ പഠിക്കുന്നുണ്ട്. വിദ്യാലയത്തിന്റെ സമീപകാല ചരിത്രത്തിൽ ഏറ്റവും കൂടുതൽ എണ്ണം വിദ്യാർത്ഥികൾ ആണ് ഈ വർഷം ഉള്ളതെന്നത് അഭിമാനകരമായ നേട്ടമാണ്. തുടർ വർഷങ്ങളിലും ഇതിന്റെ വർദ്ധനയാണ് പ്രതീക്ഷിക്കുന്നത്.
നേട്ടങ്ങളെ പ്രധാനമായും താഴെപ്പറയുംവിധം തരംതിരിക്കാം.
പഠനത്തോടൊപ്പം സർഗ്ഗാത്മക പ്രവർത്തനങ്ങൾക്കും ഒരേപോലെ പ്രാധാന്യം നൽകുന്ന വിദ്യാലയമാണ് സി.എൻ.എൻ. ഗേൾസ് ഹൈസ്കൂൾ. ഈ കോവിഡ് കാലഘട്ടത്തിലും കുട്ടികൾ വീടുകളിൽ അടച്ചിരിക്കേണ്ടിവന്ന സാഹചര്യത്തിൽ അവരുടെ ഒറ്റപ്പെടൽ, മാനസിക പിരിമുറുക്കം തുടങ്ങിയ പ്രശ്നങ്ങൾ പരിഹരിക്കുന്നതിനായി നിരവധി പ്രവർത്തനങ്ങൾ നടത്തുകയുണ്ടായി. കുട്ടികൾക്ക് വീടുകളിലിരുന്ന് ചെയ്യാവുന്ന പ്രവർത്തനങ്ങളായിരുന്നു കൂടുതലും. ചിത്രരചനയ്ക്ക് താത്പര്യമുള്ള കുട്ടികൾക്ക് ചിത്രങ്ങൾ വരയ്ക്കാനും അവ സ്കൂൾ ബ്ലോഗിലൂടെ പൊതുസമൂഹത്തിന് മുന്നിൽ പങ്കുവെക്കാനുള്ള സൗകര്യങ്ങളും അതേപോലെ നൃത്തം, നാട്യം, പ്രസംഗം, ഗാനാലാപനം തുടങ്ങിയ എല്ലാ കലാരൂപങ്ങളും പ്രകടിപ്പിക്കുന്നതിനായുള്ള വേദി എന്ന രീതിയിൽ സർഗ്ഗഭൂമി ടി.വി.യുടെ പ്രവർത്തനവും വിദ്യാലയത്തിൽ സജീവമായി നടന്നുവരുന്നു.
സർഗ്ഗാത്മക സാഹിത്യ പ്രവർത്തനങ്ങൾക്ക് വളരെയധികം പ്രാധാന്യം നൽകുന്ന വിദ്യാലയമാണ് സി.എൻ.എൻ. ഗേൾസ് ഹൈസ്കൂൾ. സ്കൂളിൽ ആറ് വർഷമായി നടന്നുവരുന്ന വായനക്കൂട്ടം അത്തരം പ്രവർത്തനങ്ങൾക്ക് ഒരു പൊതു വേദിയായി പ്രവർത്തിച്ചുവരുന്നുണ്ട്. സർഗ്ഗാത്മക വായനയിൽ താത്പര്യമുള്ള കുട്ടികളുടെ കൂട്ടം ആണ് വായനക്കൂട്ടം. സ്കൂൾ പ്രവൃത്തിദിനങ്ങളിൽ എല്ലാ ബുധനാഴ്ചകളിലും ഉച്ചസമയത്തെ ഇടവേളയിൽ സ്കൂൾ നടുമുറ്റത്തെ തുഞ്ചൻ സ്മൃതിവനത്തിലാണ് വായനക്കൂട്ടം ത്തുചേരുന്നത്. കുട്ടികൾ മരത്തണലിൽ ഒന്നിച്ചിരുന്ന് വായിച്ച പുസ്തകങ്ങളെക്കുറിച്ചുള്ള ചർച്ചകൾ നടത്തുകയും വായനക്കുറിപ്പുകൾ അവതരിപ്പിക്കുകയും സ്വന്തം രചനകളുടെ അവതരണം നടത്തുകയുമൊക്കെയാണ് ഇവിടെ പ്രധാനമായും ചെയ്യുന്നത്. കൃത്യമായ സമയസാരിണി അനുസരിച്ച് നടക്കുന്ന പ്രവർത്തനമായതിനാൽ ഈ പ്രവർത്തനത്തിന് കൃത്യതയും വ്യക്തതയുമുണ്ട്. സ്കൂൾ വായനക്കൂട്ടത്തിലൂടെ നിരവധി എഴുത്തുകാർ ഇതിനകം വളർന്നുവന്നിട്ടുണ്ട്. ശ്രീലക്ഷ്മി കെ.എ., ഗായത്രി വി.ആർ., സാനിയ കെ.ജെ. എന്നീ കുട്ടികൾ ഗ്രന്ഥകാരികളായി വളർന്നുവന്ന കുട്ടികളാണ്. ഇവരുടെ പുസ്തകങ്ങൾ പ്രസിദ്ധീകരിക്കാൻ നേതൃത്വം നൽകിയത് സ്കൂളിലെ വായനക്കൂട്ടമാണ്. ഈ ഓൺലൈൻ കാലഘട്ടത്തിൽ കുട്ടികൾ വായിച്ച പുസ്തകങ്ങളെക്കുറിച്ചുള്ള വായനക്കുറിപ്പുകളും സ്വന്തം രചനകളും ലേഖനങ്ങളും വാട്സ് ആപ്പ് കൂട്ടായ്മ വഴി പങ്കുവെക്കുകയും അവ നാട്ടുപച്ച മാഗസിൻ എന്ന ഓൺലൈൻ ഡിജിറ്റൽ മാഗസിനിലൂടെ പ്രസിദ്ധീകരിച്ചുവരികയും ചെയ്യുന്നുണ്ട്.
ചേ൪പ്പ് കേന്ദ്രമായി പ്രവ൪ത്തിക്കുന്ന സഞ്ജീവനി സമിതിയാണ് സി.എ൯. എ൯. വിദ്യാലയങ്ങളുടെ മാനേജ്മെന്റ്. ശ്രീ. കെ.ജി. അച്ച്യുതൻ മാസ്റ്റർ ആണ് ഇപ്പോഴത്തെ മനേജ൪.
വിദ്യാഭ്യാസ മേഖലയിലും സാംസ്കാരിക മേഖലയിലും ആതുരസേവനമേഖലയിലുമൊക്കെയായി നിരവധി സേവന പ്രവർത്തനങ്ങൾ നടത്തുന്ന സഞ്ജീവനി സമിതിയാണ് സി.എൻ.എൻ. ഗേൾസ് ഹൈസ്കൂളിന്റെ മാനേജ്മെന്റ് കമ്മറ്റിയായി പ്രവർത്തിക്കുന്നത്. അതുകൊണ്ടുതന്നെ വിദ്യാഭ്യാസ മേഖലയിലെ സേവനപ്രവർത്തനമാണ് സ്കൂൾ നടത്തിപ്പിൽ മാനേജ്മെന്റിന്റെ പ്രധാന ലക്ഷ്യം. പൊതുസമൂഹത്തിൽ മെച്ചപ്പെട്ട വിദ്യാഭ്യാസ സൗകര്യങ്ങൾ സൃഷ്ടിക്കുന്നതിനും ഒരുതരത്തിലുള്ള വിവേചനചിന്തയുമില്ലാതെ എല്ലാവിഭാഗം വിദ്യാർത്ഥികൾക്കും വിദ്യാഭ്യാസം നൽകുക എന്നതാണ് പ്രവർത്തന രീതി. സ്കൂൾ മാനേജ്മെന്റിന് കീഴിൽ സി.എൻ.എൻ. ബോയ്സ് ഹൈസ്കൂൾ, സിഎൻ.എൻ. ഗേൾസ് എൽ.പി. സ്കൂൾ, സി.എൻ.എൻ. ബോയ്സ് എൽ.പി. സ്കൂൾ, സി.എൻ.എൻ. ഹയർ സെക്കന്ററി സ്കൂൾ, ശ്രീശങ്കര ശിശുവിദ്യാമന്ദിരം, എൽ.പി.സ്കൂൾ ഊരകം എന്നീ സ്ഥാപനങ്ങൾ കൂടിയുണ്ട്. പാലാഴി ആഗമാനന്ദ ബാലസദനം, ഊരകം സഞ്ജീവനി ബാലികാസദനം തുടങ്ങിയ അനാഥ ബാലബാലികമാരെ സംരക്ഷിക്കുന്ന ബാലബാലികാസദനങ്ങളും സഞ്ജീവനി സമിതിയുടെ കീഴിലുണ്ട്. കൂടാതെ നിരവധി തൊഴിൽ പരിശീലനകേന്ദ്രങ്ങളും പ്രവർത്തിച്ചുവരുന്നു.
സഞ്ജീവനി സമിതിയുടെ അദ്ധ്യക്ഷൻ ആണ് സ്കൂൾ മാനേജർ ആയി ചുമതലയേൽക്കുന്നത്. മൂന്ന് വർഷക്കാലയളവാണ് സഞ്ജീവനി സമിതിയുടെ പ്രവർത്തന കാലയളവെന്നതിനാൽ സ്കൂൾ മാനേജരുടെ കാലയളവും മൂന്നുവർഷം തന്നെയാണ്. ഓരോ മൂന്നുവർഷത്തിനു ശേഷവും നടന്നുവരുന്ന തെരഞ്ഞെടുപ്പിൽ പുതിയ അദ്ധ്യക്ഷൻ തെരഞ്ഞെടുക്കപ്പെടുന്നതനുസരിച്ച് പുതിയ മാനേജർ ചുമതലയേറ്റെടുക്കുകയോ, നിലവിലുള്ള മാനേജർ വീണ്ടും തെരഞ്ഞെടുക്കപ്പെട്ട് തൽസ്ഥാനത്ത് തുടരുകയോ ചെയ്യുന്നു.
